ვერსიანიუსი
ახალი ამბები
82 წლის ასაკში გარდაიცვალა აშშ-ის ყოფილი სენატორი ჯო ლიბერმანი. ის 24 წლის განმავლობაში იყო სენატის წევრი. 2000 წელს ელ გორმა საპრეზიდენტო კამპანიისას ვიცე-პრეზიდენტობის კანდიდატად დაასახელა. ის პირველი ებრაელი იყო, ვინც აშშ-ის პოლიტიკაში ასეთი მაღალი პოსტისთვის იბრძოდა.
ოთხი წლის შემდეგ ლიბერმანი საპრეზიდენტო არჩევნებში დემოკრატიული პარტიის კანდიდატობისთვის იბრძოდა.
ლიბერმანი ცნობილი იყო, როგორც მკაცრი კურსის მომხრე საგარეო პოლიტიკაში. ის საკვანძო როლს თამაშობდა საშინაო უსაფრთხოების სამინისტროს შექმნაში, რაც 2001 წლის 11 სექტემბრის ტერაქტს მოჰყვა.
ის მჭიდროდ თანამშრომლობდა ორ წამყვან რესპუბლიკელ კოლეგასთან, ჯონ მაკკეინთან და ლინდსი გრემთან, განსაკუთრებით ერაყში აშშ-ის სამხედრო პოლიტიკის საკითხებზე. ამის გამო ის დემოკრატიული პარტიიდან ვეღარ მოხვდა სენატში, მაგრამ დამოუკიდებელ კანდიდატად მოახერხა არჩევნებში გამარჯვება და სენატში დაბრუნება.
2008 წლის აგვისტოში, რუსეთ-საქართველოს ომის შემდეგ, ჯო ლიბერმანი და ლინდსი გრემი პრეზიდენტობის კანდიდატის, ჯონ მაკკეინის ინიციატივით ჩავიდნენ საქართველოში, რათა საქართველოს ხელისუფლებისთვის სოლიდარობა გამოეხატათ. ეს არ ყოფილა მისი ერთადერთი ვიზიტი საქართველოში. ლიბერმანი გულისყურით ადევნებდა თვალს და ეხმაურებოდა ქვეყანაში მიმდინარე პროცესებს.
სწავლულებმა აშშ-დან და ბრაზილიიდან, გენეტიკურად მოდიფიცირებული ტრანსგენური ძროხა შექმნეს, რომელიც ადამიანის ისნულინის შემცველ რძეს იძლევა. პერსპექტივაში, ასეთ ცხოველებს შეუზლიათ გამოიმუშაონ ადამიანებისთვის საჭირო ნივთიერებების მარაგი. მკვლევარებმა ადამიანის დნმ-ის სპეციფიკური სეგმენტი, რომელიც კოდირებს პროინსულინს, ჩანერგეს ძროხის ათი ემბრიონის უჯრედულ ბირთვში. შემდეგ კი ის ჩვეულებრივი ძროხის საშვილოსნოში მოათავსეს.
შედეგად, ბუნებრივი გზით დაიბადა ტრანსგენური ხბო, რომელიც ახლა უკვე რძესაც იძლევა. სპეციალისტებმა ვერ შეძლეს ამ გენმოდიფიცირებული ცხოველის განაყოფიერება, თუმცა მიაჩნიათ, რომ ეს ემბრიონის ჩამოყალიბების მეთოდით იხსნება. საბოლოოდ, სწავლულებმა „აიძულეს“ ძროხა, რძე ექსპერიმენტული ჰორმონალური ინდუქციის გზით მოეცა. მასში აღმოაჩინეს სპეციფიკური ცილები, რომელიც ადამიანის ინსულინის ანალოგიურია.
მეგობრების საერთოდ არარსებობა ადამიანის ჯანმრთელობისთვის ისეთივე მავნეა, როგორც თამბაქოს მოწევა, - ასეთ გასაოცარ დასკვნამდე მივიდნენ ჰარვარდის უნივერსიტეტის მკვლევარები. უმეგობრო ადამიანი ზუსტად ისევე რისკავს ამ ცხოვრებიდან ნაადრევად წასვლას, როგორც დღეში ორი კოლოფი სიგარეტის მწეველები. ამერიკელმა მკვლევარებმა კავშირი აღმოაჩინეს მარტოობასა და სისხლში სპეციფიკურ ცილებს შორის, რაც ინფარქტსა და ინსულტს იწვევს, თრომბების წარმოქმნის გზით.
ცნობილია, რომ სოციალური იზოლაცია იწვევს ორგანიზმის სტრესულ რეაქციას, იზრდება ცილა ფიბრინოგენის მაჩვენებელი. სწავლულებმა ერთმანეთს შეადარეს ფიბრინოგენის დონე მეგობრებისა და ახლობლების რაოდენობასთან და გასაოცარი კავშირი აღმოაჩინეს. რაც ნაკლები იყო ეს რაოდენობა, მით მეტი აღმოჩნდა ცილის დონე.
ბრიტანელმა მკვლევარებმა Alcohol Health Alliance-დან დაადგინეს, რომ შაქრის მაქსიმალური, დღიური დოზის მისაღებად საკმარისია, ადამიანმა დღეში მხოლოდ ორი ჭიქა ღვინო მიირთვას. დამოუკიდებელი ლაბორატორიის სპეციალისტებმა ნისლიან ალბიონზე ცნობილი ბრენდების წითელი, თეთრი, ვარდისფერი და ცქრიალა ღვინოები შეისწავლეს. დადგინდა, რომ ზოგიერთი სახეობის ერთი ბოთლი სასმელი 60 გრამამდე შაქარს შეიცავს, რაც ერთ მინანქრიან დონატში შაქრის შემცველობასაც კი აღემატება. ჯანდაცვის ეროვნული სამსახურის რეკომენდაციის თანახმად, ზრდასრულმა ადამიანმა დღეში მაქსიმუმ 30 გრამი შაქარი შეიძლება მიიღოს. ასე რომ, დღიური ლიმიტის მისაღწევად, საკმარისია, ადამიანმა ორი ჭიქა ღვინო მიირთვას.
უკრაინის პრეზიდენტმა ვოლოდიმირ ზელენსკიმ განაცხადა, რომ პუტინისთვის საკუთარი თავის გარდა, ყველა ტერორისტია, მაშინ, როცა უკვე 20 წელია ტერორით თავად იკვებება. ზელენსკის მწვავე რეაქცია მოჰყვა რუსეთის პრეზიდენტ პუტინის მიერ უკრაინის დაკავშირებას მოსკოვთან მდებარე საკონცერტო დარბაზ „კროკუს სიტი ჰოლზე“ თავდასხმასთან.
კრემლში 25 მარტს გამართულ თათბირზე პუტინმა განაცხადა, რომ 22 მარტს მომხდარი „საშინელი დანაშაული“ შესაძლოა იყოს „მხოლოდ რგოლი მცდელობების მთელი სერიიდან“ მათი მხრიდან, ვინც რუსეთს 2014 წლიდან ებრძვის „კიევის ნეონაცისტური რეჟიმის ხელით“. პუტინის თქმით, ნაცისტები თავიანთი მიზნების მისაღწევად ყოველთვის იყენებდნენ „ყველაზე ბინძურ და არაადამიანურ საშუალებებს“.
25 მარტს ღამით, უკრაინელებისადმი ვიდეომიმართვისას პრეზიდენტმა ვოლოდიმირ ზელენსკიმ განაცხადა, რომ დღეს პუტინი ისევ თავის თავს ელაპარაკებოდა და ეს ისევ ტელევიზიით აჩვენეს.
„კვლავ უკრაინას ადანაშაულებს. ავადმყოფი და ცინიკური არსება. მისთვის ყველა ტერორისტია საკუთარი თავის გარდა, მაშინ, როცა უკვე ორი ათწლეულია ტერორით თავად იკვებება. სწორედ ის არის ტერორისთვის ყველაზე დიდი ფანჯარა. ის და მისი სპეცსამსახურები. და როცა აღარ იქნება, მასთან ერთად გაქრება მოთხოვნა ტერორსა და ძალადობაზე“, - განაცხადა პრეზიდენტმა ზელენსკიმ.
რუსეთის პრეზიდენტმა პუტინმა ყოველგვარი მტკიცებულებების გარეშე უკრაინა 23 მარტსაც ახსენა, როცა „კროკუსზე“ თავდასხმიდან თითქმის 24 საათის შემდეგ, რუსეთის მოსახლეობისადმი სატელევიზიო მიმართვისას თქვა, რომ თავდამსხმელები მიემართებოდნენ უკრაინისკენ, სადაც მათთვის მომზადებული იყო „ფანჯარა“ საზღვრის გადასაკვეთად. კიევში ეს კატეგორიულად უარყვეს.
- 22 მარტს, საღამოს, ავტომატებით შეიარაღებულმა პირებმა ცეცხლი გახსნეს მოსკოვის ოლქის ქალაქ კრასნოგორსკში მდებარე საკონცერტო დარბაზ „კროკუს სიტი ჰოლში“. შენობაში ძლიერი ხანძარი გაჩნდა. ოფიციალური მონაცემებით, დაიღუპა სულ მცირე 139 ადამიანი და 180-ზე მეტი დაშავდა.
- თავდასხმაზე პასუხისმგებლობა აიღო მსოფლიოში ტერორისტულ ორგანიზაციად გამოცხადებული „ისლამური სახელმწიფოს“ ერთ-ერთმა ფილიალმა(„ხორასანი").
- რუსეთის უშიშროების ფედერალური სამსახურის თანახმად, დაკავებულია 11 პირი, მათ შორის თავდასხმის 4 უშუალო მონაწილე, რომლებიც ტაჯიკეთიდან არიან.
24 და 25 მარტს, სასამართლომ წინასწარი პატიმრობა მიუსაჯა 7 ბრალდებულს. ოთხს ტერაქტში უშუალო მონაწილეობაში ადანაშაულებენ, დანარჩენებს კი - მათ დახმარებაში. - კრემლის პრესმდივანმა პესკოვმა უარი თქვა ეპასუხა ჟურნალისტების შეკითხვისთვის, რატომ ეტყობათ ეჭვმიტანილებს წამების კვალი.
24 მარტს ღამით მოსკოვის ბასმანის სასამართლომ დააპატიმრა მოსკოვის გარეუბანში „კროკუს სიტი ჰოლის“ საკონცერტო დარბაზში შეიარაღებულ თავდასხმაში ბრალდებული ოთხი პირი. 22 მარტის ტერაქტს 137 ადამიანის სიცოცხლე ემსხვერპლა, 182 დაშავდა.
დალერჯონ მირზოევს, მუროდალი რაჩაბალიზოდეს, მუჰამადსობირ ფაიზოვს და შამსიდინ ფარიდუნის სამუდამო პატიმრობა ემუქრებათ ტერორიზმის ბრალდებით. პატიმრობის შესახებ სხდომა დახურულ კარს მიღმა ჩატარდა.
ეჭვმიტანილები ბასმანის სასამართლოს დარბაზებში ნაცემ მდგომარეობაში მიიყვანეს. მირზოევს კისერზე ჰქონდა ცელოფნის პარკის ნაჭრები, რომელიც სახის დასაფარად გამოიყენეს. რაჩაბალიზოდეს დაკავებისას ყური მოაჭრეს. თავის ეს მხარე არ არის ნაჩვენები სასამართლოში გადაღებულ ფოტოებზე. სასამართლომ განაცხადა, რომ ორივემ აღიარა დანაშაული.
ბრალდებულებს დაუნიშნეს თარჯიმანი, ვინაიდან ორმა მათგანმა რუსული არ იცის. გამოძიებამ მოითხოვა, სხდომები დახურულ რეჟიმში გაიმართოს გამოძიების საიდუმლოდ დაცვისა და პროცესის მონაწილეთა და მათი ახლობლების უსაფრთხოების დაცვის მოტივით.
პროცესის იმ ნაწილიდან, რომელიც არ იყო დახურული, ცნობილია, რომ მირზოევი რეგისტრირებული იყო რუსეთის ქალაქ ნოვოსიბირსკში. ის 32 წლისაა, დაქორწინებულია და ჰყავს ოთხი შვილი, მათ შორის წელიწად-ნახევრის ტყუპები. მუროდალიმ თქვა, რომ არის 30 წლის, ცოლიანი და ჰყავს რვა თვის შვილი. შამსიდინ ფარიდუნი არის 25 წლის, დაქორწინებული, დარეგისტრირებულია მოსკოვის მახლობლად, კრასნოგორსკში, სადაც მდებარეობს „კროკუს სიტი ჰოლი“. მუშაობდა პარკეტის ქარხანაში. სწორედ შებოჭილი და მუხლებზე მდგომი ფარიდუნის დაკითხვის ვიდეო გამოჩნდა ომის მომხრე საჯარო ჯგუფებში. ვიდეოში ის ამბობს, რომ მას ხალხის დახოცვაში 500 ათასი რუბლი შესთავაზეს. მოგვიანებით გამოჩნდა ფოტო, სადაც მას სავარაუდოდ ელექტროშოკით აწამებდნენ.
მეოთხე ბრალდებული, 19 წლის მუჰამედსობირ ფაიზოვი, სასამართლო დარბაზში ბორბლებიანი საკაცით შეიყვანეს. მას შიშველ ტანზე სამედიცინო ხალათი ეცვა. გუშინ ის იმყოფებოდა რეანიმაციაში, სადაც ჩაუტარდა დაკითხვა. დაკავებისას მას თვალი ამოუგდეს ბუდიდან. აცხადებენ, რომ მან შეიარაღებული წინააღმდეგობა გასწია. ის ქალაქ ივანოვოში მუშაობდა საპარიკმახეროში. ადრე გავრცელდა ინფორმაცია, რომ ის ქალაქში პოპულარული პარიკმახერი იყო. მოსამართლე ტიმურ ვახრამეევმა ბრალდებულის თანმხლები ექიმებიც კი გაათავისუფლა მისი დაკავების შესახებ სხდომიდან.
გამოძიებას არ დაუსახელებია დანაშაულის სავარაუდო მოტივი. მანამდე საერთაშორისო ტერორისტულმა ორგანიზაცია „ისლამურმა სახელმწიფომ“ აიღო პასუხისმგებლობა „კროკუს სიტი ჰოლზე“ თავდასხმისთვის. საქმეზე სულ 11 ადამიანია დაკავებული. დანარჩენი დაკავებულების შესახებ არაფერია ცნობილი.