რჩეული

საქართველოს პრემიერ-მინისტრმა, ირაკლი კობახიძემ მუსლიმ თემს ყურბან-ბაირამისდღესასწაული მიულოცა. მთავრობის მეთაური, დღესასწაულთან დაკავშირებით, რელიგიის საკითხთა სახელმწიფო სააგენტოს თავმჯდომარესთან ერთად, თბილისის მეჩეთში იმყოფებოდა.

პრემიერმა ქვეყნის განვითარებაში მუსლიმი თემის მნიშვნელოვან წვლილზე ისაუბრა და აღნიშნა, რომ სახელმწიფო მათ მხარდაჭერას მომავალშიც განაგრძობს.

„ჩვენი ქვეყანა ამაყობს როგორც ეროვნული, ისე რელიგიური მრავალფეროვნებით. ჩვენთვის ძალიან საამაყოა ის ურთიერთობები, ის მეგობრობა, რომელიც ჩამოყალიბებულია ჩვენს შორის. ამას ძალიან ვუფრთხილდებით და მომავალშიც გავუფრთხილდებით. საქართველოს ხელისუფლება მაქსიმალურად ზრუნავს მუსლიმი თემის ინტერესებზე და ეს ზრუნვა მომავალშიც გაგრძელდება. თქვენ ძალიან დიდი წვლილი შეგაქვთ ჩვენი ქვეყნის წინსვლასა და განვითარებაში და მინდა ამისთვის დიდი მადლობა გადაგიხადოთ“, - განაცხადა ირაკლი კობახიძემ.

მეჩეთში შეკრებილ მუსლიმ მრევლს ყურბან-ბაირამი მიულოცეს რელიგიის საკითხთა სახელმწიფო სააგენტოს თავმჯდომარე ზაზა ვაშაყმაძემ, დასავლეთ საქართველოს მუფთმა ადამ შანთაძემ, აღმოსავლეთ საქართველოს მუფთმა ეტიბარ ემინოვმა და საქართველოს მუსლიმთა შეიხმა ფაიგნაბიევმა. ყურბან ბაირამთან დაკავშირებულ ლოცვას დიპლომატიური კორპუსის წარმომადგენლები დაესწრნენ.

საქართველოში ახალი ფორმის პასპორტის და პირადობის მოწმობის გაცემა 2025 წლის პირველი აგვისტოდან დაიწყება.

საქართველოს მოქალაქის პირადობის ელექტრონული მოწმობის, დროებითი ბინადრობის, მუდმივი ბინადრობისა და დროებითი საიდენტიფიკაციო ელექტრონული მოწმობების ტექნიკური მახასიათებლები და ფორმები, იუსტიციის მინისტრის 2025 წლის მარტის ბრძანებით, მიმდინარე წლის 4 ივნისიდან უნდა შეცვლილიყო.

მარტის ბრძანებაში ცლილება 30 მაისს შეიტანეს. ამ ახალი ბრძანებით ვადასთან ერთად გარკვეული ცვლილებები შევიდა მოწმობების ტექნიკურ მახასიათებლებშიც. მაგალითად:

ახალი მოწმობა დამატებით უნდა შეიცავდეს „ინტეგრირებულ მე-4 დონის დამცავ ერთ ნიშანს, რომელიც კლასიფიცირდება, როგორც კონფიდენციალური“;

ახალი ბრძანებით, „მოწმობაზე დაიტანება დამკვეთისა და დამამზადებლის სახელწოდებები ინიციალებით, აგრეთვე საქართველოს ეკონომიკისა და მდგრადი განვითარების სამინისტროს [სემგს] რეგისტრაციის ნომერი“;

მოწმობა უნდა შეიცავდეს ასევე: „სერტიფიკატებს ან/და გასაღებებს, რომლებიც განკუთვნილია მოწმობის ან/და მასზე დატანილი [ჩაწერილი] მონაცემების ერთიანობის, ავთენტიკურობისა და კონფიდენციალურობის დაცვისათვის,“ ასევე „მფლობელის თითის ანაბეჭდს“.

ამასთან, „ინფორმაციის ელექტრონული მატარებელი შესაძლოა შეიცავდეს კვალიფიციური ელექტრონული ხელმოწერის სერტიფიკატს, მის შესაბამის ელექტრონული ხელმოწერის შექმნის მონაცემებს, ელექტრონული ხელმოწერის შექმნის მონაცემების არასანქცირებული გამოყენებისაგან დამცავ აქტივაციის მონაცემებს და მისი გამცემი ორგანოს სერტიფიკატს;

ასევე, ფიზიკური პირის ავთენტიფიკაციის სერტიფიკატს, მის შესაბამის ავთენტიფიკაციის შექმნის მონაცემებს, ავთენტიფიკაციის შექმნის მონაცემების არასანქცირებული გამოყენებისაგან დამცავ მონაცემებს და მისი გამცემი ორგანოს სერტიფიკატს, რომლებიც დაიტანება [ჩაიწერება] მხოლოდ მფლობელის მოთხოვნით.“ – აღნიშნულია ახალ ბრძანებაში.

ძალაში კვლავ რჩება აკრძალვა, რომ ელექტრონული მოწმობების ინდივიდუალური ნომრის ნიშნებში ციფრების კომბინაცია არ შეიძლება იყოს ისე, რომ იკითხებოდეს რიცხვი 666 [მაგალითად, ბარათის ნომერში არ შეიძლება იყოს ასეთი კომბინაციები − 666XX, X666X ან XX666].

რაც შეეხება პასპორტს, იუსტიციის მინისტრის 2025 წლის აპრილის ბრძანებით, საქართველოს მოქალაქის ბიომეტრიული პასპორტის ახალი ფორმის გარდა დამტკიცდა ასევე „ბიომეტრიული დიპლომატიური პასპორტის, ბიომეტრიული სამსახურებრივი პასპორტის, აგრეთვე საქართველოში სტატუსის მქონე მოქალაქეობის არმქონე პირის ბიომეტრიული სამგზავრო პასპორტისა და ლტოლვილის ბიომეტრიული სამგზავრო დოკუმენტის ტექნიკური მახასიათებლები და ფორმები“.

აღნიშნული დოკუმენტებიც შეცვლილი ფორმით, 2025 წლის ივნისის ნაცვლად აგვისტოდან უნდა გაიცეს.

ამასთან, აგვისტომდე გაცემული ყველა დოკუმენტი [პირადობა, პასპორტი და სხვა] მისთვის განსაზღვრული ვადით იმოქმედებს.

"ბათუმელები"

ქ. რომში ვიზიტის ფარგლებში, საგარეო საქმეთა მინისტრის მოადგილემ, გიორგი ზურაბაშვილმა და იტალიის რესპუბლიკაში საქართველოს პოლიციის ატაშემ, ვლადიმერ ბორცვაძემ შეხვედრა გამართეს იტალიის რესპუბლიკის ტრასპორტისა და ინფრასტრუქტურის სამინისტროში - მართვის მოწმობების ურთიერთაღიარების საკითხთან დაკავშირებით.
შეხვედრაზე მხარეებმა ხაზი გაუსვეს აღნიშნული საკითხის მნიშვნელობას, რაც იტალიაში მცხოვრებ საქართველოს მოქალაქეებს საშუალებას მისცემს ქართული მართვის მოწმობები გამოცდის ჩაბარების გარეშე გადაცვალონ იტალიურ მართვის მოწმობაში.
შეხვედრაზე მხარეებმა განიხილეს შეთანხმების შინაარსობრივი მხარე და იმედი გამოთქვეს, რომ შესაბამისი პროცედურების ოპერატიულად დასრულების შემდგომ შესაძლებელი იქნება შეთანხმების ხელმოწერა.
აღსანიშნავია, რომ იტალიურმა მხარემ თანამშრომლობის სრული მზაობა გამოთქვა.
საგულისხმოა, რომ საქართველოს შინაგან საქმეთა სამინისტროსა და იტალიის რესპუბლიკის ტრასპორტისა და ინფრასტრუქტურის სამინისტროს შორის მრავალი წელია მიმდინარეობს ინტენსიური მოლაპარაკების პროცესი ზემოხსნებუოი შეთანხმების გაფორმების მიზნით.
ამასთან, საქართველოს მსგავსი შეთანხმება უკვე აქვს გაფორმებული ესპანეთთან, საბერძნეთთან და ირლანდიასთან

იო­სებ ჭე­ლი­ძემ შს მი­ნის­ტრის მო­ად­გი­ლის თა­ნამ­დე­ბო­ბა და­ტო­ვა. მედიაში გავრცელებულ ინ­ფორ­მა­ცი­ას ადას­ტუ­რე­ბენ ში­ნა­გან საქ­მე­თა სა­მი­ნის­ტრო­ში. 

იო­სებ ჭე­ლი­ძე შს მი­ნის­ტრის მო­ად­გი­ლის თა­ნამ­დე­ბო­ბას 2019 წლი­დან იკა­ვებ­და.

ბოლო დროს საქართველოში გაიზარდა შემთხვევები, როდესაც მომხმარებლები მაღაზიებში ნაყიდ თევზში პარაზიტებს პოულობენ.   ზღვის პროდუქტები როგორც გაყინული, ისე ცოცხალი, ჩვენი რაციონისთვის ერთ-ერთი მთავარი კომპონენტია. მიუხედავად იმისა, რომ შეიცავს უამრავ სასარგებლო ნივთიერებას, მათში ხშირად გვხვდება პარაზიტები, რომლებიც შესაძლოა სერიოზულ საფრთხეს უქმნიდეს ადამიანის ჯანმრთელობას. 

"23 მარტს შევიძინე გრაკოს ფირმის ხეკი, რომელიც მოვამზადე და მივირთვით მე და ჩემმა 6 წლის შვილმა ,მეორე დღეს აქ ვნახე ერთი გოგოს პოსტი სადაც პარაზიტებით სავსე პროდუქტი იყო ნაჩვენები, მაშინვე დარჩენილი ნაჭრები მოვსინჯე და თვალებს არ დავუჯერე ,აი ამ პარაზიტებით იყო სავსე რაც პირველ ფოტოზეა, დავუკავშირდი მაღაზიას შემდეგ კომპანიას რომელსაც შემოაქვს ეს თევზი საქართველოში და დიდი ამბით და დაპირებით მითხრეს რომ ყველაფერს მოიკვლევდნენ, იმავე დღეს იგივე ფირმის თევზი შევიძინე სხვა მაღაზიაში (საკუთარ თავს არ ვენდე ხო არ მომეჩვენათქო, ნეტა მომჩვენებოდა ) რათქმაუნდა ისევ იგივე პარაზიტები უკვე უმ მდგომარეობაში, ფოტო ვიდეოზე ნახავთ..
ამ დროის განმავლობაში არანაირი პასუხისმგებლობა არ აუღიათ, ვითხოვდი ჩემი და ჩემი შვილის ჯანმრთელობის მდგომარეობის გამოკვლევას , რაზეც მითხრეს რომ დიდი ალბათობით შემწვარი პარაზიტი არაფერს გვავნებდა ... ამაზე მეტი რა უნდა დაცინონ ადამიანს ? ჩვენი ჯანმრთელობის ხარჯზე ვიღაც გაზულუქებული ხალხი მდიდრდებიან და ამ ჭიებს  გვაჭმევენ !! რათქმაუნდა ამ ამბავს ესე არ დავტოვებ და ბოლომდე მივყვები სამართლებრივად , ვითხოვდი გაყიდვიდან ამოეღოთ რომ სხვებსაც არ მიერთვათ და აეღოთ პასუხისმგებლობა კვლევებზე .. რაზეც მიპასუხეს რომ ჯერ მოიკვლევენ..
დამიკავშირდა კომპანიის წარმომადგენელი და მომახსენა რომ სურსათის ეროვნულმა სააგენტომ დარღვევა ვერ აღმოაჩინა" - წერს მომხმარებელი ფეისბუქ ჯგუფში.

აღნიშნული პრობლემის სიმწვავიდან გამომდინარე, „ვერსია“ გიზიარებთ ინფორმაციას, იმის შესახებ, თუ რა სახის პარაზიტები არიან ზღვის პროდუქტებში,  რა ნიშნებით შეიძლება აღმოვაჩინოთ და როგორ დავიცვათ თავი.

როგორ იჩენენ თავს პარაზიტები ზღვის პროდუქტებში?
პარაზიტების არსებობა ზღვის პროდუქტებში დაკავშირებულია წყლის დაბინძურებასთან. ზღვის წყლების დაბინძურება, განსაკუთრებით, დაბინძურებული ნარჩენებითა და ტოქსინებით, ქმნის ხელსაყრელ გარემოს პარაზიტების გამრავლებისთვის. საინტერესოა, რომ პარაზიტების გადაცემა ხდება ძირითადად ხორცის, თევზის, ზღვის კომბოსტოს ან სხვა ზღვის პროდუქტების მოხმარებისას, თუ პროდუქტმა არ გაიარა სათანადო პროცედურები — მაგალითად, გაყინვა ან მოხარშვა.
როგორ ამოვიცნოთ პარაზიტები ზღვის პროდუქტებში?
პარაზიტების აღმოჩენა ხშირად საკმაოდ რთულია, რადგან ისინი უმეტესწილად უხილავები არიან გარეგნულად. თუმცა, არსებობს ნიშნები, რომლებზეც შეიძლება გაამახვილოთ ყურადღება:
-გაურკვეველი ბზარები ან ნაოჭები  თევზის ხორცში — შესაძლოა ლარვის ან ზრდასრული პარაზიტის არსებობა.
- მოძრავი ობიექტები— თუ პროდუქტის ხორცში ან რბილეულში შეამჩნევთ მოძრაობას, ეს უპრიანია პარაზიტის არსებობაზე.
- სუნი და გემო — არასასურველი სუნი ან უცნაური გემო აჩვენებს, რომ პროდუქტი არ არის სასარგებლო.
- გარეგნული ნიშნები— სუფთა პროდუქტზე არ უნდა იყოს წვეთი სისხლი, ბზარები ან გამჭვირვალე ლაქები.

რამდენიმე კვირის წინ,  სურსათის უვნებლობის სპეციალისტი ირაკლი არაბული მოსახლეობას საშიში პარაზიტის შესახებ აფრთხილებდა, რომელიც უმ ან არასათანადოდ დამუშავებულ თევზში შეიძლება აღმოჩნდეს.

„რადგან ეს პარზიტებიც აქტუალურია,კიდევ ერთხელ მოგაწვდით ინფორმაციას მათ შესახებ:
ფოტოზე გამოსახულია ანიზაკიდების (Anisakis) ლარვები, რომლებიც ხშირია ზღვის პროდუქტებში, განსაკუთრებით თევზში.
საფრთხე, რომელსაც ეს პარაზიტი ქმნის!  
ანიზაკიდოზი – ეს არის მძიმე პარაზიტული ინფექცია, რომელიც ადამიანს შეიძლება დაემართოს უმი ან არასათანადოდ დამუშავებული თევზის მიღებით.
  რისკები და სიმპტომები:
• ძლიერი მუცლის ტკივილი
• გულისრევა და ღებინება
• დიარეა და ალერგიული რეაქციები
• ზოგჯერ ქირურგიული ჩარევაც კი საჭიროა, რადგან ლარვები კუჭ-ნაწლავის კედელში იჭრებიან!
როგორ ავიცილოთ თავიდან?
თერმული დამუშავება – თევზის კარგად შეწვა, მოხარშვა ან 60°C-ზე მაღალ ტემპერატურაზე დამუშავება. გაყინვა (-20°C მინიმუმ 24 საათი) – კლავს პარაზიტებს“, - წერდა ირაკლი არაბული. 

ზღვის პროდუქტები განსხვავებით სხვა საკვები პროდუქტებისგან მაღალი რისკის მატარებელია, ამიტომ აუცილებელია მათი როგორც სპეციფიკური ჯგუფის ცალკე გამოყოფა. 
არსებობს თევზპროდუქტების რამდენიმე ძირითადი ბიოლოგიური საფრთხე:
წყლის ბაქტერიები;
გარემოს ბაქტერიები;
ადამიანის/ცხოველური წარმოშობის ბაქტერია;
პათოგენური საფრთხე;
ვირუსული დაავადებები;
პარაზიტები;
კიდევ ერთი, არანაკლებ მნიშვნელოვანი რისკი, რომელიც დაკავშირებულია ზღვის პროდუქტებთან არის  ის რომ თევზი და ზღვის პროდუქტი მიეკუთვნება ალერგენებს, გარდა ამისა, უმი ან ნახევრად მოხარშული ზღვის პროდუქტები ყველაზე მეტად იწვევენ საკვებისმიერ დაავადებებს, სწორედ ამიტომ კრიტიკულად მნიშნელოვანია ისინი გაიყინოს და ინახებოდეს შესაბამისი პირობების სრული დაცვით.

ზღვის პროდუქტების უვნებლობის დაცვის ზოგადი რეკომენდაციები
-შეინახეთ თევზი გაყინულ მდგომარეობაში ან მაცივარში;
-განაცალკევეთ მოხარშული და უმი ზღვის პროდუქტები. ხელახლა გამოყენებამდე გარეცხეთ ჭურჭელი, საჭრელი დაფები და ნებისმიერი ზედაპირი, რომელიც შეხებაშია უმი ზღვის პროდუქტებთან ან სხვა საკვებთან;
-დაიბანეთ ხელები უმი ან მოხარშული საკვების მიღებამდე და მის შემდეგ;
-მოხარშეთ ზღვის პროდუქტები ზედმიწევნით . შეამოწმეთ ტემპერატურა საკვების თერმომეტრით ფილეს ან სტეიკის ყველაზე სქელ ნაწილში.
-შეიძინეთ ზღვის პროდუქტები საცალო ვაჭრობიდან, რომლებსაც აქვთ მაღალი სტანდარტები ხარისხისა და სანიტარული პირობებისთვის.
სწორად შენახული, დამუშავებული და უვნებელი ზღვის პროდუქტების მიღება უზრუნველყოფს ორგანიზმის გამართულად ფუნქციონირებას და სასარგებლო ნივთიერებებით მომარაგებას.

დღეს ჩვენ ვმადლობთ უფალს და ვხარობთ, რომ მოგვიყვანა მის წმინდა ეკლესიაში, რათა ვეზიაროთ ამ რწმენას და ვსაზრდოობდეთ იმ მარადიული სიცოცხლის წყაროსგან, რომელზეც საუბრობს უფალი იესო ქრისტე თავის სამეუფეო ლოცვაში, - განაცხადა თბილისის სიონის საპატრიარქო ტაძარში დღესასწაულზე ქადაგებისას საპატრიარქო ტახტის მოსაყდრემ, სენაკისა და ჩხოროწყუს მიტროპოლიტმა, შიომ (მუჯირი).

მან სრულიად საქართველოს წმინდა ნინოს საქართველოში შემოსვლის დღე მიულოცა და ღმერთისა და ადამიანის ერთობის შესახებ ისაუბრა. მისივე თქმით, ყოველთვის, როდესაც ქრისტეს წმინდა სისხლსა და ხორცს ვეზიარებით, ხორციელდება და ახლდება ეს ერთობა ადამიანის ღმერთთან და ერთმანეთთან.

„გილოცავთ დღევანდელ დღესასწაულს. დღეს არის ნინოობა და დღევანდელ დღეს დაემთხვა პირველი მსოფლიო კრების წმინდა მამების კვირა.

ამ კვირა დღესთან დაკავშირებით წაკითხული იყო სახარებიდან მონაკვეთი, საიდანაც ვიგებთ, რომ მას შემდეგ, როცა უფალი იესო ქრისტე უკანასკნელად ესაუბრა თავის მოციქულებს საიდუმლო სერობაზე, მან ლოცვით მიმართა მამაზეციერს. ამ ლოცვაში განსაკუთრებით კარგად ჩანს მამა ღმერთის და ძე ღმერთის ერთობა. უფალი სთხოვს მას მორწმუნეთათვის და ამბობს: „იყვნენ ესენი ერთ’’, როგორც მამა ღმერთი და ძე ღმერთი ერთ არიან“ (ინ. 17,21). ასევე ამბობს ასეთ სიტყვებს: „ყოველივე ჩემი შენი არს და შენი ჩემი არს“ (ინ. 17,10). საოცარი სიტყვებია ეს, არც ერთ ადამიანს, არც ერთ რელიგიას არ უქადაგია ასეთი ერთობა ღმერთსა და ადამიანს შორის. ღმერთი გახდა ადამიანი იმისთვის, რომ ადამიანიც გახდეს მადლით ღმერთი. ეს ნიშნავს, რომ ყველაფერი, რაც აქვს ღმერთს, მადლით ჰქონდეს ადამიანსაც.

ეს საოცარი და განსაკუთრებული ერთობა, ძვირფასო ძმებო და დებო, ხორციელდება მაშინ, როდესაც ჩვენ ერთი ბარძიმიდან ვეზიარებით. ყოველთვის, როდესაც ქრისტეს წმინდა სისხლსა და ხორცს ვეზიარებით, ხორციელდება და ახლდება ეს ერთობა ჩვენი ღმერთთან და ერთმანეთთან. ეს არის ერთობა ქრისტეში, მის სხეულში, რომელიც სიტყვისამებრ პავლე მოციქულისა, არის ეკლესია და რომლის თავიც არის თვით უფალი იესო ქრისტე.

ამ საოცარ ლოცვაში უფალი იესო ქრისტე კიდევ განმარტავს იმას, თუ რა არის საუკუნო სიცოცხლე და ამბობს: „საუკუნო სიცოცხლე არის, რათა გიცნობდნენ შენ (ანუ მამა ღმერთს ეუბნება) და იმას, ვინც მოავლინე, იესო ქრისტეს“ (ინ. 17,3). ე. ი. საუკუნო სიცოცხლე ყოფილა არა მხოლოდ ერთი ღმერთის შეცნობა და რწმენა, არამედ იესო ქრისტეს რწმენაც, თორემ ერთი ღმერთი იმათაც სწამდათ, ვინც ითხოვდა მის ჯვარცმასა და სიკვდილს და ვინც ეს საშინელი ცოდვა ჩაიდინა; დღესაც არიან მრავლად ადამიანები, რომლებიც აცხადებენ, რომ სწამთ ერთი ღმერთი, მაგრამ ისინი უარყოფენ მისგან კაცობრიობის გამოხსნისთვის მოვლენილ ძე ღმერთს და ათასგვარ უბედურებას ჩადიან.

ეს სახარება, ძვირფასო ძმებო და დებო, არ იყო შემთხვევით წაკითხული დღევანდელ წირვაზე, რადგან დღეს არის ხსენება პირველი მსოფლიო კრების წმინდა მამების, რომლებიც წინ აღუდგნენ არიოზის მწვალებლობას, რომელიც აკნინებდა იესო ქრისტეს საღვთო ღირსებას და ამბობდა, რომ ის არის ქმნილება. ამიტომ, ეს წმინდა მამები წინ აღუდგნენ მას, დაგმეს ეს სწავლება და გამოთქვეს ჭეშმარიტება, რომ იესო ქრისტე არ არის ქმნილება, არც მხოლოდ წინასწარმეტყველი, არც რომელიმე ზნეობის მასწავლებელი, არამედ არის მხოლოდშობილი ძე ღვთისა, განკაცებული ღმერთი და მაცხოვარი სოფლისა; და ამ რწმენას აღიარებს წმინდა ეკლესია იმ დროიდან მოყოლებული, როდესაც უფალმა იესო ქრისტემ უბრძანა თავის მოციქულებს, წასულიყვნენ საქადაგებლად და მოენათლათ სახელითა მამისათა და ძისათა და სულისა წმინდისათა; იმ დროიდან მოყოლებული, როდესაც პავლე მოციქულმა განაცხადა, რომ იესო ქრისტე არის ძე ღვთისა და მაცხოვარი სოფლისა და იმ დროიდან მოყოლებული, როდესაც წმინდა მამებმა განმარტეს ეს ჭეშმარიტება და დაამტკიცეს პირველ მსოფლიო კრებაზე.

დღეს ჩვენ ვმადლობთ უფალს და ვხარობთ, რომ მოგვიყვანა მის წმინდა ეკლესიაში, რათა ვეზიაროთ ამ რწმენას და ვსაზრდოობდეთ იმ მარადიული სიცოცხლის წყაროსგან, რომელზეც საუბრობს უფალი იესო ქრისტე თავის სამეუფეო ლოცვაში. ამიტომ, ძვირფასო ძმებო და დებო, გვმართებს განსაკუთრებული მოწიწება და მადლიერება იმ დიდებული ადამიანების მიმართ, ვინც გამოთქვა და განაცხადა ეს ჭეშმარიტება, ვინც ჩვენამდე მოიტანა და გადმოგვცა ის. ვიმეორებ, ესენი არიან პირველი მსოფლიო კრების წმინდა მამები, ეს არის წმინდა მოციქულთა სწორი, ქართველთა განმანათლებელი, ქალწული ნინო, რომელმაც ეს რწმენა ჩვენთან მოიტანა და იქადაგა.

კიდევ ერთხელ, გილოცავთ დღევანდელ დიდებულ დღესასწაულს. გადმოგცემთ სრულიად საქართველოს კათოლიკოს-პატრიარქ ილია II-ის ლოცვა-კურთხევას.

დღეს, როდესაც ვიხსენიებთ და ვადიდებთ ამ დიდ მოღვაწეებს (წმინდა ნინოსთან ერთად დღეს არის ასევე ხსენება მოციქულთასწორთა, მეფე მირიანისა და დედოფალ ნანასი), ვევედროთ უფალს, რომ მათი ლოცვით შევძლოთ ამ წმინდა და საღვთო რწმენის - მართლმადიდებელი სარწმუნოების - შენახვა და ღირსი გავმხდარიყავით, ამ რწმენით სასურველი, მარადიული და ნეტარი ცხოვრების მიღწევის, მადლითა და კაცთმოყვარებითა უფლისა ჩვენისა იესო ქრისტესითა, რომელსაც შვენის ყოველი დიდება, პატივი და თაყვანისცემა, თანა მამით და სულიწმინდითურთ, აწ და მარადის და უკუნითი უკუნისამდე“, - განაცხადა მეუფე შიომ.