ქართული ღვინის დეგუსტაცია ვარშავაში, ღვინისა და ალკოჰოლიანი სასმელების საერთაშორისო გამოფენის Warsaw Wine Expo ფარგლებში გაიმართა. პოლონეთის ერთ-ერთი მასშტაბური გამოფენა Warsaw Wine Expo 11-13 მარტს გაიმართა.

ღვინის ეროვნული სააგენტოს ცნობით, ღონისძიებას პროფესიონალი სომელიე, პოლონეთის სომელიეთა ასოციაციის წევრი, ვოიჩეხ სტარჟიცკი უძღვებოდა.

„ღვინის ეროვნული სააგენტოს, სააგენტოს კონტრაქტორი მარკეტინგული კომპანიის „People PR” და პოლონური ღვინის ჟურნალის Trybuszon მხარდაჭერით გამართულ დეგუსტაცია-სემინარზე წარმოდგენილი იყო ქართული ღვინის მწარმოებელი 10-მდე კომპანიის როგორც ქვევრის, ისე კლასიკური მეთოდით დამზადებული ღვინოები. ქართული ღვინის დეგუსტაციას სომელიეეები, HoReCa სექტორის წარმომადგენლები და იმპორტიორები ესწრებოდნენ“, - ნათქვამია სააგენტოს მიერ გავრცელებულ ინფორმაციაში.

ღვინის ეროვნულ სააგენტოში აღნიშნავენ, რომ პოლონეთი ქართული ღვინის ერთ-ერთ სტრატეგიულ ბაზარს წარმოადგენს, რომელმაც ქართული ღვინის ექსპორტიორი ქვეყნების ხუთეულში სტაბილურად დაიმკვიდრა ადგილი. ღვინის ეროვნული სააგენტოს ფინანსური უზრუნველყოფით, ქართული ღვინის დეგუსტაცია-სემინარები პოლონეთში ღვინის პროფესიონალების, ღვინით ვაჭრობის სფეროს წარმომადგენლებისა და მომხმარებლებისთვის მთელი წლის განმავლობაში გაიმართება.

ცნობისთვის, 2024 წელს პოლონეთი ქართული ღვინის საექსპორტო ქვეყნებს შორის რუსეთის შემდეგ მეორე ადგილს იკავებდა. გასულ წელს ევროპის ამ ქვეყანაში ღვინის გაყიდვებით საქართველომ 16 მილიონ 599 ათასი დოლარის შემოსავალი მიიღო და ჯამში პოლონეთში 6 694 158 ლიტრი ღვინო გაიყიდა. გაყიდვები 10.3%-ით გაიზარდა.

2025 წლის დასაწყისში პოლონეთში საქართველოდან 799 ათასი დოლარის ღირებულების 311 733 ლიტრი ღვინო გაიყიდა, რაც გასული წლის იანვართან შედარებით 4.8%-ით ნაკლები მაჩვენებელია.

bm.ge