ეკონომიკა

შპს „რანჩო გარდაბანმა" გერმანულ კომპანიასთან 5 წლიანი თანამშრომლობის ხელშეკრულება გააფორმა. ამის შესახებ კომპანიის იურისტმა, არმაზ ხარძიანმა BM.GE-სთან განაცხადა.

ხარძიანის განმარტებით, ხელშეკრულება ითვალისწინებს სასათბურე მეურნეობის აშენებას, სადაც კომპანია ბოსტნეულსა და ვარდებს მოიყვანს. მისი ინფორმაციით, გერმანული კომპანია განსაკუთრებით ვარდებით არის დაინტერესებული.

“ჯამში 26 ჰა მიწის ნაკვეთი გვაქვს, თუმცა საწყის ეტაპზე 3 ჰა მიწის ათვისებას ვაპირებთ. პროექტის საინვესტიციო ღირებულება 1.5 მლნ ლარს შეადგენს, საიდანაც 500 000 ლარს სახელმწიფო აფინანსებს, ხოლო დარჩენილ 1 მლნ ლარს ჩვენი ძალებით უზრუნველყოფთ.

გერმანელები ჩამოსულები იყვნენ, ნიადაგი და კლიმატი შეისწავლეს და გვითხრეს, რომ იდეალური გარემოა იმ ვარდის ჯიშისთვის, რომელიც მათ სურთ“,- ამბობს იურისტი და დასძენს, რომ კომპანია ვარდის ნერგების იმპორტს ნიდერლანდებიდან გეგმავს. შპს „რანჩო გარდაბანი" ამ ჯიშის ვარდების ექსკლუზიური მწარმოებელია.

არმაზ ხარძიანის თქმით, 1 წლის შემდეგ „რანჩო გარდაბანი“ სამაცივრე მეურნეობის მოწყობასაც გეგმავს.

bm.ge

3 ივნისიდან ქუთაისსა და ლიონს შორის რეგულარული ავიამიმოსვლა დაიწყება. ახალი პირდაპირი მიმართულებით რეისები ქუთაისის დავით აღმაშენებლის სახელობის საერთაშორისო აეროპორტიდან ლიონის სენტ ეგზიუპერის აეროპორტის მიმართულებით და პირიქით, კვირაში ორი სიხშირით (სამშაბათი, შაბათი) შესრულდება.

როგორც საქართველოს აეროპორტების გაერთიანებაში აცხადებენ, გადაწყვეტილება ამის შესახებ ევროპის, ახლო აღმოსავლეთისა და აფრიკის რეგიონების ეკოლოგიურად ყველაზე მდგრადმა ავიაკომპანიამ, Wizz Air-მა საქართველოს აეროპორტების გაერთიანებასთან ინტენსიური მოლაპარაკებების შედეგად მიიღო.

აეროპორტების გაერთიანების გენერალური დირექტორის, ირაკლი ქარქაშაძის განცხადებით, ახალი მიმართულება საშუალებას იძლევა, გაზარდოს მოგზაურობის შესაძლებლობა საქართველოს მოქალაქეებისთვის და განამტკიცოს კავშირი საქართველოსა და საფრანგეთს შორის.

„ივნისიდან ქუთაისის საერთაშორისო აეროპორტის მგზავრებს კიდევ ერთ სასიამოვნო სიახლეს შევთავაზებთ. ლიონი იქნება საფრანგეთის მეორე ქალაქი, რომელიც, პარიზის შემდეგ, საქართველოს პირდაპირი საჰაერო გზით დაუკავშირდება. ახალი მიმართულება უზრუნველყოფს კომფორტულ მგზავრობას ქუთაისსა და საფრანგეთის ერთ-ერთ უმნიშვნელოვანეს კულტურულ-ეკონომიკურ ცენტრს შორის, ასევე, ეს იქნება სასიამოვნო სიახლე ქართველი ქომაგებისთვის, მარტივად შეძლონ დასწრება ლიონის „ოლიმპიკში“ მოთამაშე საქართველოს ფეხბურთის ეროვნული ნაკრების თავდამსხმელის, გიორგი მიქაუტაძის საკლუბო მატჩებზე და იხილონ ის ევროპული ფეხბურთის ყველაზე პრესტიჟულ ტურნირზე – ჩემპიონთა ლიგაზე“, – განაცხადა ირაკლი ქარქაშაძემ.

ბილეთების შეძენა ლიონის მიმართულებით ავიაკომპანიის ვებგვერდზე www.wizzair.com უკვე შესაძლებელია. ამ ეტაპზე Wizz Air-ი ქუთაისის საერთაშორისო აეროპორტიდან ფრენებს ევროპისა და ახლო აღმოსავლეთის 15 ქვეყნის 23 მიმართულებით ასრულებს, აპრილიდან კი ფრენებს კვლავ განაახლებს მადრიდისა და ჰამბურგის მიმართულებით.

საქართველოს ენერგეტიკისა და წყალმომარაგების მარეგულირებელმა ეროვნულმა კომისიამ (სემეკ)  საჯარო სხდომაზე შპს „ვარკეთილაირის“ ბუნებრივი გაზის განაწილების ლიცენზიის გაუქმების შესახებ იმსჯელა. აღნიშნულის საფუძველს წარმოადგენს შპს „თბილისი ენერჯის“ მიერ შპს „ვარკეთილაირის“ 100%-იანი წილის შეძენა და მთლიანი აქტივის  - გაზგამანაწილებელი ქსელისა და მასთან დაკავშირებული ინფრასტრუქტურის საკუთრებაში გადატანა.

შპს „ვარკეთილაირის“ 18 200 აბონენტსშპს „თბილისი ენერჯი“ უწევს მომსახურებას. აღნიშნულ აბონენტებზე ვრცელდება შპს „თბილისი ენერჯისთვის“ დადგენილი ტარიფები (53,971 თეთრი/კუბ.მ) ნაცვლად შპს „ვარკეთილაირისთვის“ დადგენილი ტარიფისა (57,061 თეთრი/კუბ.მ).  

შპს „ვარკეთილაირი“ ოპერირებდა ვარკეთილისა და პატარა ლილოს დასახლებებში. 

საქართველოს ენერგეტიკისა და წყალმომარაგების მარეგულირებელი ეროვნული კომისიის (სემეკ) თავმჯდომარის, დავით ნარმანიას განცხადებით, საქართველოში 2024 წელს ელექტროენერგიის მოხმარება 2023 წელთან შედარებით 5.3%-ით გაიზარდა. ამასთანავე, როგორც სემეკის თავმჯდომარე აღნიშნავს, 2024 წელი ჰიდროლოგიური თვალსაზრისით ერთ-ერთი საუკეთესო წელი იყო. გასულ წელს ჰიდროელექტროსადგურებმა 11,2 მლრდ კვტ.სთ ელექტროენერგია გამოიმუშავეს, რაც საქართველოს ელექტროენერგეტიკის ისტორიაში რეკორდული მაჩვენებელია.

    „გასულ წელს არასაყოფაცხოვრებო სექტორში 2023 წელთან შედარებით მოხმარება 9.3%-ით გაიზარდა. მათ შორის, პირდაპირი მომხმარებლების მოხმარება -  13.1%-ით. ამასთანავე, 2024 წელს, საყოფაცხოვრებო (მოსახლეობა) სექტორში ფიქსირდება ელექტროენერგიის მოხმარების რეკორდული მაჩვენებელი - 3,0 მილიარდი კვტ.სთ, რაც 2023 წლის მაჩვენებელზე 9,2%-ით მაღალია. ასევე, აღსანიშნავია, რომ 2024 წლის ზაფხულში ელექტროენერგიის მოხმარებამ გადააჭარბა ზამთრის პერიოდში მოხმარებას, რაც განპირობებულია ქვეყნის ეკონომიკური განვითარებით, მათ შორის, ტურიზმის ზრდით. ამასთანავე, საგულისხმოა საყოფაცხოვრებო სექტორში კონდიცირების სისტემის სულ უფრო აქტიური გამოყენება“, - აღნიშნა დავით ნარმანიამ.

    მისივე ინფორმაციით,  2024 წელს ექსპლუატაციაში შევიდა 3 ჰიდროელექტროსადგური ჯამური სიმძლავრით 48,7 მგვტ, მათ შორის მნიშვნელოვანი იყო ხობი-2 ჰესი 45,7 მგვტ სიმძლავრით, რაც კიდევ უფრო მეტად გაზრდის ელექტროენერგიის გამომუშავებას.