ყინულის დიეტა შეიმუშავეს

შეერთებულ შტატებში, სულ უფრო მეტი პოპულარობით სარგებლობს ყინულის დიეტა, რომლის ავტორია გასტროენტეროლოგი, ბრაიან ვაინერი. დოქტორმა არა მხოლოდ გაანდო გახდომის მსურველებს ყინულის უპირატესობა, მათ ამ თემაზე წიგნი - The Ice Diet დაუწერა და ინტერნეტში უფასოდ განათავსა. წიგნში აღწერილია ახალი დიეტის ყველა ძირითადი უპირატესობა და განსაკუთრებული თვისებები. ამერიკელი სწავლულის განცხადებით, ყინული შესანიშნავად წვავს კალორიებს (160 კკალ. ისევე, როგორც 1.6 კილომეტრის გარბენისას). თუმცა დოქტორის თქმით, ყინულით ზედმეტად გატაცებაც არ ღირს, საკმარისია, დღე-ღამეში მხოლოდ ერთ კილოგრამამდე მიირთვათ.

ვაინერის თქმით, როცა ადამიანი ყინულის მნიშვნელოვან რაოდენობას მიირთმევს, მისი ორგანიზმი წვავს ენერგიას ამ ყინულის გასადნობად. ყინულის ჭამა, გარკვეულწილად, დანაყრებასაც იწვევს, რადგან ის გადნობამდე ფიზიკურად ავსებს სივრცეს პირის ღრუსა და შემდგომ კუჭში. ასე რომ, ყინულით ორმაგი ეფექტის მიღწევა შეიძლება - თან დანაყრდებით და ამავდროულად, კალორიებსაც დაწვავთ. დოქტორის განცხადებით, ყინულის ზომიერად მიღება ადამიანის ჯანმრთელობას არავითარ პრობლემას არ შეუქმნის. რაც შეეხება კბილებს, ყინულმა, მისი დაკვნეტისას, შესაძლოა, კბილის ემალი და ღრძილებიც დააზიანოს. ამ შემთხვევაში, დოქტორი მსურველებს ურჩევს, ყინული ან პირში გაადნონ, ან დაფხვნან და ისე მიირთვან.