Recent Podcasts
საქართველოს პრეზიდენტმა, მიხეილ ყაველაშვილმა, საქართველოს პრემიერ-მინისტრის, ირაკლი კობახიძისა და პარლამენტის თავმჯდომარის, შალვა პაპუაშვილის წარდგინებით, კულტურის სფეროს წარმომადგენლები საქართველოს სახელმწიფო ჯილდოებით – ბრწყინვალებისა და ღირსების ორდენებით დააჯილდოვა.
ლაურეატებს სახელმწიფო ჯილდოები კულტურის სფეროში გამორჩეული მიღწევისა და საქართველოსათვის გაწეული აღმატებული ღვაწლისთვის, ასევე კულტურის სფეროს განვითარებაში შეტანილი განსაკუთრებული წვლილისათვის გადაეცათ.
პრეზიდენტის სასახლეში გამართულ ღონისძიებას საქართველოს პრეზიდენტის მეუღლე თამარ ბაგრატიონი, პრემიერ-მინისტრი ირაკლი კობახიძე, პარლამენტის თავმჯდომარე შალვა პაპუაშვილი, კულტურის მინისტრი თინათინ რუხაძე, აჭარის ავტონომიური რესპუბლიკის მთავრობის თავმჯდომარე სულხან თამაზაშვილი, პარლამენტის წევრები და კულტურის სფეროს წარმომადგენლები დაესწრნენ.
პრეზიდენტმა დაჯილდოებულებს მათი შემოქმედებისთვის მადლობა გადაუხადა და განაცხადა, რომ მათი სახით საქართველოს ჰყავს ადამიანები, რომლებიც ქართული კულტურის კიდევ უფრო გამდიდრებაზე ზრუნავენ და ამ საქმეს სამაგალითოდ, ღირსეულად ასრულებენ.
„როგორც მოგეხსენებათ, ქართული კულტურა ერთ-ერთი ყველაზე კარგად წარმომჩენია ქართული ტრადიციების, ჩვენი იდენტობის, ჩვენი ხასიათის. ყოველთვის იყო დრო იმისთვის, რომ ჩვენი კულტურა ყოფილიყო მაღალ დონეზე და ადამიანები, რომლებიც ისტორიის მანძილზე ქმნიდნენ ამ უდიდეს შემოქმედებას, დღემდე არიან საჩვენებელი ყველასთვის, არა მარტო საქართველოში, არამედ მთელ მსოფლიოში და ამით ვამაყობთ თითოეული ჩვენგანი.
დარგები, რომელიც შემადგენელია ქართული კულტურის – კინო, მუსიკა, თეატრი, მწერლობა, ამით გამორჩეული ვართ, ყოველთვის ვართ ამაყნი და ვიქნებით დარწმუნებული იმაში, რომ საქართველოში ეს სფერო იქნება მაღალ დონეზე, იმდენად დიდი ტრადიციაა ქართული კულტურის.
რა თქმა უნდა, ამას სჭირდება გაფრთხილება, სჭირდება ხელშეწყობა, იმიტომ, რომ ის, რაც აქამდე მოიტანეს ჩვენმა წინაპრებმა, აუცილებელია, რომ გადავცეთ ჩვენს მომავალ თაობას. თქვენ ხართ ის ადამიანები, ვინც ყოველდღიურ რეჟიმში ქმნით ამ უდიდეს შემოქმედებას და მინდა, ქედი მოვიხარო თქვენს წინაშე.
ჩვენ ბედნიერები ვართ, რომ გვაქვს უნიკალური ქართული კულტურა და ვამაყობთ ამით. მინდა, ქართველი ხალხისა და სახელმწიფოს სახელით მოგილოცოთ ეს ჯილდო და გისურვოთ მომავალში წარმატებები“, – განაცხადა საქართველოს პრეზიდენტმა.
კულტურის სფეროში გამორჩეული მიღწევისა და საქართველოსათვის გაწეული აღმატებული ღვაწლისათვის ბრწყინვალების ორდენით დაჯილდოვდნენ: სს – „ქართული ფილმის“ დირექტორთა საბჭოს წევრი, კინორეჟისორი მერაბ კოკოჩაშვილი, სსიპ – ქ. თბილისის ზაქარია ფალიაშვილის სახელობის ოპერისა და ბალეტის პროფესიული სახელმწიფო თეატრის სამხატვრო ხელმძღვანელი და დირექტორი, საოპერო მომღერალი, პედაგოგი ბადრი მაისურაძე.
კულტურის სფეროს განვითარებაში შეტანილი განსაკუთრებული წვლილისთვის ღირსების ორდენით დაჯილდოვდნენ: სსიპ – საქართველოს სახელმწიფო კამერული გუნდის სამხატვრო ხელმძღვანელი, მუსიკოსი, გუნდის დირიჟორი ჯიქი ჯანგულაშვილი, სსიპ ქ. თბილისის ზაქარია ფალიაშვილის სახელობის ოპერისა და ბალეტის პროფესიული სახელმწიფო თეატრის სოლისტი, საოპერო მომღერალი გიორგი ანდღულაძე, სსიპ მწერალთა სახლის დირექტორი ქეთევან დუმბაძე, სსიპ ქ. თბილისის ზაქარია ფალიაშვილის სახელობის ოპერისა და ბალეტის პროფესიული სახელმწიფო თეატრის სოლისტი, საოპერო მომღერალი ოთარ ჯორჯიკია, საოპერო მომღერალი მიხეილ ქირია, სსიპ საქართველოს ხელოვნების სასახლის – კულტურის ისტორიის მუზეუმის გენერალური დირექტორი გიორგი კალანდია, შპს – Gigastudio-სა და შპს საბავშვო სტუდია „ბზიკების სტუდიოს“ დამფუძნებელი და ხელმძღვანელი გიორგი კუხიანიძე, შპს „აიბი-მთიების“ სკოლის პედაგოგი, საქართველოს განათლების, მეცნიერებისა და ახალგაზრდობის სამინისტროს სკოლამდელი და ზოგადი განათლების დეპარტამენტის ზოგადი განათლების კონსულტანტი, საქართველოს საზოგადოებრივი მაუწყებლის სამეურვეო საბჭოს წევრი გრიგოლ მურღულია, ა(ა)იპ შუახევის კულტურის ცენტრის უხუცესთა ქორეოგრაფიული ანსამბლის, „ფესვების“ ქორეოგრაფი ბადრი დარჩიძე, ა(ა)იპ შუახევის კულტურის ცენტრის უხუცესთა ქორეოგრაფიული ანსამბლის, „ფესვების“ მუსიკოს-აკომპანიატორები მინდია ბერიძე და როლანდ ივანაძე, ა(ა)იპ შუახევის კულტურის ცენტრის უხუცესთა ქორეოგრაფიული ანსამბლის, „ფესვების“ მოცეკვავეები: დავით მაკარაძე, ზვიად ბოლქვაძე, თამაზ ბერიძე, ლევან ფუტკარაძე, მაყვალა ბუჩუკური, მიხეილ მელიქიშვილი, მიხეილ ფუტკარაძე, მუხრან დარჩიძე, ნანული გოგიტიძე, ნოდარ ქარცივაძე, ნოდარ დავითაძე, ნუგზარ ხიმშიაშვილი, რევაზ მჟავანაძე, რუსუდან დარჩიძე, შალვა მიქელაძე, ხასან ხილაძე, ჯემალ ართმელაძე, შოთა დიასამიძე და მიხეილ კაკალაძე (სიკვდილის შემდეგ), სსიპ ქ. თბილისის ზაქარია ფალიაშვილის სახელობის ოპერისა და ბალეტის პროფესიული სახელმწიფო თეატრის სამხატვრო ხელმძღვანელი და დირექტორი, საოპერო მომღერალი, პედაგოგი ბადრი მაისურაძე.
ბერლინის 76-ე საერთაშორისო კინოფესტივალის მთავარი ჯილდო გერმანელი რეჟისორის ილკერ ჩატაკის ფილმმა „ყვითელი წერილები“ მიიღო.
გრან-პრი კი თურქ რეჟისორ ემინ ალპერს ხვდა წილად, ფილმისთვის „გადარჩენა“.
„ვერცხლის დათვი“ საუკეთესო სამსახიობო შესრულებისთვის გერმანელ მსახიობ სანდრა ჰიულერს გადაეცა მთავარი როლისთვის ფილმში „ვარდი. „დათვი“ მეორე პლანის საუკეთესო როლებისთვის გადაეცათ ანა კალდერ-მარშალსა და ტომ კორტნის („დედოფალი ზღვაზე“).
საუკეთესო რეჟისურისთვის ჯილდო ბრიტანელმა რეჟისორმა გრანტ გიმ მიიღო („ყველას მოსწონს ბილ ევანსი“), საუკეთესო სცენარისტად კი ჟენევიევ დიულიუდ-დესალი აღიარეს („ნინა როზა“).
ლოს-ანჯელესში „გრემის“ დაჯილდოების 68-ე ცერემონია გაიმართა.
წლის საუკეთესო სიმღერად ბილი აილიშის Wildflower-ი დასახელდა. Bad Bunny-ს Debí Tirar Más Fotos წლის საუკეთესო ალბომად აღიარეს. წლის ჩანაწერის ტიტული კენდრიკ ლამარისა და SZA -ს Luther-მა მიიღო, საუკეთესო ახალი არტისტი კი ოლივია დინი გახდა.
საუკეთესო როკ-შესრულების ნომინაციაში გაიმარჯვეს Yungblud-მა, ნუნო ბეტენკურტმა, ფრენკ ბელომ, ადამ ვეიკმანმა და II-მ, რომლებმაც ოზი ოსბორნის გამოსამშვიდობებელ კონცერტზე მისი ლეგენდარული სიმღერა Changes შეასრულეს.
საუკეთესო რეპ-ალბომი კენდრიკ ლამარის GNX გახდა.
სიმღერა Golden მულტფილმიდან „კეი პოპ დემონებზე მონადირეები“ მედიაკონტენტისთვის შექმნილი საუკეთესო კომპოზიცია გახდა.
მსოფლიო კინოინდუსტრიის მთავარ მოვლენამდე ათვლა დაიწყო. ამერიკის კინოაკადემიამ „ოსკარის“ რიგით 98-ე დაჯილდოების ნომინანტები ოფიციალურად წარადგინა. წლის საუკეთესო ნამუშევრების, რეჟისორებისა და მსახიობების ვინაობა 15 მარტს, საზეიმო ცერემონიაზე გახდება ცნობილი.
წლევანდელი ნომინაციების ლიდერებს შორის პოლ ტომას ანდერსონის, გილერმო დელ ტოროსა და რაიან კუგლერის ახალი პროექტები მოხვდნენ.
წარმოგიდგენთ ძირითადი კატეგორიების ნომინანტებს:
წლის საუკეთესო ფილმი
მთავარი ჯილდოსთვის წელს 10 სურათი იბრძოლებს. სიაში მოხვდნენ როგორც მაღალბიუჯეტიანი ბლოკბასტერები (მაგალითად, „F1“), ისე საავტორო კინოს გამორჩეული ნიმუშები:
• One Battle After Another
• Marty Supreme
• Hamnet
• Sinners
• Sentimental Value
• The Secret Agent
• Train Dreams
• Bugonia
• F1
• Frankenstein
საუკეთესო რეჟისურა
• პოლ ტომას ანდერსონი (One Battle After Another)
• რაიან კუგლერი (Sinners)
• გილერმო დელ ტორო (Frankenstein)
• ჯოშ საფდი (Marty Supreme)
• იოაკიმ ტრიერი (Sentimental Value)
• ქლოი ჟაო (Hamnet)
მსახიობთა ნომინაციები
კაცის როლის საუკეთესო შესრულებისთვის ნომინანტებს შორის არიან ლეონარდო დიკაპრიო და ტიმოთი შალამე, ხოლო ქალებს შორის ლიდერობენ ემა სტოუნი და ჯესი ბაკლი.
საუკეთესო მსახიობი კაცი:
• მაიკლ ბ. ჯორდანი (Sinners)
• ვაგნერ მოურა (The Secret Agent)
• ლეონარდო დიკაპრიო (One Battle After Another)
• ტიმოთი შალამე (Marty Supreme)
• ითან ჰოუკი (Blue Moon)
საუკეთესო მსახიობი ქალი:
• ჯესი ბაკლი (Hamnet)
• რენატე რეინსვე (Sentimental Value)
• ემა სტოუნი (Bugonia)
• როუზ ბირნი (If I Had Legs I’d Kick You)
• ქეით ჰადსონი (Song Sung Blue)
მეორეხარისხოვანი როლები
ამ კატეგორიაში განსაკუთრებული კონკურენციაა. საინტერესოა, რომ ფილმმა Sentimental Value ქალის მეორეხარისხოვანი როლის ნომინაციაში ერთდროულად ორი პოზიცია დაიკავა.
საუკეთესო მსახიობი კაცი (მეორეხარისხოვანი როლი):
• ბენისიო დელ ტორო (One Battle After Another)
• ჯეიკობ ელორდი (Frankenstein)
• დელროი ლინდო (Sinners)
• შონ პენი (One Battle After Another)
• სტელან სკარსგარდი (Sentimental Value)
საუკეთესო მსახიობი ქალი (მეორეხარისხოვანი როლი):
• ელ ფენინგი (Sentimental Value)
• ინგა იბსდოტერ ლილეასი (Sentimental Value)
• ემი მედიგანი (Weapons)
• ტეიანა ტეილორი (One Battle After Another)
• ვუნმი მოსაკუ (Sinners)