რჩეული სტატიები

Grid List

პოპულარული ესპანური კურორტის, მალაგას ხელისუფლებამ გასაბერი სექს-სათამაშოები აკრძალა, რომელიც ხალხს ადგილობრივ წვეულებებზე მიაქვს ხოლმე. ბოლო წლებში, ეს სამხრეთ-ესპანური ქალაქი პოპულარული ადგილი გახდა ტურისტებისთვის, რომელთაც გასართობი საღამოების, წველებების მოწყობა სურთ. მიზეზი მალაგას იაფი რეისები და მჩქეფარე ღამის ცხოვრებაა. თუმცა, ადგილობრივებმა მტკიცედ გადაწყვიტეს, სტუმრების უწესო ქცევებს შეებრძოლონ. ახალი კანონის მიხედვით, აკრძალულია ქუჩაში ყოფნა მხოლოდ ქვედა საცვალით, ასევე, ტანსაცმლით ან აქსესუარით, რომელიც გენიტალიებს გამოხატავს, ან სექს-თოჯინებით. კანონდამრღვევს 750 ევროს ოდენობის ჯარიმა ემუქრება. ეს თანხა 1500 ევრომდე შეიძლება გაიზარდოს, თუკი კანონდამრღვევი არასრულწლოვანთან, ან შშმ პირთან ერთად იქნება, ან დარღვევა სკოლასთან და საბავშვო მოედანთან დაფიქსირდება.

შვედურმა ალკოჰოლურმა ბრენდმა Absolut Vodka, Pasta Bag-ის დიზაინერ ნიკოლას ბენტელესთან ერთად, შექმნა ჩანთა Absolut Espreso Martini, რომელსაც კოქტეილის ბოკალის ფორმა აქვს. აქსესუარი ზუსტად ისე გამოიყურება, როგორც მარტინის ჭიქა - პირამდე გავსებული ესპრესო ყავის მარცვლებით. ჩანთა ტყავის, ქრომირებული ფოლადისა და მტკიცე ტრიტანის პლასტმასისგანაა დამზადებული. აქსესუარი შეზღუდული რაოდენობით გამოუშვეს და ის უკვე გაყიდვაშია, მისი ფასი 200 დოლარამდეა.

ნიუ-იორის ხელისუფლებამ ოფიციალური განცხადება გამოაქვეყნა ვაკანსიის თაობაზე - მსურველებს ვირთხებთან ბრძოლის საქალაქო სამსახურის უფროსის თანამდებობის დაკავებას სთავაზობენ. გარდა სხვა თვისებებისა, ვაკანტური ადგილის დაკავების კანდიდატებს უნდა ჰქონდეთ „მკვლელის ინსტინქტი“ და „მოხერხებულობის აურა“. გავრცელებულ განცხადებაში წერია, რომ იდეალური კანდიდატი მეტად მოტივირებული უნდა იყოს და რაღაც ხარისხით - სისხლისმსმელიც კი. ვრთხების პრობლემა აშშ-ს უდიდეს მეგაპოლისში არახალია. ამჟამად, მღრნელების რაოდენობას 2 მილიონამდე ითვლიან.

„ნიუ-იორკის 8.8 მილიონი მცხოვრები და ქალაქის ხელისუფლება მზადაა, მხარში დაგიდგეთ, რომ შემცირდეს ვირთხების პოპულაცია“, - ნათქვამია მერიის მიერ გავრცელებულ დოკუმენტში. კანდიდატი უნდა ცხოვრობდეს ნიუ-იორკში და ფლობდეს ბაკალავრის ხარისხს. სავარაუდო ხელფასი 120-170 ათასი დოლარია წელიწადში.

ამერიკელმა კინოაკადემიკოსებმა „ოსკარის“ პრემიისთვის ეკოლოგიური დრეს-კოდი შემოიღეს. მათ კოლაბორაციის შესახებ განაცხადეს „მდგრად“ ორგანიზაციასთან, რომელიც დიზაინისა და გართობის სამყაროში ეკო-იდეებს - Red Carpet Green Dress Global აპიარებს. შედეგად, მივიღეთ ის, რომ ამიერიდან, „ოსკარის“ სტუმრები მთელი სერიოზულობით უნდა მოეკიდონ სამოსის შერჩევას. ორგანიზაცია სახელგანთქმულ ადამიანებს სთავაზობს, ისარგებლონ სპეციალური სახელმძღვანელოთი და შეარჩიონ გამოსასვლელი სამოსი შემდეგი კატეგორიებიდან: ორგანული ტანსაცმელი, ეკო-ნახელავი დამოუკიდებელი ბრენდებისგან, ეკო-ტყავი, ასევე, ვინტაჟური ნივთები. როგორც დასავლური მედია წერს, გზამკვლევი ეკოლოგიური დრეს-კოდის შესახებ, წინასწარ გავრცელდება ცერემონიაზე მიწვეულ სტუმრებს შორის. 

გერმანელი მიხაელ შუმახერის ბოლიდი „ფერარი“, რომლითაც მან მეექვსედ მოიპოვა „ფორმულა-1“-ის ჩემპიონის ტიტული, შვეიცარიაში აუქციონზე გაიყიდა. ჟენევაში გამართულ „სოთბის“ ვაჭრობაზე, ავტომობილი თანამედროვე „ფორმულა-1“-თვის რეკორდულ ფასად - 13 მილიონ ფრანკად გაიყიდა. თავდაპირველად, ლოტის ღირებულება 7.5 მილიონად შეფასდა, ექსპერტები ბოლიდში მაქსიმუმ 9.6 მილიონის მიღებას ვარუდობდნენ, თუმცა ვაჭრობის დროს, შუმახერის ავტოს ფასი, პრაქტიკულად, გაორმაგდა.

აშშ-ს მეიოს კლინიკის მკვლევარები ვარაუდობენ, რომ გულსისხლძარღვთა დაავადების მქონე პირებში, გულის შეტევის რისკის ამოცნობა მათი ლაპარაკის მიხედვით შეიძლება. საუბარია კომპიუტერულ ალგორითმზე, რომელიც პაციენტების ხმების ჩანაწერის მიხედვით გამოთვლის, ვინ არის უფრო სერიოზული რისკქვეშ. ალორითმმა გააანალიზა ადამიანის ხმის 80-ზე მეტი მაჩვენებელი, მათ შორის, სიმაღლე, ინტონაცია, ცვლილებები სიხშირესა და ტონში - ისიც კი, რაც ადამიანის ყურისთვის შეუმჩნეველია. რა გავლენას ახდენს გულის მდგომარეობა ხმაზე, სწავლულებს ჯერ არ დაუდგენიათ, თუმცა მათი ვარაუდით, ეს ნერვულ სისტემას უკავშირდება. კვლევისას მედიკოსებმა, 108 პაციენტს, რომელთა ასაკი 60 წლის ფარგლებში იყო და სავარაუდოდ, გულის იშემიური დაავადება ჰქონდათ, სმარტფონზე სამი პატარა ხმოვანი ჩანაწერის გაკეთება სთხოვეს. თითოეული ჩანაწერი ალგორითმმა შეამოწმა და მაღალი რისკქვეშ მყოფები გამოავლინა. ამ პაციენტებზე კიდევ ორი წლის დაკვირვების შედეგად გაირკვა, რომ ალგორითმით მონიშნული პაციენტების 60%, ამ ორი წლის განმავლობაში, გულის შეტევით მოხვდა კლინიკაში.