მთავრობის პასუხისმგებლობაა სააკაშვილის ფიზიკური და მენტალური ჯანმრთელობის დაცვა-დეგნანი

აშშ-ის ელჩმა კელი დეგნანმა ქუთაისის სახელმწიფო უნივერსიტეტში, შესაბამისი კითხვის პასუხად, მედიასთან განაცხადა, რომ აკვირდებიან საქართველოს ყოფილი პრეზიდენტის, მიხეილ სააკაშვილის ჯანმრთელობის მდგომარეობას და საქებარია სახალხო დამცველის ოფისის მიერ გაწეული სამუშაო.

„აშშ დიდი ყურადღებით აკვირდება ბატონი სააკაშვილის საქმეს. საქებარია ომბუდსმენის ოფისის მიერ შესრულებულ სამუშაოები - ეს ნამდვილად სამაგალითოდ შესრულებული სამუშაო იყო, როდესაც მონიტორინგს უწევდნენ მის მდგომარეობას და უზრუნველყოფდნენ, რომ მისი უფლებები დაცული ყოფილიყო. ეწვივნენ მას [სააკაშვილს] ორჯერ ბოლო კვირაში. საბოლოო ჯამში, მთავრობის პასუხისმგებლობაა, უზრუნველყოს ბატონი სააკაშვილის ფიზიკური და მენტალური ჯანმრთელობის დაცვა, მისი სამედიცინო საჭიროებების დაკმაყოფილება და მისი უფლებების დაცვა, მათ შორის სამართლიანი სასამართლოს უფლების. ჩვენ მოველით რომ ეს კონსტიტუციური ვალდებულება და პასუხისმგებლობა დაცულია“, - განაცხადა კელი დეგნანმა.

9 დეკემბერს, 13:00 საათზე, საქალაქო სასამართლოში დანიშნულია სასამართლო პროცესი - მოსამართლე გიორგი არევაძემ სააკაშვილის ადვოკატების შუამდგომლობის საფუძველზე უნდა იმსჯელოს ყოფილი პრეზიდენტისთვის სასჯელის გადავადებაზე ან მისგან სრულად გათავისუფლებაზე. შუამდგომლობის საფუძველი ადვოკატებისთვის გახდა ჩატარებული ექსპერტიზების დასკვნები, რომლებშიც სააკაშვილის ჯანმრთელობის მდგომარეობა მძიმედ არის შეფასებული. არსებობს მოსაზრებაც, რომ ყოფილი პრეზიდენტი შეიძლება მოწამლული იყოს. სასამართლოს მოსამართლის სტატუსით მიმართავს სახალხო დამცველიც - მისი კონსილიუმი მიიჩნევს, რომ სააკაშვილის დიაგნოზი მეოთხე ხარისხის კახექსიაა და თუკი ყოფილი პრეზიდენტი წონის კლებას ამ ტემპით გააგრძელებს, რამდენიმე თვეში მისი სიცოცხლე საფრთხის წინაშე აღმოჩნდება.

მსჯავრდადებული მიხეილ სააკაშვილი ექიმების მეთვალყურეობის ქვეშ 2022 წლის 12 მაისიდან იმყოფება კლინიკა "ვივამედში." ხელისუფლება ამბობს, რომ სახელმწიფო ყველაფერს აკეთებს მისი ჯანმრთელობისთვის, მაგრამ პაციენტი მკურნალობას რთულად ემორჩილება.