მამამ, შვილს მობილური თამაშები „მიუსაჯა“

ჩინელმა მამამ, საკუთარ 11 წლის ბიჭს, 17 საათის განმავლობაში, მობილურში თამაში მიუსაჯა. როგორც კაცი ამბობს, ამგვარად მას „სმარტფონზე“ დამოკიდებული შვილის დასჯა სურდა. ჩინური მედიის ცნობით, მამამ აღმოაჩინა, რომ ბიჭი ღამღამობით, ძილის ნაცვლად, ჩუმად თამაშობდა ტელეფონში. გაოგნებულმა კაცმა შვილს განუცხადა, რომ ნებას აძლევს, მეორე დღემდე ითამაშოს, მხოლოდ ერთი პირობით - არ უნდა დაიძინოს. გარდა ამისა, მამამ შვილის მასწავლებელს სკოლიდან ერთი დღით გათავისუფლება სთხოვა. შედეგად, გადაბმული 17-საათიანი თამაშის შემდეგ, ბიჭს დაძინების უფლება მიეცა, რადგან მან გააცნობიერა საკუთარი საქციელი და ბოდიში მოიხადა. ეს ამბავი მამამ სოციალურ ქსელში გაახმაურა და კრიტიკის ქარცეცხლშიც მოექცა _ ბავშვთან ასეთი მიდგომისთვის. კაცი აცხადებს, რომ მისი შვილი კარგ ფიზიკურ ფორმაშია და მის ჯანმრთელობას არაფერი ემუქრება, თუმცა სხვა მშობლებს მაინც არ ურჩევს მისი მეთოდის გამეორებას.