Category Blog

ტაივანელი კაცი ცოლს ჰიგიენური ნორმების დაუცველობის გამო დაშორდა. კაცის თქმით, მისი ცოლი, ლინი წელიწადში მხოლოდ ერთხელ ბანაობდა და იხეხავდა კბილებს.

სასამართლოზე კაცმა თქვა, რომ ის დიდი ფსიქოლოგიური წნეხის ქვეშ იყო,  რადგან წყვილს სექსი წელიწადში მხოლოდ ერთხელ, მისი ყოფილი ცოლის ბანაობის შემდეგ ჰქონდა.

გასაკვირი არაა, რომ ცოლ-ქმარს, დაახლოებით 10-წლიანი თანაცხოვრების განმავლობაში, შვილიც არ ჰყოლია.

მექსიკაში ვითარება უკიდურესად დაიძაბა. ქვეყნის უმსხვილესი ნარკოკარტელის ლიდერის მკვლელობამ, რასაც წინ სისხლიანი სპეცოპერაცია უძღოდა, ქვეყნის რამდენიმე შტატში ნამდვილი ქაოსი და შეიარაღებული დაპირისპირებები გამოიწვია. კარტელის მეთაურის სიკვდილის შემდეგ, დაჯგუფების წევრებმა საპასუხო იერიშები წამოიწყეს, რის შედეგადაც მექსიკის ჩრდილოეთ და ცენტრალურ რეგიონებში ვითარება კონტროლიდან გამოვიდა.

კრიმინალური დაჯგუფების წევრებმა ათეულობით სატვირთო ავტომობილი და ავტობუსი გაიტაცეს, ცეცხლი წაუკიდეს და ცენტრალური მაგისტრალები ჩახერგეს. პარალელურად, დაფიქსირდა თავდასხმები სამთავრობო შენობებსა და პოლიციის განყოფილებებზე, თვითმხილველები კი ავტომატური ცეცხლსასროლი იარაღიდან უწყვეტი სროლის ხმას ადასტურებენ. შექმნილი ვითარების გამო მოსახლეობაში პანიკაა – ადგილობრივი ხელისუფლება მოქალაქეებს მოუწოდებს, არ დატოვონ სახლები, რადგან შეწყვეტილია სასწავლო პროცესი და დაიხურა სავაჭრო ცენტრები თუ აეროპორტები.

ექსპერტების შეფასებით, ლიდერის ლიკვიდაციამ კარტელის შიგნით ძალაუფლების ვაკუუმი შექმნა, რის გამოც ახლა გავლენისთვის ერთმანეთს არა მხოლოდ სამართალდამცავები და კრიმინალები, არამედ დაჯგუფების შიგნით არსებული სხვადასხვა ფრაქციებიც უპირისპირდებიან. პარალელურად, მეტოქე კარტელები ცდილობენ დასუსტებული დაჯგუფების ტერიტორიების ხელში ჩაგდებას, რაც კონფლიქტის მასშტაბებს კიდევ უფრო ზრდის.

მექსიკის პრეზიდენტმა ქვეყნის მასშტაბით ეროვნული გვარდიისა და არმიის დამატებითი ქვედანაყოფების მობილიზება უკვე გამოაცხადა და აღნიშნა, რომ სახელმწიფოს მიზანი წესრიგის აღდგენა და მშვიდობიანი მოქალაქეების დაცვაა, რადგან ქვეყანა კრიმინალური ტერორის წინაშე პოზიციებს არ დათმობს.

 ამ დროისთვის არსებული მონაცემებით, შეტაკებების შედეგად არიან გარდაცვლილები და დაჭრილები როგორც სამართალდამცავებს, ისე თავდამსხმელებს შორის, საერთაშორისო საზოგადოება კი მექსიკაში მყოფ საკუთარ მოქალაქეებს უსაფრთხოების განსაკუთრებული ზომების მიღებისკენ მოუწოდებს.

აშშ-ის პრეზიდენტი დონალდ ტრამპი აცხადებს, რომ გლობალურ 10%-იან ტარიფებს 15%-მდე ზრდის.

ამის შესახებ დონალდ ტრამპი სოციალურ ქსელში დაწერა. 

„აშშ-ის უზენაესი სასამართლოს მიერ მრავალთვიანი ფიქრის შედეგად ტარიფებთან დაკავშირებით გუშინ გამოქვეყნებული აბსურდული, ცუდად შედგენილი და სრულიად ანტიამერიკული გადაწყვეტილების საფუძვლიანი, დეტალური და ამომწურავი განხილვის შემდეგ, ეს განცხადება ჩაითვალოს იმის დასტურად, რომ მე, როგორც ამერიკის შეერთებული შტატების პრეზიდენტი, დაუყოვნებლივ ვზრდი გლობალურ 10%-იან ტარიფებს იმ ქვეყნებისთვის, რომელთა უმეტესობა ათწლეულების განმავლობაში დაუსჯელად „ძარცვავდა“ შეერთებულ შტატებს (ვიდრე არ გამოვჩნდი მე) სრულად დასაშვებ და სამართლებრივად გამყარებულ 15%-მდე“, – წერს ტრამპი.

ცნობისთვის, აშშ-ის უზენაესმა სასამართლომ ქვეყნის პრეზიდენტის, დონალდ ტრამპის მიერ 2025 წლის 3 აპრილს დაწესებული საგანგებო ტარიფები უკანონოდ ცნო. სასამართლომ დაადგინა, რომ დონალდ ტრამპმა დაარღვია ფედერალური კანონი, როდესაც ცალმხრივად დააწესა ფართომასშტაბიანი ტარიფები მთელ მსოფლიოში.

რუსეთის ხელისუფლებამ სრულად აკრძალა მიმოწერისა და სატელეფონო კომუნიკაციის პოპულარული პლატფორმა WhatsApp-ი, რომელსაც ქვეყანაში 100 მილიონზე მეტი მომხმარებელი ჰყავდა.

ინფორმაცია კრემლის პრესსპიკერმა, დიმიტრი პესკოვმა ოფიციალურად დაადასტურა და განაცხადა, რომ ამის მიზეზი WhatsApp-ის მფლობელი კომპანია Meta-ს მიერ ადგილობრივი კანონმდებლობის უგულებელყოფა და სახელმწიფო ორგანოებთან თანამშრომლობაზე უარის თქმა გახდა. გამოქვეყნებულ წერილში პესკოვმა კიდევ ერთხელ აღნიშნა, რომ ამჟამად რუსეთის მოქალაქეებს შეუძლიათ WhatsApp-ის რუსული ანალოგით, MAX-ით ისარგებლონ, რომელიც, პრესსპიკერის თქმით, გაცილებით უფრო კარგი და მარტივად გამოსაყენებელი საკომუნიკაციო პლატფორმაა. პლატფორმა, რომელშიც ჩაშენებულია არაერთი სამთავრობო პროგრამაც, რათა მოქალაქეებს საჯარო სერვისებზე წვდომა მობილურიდანვე, სახლიდან გაუსვლელად ჰქონდეთ.

აღსანიშნავია, რომ ქვეყანაში WhatsApp-ის სრულად დაბლოკვისთვის მზადება რუსეთის ხელისუფლებამ ჯერ კიდევ 6 თვის წინ დაიწყო, როცა მარკ ცუკერბერგის კომპანია Meta-ს ადგილობრივი კანონმდებლობის დარღვევისთვის ჯარიმები გამოუწერა და მოგვიანებით ექსტერმისტულ ორგანიზაციათა ნუსხაშიც შეიყვანა. პარალელურად, საინფორმაციო საშუალებებით კრემლმა აქტიურად დაიწყო საკუთარი ანალოგის, MAX-ის რეკლამირება, რომელიც სამოქალაქო აქტივისტებისა და ტექნოლოგიური სექტორის ექსპერტების შეფასებით, რუსეთის ხელისუფლების ხელში მოსახლეობაზე ინფორმაციის შეგროვებისა და მათი გამუდმებული კონტროლის კიდევ ერთ ხელსაწყოდ იქცევა. WhatsApp-ის დაბლოკვის ფონზე მოსკოვში, კომუნიკაციების ეროვნული კომისიის შესასვლელთან ხანმოკლე აქცია გაიმართა, სადაც აქტივისტებმა “როსკომნაძორის” კარებს ბოქლომი დაადეს. დემონსტრაციის მონაწილეები მალევე დააკავეს.

ანალიტიკოსების ნაწილი მიიჩნევს, რომ WhatsApp-ის აკრძალვა ბოლომდე ეფექტური ვერ იქნება, რადგან პლატფორმის აქტიური მომხმარებლები და ის პირები, ვინც მაქსიმალურად ცდილობენ, თავი აარიდოს სახელმწიფო კონტროლს, აუცილებლად გამოიყენებენ VPN-სა და მსგავს სისტემებს, რომლებიც ადამიანს საშუალებას აძლევენ, სრულიად სხვა ქვეყნიდან შევიდნენ პლატფორმაზე ისე, რომ ეს სადაზვერვო ორგანოებმა ვერ დააფიქსირონ.