რას ფიქრობენ პოლიტიკოსები ლევან ვასაძის ინიციატივაზე
პოლიტიკაში ახლადგამოჩენილი „რაინდი“, “ერთობა, რაობა, იმედის” დამფუძნებელი, ლევან ვასაძე ხელისუფლებას მიმართავს:
„ვაძლევთ ხელისუფლებას 10 დღიან ვადას, გააუქმოს 25 ივნისამდე დაგეგმილი ე.წ. დაანონსებული პრაიდი, რათა არ მისცენ საბაბი ქვეყანაში ესკალაციის და დაპირისპირების პროცესების განვითარებას, რათა ყოველ წელს არ გვიწევდეს სირბილი ამ სისულეებზე. მიიღონ კანონი, რომელიც აკრძალავს გარყვნილების პროპაგანდას ქვეყანაში,”- განაცხადა ლევან ვასაძემ.
საინტერესოა, რას გულისხმობს გაპოლიტიკოსებული „რაინდი“ გარყვნილებაში ან როგორ წარმოუდგენია მისი პროპაგანდის აკრძალვა კანონით. ისე, შეიძლება, ჩავთვალოთ, რომ „გარყვნილების აკრძალვის“ მოთხოვნა „რაინდის“ მხრიდან პოპულიზმია, რადგან სისხლის სამართლის კოდექსით, გარყვნილება სამართლებრიბად უკვე არის დეფინიცირებული და ისჯება შესაბამისი მუხლით. „ვერსია“ დაუკავშირდა ქართველ პოლიტიკოსებს და ჰკითხა, რას ნიშნავს მათთვის გარყვნილება და როგორ წარმოუდგენიათ გარყვნილების პროპაგანდის აკრძალვა?
სანამ პოლიტიკოსების მოსაზრებებს გაგაცნობთ, „ვერსია“ კონსტიტუციონალისტ ლევან ალაფიშვილს კომენტარს გთავაზობთ, რომელიც აღნიშნავს, რომ დემოკრატიული სტანდარტების ფარგლებში აღნიშნული საკითხი უკვე რეგულირებულია და აკრძალვის მოთხოვნა მისაღები ფორმა არ არის:
„როდესაც პოლიტიკოსები ჩვენნაირ საზოგადოებაში ცდილობენ წინასაარჩევნო პერიოდში ეროვნულ სენტიმენტებზე „თამაშს“, კეთილგანწყობის მოპოვებას, ახალი არ არის და სწორედ ამასთან გვაქვს საქმე, თორემ თუ პროფესიით იურისტებს ამას დაეკითხებით, ნახავთ, რომ ეს საკითხი, რა თქმა უნდა, დემოკრატიული სტანდარტების ფარგლებში რეგულირებულია საკმარისად, რაც დემოკრატიულ სტანდარტებს შეესაბამება. აკრძალვა და ამდაგვარი რაღაცები საბჭოური მიდგომა და პოლიციური რეჟიმები უკვე გამოვიარეთ. მაგალითისთვის მოვიყვან „აიიას“ მაგალითს, ზუსტად ამდაგვარი მიმართულების პოლიტიკურმა ორგანიზაციამ მიმართა თბილისის მერიას, ესეც ეროვნულ სენტიმენტებზე მოთამაშე ორგანიზაცია იყო, შესაბამისად, მერიამ მიიღო გადაწყვეტილება, სასამართლო პროცესები წარემართა და როგორც მე ვიცი, საკონსტიტუციო სასამართლოში გადაწყვეტილება ჯერ მიღებული არ არის." - განგვიმარტა ლევან ალაფიშვილმა.
პარტია „თავისუფალი საქართველოს“ ლიდერს, კახა კუკავას გარყვნილების აკრძალვის შესახებ ასეთი მოსაზრება აქვს:
„ფორმებს რაც შეეხება, ეს იურიდიული ნიუანსებია, რომელიც მხოლოდ კონკრეტულ ფორმაში უნდა გადაწყდეს. შემიძლია, გითხრათ მაგალითები. მაგალითად, ისეთი აქცია, როგორიც არის გეი აღლუმი, შეიძლება, რომ ქალაქის ცენტრალურ ადგილებში იყოს აკრძალული. არსებობს კანონი შეკრებებისა და მანიფესტაციების შესახებ, რომელშიც შევა ცვლილება. ვინც დაარღვევს ამ ნორმას, ბუნებრივია, რომ მათზე გავრცელდება ადმინისტრაციული პასუხისმგებლობა. დასჯა ბუნებრივია, არ გულისხმობს იმას, რომ ვიღაც ციხეში ჩასვა. არ უნდა ხდებოდეს თავზე მოხვევა ადამიანებისთვის მასობრივად, იმისთვის, რაც მათთვის მიუღებელია. ამავდროულად გვესმის, რომ უმცირესობას თავისი აკვიატება აქვთ და ამიტომაც უნდა მოინახოს ის გონივრული ზღვარი, როდესაც შეუძლიათ, რომ თავიანთი საქმეებით ისე დაკავდნენ, სხვებს ნერვები არ მოუშალონ. არსებობს დასავლური პრაქტიკა, თავიანთი კლუბები აქვთ და სივრცეები, სადაც იურთიერთობენ და არ იქნება ეს გამაღიზიანებელი. სრულიად აშკარაა, ბოლო წლებში, რასაც ვუყურებთ, რომ მათი ამოცანაა, კონფლიქტში შევიდნენ, ტრადიციულ უმრავლესობასთან. რაც, საერთო ჯამში, ქვეყანაში წესრიგს ხელს უშლის. თუ უნდათ რამის გაკეთება ან რამის გამართვა, გამართონ, მაგრამ არ არის აუცილებელია მის გაკეთება პარლამენტის წინ და არც ქაშვეთის მიმდებარე ტერიტორიაზე“.
„ლეიბორისტული პარტიის“ ერთ-ერთი ლიდერი, გიორგი გუგავა:
„გარყვნილებასთან დაკავშირებით არსებობს დამკვიდრებული ცნება, საზოგადოებრივ-ზნეობრივი, მორალური ნორმების დარღვევა, ალბათ, ითვლება გარყვნილებად, მაგრამ გარყვნილება ამ ეტაპზეც აკრძალულია, ამორალური ქმედებების პროპაგანდირებაც და ქმედებაც. ვერ გეტყვით, რას გულისხმობს კონკრეტულად ლევან ვასაძე პროპაგანდის აკრძალვაში.
სისხლის სამართლის კოდექსის მოქმედი ადმინისტრაციული სამართალდარღვევათა კოდექსი ითვალისწინებს შესაბამის ნორმებს, თუ რა ფორმით უნდა იყოს გარყვნილი ქმედება დასჯადი, რაც გამოიხატება სხვადასხვა ქმედებებში.
კონკრეტული პირი რას გულისხმობს პროპაგანდირებაში ვერ გეტყვით.
მაგალითად, პედოფილია დასჯადია და ასევე ყველა გარყვნილი ქმედება, რომელიც შეურაცხყოფას აყენებს ადამიანს, ან ისეთი ქმედების ჩადენა, რომელიც ირგვლივ მყოფებს შეურაცხჰყოფს და ეწინააღმდეგება საზოგადოდ დადგენილ ზნეობრივ ნორმებს. სხვა მხრივ კი, არ ვიცი, პროპაგანდაში რასგულისხმობს და თუ პედოფილიის პროპაგანდაზეა საუბარი, რა თქმა უნდა, ეს დასჯადი უნდა იყოს.“
„გირჩის“ ერთ-ერთი ლიდერი, იაგო ხვიჩია:
„იმდენად არ მაინტერესებს ვასაძის მოსაზრებები გარყვნილებაზე, რომ კომენტარები ვაკეთო ამაზე... მას აქვს თავისი პოლიტიკური დღის წესრიგი, რომლის კომენტირება არ მგონია ჩემი საქმე. ზოგადად, აკრძალული უნდა იყოს მხოლოდ ძალადობა.“
საპარლამენტო უმრავლესობის წარმომადგენელი, დეპუტატი ლადო კახაძე:
„ადამიანის უფლება არის მოითხოვოს ან ეს, ან ის. ერთმა მოითხოვოს ლგბტ-ს პროპაგანდა, მეორემ - საწინააღმდეგო პროპაგანდა. ადამიანს აქვს ყველაფრის მოთხოვნის უფლება, ოღონდ ეს უნდა მოხდეს კონსტიტუციის ფარგლებში. მე დიდი ხნის კაცი ვარ და ჩემზე ვერავინ ვერ იმოქმედებს დედამიწაზე უარყოფითი ფორმით, გამზარდა ოჯახმა, გვარმა, საზოგადოებამ, სკოლამ. მე ექიმი ვარ და ჩემთვის განურჩევლად ყველა ადამიანი უფლის საჩუქარია.“
„ვერსია“ ლევან ვასაძის პოლიტიკური მოძრაობის ერთ-ერთ ლიდერს, შოთა გლურჯიძესაც დაუკავშირდა:
_ საერთოდ, რაც არის საზოგადოებისთვის მიუღებელი, ის უნდა აიკრძალოს. ბატონმა ლევანმა თქვა, რომ ამის აგიტაცია უნდა აიკრძალოს, თორემ მაგას როგორ აკრძალავ, ადამიანის კერძო ცხოვრება პრივატულია და რასაც აკეთებს სახლში, ამას ვერავინ აკრძალავს. თუმცა, ამის აგიტაცია და პროპაგანდა უნდა აიკრძალოს. იგულისხმება ლგბტ თემის პროპაგანდის აკრძალვა, თორემ ეს საზოგადოება არსებობს და ყოველთვის არსებობდა. ამის აკრძალვა, მგონი, აბსურდია. რაც ჩვენს ტრადიციულ მორალს ეწინააღმდეგება, არ გვინდა, იმის პროპაგანდა და მანიფესტაცია ხდებოდეს.
_ ბატონო შოთა, იურისტები და პოლიტიკოსები მიიჩნევენ, რომ ვასაძის მოთხოვნა არის პოპულიზმი და არჩევნების წინ საზოგადოებაზე სენსიტიური თემით „თამაში“...
_ ე.ი. ამბობენ, რომ სენსიტიტური თემაა და საზოგადოებას აღელვებს ეს თემა და ხელისუფლება უნდა შეეცადოს, რომ ასეთი რამ არ დაუშვას. მე ხომ არ ვდემონსტრირებ და ვმანიფესტირებ ჩემი სექსუალური ცხოვრებით? ვცხოვრობთ ჩვენი ცხოვრების წესით და ვცდილობთ, ეს იყოს ჩვენი ინტიმური ცხოვრება. ამის დემონსტრაცია და მანიფესტირება რა უბედურებაა?!
_ ბატონო შოთა, პირდაპირ გკითხავთ, გარყვნილების პროპაგანდის აკრძალვის მოთხოვნა აბსურდული არაა?
_ თუ ეს შეუძლებელი მოთხოვნაა, ევროკავშირის წევრმა ქვეყანამ უმრავლესი ხმით გუშინწინ მიიღო ამ პროპაგანდის აკრძალვა. ჩვენ იმასვეს ვითხოვთ ჩვენი პარლამენტისგან. ვმუშაობთ ამ კანონპროექტზე და შევიტანთ აუცილებლად პარლამენტში... ეს ყველაფერი ხდება იმისთვის, რომ აირიოს აქ სიტუაცია და დაპირისპირება მოხდეს.
_ ისე, რაიმე აქტოვობით ხომ არ აპირებთ ლგბტ თემის პრაიდის მსვლელობის ხელშეშლას?
_ არა, პირიქით, ჩვენ ვითხოვთ, ხელისუფლებამ აღკვეთოს, რომ რაღაც პრობლემები არ იყოს.