რჩეული სტატიები

Grid List

ბოჭორიშვილის კლინიკის დირექტორი სოციალურ ქსელში ახლა მოცირკულირე ვირუსების შესახებ მიმართვას აქვეყნებს : 

 

„ახლა მოცირკულირე ვირუსების შესახებ
მეხსიერებამ ამოაგდო კოვიდ- 19-ის დასაწყისში, 2020წლის მარტ- მაისში ჩემი და კლინიკის სხვა ექიმების მიერ მიცემული განმარტებები ახალ, მაშინ შეუცნობ ვირუსთან დაკავშირებით. ჩვენი გამოცდილი ინფექციონისტების მოსაზრებათა საფუძველზე, მაშინ ხაზს ვუსვამდით ორ გარემოებას:1.გარკვეული დროის შემდეგ, როცა კოვიდ-19 "მოივლიდა" კაცობრიობას და მასობრივი იმუნიტეტის ფაზა დადგებოდა, კოვიდ 19 გადაიქცეოდა "ჩვეულებრივ", ბუნებაში მუდმივად მოცირკულირე ვირუსად, ან გაქრებოდა დიდი ხნით. 2.გრიპის ვირუსები, განსაკუთრებით ე.წ. შიფტიანი გრიპის ვირუსები თავისი ვირულენტულობით, მომაკვდინებლობით, არც კოვიდ- პანდემიის დროს და არც მერე არაფრით არ არიან კოვიდზე ნაკლები- პირიქით, ზოგი ტალღის დროს ბევრად საშიშიცაა ადამიანისთვის (თუნდაც, ე.წ. "ესპანური გრიპი" გავიხსენოთ).
პანდემიიდან ორი წლის თავზე პირველი პუნქტი შესრულდა- კოვიდი ჩვეულებრივ ვირუსულ დაავადებად გადაიქცა და ახლა დადგა გრიპების პერიოდი... სწორედ ასე გავრცელებული გრიპებით შეწუხებული ადამიანების ხშირმა კითხვებმა განაპირობა ჩემი სტატუსი. ბევრგან წავიკითხე: "ამ გრიპმა რომ დამაგდო, იმის მეათედი არ უქნია კოვიდს!"... ახლა ჩვენს ქვეყანაში ცირკულირებს ვირუსების 7-8 ტიპი. მათ შორის გრიპის ვირუსები A/H1და A/H3 გასათვალისწინებელია, რომ ჯერ არ წამოსულა სეზონური B გრიპი, რომლის გამოჩენა წელს მაღალი ალბათობითაა მოსალოდნელია (თუმცა, არის გარკვეული შანსი, რომ წელსაც არც გამოჩნდეს).
რაც შეეხება გრიპის პროფილაქტიკას- ისეთივეა, როგორც ყველა ვირუსის, მათ შორის კოვიდ 19-ის შემთხვევაში. ინდივიდუალურ დაცვით საშუალებებთან ერთად, რა თქმა უნდა, აცრაც. ჯერ კიდევ არაა გვიან და ოთხკომპონენტიანში შედის B- გრიპის წინააღმდეგ დაცვაც. მკურნალობა ისეთივე- როგორც სულ იყო და ყველგან შეგიძლიათ ნახოთ. ერთადერთს გეტყვით მხოლოდ: პირველივე დღეებში, თუ არ გაგრძელდა გრიპი, ნუ დაიწყებთ ანტიბიოტიკებით!! აზრი არა აქვს. ანტიბიოტიკები დაიწყეთ მხოლოდ ექიმის დანიშნულებით- ისიც, როგორც გამოცდილებამ გვაჩვენა, აჯობებს დაეკითხოთ მხოლოდ ინფექციონისტებს...“

ლეგენდარული სპორტსმენები, მსოფლიოს აბსოლუტური, ყოფილი ჩემპიონები კრივში - მაიკ ტაისონი და ევანდერ ჰოლიფილდი ტკბილეულობას გამოუშვებენ. მოკბეჩილი ყურის ფორმის მარმელადის კანფეტებში მარიხუანაც იქნება. პროდუქციას Holy Ears – „მინდა ყურები„ ერქმევა და ის არიზონას, ილინოისის, ნევადასა და ნიუ-ჯერსის შტატებში გაიყიდება. ტაისონისა და ჰოლიფილდის სკანდალური ბრძოლა 1977 წელს შედგა და ის დროზე ადრე, მესამე რაუნდში დასრულდა, რადგან ტაისონმა მოწინააღმდეგეს ყური მოაჭამა. ამის გამო, მაიკს დისკვალიფიკაცია მისცეს და სამი მილიონი დოლარითაც დააჯარიმეს. ჰოლიფილდს მაშინ რვა ნაკერის დადება დასჭირდა ყურზე.

დიდ ბრიტანეთსა და ევროპის ნაწილს, დეკემბრიდან თებერვლამდე, ანომალურად თბილი ამინდი ელის, - აცხადებენ ევროკავშირის კლიმატის ცვლილებასთან ბრძოლის სამსახურის (Copernicus) თანამშრომლები. მათი თქმით, ამ ზამთარს ვეროპაში ჰაერის ტემპერატურა ისტორიულ მაჩვენებელზე მაღალი იქნება და ნალექების რაოდენობა შემცირდება. პროგნოზის მიხედვით, ბალტიის ზღვის, ხმელთაშუა და ჩრდილოეთის ზღვების სანაპირო რაიონები ზამთრისთვის საშუალოზე მაღალ ტემპერატურას უნდა ელოდონ. საფრანგეთსა და გერმანიაში, ჩვეულებრივზე გაცილებით ნაკლები ნალექი მოვა. ეს, ერთი მხრივ, უკეთესი იქნება, რადგან ბუნებრივ გაზზე მოთხოვნა შემცირდება.

ასეთ დასკვნას ამერიკელი ხანდაზმული ქალბატონი, მერი ფლიპსი აკეთებს, რომელსაც ცოტა ხნის წინ, 101 წელი შეუსრულდა. მისი აზრით, ხანგრძლივი და ბედნიერი ცხოვრება... ტეკილას დამსახურებაა. 15 წლის ასაკში, მერიმ ოჯახის ყველა წევრი დაკარგა. 18 წლისა, საცხოვრებლად ჩიკაგოდან მექსიკაში გადავიდა და ტეკილასაც სწორედ იქ დაუმეგობრდა. 1921 წელს დაბადებული ფლიპსი ისეთ მოვლენებს მოესწრო, როგორებიცაა დიდი ამერიკული დეპრესია, რამდენიმე ომი, ადამიანის მთვარეზე გაფრენა და ტექნოლოგიური რევოლუცია. მერიმ აღზარდა ექვსი შვილი, მექსიკიდან ისევ სამშობლოში დაბრუნდა და მხატვარი გახდა. 101 წლის იუბილე ქალმა ოჯახის წევრებთან ერთად აღნიშნა და მათთან ერთად ისე იმხიარულა, მაგიდაზე ცეკვის სურვილიც კი გაუჩნდა. იქნებ, იცეკვა კიდეც, ჭიქა ტეკილას შემდეგ...

20 ნოემბრიდან 18 დეკემბრის ჩათვლით, კატარში მსოფლიოს უძლიერესი 32 საფეხბურთო ქვეყანა პირველობისთვის იბრძოლებს. ეს სანახაობა ათიათასობით ადამიანს სიცოცხლის და ჯანმრთელობის ფასად დაუჯდა.

FBI ეჭვობს, რომ მილიონების სანაცვლოდ, საფეხბურთო ბომონდმა თვალი დახუჭა კატარში ადამიანის უფლებების სისტემურ დარღვევებზე.

ყველაფერი კორუფციით დაიწყო?

2010 წლის 2 დეკემბერს, FIFA-ს იმჟამინდელი პრეზიდენტი, ზეპ ბლატერი სიხარულს არ მალავდა. “ახალ მიწებზე მივდივართ”, - უთხრა მან ჟურნალისტებს მას შემდეგ, რაც ფიფამ გამოაცხადა, რომ 2018 წელს მუნდიალს რუსეთი უმასპინძლებდა, 2022 წელს კი - კატარი.

ორივე ქვეყანას მსოფლიო ჩემპიონატი პირველად ერგო. ბევრმა ეს გადაწყვეტილება სადავოდ მიიჩნია. მათ შორის იმიტომ, რომ რუსეთშიც და კატარშიც სისტემურად ირღვევა ადამიანის უფლებები. ბლატერი კრიტიკოსებს ჯიუტად პასუხობდა, რომ “ახალბედები” იმსახურებენ ნდობას, ფეხბურთის სიყვარულის ხარჯზე კი ისინი უფრო მეტად დაუახლოვდებიან დანარჩენ სამყაროს.

ხუთ წელიწადში, საფეხბურთო ელიტებში მორიგი კორუფციული სკანდალი მოხდა. 2015 წლის დეკემბერში, ზეპ ბლატერი და ევროპის საფეხბურთო ასოციაციის, უეფას პრეზიდენტი, მიშელ პლატინი ფეხბურთს 8-8 წლით ჩამოაცილეს, რამდენიმე მაღალჩინოსანი კი დააპატიმრეს. აშშ-ის გამოძიებათა ფედერალური ბიუროს მონაცემებით, ბოლო 20 წელიწადში ბრალდებულებმა 150 მილიონი დოლარის ქრთამი აიღეს. მათ შორის იმაში, რომ მუნდიალი რუსეთსა და კატარში ჩატარებულიყო.

დღეს ზეპ ბლატერი ამბობს, ადამიანის უფლებების დარღვევებზე თვალის დახუჭვა შეცდომა იყოო. “კატარი ძალიან პატარა ქვეყანაა. ფეხბურთი და მსოფლიო ჩემპიონატი მისთვის მეტისმეტად დიდია”, - თქვა მან 9 ნოემბერს.

სტადიონებს აშენებდნენ გაუსაძლის პირობებში

ნავთობითა და გაზით მდიდარ კატარში მსოფლიო ჩემპიონატისთვის 7 ახალი სტადიონი ააშენეს. მთლიანობაში, ახალი ინფრასტრუქტურა 200 მილიარდ დოლარზე მეტი დაჯდა. ეს ისტორიაში უძვირესი მუნდიალი იქნება. შედარებისთვის, წინა მასპინძელმა, რუსეთმა 12 მილიარდ დოლარამდე დახარჯა.

კატარი მსოფლიოს ერთ-ერთი უმდიდრესი ქვეყანაა. 2021 წელს მშპ ერთ სულ მოსახლეზე 61 276 დოლარი იყო. მოსახლეობა კი სულ რაღაც 2.9 მილიონია. მაგრამ აქედან თითქმის 90% ემიგრანტები არიან.

ბანგლადეშის ინდოეთის, კენიის, ნეპალისა და სხვა ქვეყნების მოქალაქეები კატარში უკიდურესი სიღარიბის გამო ჩამოდიან და მიზერულ ხელფასს თანხმდებიან. მძიმე სამუშაო პირობებსა და შრომითი კანომბდელობების რეფორმის აუცილებლობაზე წლებია საუბრობენ Amnesty International-ი (AI), Human Rights Watch-ი და სხვა უფლებადამცველი ორგანიზაციები.

მაგალითად, 2016 წელს AI-მა დაწერა,რომ სტადიონების, სასტუმროებისა და გზების მშენებლობებზე გაუსაძლის პირობებსა და 40-გრადუსიან სიცხეში მუშაობდნენ. დღეში 14-18 საათს, დასვენების გარეშე. მუშების საშუალო ხელფასი 220 დოლარი იყო.

ბევრი ცხოვრობდა ბარაკებში, ქალაქგარეთ. 1 პატარა ოთახში ღამეს ხშირად 6 ადამიანი ათევდა. ბევრს ართმევდნენ პასპორტს, უგვიანებდნენ ხელფასს. არ აძლევდნენ თავისუფლად გადაადგილების შესაძლებლობას.

უკანასკნელ 12 წელიწადში, AI-ს გამოთვლებით, კატარში 100 ათასზე მეტი მუშის უფლებები დაირღვა.

ოფიციალური მონაცემებით, 2021 წელს მშენებლობებზე დაიღუპა 38 მუშა. ბრიტანულმა გამოცემა "გარდიანმა" გამოიანგარიშა, რომ ბოლო 11 წელიწადში, ანუ მას შემდეგ, რაც კატარმა მუნდიალის მასპინძლობის უფლება მიიღო, დაიღუპა 6500-ზე მეტი მუშა. შემთხვევების უმეტესობა გამოუძიებელია.

მოწოდებების საპასუხოდ, კატარმა ჩაატარა შრომითი კანონმდებლობის რეფორმა და შემოიღო რეგიონში ყველაზე მაღალი მინიმალური ხელფასი (280 დოლარი).

ოქტომბერში გამოქვეყნებულ ანგარიშში შრომის საერთაშორისო ორგანიზაციამ დაწერა, რომ კატარმა “მნიშვნელოვანი” რეფორმები გაატარა და “ასიათასობით მუშის სამუშაო და საცხოვრებელი პირობები გააუმჯობესა”. თუმცა, ამასთანავე, “მეტია გასაკეთებელი იმისთვის, რათა რეფორმები ძალაში შევიდეს”.

კატარში სისტემურად ძალადობენ ლგბტ ადამიანებზე

წლებია, კატარში სისტემურად ირღვევა ლგბტ ადამიანების უფლებები. Human Rights Watch-ის ინფორმაციით, მხოლოდ 2019-2022 წლებში პოლიციელებმა სცემეს 6 ადამიანს და სექსუალურად იძალადეს 5-ზე.

ორგანიზაციის ანგარიშის თანახმად, 4 ტრანსგენდერი ქალი, 1 ბისექსუალი ქალი და 1 გეი მამაკაცი პოლიციამ უკანონოდ გამოკეტა მიწისქვეშა საპატიმროში. ერთ-ერთმა მათგანმა იქ ორი თვე გაატარა. ერთმა ტრანსგენდერმა ქალმა უფლებადამცველებს უთხრა, რომ მას აიძულებდნენ "ისევ კაცი გამხდარიყო”.

კატარში ჰომოსექსუალური კავშირი კრიმინალიზებულია და ხუთწლიანი პატიმრობით ისჯება. ამისდა მიუხედავად, კატარის ხელისუფლებამ არაერთხელ თქვა, რომ მათი ქვეყანა უმასპინძლებს ყველას, “თუკი ისინი დაიცავენ ადგილობრივ ადათ-წესებს”.

8 ნოემბერს, მსოფლიო ჩემპიონატის ელჩმა და ყოფილმა ფეხბურთელმა, ჰალიდ სალმანმა, გერმანული გამოცემისთვის მიცემულ ინტერვიუში ჰომოსექსუალობას უწოდა “ტვინის დაზიანება”.

ზოგი მსოფლიო ჩემპიონატს აღარ უყურებს

ამ ყველაფრის გამო, ევროპის არაერთ ქვეყანაში, ადამიანები აღარ აპირებენ მსოფლიო ჩემპიონატის ყურებას.

მაგალითად, საფრანგეთში პარიზის, მარსელის, ლიონის, ბორდოსა და ტულუზის ადგილობრივმა ხელისუფლებამ გადაწყვიტა, წელს არ დაამონტაჟოს დიდი ეკრანები მსოფლიო ჩემპიონატის საყურებლად.

კატარს აკრიტიკებენ გერმანიაშიც. ქვეყნის შაინაგან საქმეთა მინისტრმა, ნენსი ფეზერმა რამდენჯერმე მოსთხოვა დოჰას იმის გარანტიები, რომ კატარში ჩასული გერმანელი ლგბტ ადამიანების უსაფრთხოებას დაიცავენ.

თუმცა მისმა კატარელმა კოლეგამ ბრალდებებს და კრიტიკას ფარისევლობა უწოდა. “ერთი მხრივ, გერმანიის ხელისუფლება მოსახლეობას ცრუ ინფორმაციას აწვდის. მეორე მხრივ, მას არ აქვს ჩვენთან პრობლემა, როცა საქმე ეხება ენერგოთანამშრომლობას ან ინვესტიციებს”, - თქვა შეიხმა მოჰამედ ბინ აბდულრაჰმან ალ-თანიმ.

***

და კიდევ - ისტორიაში პირველად, მსოფლიო ჩემპიონატი ტარდება ზამთარში. ეს იმიტომ, რომ ზაფხულობით კატარში ძალიან ცხელა. ევროპული ქვეყნების უმეტესობაში საფეხბურთო სეზონის შეწყვეტა მოუხდათ.

არაერთმა მწვრთნელმა და ფეხბურთელმა ამის გამოც გააკრიტიკა FIFA. კრიტიკოსების თქმით, შუა სეზონში მსოფლიო ჩემპიონატზე ასპარეზობა ფეხბურთელებისთვის მეტისმეტი ფიზიკური დატვირთვა იქნება.

წყარო-radiotavisupleba.ge

ჩრდილოეთ კორეაში, მრავალრიცხოვანი აკრძალვების ფონზე, რეკლამა გამოჩნდა, რომელიც ადგილობრივებს ახალ „სუპერსასმელს“ სთავაზობს. ამბობენ, რომ ის თავის ტვინის უჯრედებს ზრდის. სასმელს რეკლამას ქვეყნის სიახლეთა სააგენტო უწევს. სახელიდან გამომდინარე, წვენს მორანბონგში - დედაქალაქ ფხენიანის გარეუბანში მდებარე კომპანია უშვებს. სასმელი 60 ტიპის მიკროელემენტს შეიცავს და 30-ზე მეტი სახეობის მცენარისგან მზადდება. სასმელს აქვს, როგორც პროფილაქტიკური, ასევე, სამკურნალო თვისებები. ის აუმჯობესებს გონებრივ შესაძლებლობებსა და მეხსიერებას ტვინის უჯრედების გაზრდის მეშვეობით, - ნათქვამია რეკლამაში. სასმელი ნაოჭის გაჩენასაც ებრძვის და ადამიანს ინფარქტებისგანაც იცავს.