ეკონომიკა

რუსეთმა აფხაზეთიდან მანდარინის იმპორტი აკრძალა. ოფიციალური ვერსიით, აკრძალვა გამოწვეულია იმით, რომ მანდარინებში მავნებელი, დასავლური ყვავილის ტრიპსი აღმოაჩინეს. თუმცა, აფხაზური მხარის თქმით, ამ გზით რუსეთი აგრძელებს მასზე „შურისძიებას“ ნაკისრი ვალდებულებების შეუსრულებლობის გამო.

რუსეთთან საზღვარზე 20 სატვირთო მანქანა ციტრუსოვანი ხილით დააკავეს. რუსეთის ვეტერინარული და ფიტოსანიტარული ზედამხედველობის ფედერალური სამსახური აცხადებს, რომ არანაირი ემბარგო არ არის შემოღებული და „თუ დასკვნა დაადასტურებს ფიტოსანიტარულ მოთხოვნებთან შესაბამისობას, მაშინ ზემოთაღნიშნულ პარტიას დაუშვებენ“.

მსგავსი აკრძალვა უკვე დაწესდა 2004 წელს. ფორმალური მიზეზი მაშინაც იყო ერთგვარი საბოტაჟი, მაგრამ ნამდვილი მიზეზი ის იყო, რომ რუსეთი უკმაყოფილო იყო აფხაზეთის საპრეზიდენტო არჩევნების შედეგებით.

ამჯერად, დასავლური ყვავილოვანი ტრიპსი მოულოდნელად “გამოჩნდა” მანდარინებში რუსეთ-აფხაზური ურთიერთობების სერიოზული გაუარესების ფონზე.

აფხაზეთის პრემიერ-მინისტრის მოვალეობის შემსრულებელმა ვალერი ბგანბამ ღიად გამოთქვა მოსაზრება, რომ ეს არის რუსეთის პასუხი აფხაზეთის პარლამენტის უარზე რუსეთ-აფხაზური საინვესტიციო შეთანხმების რატიფიცირებაზე.

ოპოზიცია, სამოქალაქო საზოგადოება და ადგილობრივი მეწარმეები აფხაზეთში კატეგორიულად ეწინააღმდეგებოდნენ ამ შეთანხმებას, რომელიც უპრეცედენტო სარგებელს აძლევს რუს ინვესტორებს.

დავა გადაიზარდა მასობრივ საპროტესტო აქციებში და საბოლოოდ ოპოზიციამ ხელში ჩაიგდო სამთავრობო შენობების კომპლექსი. რამდენიმე დღის შემდეგ კი პრეზიდენტი ასლან ბჟანია, რომელიც აქტიურად ლობირებდა შეთანხმებას, იძულებული გახდა გადამდგარიყო.

2 დეკემბერს აფხაზეთის პარლამენტმა კვლავ ხელშეკრულების რატიფიცირების წინააღმდეგ მისცა მხარი.

და მოსკოვს, როგორც ჩანს, ეს საერთოდ არ მოეწონა.

მანამდე კრემლმა უკვე მიიღო არაერთი „დასჯის“ ღონისძიება აფხაზეთის მიმართ, რომელიც უარს ამბობს რუსეთისთვის სასარგებლო, მაგრამ თავისთვის საზიანო გადაწყვეტილებების მიღებაზე. აფხაზეთმა ფაქტობრივად შეწყვიტა რუსეთისგან სოციალურ-ეკონომიკური დახმარების მიღება, მათ შორის, ელექტროენერგიის შეღავათიანი ტარიფებით, რის შედეგადაც რესპუბლიკა აღმოჩნდა ენერგეტიკული კოლაფსის პირას.

ოპოზიციური აფხაზური ტელეგრამის არხები, რუს ბლოგერ იგორ დმიტრიევზე დაყრდნობით, მიანიშნებენ, რომ ყოფილმა პრეზიდენტმა ასლან ბჟანიამ წვლილი შეიტანა სანქციების დაწესებაში.

„ასეთი ქმედებები გამიზნულია აფხაზეთში ისედაც კრიზისული სიტუაციის გამკაცრებისთვის, რათა ზეწოლა მოხდეს საზოგადოებაზე და შემდგომში რუსული ფინანსური დახმარების აღდგენა დაუკავშირონ საინვესტიციო კანონის პროექტის მიღებას, ასევე – ბჟანიას ხელისუფლებაში დაბრუნებას“, – წერს ოპოზიცია Telegram-ზე.

წყარო: JAMnews

ამერიკის შეერთებული შტატების საპრეზიდენტო არჩევნებში დონალდ ტრამპის გამარჯვების ფონზე, საერთაშორისო ბირჟაზე ოქროს და ვერცხლის ფასები შემცირდა. ერთთვიან პერიოდში კორექციის მაჩვენებელი 4%-ს შეადგენს, ხოლო უნცია ოქროს ფასი ამჟამად 2,630 დოლარია.

ძვირფასი მეტალების გაიაფება იმ მოცემულობითაა განპირობებული, რომ ტრამპის ერთ-ერთ მთავარ დაპირებას მსოფლიოს მასშტაბით ომების და კონფლიქტების დასრულება წარმოადგენს, თავად ეს მოცემულობა კი ოქროსა და ვერცხლის ინვესტორებისთვის სასურველი არ არის, რადგან ძვირფასი მეტალების ღირებულებას სწორედ გეოპოლიტიკური რისკების დაგროვება განსაზღვრავს.

მართალია, ერთკვირიან პერიოდში ოქრო გაიაფებულია, თუმცა ერთწლიან პერიოდში მისი ფასი მაინც 30%-ითაა გაზრდილი, ამიტომ ეს ბოლოდროინდელი კლება მინიმალურ კორექციად შეიძლება ჩაითვალოს.

ზოგადად, ინვესტორები ოქროს პორტფელის დივერსიფიკაციის და გლობალური კრიზისებისგან თავის დაზღვევის მიზნით ყიდულობენ. გარდა ამისა, ოქროს უმსხვილეს შემსყიდველთა შორის არიან ცენტრალური ბანკები და გლობალური საფინანსო ინსტიტუტები, რომელთაც ოქრო რეზერვების შესავსებად სჭირდებათ.

ოქროს ხშირად მოიხსენიებენ, როგორც კრიზისისგან თავის დაზღვევის საშუალებას, რაც იმ ფაქტითაა განპირობებული, რომ ოქრო მაშინაც კი ინარჩუნებს თავის ღირებულებას, როდესაც გლობალური ეკონომიკური და გეოპოლიტიკური ვითარება მნიშვნელოვნად უარესდება და კრიზისის რისკები იზრდება. როცა რისკები იკლებს, ოქროს ფასი მცირდება, რაც ლოგიკური და მოსალოდნელია.

ეკონომიკის მინისტრი ლევან დავითაშვილი გერმანიის ელჩის შეფასებას, რომ მაღალი ეკონომიკური ზრდა უკრაინაში ომის ეფექტმა განაპირობა, გულდასაწყვეტს უწოდებს.

ჟურნალისტების კითხვის საპასუხოდ, დავითაშვილმა აღნიშნა, რომ ომს გარკვეული პოზიტიური ეფექტი ჰქონდა, თუმცა მისი მტკიცებით, ქვეყნის ეკონომიკის ზრდა დიდწილად წლების წინ გატარებულ მნიშვნელოვან რეფორმებს უკავშირდება.

"ძალიან გულდასაწყვეტია, როდესაც ასეთი მნიშვნელოვანი პარტნიორი ქვეყნის წარმომადგენელი ასეთი ფორმით საუბრობს, რასაც არ აქვს ბოლომდე ეკონომიკური საფუძველი. ჩვენ, ყოველთვის ვსაუბრობდით რუსული ფაქტორის და ომის ფაქტორის ეფექტზე ჩვენს ეკონომიკაში, პროფესიონალები თანხმდებიან, რომ ამას გააჩნია გარკვეული ეფექტი პოზიტიური ეფექტი ეკონომიკურ ზრდაში, თუმცა ეს არის გადაჭარბებული, რომ საქართველოს ეკონომიკური პროგრესი ბოლო წლებში და განსაკუთრებით ბოლო წელს, არის დაკავშირებული მხოლოდ ომთან და გეოპოლიტიკურ ვითარებასთან. იგივე გეოგრაფიაში ძალიან ბევრი ქვეყანა, რომლებსაც უფრო ლიბერალური ეკონომიკური ურთიერთობები გააჩნიათ რუსეთთან, არ იზრდება ისეთივე მაღალი ტემპით, როგორითაც საქართველოს ეკონომიკა. ჩვენ ბევრი შემზღუდავი ფაქტორი გაგვაჩნია, ამის მიუხედავად, საქართველოს ეკონომიკა ყველაზე სწრაფად მზარდია არა მხოლოდ ევროპაში, სამხრეთ კავკასიასა და ცენტრალური აზიის ქვეყნებთან მიმართებით. ამავე დროს, ეს არაა მხოლოდ ჩვენი შეფასება, რომ სწრაფად გავიზრდებით მომავალ წლებში, ამას ადასტურებს ყველაზე ავტორიტეტული საერთაშორისო საფინანსო ინსტიტუტების პროგნოზებიც.

ეს შეიძლება იყოს 2%-იანი ეფექტი, რომელიც იგივე შუა დერეფნის როლს და მნიშვნელობას ზრდის და ეს რა თქმა უნდა, არის პოზიტიური ფაქტორი ჩვენი ეკონომიკისთვის, მაგრამ დიდწილად საქართველოს ეკონომიკური ზრდა განპირობებულია იმ მნიშვნელოვანი რეფორმებით, რომლებიც წლების წინ გავატარეთ",- განაცხადა დავითაშვილმა.

ცნობისთვის, გერმანიის ელჩმა, პეტერ ფიშერმა BMGtv-სთან ვრცელ ინტერვიუში საქართველო გერმანიის ურთიერთობებზე ისაუბრა და პრობლემებზე, რომელიც საქართველოს ევროინტეგრაციის გზაზე აქვს. მან განაცხადა, რომ ეკონომიკური ზრდის მაღალი მაჩვენებელი არის მოულოდნელი მოგება უკრაინაზე რუსეთის თავდასხმიდან და ასეთი ტიპის მოგება არ გრძელდება.