სწრაფად დაბერების მიზეზს მიაგნეს

ადამიანის დაბერების პროცესს სერიოზულად აჩქარებს მავნე ნოვთიერებები, რომლებიც ორგანიზმში გარემოდან ხვდებიან, - ამტკიცებენ ამერიკელი სწავლულები. კაროლინის უნივერსიტეტის ონკოლოგიური ცენტრის სპეციალისტებმა, ცოტა ხნის წინ ჩატარებული გამოკვლევების შედეგად დაადგინეს, რომ გენები მხოლოდ 30%-ით ახდენს გავლენას იმაზე, თუ როგორ გამოიყურება ადამიანი, ხოლო გარე-ფაქტორები ორგანიზმზე გაცილებით სერიოზულად ზემოქმედებენ. მათი როლი ექსპერტებმა 70%-ით შეაფასეს. დაბერების პროცესის სისწრაფის განსაზღვრის მეთოდიკა მკვლევარებმა მღრღნელებზე გამოსცადეს. ასევე, ექსპერიმენტისას გამოავლინეს ის გენებიც, რომლებიც შედარებით მეტად ეწყობენ ხელს დაბერებას. მიღებული მონაცემების მიხედვით, ყველაზე საშიში ტოქსინია სიგარეტის კვამლი. მეორე და მესამე ხარისხის ზიანს ახალგაზრდობას ულტრაიისფერი გამოსხივება და ქიმიოთერაპია აყენებს, თანაც ეს უკანასკნელი პროცედურა სიბერეს 15 წლით გვიახლოვებს. სპეციალისტებმა დაადგინეს, რომ ეს ფაქტორები აზიანებენ ჯანმრთელ უჯრედებს, რომლებიც ნეგატიური ზემოქმედების გამო, გაყოფის უნარს კარგავენ. დროთა განმავლობაში, ეს დაზიანებული უჯრედები ორგანიზმში გროვდებიან და სხვადასხვა სახის ანთებით პროცესებს იწვევენ, შედეგად კი ათასგვარი ასაკობრივი დაავადებაც ჩნდება.