ჟურნალი ოთხ წელიწადში ერთხელ გამოდის

ცოტა ხნის წინ, საფრანგეთში, უნიკალური სატირული გაზეთის - La Bougi du Sapeur მორიგი ნომერი გამოვიდა. გამოცემა ოთხ წელიწადში ერთხელ, ნაკიანი წლის 29 თებერვალს ახარებს მკითხველს. გაზეთი პირველად 1980 წელს დაიბეჭდა, წელს კი მისი მე-12 ნომერი გამოვიდა. აღსანიშნავია, რომ ეს ერთადერთი გაზეთია მსოფლიოში, რომელიც ასეთი ინტერვალით გამოიცემა და ის მეგობრების ჯგუფმა დააფუძნა. გამოცემის ტირაჟი 200 ათასი ეგზემპლარია, მისი ფასი კი 4.90 ევროა.

„გაზეთის პირველი ნომერი ორ დღეში სრულად გაიყიდა. შემდეგზე მოთხოვნა ძალიან დიდი იყო, მაგრამ გადავწყვიტეთ, ახალი ნომერი მხოლოდ ოთხი წლის შემდეგ დაგვებეჭდა“, - იხსენებს გამოცემის რედაქტორი. მას დღესაც რამდენიმე მეგობარი აკეთებს - ისინი ბარში იკრიბებიან და იდეებს იქ ამუშავებენ. გამოცემას არ აქვს ონლაინ-ვერსია, ის მხოლოდ ჯიხურებში იყიდება.