რჩეული

საქართველოს ჩრდილოეთით, კავკასიონის ქედს მიღმა, ყველასგან გამორჩეული მისტიკური მხარე - თუშეთი მდებარეობს. იქ მისასვლელად მოგზაურს 72-კილომეტრიანი, კლდოვან ფერდობებზე გაჭრილი რთული გზა ელის.

ვინც ერთხელ მაინც გაბედა და ამ გზას დაადგა, ხვდება, რომ ყველაზე ფასეული ადგილები ხშირად ყველაზე რთულად მისადგომია.

თუშური თავგადასავალი აბანოს უღელტეხილის გავლით იწყება. ზღვის დონიდან 3000 მეტრზე, ღრუბლებს ზემოთ დაჯის კაფეა, თუში გოგო მოგზაურებს ცხელი ჩაითა და სახლის ჯემით უმასპინძლდება.

თუშეთის გზაზე, რთული რელიეფისა და მეტეოროლოგიური პირობების გამო, ტრანსპორტის მოძრაობა წელიწადში დაახლოებით 4-5 თვის განმავლობაშია შესაძლებელი.

საავტომობილო გზების დეპარტამენტი, ფშაველი-აბანო-ომალოს გზის 72 კმ-იან მონაკვეთზე, ინფრასტრუქტურულ სამუშაოებს ახორციელებს, რომელიც გადაადგილებას გაუადვილებს როგორც ადგილობრივ მოსახლეობას, ასევე მნიშვნელოვანია ტურისტული პოტენციალის განვითარების თვალსაზრისითაც.

გზის ბოლოს მთიანი რელიეფით, მდინარეებითა და ალპური მინდვრებით განთქმული თუშეთია. განსაკუთრებით თვალწარმტაცი მთებში ჩამალული ომალოა, ტურისტებისთვის ლაშქრობა სწორედ აქედან იწყება.

საქართველოს ტურიზმის ეროვნული ადმინისტრაცია წლებია საფეხმავლო ბილიკების განვითარების პროექტს ახორციელებს. სულ ცოტა ხნის წინ, თუშეთში 90 კმ სიგრძის, საფეხმავლო ბილიკები მოინიშნა.

ზღვის დონიდან 2000 მეტრზე სოფელი დართლო მდებარეობს, რომელიც ძველი თუშური ტიპის ნაგებობებითა და ფიქლის მშრალი წყობით ნაშენები სახლებითაა გამორჩეული. იდოიძეების ოჯახი ერთ - ერთია, ვინც თუშეთში ჩამოსულ მოგზაურებს მასპინძლობს და ადგილობრივ კულტურას აზიარებს. 

საქართველოს ტურიზმის ეროვნული ადმინისტრაცია თუშეთის ტურისტული პოტენციალის პოპულარიზაციის მიზნით, აქტიურად მუშაობს, რომ ამ მხარის უნიკალური ბუნებისა და სათავგადასავლო ტურიზმის შესაძლებლობების შესახებ, უფრო მეტმა მოგზაურმა შეიტყოს.

ასე რომ, თუშეთი 2025 წლის ტურისტული სეზონის გახსნას თავგადასავლების მაძიებლებისთვის საინტერესო სიახლით ხვდება. ყველას, ვინც მისტიკურ მხარეში მოგზაურობას გადაწყვეტს, წინ საფეხმავლო ბილიკები, ავთენტური გარემო და დაუვიწყარი აღმოჩენები ელის.

ავტორი: ნინი ნაცვლიშვილი

რუსთავი 2

რიკოთის 4 ზოლიანი ჩქაროსნული გზის დარჩენილი 4 კმ-იანი მონაკვეთის აღმოსავლეთ-დასავლეთის მიმართულებაზე 2 ზოლის მშენებლობა დასრულდა და ავტოტრანსპორტის მოძრაობა დღეს გაიხსნა.

ახალ 2 ზოლზე დროებით გადაერთვება ორივე მიმართულების სატრანსპორტო მოძრაობა: ერთი ზოლი მოემსახურება აღმოსავლეთიდან დასვლეთისკენ მიმავალ ტრანსპორტს, ხოლო მეორე ზოლი - დასავლეთიდან აღმოსავლეთისკენ მომავალ ტრანსპორტს.

მოძრაობის გადართვისთანავე, დაიწყება ამავე მონაკვეთზე არსებული ძველი გზის მაგისტრალურ გზად რეკონსტრუქციისა და მშენებლობის სამუშაოები. პროექტის ფარგლებში, მოეწყობა 2 ზოლიანი ჩქაროსნული გზა და 5 ახალი ხიდი.
სამუშაოების დასრულების შემდეგ, რიკოთის 52 კმ-იანი მაგისტრალი სრულად იქნება გახსნილი ავტოტრანსპორტისთვის, რაც მნიშვნელოვნად გააუმჯობესებს გადაადგილებას.

რიკოთის მაგისტრალური გზის მშენებლობის პროექტის ფარგლებში, სულ შენდება 52 კმ-იანი 4 ზოლიანი მაგისტრალური გზა (51 გვირაბითა და 97 ხიდით). ამ დროისათვის, ტრანსპორტი უკვე ისარგებლებს ახალი 4 ზოლიანი გზის 48 კმ-ით (50 გვირაბითა და 91 ხიდით), რომელმაც 8 კმ-ით შეამცირა მგზავრობის მანძილი და გაანახევრა გადაადგილების დრო.

ახალი გზა აშენებულია საგზაო უსაფრთხოების საერთაშორისო სტანდარტების შესაბამისად და უზრუნველყოფილია საგზაო განათების სისტემით.

საერთო ჯამში, რიკოთის მაგისტრალური ახალი გზის 96%-ით ავტოტრანსპორტი უკვე სარგებლობს.

რიკოთის მაგისტრალური გზის მშენებლობა აზიის განვითარების ბანკის (ADB), ევროპის საინვესტიციო ბანკის (EIB) და მსოფლიო ბანკის (WB) სესხებისა და სახელმწიფო ბიუჯეტის თანადაფინანსებით ხორციელდება. სამუშაოების ჯამური ღირებულება 2.6 მილიარდ ლარამდეა.

საქართველოს მთავრობასა და საბერძნეთის რესპუბლიკის მთავრობას შორის, ეროვნული მართვის მოწმობების ურთიერთაღიარებისა და გადაცვლის შესახებ შეთანხმება, ძალაში მიმდინარე წლის 21 ივნისიდან შევიდა. ინფორმაციას შსს ავრცელებს.

„შეთანხმების ამოქმედებისთანავე, მხარეთა კომპეტენტური ორგანოების მიერ გაცემული მოქმედი მართვის მოწმობის მფლობელები, თეორიული ან პრაქტიკული გამოცდის ჩაბარების გარეშე შეძლებენ მიიღონ, თანაბარი ძალის მქონე მართვის მოწმობა იმ სახელმწიფოში, რომელიც მათ კანონიერ საცხოვრებელს წარმოადგენს. შეთანხმებით განსაზღვრულია, რომ დოკუმენტის ძალაში შესვლის შემდგომ, თეორიული და პრაქტიკული გამოცდების ჩაბარების გარეშე, გადაცვლას დაექვემდებარება მართვის მოწმობის AM“, „A“,„A1“, „A2“, „B“, „B1“, „C“, „D“, „C1“, „D1“, „BE“, „CE“, „DE“,„C1E“, „D1E“კატეგორიები/ქვეკატეგორიები.

საქართველოს მთავრობასა და საბერძნეთის რესპუბლიკის მთავრობას შორის ეროვნული მართვის მოწმობების ურთიერთაღიარებისა და გადაცვლის შესახებ შეთანხმებას, 2024 წლის 26 ივნისს, საბერძნეთის რესპუბლიკაში, ათენში მოეწერა ხელი.

მსგავსი ტიპის შეთანხმება საქართველოს, ასევე, გაფორმებული აქვს, ესპანეთის სამეფოსთან და ირლანდიასთან, სადაც ქართული მართვის მოწმობების გადაცვლა უკვე შესაძლებელია", - ვკითხულობთ ინფორმაციაში.