საზოგადოება - ვერსია - ვერსია https://www.versia.ge Sat, 31 Oct 2020 06:15:43 +0400 Joomla! - Open Source Content Management en-gb დიდი სპორტული ტრაგედია _ რატომ მოიკლა თავი 16 წლის ფეხბურთელმა https://www.versia.ge/2013-07-31-11-23-15/item/6985-დიდი-სპორტული-ტრაგედია-_-რატომ-მოიკლა-თავი-16-წლის-ფეხბურთელმა.html https://www.versia.ge/2013-07-31-11-23-15/item/6985-დიდი-სპორტული-ტრაგედია-_-რატომ-მოიკლა-თავი-16-წლის-ფეხბურთელმა.html

ხაბიბი წავიდა _ „დედას პირობა მივეცი, რომ მხოლოდ ერთხელღა ვიჩხუბებდი!“

ტრაგედიით დავიწყოთ: ის, რომ მოზარდის ფსიქიკას განსაკუთრებული მოპყრობა სჭირდება, კიდევ ერთხელ დადასტურდა _ ჯერემი უისტონი „მანჩესტერ სიტის“ ბავშვთა აკადემიის წევრი იყო და დიდ ფეხბურთელობაზე ოცნებობდა, მაგრამ მოულოდნელად, აკადემიიდან გაუშვეს. მართალია, ხმამაღლა ამის შესახებ არავინ არაფერს ამბობს, მაგრამ კულუარულად გავრცელებული ინფორმაციით, ჯერემის უთხრეს, რომ მისგან ფეხბურთელი არ გამოვიდოდა. შინ დაბრუნებულმა 16 წლის მოზარდმა სიცოცხლე თვითმკვლელობით დაასრულა.

კიდევ ერთ გარდაცვალებას ეხება საფრანგეთში ატეხილი სკანდალი: მოგეხსენებათ, 16 ოქტომბერს, 18 წლის ჩეჩენმა მოსწავლემ, აბდულახ ანზოროვმა დანით საკუთარი მასწავლებელი მოკლა და მკვლელობის დროს, „ალაჰ აკბარს“ იძახდა. მკვლელობის შემდეგ, მან მასწავლებელს თავი მოაჭრა და სამართალდამცავებმა აყვანის დროს მოკლეს. მკვლელობის მიზეზი ის გახდა, რომ გაკვეთილზე, მასწავლებელმა მოსწავლეებს მუჰამედის კარიკატურები აჩვენა. სწორედ ამ თემაზე გააკეთა განცხადება საფრანგეთის პრეზიდენტმა, ემანუელ მაკრონმა და აღნიშნა: 

„ერთობა და სიმტკიცე _ ერთადერთი პასუხი საშინელი მუსულმანური ტერორიზმის წინააღმდეგ“. 

„ეს ფრანგი მუსულმანების შეურაცხყოფაა. სანამ მაკრონი პრეზიდენტი იქნება, მე ეროვნულ ნაკრებში აღარ ვითამაშებ“, _ განაცხადა „მანჩესტერ იუნაიტედისა“ და საფრანგეთის ნაკრების გამოკვეთილმა ლიდერმა, პოლ პოგბამ. პოგბას სიტყვებს გულშემატკივართა დიდი ნაწილის უკმაყოფილება მოჰყვა _ ისინი მაკრონს მოუწოდებენ, მაქსიმუმი გააკეთოს, რათა ლიდერი გუნდს დაუბრუნდეს, თუმცა არც პრეზიდენტი აპირებს ახალი განცხადების გაკეთებას და შესაბამისად, არც პოგბა შეცვლის გადაწყვეტილებას. 

 

* * * 

მორიგი შეხვედრა გამართა ლიანა ჯოჯუამ. UFC-ს მონაწილე ერთადერთმა ქართველმა, ამერიკელ მირანდა მავერიკთან ვერაფერი გააწყო. მართალია, მავერიკი უპირობო ფავორიტად ითვლებოდა, მაგრამ ჯოჯუამ სოლიდური წინააღმდეგობა გაუწია, თუმცა ერთ მომენტში, ცხვირში მეტოქის იდაყვი მოხვდა, მას სისხლი ვერ შეუჩერეს და საბოლოო ჯამში, ტექნიკური წაგება ჩაუთვალეს. ჯოჯუამ საკუთარი ცხვირის ფოტო სოციალურ ქსელში თავად გამოფინა და ახლა ადვილი მისახვედრი ხდება, როგორი ტკივილის ატანა უწევთ სპორტის ამ სახეობის მებრძოლებს. 

რადგან UFC-ზე ვსაუბრობთ, ისიც ვთქვათ, რომ კარიერაში ბოლო ბრძოლა გამართა დაუმარცხებელმა ხაბიბ ნურმაგომედოვმა. ამჯერად, მისი მეტოქე ჯასტინ გეიჯი იყო, თუმცა წინააღმდეგობა მანაც ვერ გაუწია და ხაბიბი რინგიდან ბეჭდაუდებელი მიდის. 

წასვლა კი მას შემდეგ გადაწყვიტა, რაც ორი თვის წინ, კორონავირუსით მამა, რომელიც ასევე, მისი პირადი მწვრთნელი იყო, გარდაეცვალა. 

„მამის გარდაცვალების შემდეგ, დედამ მთხოვა, რომ ბრძოლას შევეშვა. პირობა მივეცი, რომ მხოლოდ ერთხელ ვიჩხუბებდი და შემდეგ რინგიდან წავიდოდი. ძალიან ბევრი საუბრობდა, რომ გეიჯის ჩემი დამარცხება შეეძლო. ამიტომ, მასთან შეხვედრის გარეშე წასვლა გაქცევას დაემსგავსებოდა. მე გავიმარჯვე და მივდივარ“, _ განაცხადა ხაბიბმა და მხოლოდ ამ ბრძოლიდან, ხელს 30 მილიონი დოლარი გააყოლა. 

* * * 

ქართველ ვუნდერკინდ ხვიჩა კვარაცხელიას, ზაფხულის სატრანსფერო სეზონში, რომელიმე გრანდი აუცილებლად იყიდის. ჯერ იყო და, „რუბინის“ მარგალიტის ყიდვა „კრასნოდარს“ სურდა და 10 მილიონს იხდიდა, ორი კვირის წინ, თურქული „გალათასარაი“, ჩვენებურის სანაცვლოდ, 15 მილიონს ჩამოვიდა, ახლა კი საქმეში ესპანური „სევილია“ ჩაერთო და როგორც პირენეული მედია წერს, ისინი მზად არიან, კვარაცხელიაში 20 მილიონი გადაიხადონ. აი, „რუბინის“ შეფობის აზრით კი, ხვიჩა ამ ეტაპზე, მინიმუმ, 25 მილიონი ღირს, მაგრამ თუ ზაფხულამდე ასეთი პროგრესი განაგრძო, მისი ფასი ბევრად მეტი იქნება. 

* * * 

პანდემიის შემდეგ, პირველი ტურნირი გაიმართა ძიუდოში. მსოფლიო თასს უნგრეთის დედაქალაქმა უმასპინძლა და იმის მიუხედავად, რომ ქართველები სოლიდური შემადგენლობით იყვნენ წასულნი, მხოლოდ ორი ბრინჯაო ირგუნეს და ორივე +100 კილოგრამში. კვარცხლბეკზე გელა ზაალიშვილი და ლევან მატიაშვილი ავიდნენ. საინტერესოა, რომ ვაჟთა შორის, შვიდი წონიდან ხუთში, რუსმა ძიუდოისტებმა მოიპოვეს გამარჯვება. ყველაფერ ამაზე უფრო საინტერესო კი -60 კილოგრამამდე ნახევარფინალური დაპირისპირებები იყო. ნახევარფინალში ერთი წყვილი „რუსმა“ რობერტ მშვიდობაძემ და უნგრელმა ნაჯი დავიდამ შეადგინეს, მეორე წყვილში კი ფინალის საგზურს „ფრანგი“ ლუკა მხეიძე და „რუსი“ იაგო აბულაძე ეცილებოდნენ. საბოლოოდ, „რუსული“ ფინალი შედგა, სადაც აბულაძემ მშვიდობაძეს მოუგო და... ბუდაპეშტში, რუსული ჰიმნი დაუკრეს, კვარცხლბეკზე ოთხი მედალოსნიდან, სამი ქართველი იდგა, თუმცა ქართული დროშა არ აწეულა. 

* * * 

კორონავირუსმა კორექტივები საქართველოს საფეხბურთო ჩემპიონატშიც შეიტანა. „ჩOVID-19“ უმაღლესი ლიგის რამდენიმე კლუბის ფეხურთელს დაუდასტურდა და შესაბამისად, სფფ-მ არაერთი შეხვედრა გადადო. შეხვედრები ნოემბრის ბოლოსთვის კი ჩაინიშნა, მაგრამ თუ მდგომარეობა არ გაუმჯობესდება, ისევ გადადება მოუწევთ. 

* * * 

საინტერესო ამბავი მოხდა კვიპროსის ჩემპიონატში. ქართველთა „ანორთოსისმა“, „აპოლონი“ 2:0 დაამარცხა, მატჩის შემდგომ კი გუნდის ქართველმა თავკაცმა, თემურ ქეცბაიამ და ლიდერმა თორნიკე ოქრიაშვილმა, მოედანზე, ლამის მუშტი-კრივი გამართეს. რა იყო მოსწავლე-მასწავლებლის შებმის მიზეზი, უცნობია, თუმცა როგორც შემდეგ თავად ახსნეს, ისინი მხოლოდ გუნდის ინტერესებიდან გამომდინარე ფიქრობენ და ამიტომ, კამათი მოგებული მატჩის შემდეგაც კი მოუხდათ. ინციდენტს ორივე მხარე ამოწურულად აცხადებს, თუმცა მართლა არ იყო კარგი სანახავი ის კადრები, რაც გავრცელდა. 

* * * 

შეიძლება, ძალიანაც არ გვინდა, მაგრამ მაინც მოგვიწევს იმის თქმა, რომ გასულ კვირას, საქართველოს მორაგბეთა ნაკრებმა სირცხვილი ჭამა. ის, რომ შოტლანდიასთან აუცილებლად დავმარცხდებოდით, არავისთვის უცხო და მოულოდნელი არ იყო. არც ანგარიში _ 7:48 არის მაინცდამაინც კატასტროფული, მაგრამ მთავარი ის გახლავთ, რომ უშუალოდ შეხვედრა, ჩვენმა გუნდმა საშინლად ჩაატარა. არანაირი მონახაზი, არანაირი შემართება, არანაირი ტაქტიკა... მეტოქემ ლეკის ნაბადივით მოახვია საკუთარი თამაში „ბორჯღალოსნებს“ და მთელი 80 წუთი, საკუთარ ნებაზე ატარა. შოტლანდიელებმა გაიტანეს ყველა გემოვნების დასაკმაყოფილებელი ლელო, ბურთაობდნენ ლაღად, დაძაბულობის გარეშე და დამსახურებულად გაიმარჯვეს. 

14 ნოემბერს, საქართველო რვა ერზე იწყებს ასპარეზობას და ინგლისს ხვდება, იმ ინგლისს, რომელიც შოტლანდიაზე ძლიერია და თუ ასე ვითამაშებთ, მოგებაზე ფიქრი კი არა, ვინძლო, ანგარიში სამნიშნა იყოს. 

* * * 

იაპონიაში, სუმოისტთა ოლო ტურნირის უარყოფითი ბალანსით დასრულების შემდეგ, ლევან გორგაძე რეიტინგში რომ დაქვეითდებოდა, ადვილი მისახვედრი იყო. ბოლო ტურნირი მან მეოთხე მაეგაშირას რანგში იჭიდავა, წლის დასკვნით ტურნირზე კი, რომელიც სტარტს 8 ნოემბერს აიღებს, ტოჩინოშინი მეშვიდე მაეგაშირა იქნება. წლის ბოლო ტურნირი ლევანმა აუცილებლად დადებითი ბალანსით უნდა დაასრულოს, რადგან სხვა შემთხვევაში, შესაძლოა, ათეულს ქვემოთ ჩავარდეს, რაც სასურველი ნამდვილად არ არის. 

* * * 

გასულ უქმეებზე, ფეხბურთის გულშემატკივრებს „ელ კლასიკოს“ ნახვის შესაძლებლობა ჰქონდათ. ბარსელონა-რეალის დაპირისპირება, როგორ ფორმაშიც არ უნდა იყვნენ, დიდი მოვლენაა და ასე იყო ამჯერადაც. კოვიდის გამო, ცარიელი ტრიბუნების წინ მოთამაშე „ბარსა“ 1:3 დამარცხდა, „რეალის“ თავკაცმა, ზინედინ ზიდანმა კი საინტერესო რეკორდი დაამყარა. მას გუნდის მწვრთნელის რანგში, კატალონიაში მეექვსე გასვლა ჰქონდა და ამ ექვსი შეხვედრიდან, ფრანგს ერთიც არ წაუგია _ 3 მოგების წილ, 3 ფრე. ბოლო შეხვედრაში წაგება „ბარსას“ თავკაცმა, რონალდ კუმანმა მსაჯებს დააბრალა, ევროპაში კი მსაჯთა კრიტიკა ისჯება. შესაბამისად, დიდი შანსია, ჰოლანდიელი სპეციალისტი 4-დან 12-მატჩამდე მოკვეთონ და გუნდის გაყვანა შეხვედრაზე მეორე მწვრთნელს მოუხდეს. საზიზღარ ფორმაში მყოფ „ბარსელონას“ კი ეს ნამდვილად არ აწყობს. 

 

* * * 

ასაკის მიუხედავად, „ბაიერნის“ ფორვარდი, რობერტ ლევანდოვსკი სასწაულებს ჩადის. 32 წლის ფორვარდს, გერმანიის ბუნდესლიგის საწყის 5 ტურში, 10 გოლი და 3 საგოლე გადაცემა დაუგროვდა. სტატისტიკით, ის მეტოქის კარს ყოველ 37 წუთში ერთხელ ლაშქრავს, რაც ევროპაში რეკორდია. 

კიდევ ერთი ლეგენდარული ფეხბურთელი, რონალდინიო, გასულ უქმეებზე, ღიმილით ჩაერთო სოციალური ქსელის პირდაპირ ეთერში და ასევე, ღიმილით გამოაცხადა, რომ მას კორონავირუსი დაუდასტურდა. ზოგადად, ბრაზილია, ვირუსის გავრცელების მხრივ, ერთ-ერთი ლიდერია და ამიტომ, რონალდინიოს დაინფიცირებაც არავის გაჰკვირვებია. უბრალოდ, ამ ინფორმაციის მიწოდების ფორმამ ბევრი გაახალისა და რონალდინიოც ყველას მოუწოდებს, დაინფიცირებით ტრაგედიას ნუ შექმნიან, იმკურნალონ და ყველაფერი კარგად იქნება.

ბათო ჯაფარიძე

]]>
versiaprinti@yahoo.com (super admin) საზოგადოება Wed, 28 Oct 2020 12:38:54 +0400
საქართველოს ბანკის განცხადება ზუგდიდში მომხდარ მოვლენებზე https://www.versia.ge/2013-07-31-11-23-15/item/6983-საქართველოს-ბანკის-განცხადება-ზუგდიდში-მომხდარ-მოვლენებზე.html https://www.versia.ge/2013-07-31-11-23-15/item/6983-საქართველოს-ბანკის-განცხადება-ზუგდიდში-მომხდარ-მოვლენებზე.html

„საქართველოს ბანკი“ გუშინ ზუგდიდში მომხდარ მოვლენებთან დაკავშირებით სპეციალურ განცხადებას ავრცელებს:
 
„გუშინდელ მოვლენებში ჩართული ყველა თანამშრომელი, მომხმარებელი და პოლიციელი ახლა უსაფრთხოდ და ჯანმრთელადაა. აუცილებლად ვიპოვით გზას, რომ თითოეულის ცხოვრება მალე დაუბრუნდეს ჩვეულ რეჟიმს
 
მადლობა გულშემატკივრობისთვის“
 
]]>
versiaprinti@yahoo.com (super admin) საზოგადოება Thu, 22 Oct 2020 11:45:51 +0400
ხიზილალას კონტრაბანდას სამართალდამცავის სიცოცხლე შეეწირა https://www.versia.ge/2013-07-31-11-23-15/item/6976-ხიზილალას-კონტრაბანდას-სამართალდამცავის-სიცოცხლე-შეეწირა.html https://www.versia.ge/2013-07-31-11-23-15/item/6976-ხიზილალას-კონტრაბანდას-სამართალდამცავის-სიცოცხლე-შეეწირა.html

ყოფილი ცოლ-ქმრის, ქმრის ძმაკაცისა და ცოლის დის დანაშაულებრივი კავშირები

1983 წლის შემოდგომაზე, შებინდებისას, მილიციის თანამშრომელი შინ ბრუნდებოდა, როცა დაინახა, რომ კაცი ქალს მანქანისკენ ექაჩებოდა. ქალი წინააღმდეგობას უწევდა და სამართალდამცავმაც ჩარევა გადაწყვიტა. ის წყვილთან მივიდა, მაგრამ სანამ ხმას ამოიღებდა, მამაკაცმა დანა იშიშვლა და მილიციის თანამშრომელს გულ-მკერდის არეში ძალუმად ჩაარტყა. მან ქალი მანქანაში მაინც ჩატენა და შემთხვევის ადგილიდან მიიმალა. განყოფილებაში პენსიონერმა დარეკა, რომელიც ყველაფერს ფანჯრიდან უყურებდა. იმის გამო, რომ სიბნელე იყო და თან პენსიონერს მხედველობა არ უვარგოდა, მეტი ვერაფერი თქვა. სამაგიეროდ, თანამშრომელმა გარდაცვალებამდე მოასწრო და ექიმს უთხრა, ქალს ბორტგამცილებლის ფორმა ეცვა, ხელში კი ხახვი და პური ეჭირაო.

„შესაძლოა, ეს ვინმესთვის უმნიშვნელო ინფორმაცია იყოს, მაგრამ გამოცდილმა მილიციელმა, პრაქტიკულად, ქალის მისამართი დაასახელა. როცა სტუმრად მიდიხარ, ხახვს და პურს არ ყიდულობ ანუ ჩვენ უნდა გვეძებნა იმ უბანში მცხოვრები სტიუარდესა, რაც რთული ნამდვილად არ იყო. ერთ საათში, უკვე სტიუარდესას კარზე ვაკაკუნებდით, თუმცა კარი არავინ გაგვიღო. მეზობლებმა გვითხრეს, რომ ის რეისში იყო და შესაბამისად, სახლში ამიტომ არ იმყოფებოდა, მისი შვიდი წლის შვილი კი ქალის დამ წაიყვანა. 

 

როგორც წესი, შორეული რეისების დროს, ბავშვი ან ქმარყოფილს, ან დას მიჰყავდა. გადამოწმების შედეგად აღმოჩნდა, რომ ქალი, მართლაც, რეისში იყო და თან _ სად, მოსკოვში. ხომალდის კაპიტანმა დაადასტურა, რომ ბორტგამცილებელი იმ დროს, მათთან ერთად, მოსკოვში იმყოფებოდა და უკან გამოსაფრენად ემზადებოდა ანუ ის მკვლელობის ადგილზე ვერანაირად იქნებოდა. 

კინაღამ გადავირიეთ. იმ უბანში კი არა, ხუთი კილომეტრის რადიუსში, სხვა „სტიუარდესა“ არ ცხოვრობდა. არ იყო ეს ისეთი პროფესია, ყოველ მეორეს რომ ჰქონოდა... დავკითხეთ სტიუარდესას და, რომელმაც აღნიშნა, რომ მკვლელობის მომენტში, დის სახლში იყო და ბავშვთან ერთად, შინ გამგზავრებას აპირებდა. გადავწყვიტეთ, სახლი გაგვეჩხრიკა და თუ იქ პურსა და ხახვს ვიპოვიდით, სტიუარდესას და უფრო მეტად შეგვეწუხებინა“, _ იხსენებს პოლიციის გადამდგარი პოლკოვნიკი, ბატონი თენგიზი. 

ბორტგამცილებლის სახლის ჩხრეკისას არაფერი აღმოჩნდა. გამომძიებლები მხოლოდ მაცივარში, 3-ლიტრიან ქილაში შენახულმა წითელმა ხიზილალამ გააოცა. ეს მაშინ (და ახლაც) დელიკატესი იყო, საკმაოდ ძვირი ღირდა და რაც მთავარია, მისი შოვნა ურთულესი იყო. ოჯახში ეს იმით ახსნეს, რომ ბორტგამცილებელი რეისებს სხვადასხვა მიმართულებით ასრულებდა, შესაბამისად, რუსეთში ბევრი ნაცნობი კოლეგა-მეგობრები ჰყავდა, რომლებიც ვლადივოსტოკში დაფრინავდნენ და იქ ხიზილალა თავის ფასში იშოვეს. 

თქმა არ უნდა, პროდუქტი ბრაკონიერების მიერ იქნებოდა მოპოვებული, მაგრამ გამოძიებას ახლა ამისთვის არ ეცალა _ სამართალდამცავებს მილიციელის მკვლელი უნდა ეპოვათ. 

„სტიუარდესას“ ყოფილი ქმარი ერთ-ერთ მიგდებულ სასადილოში, მტვირთავად მუშაობდა. მას სამსახურში მივაკითხეთ და ძალიან გაგვიკვვირდა, როცა რიგითი მტვირთავი, პიჯაკში გამოწყობილი, დირექტორის კაბინეტიდან ღიღინით გამოვიდა. 

_ სამუშაო დღე მორჩა, დირექტორს კი თანამშრომლებთან უშუალო დამოკიდებულება აქვს, _ ასე ახსნა მან თავისი საქციელი, თუმცა ყველასთვის ნათელი იყო, რომ რაღაც რიგზე არ გახლდათ. აი, იმის გასაგებად, რა იყო ეს რაღაც, სასადილოს შემოწმება გადავწყვიტეთ და ორი სამლიტრიანი წითელი ხიზილალა იქაც აღმოვაჩინეთ“, _ იხსენებს ბატონი თენგიზი. 

სასადილოს დირექტორმა ხიზილალას დანახვაზე ხელები გაასავსავა, მე არაფერი ვიცი, ჩემთან მუშები დადიან, ხიზილალა თეფშზე რომც დავუდო, მაინც არ შეჭამენ, არც იციან, რა ხილიაო. 

ერთი მხრივ, აბსურდი იყო, რომ სასადილოს დირექტორმა არ იცოდა, მის მაცივარში რა ინახებოდა, ხოლო მეორე მხრივ, ყველაფერ ამას ისე გულწრფელად და გაოცებით ამბობდა, ძნელი იყო, არ დაგეჯერებინა. შეშინებულ დირექტორს კითხვა დენდივით გამოწყობილ მტვირთავზეც დაუსვეს და ისევ გულწრფელად აღიარა _ ერთ-ერთმა აქაურმა მაღალჩინოსანმა მთხოვა სამსახურში მისი მიღება და ისიც მთხოვა, ნუ ამუშავებო. 

დირექტორი მზად იყო, პასუხი ამაზე უფრო ეგო, ვიდრე ხიზილალაზე, რომელზეც შეიძლება, დაეხვრიტათ კიდეც, რადგან ორი სამლიტრიანი ხიზილალა, რამდენიმე ათას მანეთს უკაკუნებდა, ამისთვის კი თავზე ხელს არავინ გადაუსვამდა. 

უკვე ადვილი მისახვედრი გახდა, რომ „სტიუარდესას“ ხიზილალა კონტრაბანდულად ჩამოჰქონდა და იმით სარგებლობდა, რომ ეკიპაჟის წევრებს საბაჟოზე ან არ ჩხრეკდნენ, ან ძალიან მსუბუქად. ქმარყოფილი ხიზილალას სასადილოში ჩუმად ასაღებდა და თან ისე ასაღებდა, ამის შესახებ დირექტორმაც კი არაფერი იცოდა. კარგად აწყობილ სქემას ვიღაცამ თუ რაღაცამ შეუშალა ხელი, გამოძიებას ის უნდა გაეგო, ვინ იყო ეს ვიღაც თუ რაღაც და რაც მთავარია, ვინ იყო გამოწყობილი „სტიუარდესას“ ფორმაში, ასევე, ვინ დაარტყა დანა მილიციის თანამშრომელს. 

ყოფილ ქმარს უტყუარი ალიბი ჰქონდა, ბორტგამცილებელი კი ქვეყანაში საერთოდ არ იყო... 

გამოძიება ჩიხში შევიდა და ნაცად მეთოდს მიმართა _ უბანში პენსიონერები გამოკითხა. კომუნიზმის შენების პროცესში, პენსიონერებს, ასე თუ ისე, პენსია ჰყოფნიდათ და იშვიათად მუშაობდნენ. კაცები დილიდან საღამომდე, ეზოში დომინოთი, ნარდით ან ჭადრაკით ერთობოდნენ, ქალებიც ისხდნენ და ხან ძველ ამბებს იხსენებდნენ, ხანაც ახალგაზრდებს ჭორავდნენ. შესაბამისად, არ არსებობდა, პრაქტიკულად, ერთი კორპუსის ეზო, სადაც დღის განმავლობაში, რამდენიმე პენსიონერი არ „აბირჟავებდა“. სამართალდამცავებისთვის ეს კასტა, ერთ-ერთი მთავარი წყარო იყო.  

პენსიონერებმა ერთხმად დაადასტურეს, რომ უფროსი დის არყოფნის დროს, უმცროსი და „სტიუარდესას“ ფორმას არცთუ იშვიათად იცვამდა და ისე სეირნობდა. 

„სტიუარდესას“ ფორმაში გამოწყობილ გოგოს, ბიჭები მეტ ყურადღებას აქცევდნენ და მის გაცნობას ცდილობდნენ. შედეგად, გამოძიება მივიდა დასკვნამდე, რომ იმ ღამეს, როცა სამართალდამცავი მოკლეს, ფორმა სწორედ უმცროს დას ეცვა ანუ ის მკვლელსაც იცნობდა. როგორც მაშინ, ისე ახლაც, სამართალდამცავის მკვლელობის გახსნა პოლიციის მუნდირის ღირსების საქმე იყო, ამიტომ გოგონა განყოფილებაში უბოდიშოდ მიაბრძანეს და როცა მან ურცხვად განაცხადა, არაფერი ვიციო, ერთი ლაზათიანი სილაც გააწნეს. 

„გარდაცვლილ მილიციელს იქ ბევრი მეგობარი ჰყავდა. მათთვის ის ქალი, მინიმუმ, მკვლელობის თანამონაწილე იყო და თუ ნებით არ იტყოდა სიმართლეს, ძალით ათქმევინებდნენ. ყველაფერი ეს, დაახლოებით, 30 წამში ავუხსენი დაკავებულს და ისიც ვუთხარი, ახლა ავდგები, ოთახიდან გავალ და შეიძლება, ხუთ წუთში, უკვე მკვდარი იყო-მეთქი. აკანკალდა და მაშინვე ყველაფერი დაფქვა“, _ იხსენებს ბატონი თენგიზი. 

როგორც დაკავებულმა თქვა, მის დას ხიზილალა კონტრაბანდულად ჩამოჰქონდა, ყოფილი ქმარი კი, თავის ძმაკაცთან ერთად, ყიდდა. ის ძმაკაცი ადრე ნასამართლევი იყო და მისი ყველას ეშინოდა. სწორედ მან აიძულა სტიუარდესა კონტრაბანდაზე წასულიყო. საუბარი რამდენიმე ათას მანეთზე იყო, რასაც ყოველთვიურად, ხიზილალას რეალიზაციით აკეთებდნენ. სწორედ ქმარყოფილის ძმაკაცმა მოითხოვა არა ერთი, არამედ, ერთდროულად სამი ქილის წამოღება, რაზეც დამ უარი განაცხადა. სახლთან სწორედ სტიუარდესას უცდიდა და როცა ფორმაში ქალი დაინახა, ეგონა, ის იყო. მისი შეშინება სურდა და მოულოდნელად, სამართალდამცავი გამოჩნდა, რომელიც გოგონას დაცვას შეეცადა, თუმცა საბოლოოდ, სიკვდილი იპოვა. 

„ყოფილი ქმრის ძმაკაცის დასაკავებლად მე არ წავსულვარ. სამინისტროში წავედი და მინისტრის მოადგილეს ავუხსენი, რომ ჩვენი თანამშრომელი ხიზილალას გამო მოკლეს. ისიც ყველაფერს მიხვდა, მიხვდა იმასაც, რატომ ვიჯექი მასთან და არა _ სპეცოპერაციაზე. დაახლოებით, ერთ საათში, მინისტრის მოადგილის კაბინეტში სატელეფონო ზარი გაისმა, აუწყეს, რომ საშიში დამნაშავის აყვანის დროს, სამართალდამცავები იძულებულნი გახდნენ, ცეცხლი გაეხსნათ და ეჭვმიტანილი ადგილზე გარდაიცვალა. 

შესაძლოა, ეს ვინმესთვის სისასტიკე იყოს, ჩვენთვის კი ერთგვარი სამართლის ზეიმი გახლდათ. მას თანამშრომლის მკვლელობისთვის მაინც დახვრეტდნენ, ჩვენ, უბრალოდ, პროცესი დავაჩქარეთ“, _ დაასრულა მოყოლა ბატონმა თენგიზმა. 

ბორტგამცილებელს კონტრაბანდისთვის პირობითი სასჯელი მისცეს და ფრენა აუკრძალეს, მისი ყოფილი ქმარი, კონტრაბანდული საქონლის გასაღებისთვის, ციხეში სამი წლით გაისტუმრეს, და კი, რომელიც დანაშაულს შეესწრო და დამალა, გისოსებს მიღმა ხუთი წლით გაუშვეს. არადა, პირობითი მსჯავრი მისთვისაც შეიძლებოდა, მაგრამ მან სამართალდამცავის მკვლელობა დამალა, ეს კი არავინ აპატია.

ბათო ჯაფარიძე

 

]]>
versiaprinti@yahoo.com (super admin) საზოგადოება Wed, 21 Oct 2020 12:35:12 +0400
ხელჩართული ჩხუბი მკლავჭიდის ფედერაციაში და სკანდალში გახვეული თემურ ქეცბაია https://www.versia.ge/2013-07-31-11-23-15/item/6975-ხელჩართული-ჩხუბი-მკლავჭიდის-ფედერაციაში-და-სკანდალში-გახვეული-თემურ-ქეცბაია.html https://www.versia.ge/2013-07-31-11-23-15/item/6975-ხელჩართული-ჩხუბი-მკლავჭიდის-ფედერაციაში-და-სკანდალში-გახვეული-თემურ-ქეცბაია.html

დაკორონებული მსოფლიო სპორტის კრიტიკული დღეები

იმის მიუხედავად, რომ ევროპის საფეხბურთო ჩემპიონატმა და მსოფლიოს ყველაზე დიდმა სპორტულმა ღონისძიებამ _ ოლიმპიურმა თამაშებმა 2021 წლისთვის გადაიწია, ძალიან დიდია იმის ალბათობა, რომ ერთი ტურნირიც არ ჩატარდეს. ამის მიზეზი, კორონავირუსის მეორე თუ მესამე ტალღის გარდა, ისიც გახლავთ, რომ შესაძლოა, კომპანიებისთვის აღნიშნული ტურნირები ფინანსურად მომგებიანი აღარ იყოს. თუ ევროპის ჩემპიონატსა და ოლიმპიადაზე გულშემატკივარს არ დაუშვებენ, თუ არ გაიყიდება ბილეთები, თუ არ იქნება ოლიმპიური სოფლები, თუ არ აღდგება საჰაერო მიმოსვლა ქვეყნებს შორის, ტურნირს კვლავ ჩაშლა ემუქრება. შესაძლოა, სასაცილოდ მოგეჩვენოთ, მაგრამ ერთ-ერთი კომპანიის წარმომადგენელმა ისიც კი თქვა, ოლიმპიადის მსვლელობის დროს, ერთი თვის განმავლობაში, მილიარდზე მეტ პრეზერვატივს ვყიდით და თუ ახლა ხალხი არ იქნება, პრეზერვატივები ვის რაში დასჭირდებაო ანუ ყველას თავისი სატკივარი აქვს და ერთადერთი გამოსავალი ის გახლავთ, რომ დიდი ფული ტელევიზიებმა გადაიხადონ. თავის მხრივ, ტელევიზიების მფლობელები ვაჭრობენ, რადგან კარგად იციან, თუ გულშემატკივრებს არ დაუშვებენ, ოლიმპიურ კომიტეტს მათ გარდა, სხვა გზა აღარ ექნებათ და ამიტომ, დაბალ ფასს სთავაზობენ.

ყველაზე ცუდ დღეში იაპონიაა, რომელმაც 20 მილიარდ დოლარამდე ზარალი უკვე ნახა, რადგან ოლიმპიადისთვის მოწყობილი ინფრასტრუქტურა ერთი წელი უქმად უნდა ჰქონდეს და თუ ტურნირი ისევ გადაიდება, იაპონელებისთვის ეს დამატებით 20 მილიარდის ზარალი იქნება. 40 მილიარდი სუფთა ზარალი კი იაპონიისთვისაც ძალიან ბევრია. მოკლედ რომ ვთქვათ, გაზაფხულისთვის ან ვაქცინა უნდა იყოს, ან ტურნირების ჩატარება დიდი კითხვის ნიშნის ქვეშ დადგება. 

* * * 

12 ნოემბერს, საქართველოს საფეხბურთო ნაკრებს საუკუნის მატჩი რომ ელოდება, კარგად გემახსოვრებათ. თბილისში, ჩრდილოეთ მაკედონიასთან ნებისმიერი ანგარიშით გამარჯვების შემთხვევაში, სწორედ იმ ევროპის ჩემპიონატის ფინალურ ეტაპზე უნდა ვითამაშოთ, რომელზეც წეღან მოგახსენეთ. ჰოდა, ახლა იმის შანსია, რომ ამ შეხვედრაში, გუნდს ნაკრების სამი წევრი _ კაპიტანი ჯაბა კანკავა, ნიკა კვეკვესკირი და ელგუჯა ლობჟანიძე ვერ დაეხმარონ. სამივე მათგანი ბურთს ყაზახეთში აგორებს და ორშაბათს, 19 ოქტომბერს, ყაზახეთის მთავრობის დადგენილებით, ნებისმიერ სპორტსმენს ქვეყნის დატოვება ეკრძალება, რადგან ყაზახეთში, პანდემიის ახალ ტალღას სერიოზულად უფრთხიან. ამ საკთხთან დაკავშირებით, ფედერაციის პოზიცია ჯერჯერობით უცნობია, მაგრამ იმის თქმა კი გადაჭრით შეიძლება, რომ კანკავას გარეშე, საქართველოს ნახევარდაცვის ხაზის წარმოდგენა, უბრალოდ, შეუძლებელია. 

* * * 

გასულ კვირას, ყველაზე დიდი ხმაური ქართულ სპორტში მკლავჭიდის ფედერაციაში იყო. მოქმედ პრეზიდენტ სოსო ჯაჭვლიანს, სპორტსმენთა და მწვრთნელთა არცთუ მცირე ნაწილი მიუვარდა, ის კორუფციასა და ფულის გაფლანგვაში დაადანაშაულა და ლამის ხელჩართული ჩხუბიც გაუმართა. როგორც გვეუბნებიან, მკლავჭიდის ფედერაციაში სხდომა მალე გაიმართება, რომელზეც ჯაჭვლიანს პოსტის შენარჩუნება ძალიან გაუჭირდება და მის ნაცვლად, მკლავჭიდელებს პრეზიდენტად ნაკრების ერთ-ერთი ვეტერანი და ძველი მკლავჭიდელი, ერეკლე გურჩიანი სურთ. 

* * * 

უცნაურ ამბავშია გახლართული თემურ ქეცბაიაც: „ანორთოსისის“ ქართველი თავკაცი იქაურ მედიას არ სწყალობს, რადგან კვიპროსელი ჟურნალისტები არცთუ იშვიათად აკრიტიკებენ და ხშირად არამართებულად. ჰოდა, ბოლო ორი შეხვედრის შემდეგ, ქეცბაიამ პრესკონფერენციაზე მისვლაზე უარი თქვა, რის გამოც, 10 000-ევროიანი ჯარიმა დაუწერეს. ქართველი სპეციალისტი მზადაა, ჯარიმები იხადოს და პრესკონფერენციაზე არ იაროს, თუმცა ფეხბურთის ფედერაციამ „ანორთოსისის“ ხელმძღვანელობას კატეგორიულად მოსთხოვა, მწვრთნელი პრესკონფერენციაზე მივიდესო. 

გასულ უქმეებზე, მორიგი შეხვედრის შემდეგ, რომელიც „ანორთოსისმა“ მოიგო, ბატონი თემური პრესკონფერენციაზე გამოცხადდა და მხოლოდ ერთი ფრაზა თქვა _ „ძალიან კარგი, ჩვენ მივიღეთ ის შედეგი, რაც გვსურდა“. ამის შემდეგ, ქართველმა მწვრთნელმა პრესკონფერენცია დატოვა და ახლა კვიპროსული მედია კატეგორიულად ითხოვს, რომ „ანორთოსისმა“ თემური თანამდებობიდან გაუშვას. 

ვერ გეტყვით, რას გადაწყვეტენ „ანორთოსისის“ შეფები, მაგრამ შეგახსენებთ, რომ 4 წლის წინ, ქეცბაიამ კვიპროსზე „აპოლონი“ გააჩემპიონა და... გადადგა. 

* * * 

წერილის დასაწყისში, ფინანსურ კრიზისზე გითხარით და ამ მხრივ, დალხენილი ცხოვრება ისეთ გრანდსაც კი არ აქვს, როგორიც „ბარსელონაა“. კატალონიური კლუბის ფეხბურთელებმა, გასული სეზონის მიწურულს, ხელფასების შემცირებაზე თანხმობა თქვეს, რათა გუნდს როგორმე დახმარებოდნენ, მაგრამ ახლა ირკვევა, რომ „ბარსას“ ბიუჯეტში 200-მილიონიანი გარღვევა აქვს. კლუბის შეფობა ისევ ფეხბურთელებს მიადგა და მათ ხელფასის შემცირება კი არა, გადახდის გადავადება შესთავაზა ანუ კლუბი ვალდებულებას აიღებს, რომ ფეხბურთელებს დაპირებულ თანხას გადაუხდის, მაგრამ მას შემდეგ, რაც სტადიონზე ხალხი დაბრუნდება და ყველაფერი ჩვეულ რეჟიმში ჩადგება. 

მოთამაშეებმა ითათბირეს და... ასეთ პირობაზე უარი განაცხადეს. ფიფას კანონით, კლუბი ვალდებულია, მოთამაშეს კონტრაქტით დაპირებული თანხა გადაუხადოს და თუ ამას არ აკეთებს, საქმეში ფიფა ერთვება, მაგრამ თუ კლუბი გაკოტრებულად გამოცხადდება, გადახდის ვალდებულებაც ეხსნება. ჰოდა, როგორც ჩანს, ფეხბურთელებს სერიოზული ეჭვი გაუჩნდათ, რომ დღეს თუ არა ხვალ, „ბარსელონას“ ფინანსური კრიზისი უმართავი გახდება და დაპირებული ჯამაგირის გარეშე დარჩებიან. არსებული რეალობის გათვალისწინებით, კატალონიურ გრანდს კრედიტს ბანკებიც არ აძლევენ, რადგან პანდემიის მასშტაბები დღითი-დღე იზრდება და ყველა ხვდება, რომ ეს პრობლემა დღეს და ხვალ არ დასრულდება. 

* * * 

გასული სეზონის საუკეთესო მცველად აღიარებული ვირჯილ ვან დაიკი, „ლივერპულსა“ და ჰოლანდიის ნაკრებს კარგა ხანს ვერ დაეხმარება. ის რამდენიმე დღის წინ, „ევერტონთან“ შეხვედრაში დაიმტვრა და ოპერაცია სჭირდება. მართალია, თავად ფეხბურთელი იმედიანადაა, მაგრამ ექიმები ვარაუდობენ, რომ შესაძლოა, ვირჯილმა 8 თვე გამოტოვოს, რაც იმას ნიშნავს, რომ მიმდინარე სეზონი მისთვის დასრულებულია. 

* * * 

ორი კვირის წინ, ესპანელ ჩოგბურთელ კარლოს ალკარასს არავინ იცნობდა. 17 წლის ბიჭზე ამბობდნენ, რომ პერსპექტიულია, მაგრამ ასეთი პერსპექტიულები, თითქმის ყოველ წელს ჩანან და მერე იკარგებიან ხოლმე. აი, კარლოსს კი, სავარაუდოდ, სხვა მომავალი ელოდება. ბოლო ორ კვირაში, მან მიჯრით AთP-ს ორი ტურნირი მოიგო და რეკორდიც დაამყარა _ ამ ასაკში, ზედიზედ ორი ტურნირი არავის მოუგია. 

ესპანელები ახალი ვარსკვლავის დაბადებაზე საუბრობენ, თუმცა, ჯერჯერობით, მთავარი ვარსკვლავი რაფაელ ნადალია და კარლოსსაც იქამდე მისასვლელად, უდიდესი ძალისხმევა დასჭირდება. 

ისე, შეგახსენებთ, რომ რაფა ნადალი ჩოგბურთზე სრულიად შემთხვევით მოხვდა. მისი ბიძა, სერხი ნადალი „ბარსელონას“ ფეხბურთელი იყო და პატარა რაფასაც ფეხბურთელობისთვის ამზადებდნენ, თუმცა მან ოჯახის წევრებს გამოუცხადა, „ბარსელონას“ აკადემიაში კი არა, „რეალის“ მაისურის მორგებაზე ვოცნებობო. ოჯახმაც ითათბირა და ფეხბურთის ნაცვლად, აქტიური ბავშვი ჩოგბურთზე მიიყვანა. ვერ გეტყვით, რა დაკარგა საფეხბურთო სამყარომ, მაგრამ ჩოგბურთმა მსოფლიოს ყველა დროის ერთ-ერთი საუკეთესო სპორტსმენი მიიღო. ჰო, ოჯახის წინააღმდეგობის მიუხედავად, რაფა დღემდე, „რეალის“ თავგადაკლული ქომაგია. 

* * * 

ათწლიანი ლოდინის შემდეგ, როგორც იქნა, NBA-ს ჩემპიონის ტიტული დაიბრუნა „ლეიკერსმა“. ალბათ, სიმბოლურია, რომ 2010 წელს, როცა ლოს-ანჯელესელებმა ოქროს მედლები ბოლოს მოიგეს, მათი ლიდერი ტრაგიკულად დაღუპული კობი ბრაიანტი იყო. ამჯერად კი გუნდს ლებრონ ჯეიმსმა ულიდერა და საჩემპიონო ბეჭედიც ალალად დაიმსახურა. 

მართალია, პანდემიის გამო, საჩემპიონო პრემიები ისეთი მსუყე ვერ იქნება, როგორც მაგალითად, შარშან ან შარშანწინ იყო, მაგრამ ლებრონს ეს ყველაზე ნაკლებად აღელვებს. მას ხელფასი საერთოდ რომ არ მისცენ (არადა, 37.44 მილიონი აქვს წლიურად), სარეკლამო კონტრაქტებიდან, წელიწადში 146 მილიონ დოლარს იღებს და აშკარად არ უნდა უჭირდეს. 

სხვათა შორის, კალათბურთის სპეციალისტებმა ნაციონალური ლიგის კრიზისსა და ვარსკვლავების ნაკლებობაზე ისაუბრეს, რაც იმით ახსნეს, რომ 35 წლის ჯეიმსის გამჩერებელი არავინ გამოჩნდა ანუ ახალ თაობაში არავინაა ისეთი, ვინც ჯეიმსის წასვლის შემდეგ, უძლიერესის სახელს დაიმკვიდრებს.

ბათო ჯაფარიძე

]]>
versiaprinti@yahoo.com (super admin) საზოგადოება Wed, 21 Oct 2020 12:35:09 +0400
შინაგან საქმეთა სამინისტროს საზოგადოებრივი უსაფრთხოების მართვის ცენტრის, 112-ის განცხადება https://www.versia.ge/2013-07-31-11-23-15/item/6972-შინაგან-საქმეთა-სამინისტროს-საზოგადოებრივი-უსაფრთხოების-მართვის-ცენტრის,-112-ის-განცხადება.html https://www.versia.ge/2013-07-31-11-23-15/item/6972-შინაგან-საქმეთა-სამინისტროს-საზოგადოებრივი-უსაფრთხოების-მართვის-ცენტრის,-112-ის-განცხადება.html

112 აქტიურად არის ჩართული კორონავირუსის მართვის პროცესში და განსაკუთრებულ რეჟიმში მუშაობს, რათა თითოეულმა მოქალაქემ დროული და მაღალკვალიფიციური მომსახურება მიიღოს.

 

კორონავირუსის პანდემიამდე, ცენტრში, 24 საათის განმავლობაში, საშუალოდ 13 000-მდე ზარი შემოდიოდა, დღევანდელი მონაცემებით კი, ოპერატორები 18 000-მდე ზარს პასუხობენ. შესაბამისად, მობილიზებულია დამატებითი ცვლები, რათა თითოეულ ზარზე ოპერატიულად მოხდეს რეაგირება.

 

როგორც მოგეხსენებათ, 112-ს, კორონავირუსის მართვის პროცესში, მნიშვნელოვანი ფუნქცია დაემატა. თითოეულ მოქალაქეს კორონავირუსისთვის დამახასიათებელი სიმპტომების შემთხვევაში, შეუძლია დარეკოს 112-ზე. ვირუსთან დაკავშირებული შეტყობინებები კი ოპერატორების მხრიდან კლასიფიცირდება და მწვავე შემთხვევები - სასწრაფო სამედიცინო დახმარების ცენტრს, ხოლო არამწვავე გამოძახებები - ოჯახის ექიმებს გადაეცემა.

 

ქვეყანაში შექმნილი ეპიდვითარების მიუხედავად, 112-ში, 24 საათის განმავლობაში, 3000-მდე არამიზნობრივი და საინფორმაციო ტიპის ზარი ფიქსირდება, რაც აფერხებს მუშაობის პროცესს. შედეგად, ვისაც რეალურად სჭირდება დახმარება, მაშინ როცა წამები გადამწყვეტია, შეიძლება ვერ დაგვიკავშირდეს, რაც იწვევს მოსახლეობის უკმაყოფილებას.

 

ინფიცირების რაოდენობის ზრდასთან ერთად, იზრდება დატვირთვა. 112 განაგრძობს 24 საათის განმავლობაში, განსაკუთრებულ რეჟიმში მუშაობას, რათა თითოეულმა მოქალაქემ მაღალი სტანდარტის მომსახურება მიიღოს, როგორც გადაუდებელი შემთხვევის დროს, ასევე ვირუსთან დაკავშირებით.

 

მოქალაქეებს კი, გთხოვთ, გამოიჩინოთ მაღალი მოქალაქეობრივი პასუხისმგებლობა და არამიზნობრივად არ დარეკოთ 112-ზე.

 

დარეკეთ, მხოლოდ მაშინ, როცა გესაჭიროებათ საპატრულო პოლიციის, სასწრაფო სამედიცინო და სახანძრო/სამაშველო სამსახურების დახმარება. ასევე, დაგვიკავშირდით კორონავირუსული სიმპტომების გამოვლენისთანავე, რათა მიიღოთ შესაბამისი კონსულტაცია ოჯახის ექიმისგან.

 

112 არის გადაუდებელი დახმარების ნომერი, კორონავირუსის მართვის პროცესში დაწესებულ წერტილოვან შეზღუდვებსა და დაშვებებზე დაკავშირებული საინფორმაციო ტიპის შეკითხვებისთვის შეგიძლიათ მიმართოთ მთავრობის ცხელ ხაზს - 144.

]]>
versiaprinti@yahoo.com (super admin) საზოგადოება Tue, 20 Oct 2020 21:11:20 +0400
დიმიტრი ხუნდაძე: „ჩაკეტვა და ზომების გამკაცრება საჭირო აღარაა!“ https://www.versia.ge/2013-07-31-11-23-15/item/6970-დიმიტრი-ხუნდაძე-„ჩაკეტვა-და-ზომების-გამკაცრება-საჭირო-აღარაა-“.html https://www.versia.ge/2013-07-31-11-23-15/item/6970-დიმიტრი-ხუნდაძე-„ჩაკეტვა-და-ზომების-გამკაცრება-საჭირო-აღარაა-“.html

უქმნის თუ არა დამძიმებული ეპიდვითარება არჩევნების ჩატარებას საფრთხეს _ „დღეს უფრო მეტად გაბედულები ვართ!“

2020 წლის 13 ოქტომბრის მონაცემებით, საქართველოში კორონავირუსის 569 ახალი შემთხვევა გამოვლინდა და ინფიცირების შემთხვევათა რაოდენობა 12 841-მდე გაიზარდა. კოვიდინფექციით კიდევ 9 პაციენტი გარდაიცვალა და გარდაცვლილთა რაოდენობამ 102-ს მიაღწია. მოკლედ, საქართველოში ცუდი კორონავითარებაა, თუმცა ხელისუფლება „ჩაკეტვის“ გზას აღარ ირჩევს. გასათვალისწინებელია ისიც, რომ დაახლოებით, ორ კვირაში, ქვეყანაში საპარლამენტო არჩევნები ტარდება, რაც ვირუსის გავრცელების თვალსაზრისით, შესაძლოა, რისკის შემცველი იყოს. „ვერსია“ ეპიდვითარების შესაფასებლად, პარლამენტის ჯანდაცვის კომიტეტის თავმჯდომარეს, დიმიტრი ხუნდაძეს დაუკავშირდა:

_ გლობალურად ეპიდვითარება დღითიდღე უარესდება, პრაქტიკულად, ყველა ქვეყანაში იმატებს ინფიცირებულთა რიცხვი. 218 ქვეყანაა COVID 19 -ით დაზიანებული და შესაძლო მეორე ტალღა, როგორც ვვარაუდობდით, რეალობად იქცა. 

ინფიცირებულთა რაოდენობა იმატებს საქართველოშიც. ამ მხრივ, როგორც ვხედავთ, აჭარა გამოირჩევა, სადაც ბოლო დროს, გარკვეული სტაბილიზაცია იქნა მიღწეული ანუ ინფიცირებულთა რიცხვმა დაიკლო, თუმცა შემთხვევათა რაოდენობა იზრდება დედაქალაქში და ასევე, იმერეთის რეგიონშიც. 

მოკლედ, ეს ვითარება, პრაქტიკულად, აჭარის ანარეკლია, რაც მოსალოდნელი და პროგნოზირებადი იყო. ზღვის სეზონის დროს, ელემენტარული წესები რომ დაგვეცვა, რა რეკომენდაციასაც ვიძლეოდით _ ფიზიკური დისტანცია თუ პირბადის მოხმარება, დღეს ვითარება პოზიტიურად განსხვავებული იქნებოდა, თუმცა პანიკის საფუძველი დღესაც არ არსებობს, საჭიროა სიფრთხილე, ყურადღება და პასუხისმგებლობა, რომ არ დავაზიანოთ, როგორც საკუთარი ჯანმრთელობა, ასევე, გავუფრთხილდეთ სხვისასაც და რისკის ქვეშ არ დავაყენოთ ქვეყნის უსაფრთხოება. 

_ ბატონო დიმიტრი, საკოორდინაციო საბჭო, რომლის წევრიც ბრძანდებით, შეზღუდვების დაწესებას ხომ არ გეგმავს? 

 

_ როგორც ვთქვი, ვითარება ყველგან უარესდება, რაც პროგნოზირებადი იყო, მაგრამ ჩვენთანაც და ასევე, მსოფლიოშიც, გამკაცრების, რეგულაციებისა და შეზღუდვების მიმართულება არ არის. 

ყველა ქვეყანას და, მათ შორის, ჩვენც, ორი ძირითადი პრინციპი გვაქვს დასაცავი _ ქვეყნის ეპიდუსაფრთხოება ანუ მოსახლეობის ჯანმრთელობაზე ზრუნვა და ასევე, ეკონომიკური სტაბილიზაცია. ჩაკეტვა კი ეკონომიკას, რა თქმა უნდა, საკმაოდ მძიმე ზიანს აყენებს. 

ასევე, გვაქვს მესამე საზრუნავიც _ ვართ პოლიტიკურად აქტიურ პროცესში, წინ გვაქვს არჩევნები და საჭიროა, საარჩევნო და ზოგადად, პოლიტიკური პროცესის სწორად მართვა. 

რაც შეეხება იმას, მოსალოდნელია თუ არა დამატებითი შეზღუდვები, გამკაცრებები ან ჩაკეტვები, ამ ვითარებაში, ამის საჭიროება არ არის და ვფიქრობ, არც მომავალში იქნება, თუმცა ყველაფერი ეპიდვითარებაზეა დამოკიდებული. 

წერტილოვანი, ლოკალური გამკაცრებები, რა თქმა უნდა, იქნება. გავხსენით სკოლები, მაგრამ ვხედავთ, რომ ზოგან პედაგოგებს დაუდასტურდათ COVID 19 , ზოგან _ მოსწავლეებს და ლოკალური შეზღუდვები, რა თქმა უნდა, საჭირო იქნება. 

ვფიქრობთ და სხვა ქვეყნებიც ასეთ მიმართულებას იღებენ, რომ არ შეიზღუდოს ფრენები, მაგრამ აქაც იქნება გარკვეული რეგულაციები და რეკომენდაციები, რათა სტუმარს ან იმ ადამიანს, რომელიც ჩვენი ქვეყნიდან გადის, ჰქონდეს ე.წ. კოვიდპასპორტი ანუ დასტური, რომ გატესტილია და COVID 19 არ უდასტურდება. 

პარალელურად, სამედიცინო სექტორი, რომელიც წინა ხაზზეა, რა თქმა უნდა, სრულ მზადყოფნაშია. 

_ ისე, ჩნდება კითხვა: ადრე, როცა ვირუსის დაბალი მაჩვენებლი იყო, ჩავიკეტეთ და მკაცრი შეზღუდვები დაწესდა. ახლა კი, როცა მაჩვნებელი გაცილებით მაღალია, ასეთი ტენდენცია აღარაა. რატომ? 

_ ლოგიკური კითხვაა და პასუხიც ლოგიკური აქვს: თავიდან უფრო მეტი შიში და ცუდის მოლოდინი იყო, რამეთუ მსოფლიო ამ გლობალური გამოწვევისთვის მზად არ გახლდათ, მზად არც ჩვენ ვიყავით. კლინიცისტებმა არ იცოდნენ, რა დაავადებასთან ჰქონდათ საქმე და რთული პაციენტები როგორ უნდა ემართათ. კლინიკები არ იყო მომზადებული და ამისთვის გვჭირდებოდა დრო, რადგან ნახტომისებურ ზრდას სისტემა ვერ გაუძლებდა. 

მოკლედ, თავიდან უფრო მეტი კითხვა იყო, ვიდრე _ პასუხი. დღეს კი ამ ვირუსთან დაკავშირებით, მიუხედავად იმისა, რომ კიდევ არ გვაქვს პირდაპირი მოქმედების ანტივირუსული პრეპარატი და არ გვაქვს ვაქცინა, ინფორმაცია უფრო მეტია. 

სიკვდილიანობის მაჩვენებელმაც მნიშვნელოვნად დაიკლო, მანამდე, საერთო მაჩვენებელი, გლობალურად 7% იყო, დღეს კი 3%-ზე ქვემოთაა. ჩვენთან კიდევ ბევრად ნაკლებია ეს მაჩვენებელი. მაჩვენებლმა პოზიტიურად დაიკლო და დღეს მართვა შედარებით ნაკლებად პრობლემურია, ვიდრე აქამდე იყო, ამიტომ დღეს უფრო გაბედულები ვართ, ვიდრე მანამდე ვიყავით. დრო მოვიგეთ და დღეს კლინიკების 80% მზადაა, რომ საჭიროების შემთხვევაში, სისტემაში ჩაერთოს, მანამდე, მხოლოდ 5 კლინიკა იყო ჩართული. 

 

სხვათა შორის, მაშინ მსოფლიოში ინდივიდუალური დაცვის საშუალებების დეფიციტიც იყო და ნიღბების წარმოებაც კი არ ხდებოდა, რადგან ისინი მხოლოდ სამედიცინო დაწესებულებებზე იყო გათვლილი. შემდეგ კი მთელ მსოფლიოს დასჭირდა. 

ასევე, თავიდან ძალიან ბევრი „ფეიკტესტი“ გამოჩნდა, დაბალი ხარისხის, მწარმოებლებიც კი ვერ აკმაყოფილებდნენ საკუთარი ქვეყნის მოთხოვნებს. დღეს არც ტესტების დეფიციტია, საქართველოში, დღეში 10 000-ის ფარგლებში ვაკეთებთ ტესტებს. 

ასე რომ, დღეს უფრო მეტად მზად და ვიმეორებ, უფრო მეტად გაბედულები ვართ, მაგრამ მთავარია არა მხოლოდ რეგულაციები და უწყებების მზაობა, არამედ, დიდი მნიშვნელობა აქვს საზოგადოების დამყოლობასაც. დღეს ყველაზე მძლავრი დაცვის საშუალება, სანამ არ გვექნება ვაქცინა და ანტივირუსული პრეპარატი, პირბადე, ფიზიკური დისტანცირება და ჰიგიენის წესების დაცვაა. ამიტომ საზოგადოებაც და ხელისუფლებაც, ერიც და ბერიც უნდა იყოს ერთიანი და სიმძიმეს ყველა ერთად დავძლევთ! 

_ როგორც მივხვდი, არჩევნების ჩატარებასთან დაკავშირებით, კითხვები არ არსებობს, არა? 

_ დიახ, წეღანდელი თქმის არ იყოს, ჯანმრთელობის დაცვისა და ეკონომიკური სტაბილურობის გარდა, გვაქვს მესამე ვალდებულებაც _ პოლიტიკური პროცესის სტაბილურობა. საარჩევნო პროცესი იმგვარად უნდა ვმართოთ, რომ არჩევნების შემდეგ, არ მივიღოთ გაუარესებული ეპიდვითარება, რამეთუ სიმჭიდროვე მატულობს არჩევნებში და ამიტომ, აქაც წესები უნდა იქნას დაცული. ეს რეკომენდაციები გაცემულია და ვფიქრობ, ჩვენს საზოგადოებასთან ერთად, საარჩევნო პროცესსაც ისე უსაფრთხოდ ჩავატარებთ, რომ შემდეგ დამატებითი პრობლემები არ მივიღოთ.

თათია გოჩაძე

 

]]>
versiaprinti@yahoo.com (super admin) საზოგადოება Wed, 14 Oct 2020 12:53:18 +0400
ვინ არის სპორტსმენი, რომლის ქონებამ მილიარდს გადააჭარბა https://www.versia.ge/2013-07-31-11-23-15/item/6965-„შემაშფოთებელი-არაფერია-“-_-ექსკლუზიური-ინტერვიუ-თენგიზ-ცერცვაძესთან.html https://www.versia.ge/2013-07-31-11-23-15/item/6965-„შემაშფოთებელი-არაფერია-“-_-ექსკლუზიური-ინტერვიუ-თენგიზ-ცერცვაძესთან.html

ქართველები, ქართველების წინააღმდეგ _ როგორ აპირებენ რუსი მორაგბეები „ბორჯღალოსნების“ დამარცხებას

საქართველო, თბილისი, ბორის პაიჭაძის სახელობის ეროვნული სტადიონი, 12 ნოემბერი, 20.00 საათი _ ეს არის თარიღი და ადგილი, როცა ქართული ფეხბურთის ბედი გადაწყდება. ჰო, სწორედ რომ ბედი, რადგან ამ დღეს, საქართველოს ნაკრები ჩრდილოეთ მაკედონიასთან ან იგებს და ევროპის ჩემპონატის ფინალურ ეტაპზე თამაშს ინაღდებს, ან არა და ქართული ფეხბურთი, მინიმუმ, ათი წლით მიიძინებს. ბელორუსებთან 8 ოქტომბერს გამართული შეხვედრა, ავად თუ კარგად, მოვიგეთ და თუ ვინმე იმას მისტირის, რომ ლამაზი ფეხბურთი ვერ ვაჩვენეთ, ნერვები დაიწყნაროს _ მატჩის შემდგომ, ტაბლოზე ანგარიში რჩება და არა _ ლამაზი თამაში. შევეცდებით, მიახლოებით მაინც აგიხსნათ, რას ნიშნავს ქართული ფეხბურთისთვის ამ შეხვედრის მოგება: პირველ რიგში, ფინანსურ სარგებელს, რომელიც 9.25 მილიონ ევროში აისახება ანუ საქართველოს ფეხბურთის ფედერაცია, მხოლოდ ევროპის ჩემპიონატზე მოხვედრისთვის, 35 მილიონ ლარზე მეტს უეფასგან მიღებს. ამას ჯგუფურ ეტაპზე მოგებული თითო მატჩისთვის კიდევ 2 მილიონი, ფრესთვის კი 750 ათასი ევრო ემატება და ბარემ, იმასაც გეტყვით, რომ ევროპის ჩემპიონს 60 მილიონი ევრო ერგება ბონუსად.

ფული ფულად და, საქართველოში ისედაც ყველაზე პოპულარული სპორტის სახეობა კიდევ უფრო პოპულარული გახდება. 2020 წლის 12 ნოემბერს, თბილისში, შესაძლოა, 1981 წლის 13 მაისი, ლამის მთელი სიზუსტით გაცოცხლდეს. ეს არ იქნება არც რომელიმე პოლიტიკური პარტიის გამარჯვება და არც _ რომელიმე კონკრეტული ადამიანის, ეს იქნება სახალხო ზეიმი, რომელიც ასე აკლია ჩვენს ქვეყანას და არ ექნება მნიშვნელობა არც პარტიულ კუთვნილებას, არც _ კანის ფერს, არც _ მრწამსს და საერთოდ, არაფერს. 

 

უკვე ისიც ცნობილია, თუ რომელ ჯგუფში მოხვდება და ვის შეხვდება ჩვენი გუნდი. ფინალურ ეტაპზე, საქართველო ჩ ჯგუფში, ჰოლანდიასთან, უკრაინასა და ავსტრიასთან ერთად ითამაშებს და არც ეს ჯგუფი ჩანს უშანსო, თუ გავედით. 

ცალკე თემაა სტადიონზე ქომაგების დაშვების საკითხი. მართალია, საკოორდინაციო საბჭოს გადაწყვეტილებით, ბელორუსთან პრინციპული დაპირისპირება უმაყურებლოდ ჩატარდა, მაგრამ ათასობით გულშემატკივარი, დედაქალაქსა თუ რეგიონებში, დიდ ეკრანებთან, სხვადასხვა ლოკაციაზე შეიკრიბა და რეალობას თვალს თუ გავუსწორებთ, 55-ათასიან „დინამო არენაზე“, 20 ათასი გულშემატკივრის შეშვება დიდი პრობლემა არ უნდა იყოს, მით უმეტეს მაშინ, როცა წინ საუკუნის მატჩია. 

რაც შეეხება ბელორუსთან თამაშს, ის ერთადერთი გოლის წყალობით მოვიგეთ, რომელიც თორნიკე ოქრიაშვილმა, თერთმეტმეტრიანის ნიშნულიდან შეაგდო და პენალტიც მას შემდეგ დაინიშნა, რაც ამომავალმა ვარსკვლავმა, ხვიჩა კვარაცხელიამ იაქტიურა. ყაზანის „რუბინის“ 19 წლის შემტევი, მართლაც, საოცრად პროგრესირებს და სანამ ის საქართველოს ნაკრებისთვის იბრძოდა, მის კლუბს „კრასნოდარმა“ 10 მილიონი ევრო შესთავაზა და უარი მიიღო _ ყაზანელებს ხვიჩას გაყიდვა ბევრად ძვირად სურთ, თანაც ევროპაში, რადგან შიდა ჩემპიონატში კონკურენტი არ გააძლიერონ. თუ კვარაცხელიამ პროგრესი ამ ტემპით გააგრძელა, 10 მილიონი მის ტრანსფერში სასაცილო ფასად გამოჩნდება. 

* * * 

11 ოქტომბერს, ერთა ლიგის შესარჩევში, საქართველო პოლონეთში, სომხეთს დაუპირისპირდა. წესითა და რიგით, მატჩისთვის ერევანს უნდა ემასპინძლა, მაგრამ მეზობლად მიმდინარე საომარი მოქმედებების გათვალისწინებით, შეხვედრა პოლონეთში ჩატარდა და ფრედ, 2:2 დასრულდა. ჩვენმა გუნდმა გადახალისებული შემადგენლობით ითამაშა, მატჩსაც იგებდა, მაგრამ შეხვედრის დასრულებამდე სამი წუთით ადრე, მეტოქემ პენალტით გაათანაბრა და ქულა გადაარჩინა. 

* * * 

ფეხბურთი გასაგებია, მაგრამ რაგბიზეც ვთქვათ. საპარლამენტო არჩევნების მეორე დღეს ანუ 1 ნოემბერს, თბილისში, „ბორჯღალოსნები“ რუსეთს უმასპინძლებენ. რა ძნელი მისახვედრია, რომ მუდმივმა წაგებებმა ჩრდილოელები ძალიან შეაწუხა და ისინი საქართველოსთან სათამაშოდ განსაკუთრებით ემზადებიან. უფრო მეტიც, მათ ნაკრებში ოთხი ქართველი ითამაშებს. ოთხივეს რუსეთის მოქალაქეობა აქვს და ჩვენს ნაკრებში არასოდეს უთამაშია. ამას გარდა, რუსთა თავკაცმა ერთგვარ ტაქტიკურ სვლასაც მიმართა _ რუსეთის ლიგაში მოთამაშე ქართველი ლეგიონერებით გუნდი გააკეთა, რომელიც რუსებს თბილისში წამოსვლამდე შერკინება ანუ რუსული მხარე შეეცდება, ქართული სათამაშო სტილის საიდუმლო სწორედ ასე გაიგოს და ჩვენი სუსტი წერტილებიც შეისწავლოს. რა გამოუვათ ამ საქმიდან, ვერ გეტყვით, მაგრამ ფაქტია, რომ 1 ნოემბერს, რუსები მოსაგებად ძალუმად გაიწევენ. 

* * * 

იტალიურმა გამოცემებმა, სერია A-ში მოთამაშე ფეხბურთელთა და მწვრთნელთა ხელფასების ოდენობა გამოაქვეყნეს. როგორც წესი, აპენინებზე ბევრს იშვიათად იხდიან და, მაგალითად, ინგლისსა და ესპანეთთან, იტალიური ანაზღაურება ახლოსაც ვერ მივა. ასაკის მიუხედავად, კრიშტიანუ რონალდუ, იტალიაში ყველაზე მაღალანაზღაურებადი ფეხვბურთელია _ წლიური 31 მილიონი ევროთი და ეს მაშინ, როცა მეორე ადგილზე მყოფი, მისივე თანაგუნდელის, ლეონარდო ბონუჩის ჯამაგირი, სულ რაღაც, 6.5 მილიონი ევროა. 

მწვრთნელთა შორის პირველობას, 12 მილიონი ევროთი, „ინტერის“ თავკაცი, ანტონიო კონტე არავის უთმობს და მეორე ადგილზე მყოფ „რომას“ დამრიგებელ, პაულო ფონსეკას საგრძნობლად უსწრებს. დედაქალაქელები ფონსეკას, წლიურად 2.5 მილიონს უხდიან. 

ისე, რონალდუ პორტუგალიის ნაკრებში სათამაშოდ იყო წასული და მაშინ, როცა ესპანელების წინააღმდეგ ქვეყნის ღირსებას იცავდა, მის სამშობლოში, მადეირაში, სახლი გაძარცვეს. მძარცველებმა წაიღეს ყველაფერი, რისი წაღებაც და ზურგზე წამოკიდებაც შეიძლებოდა, თუმცა კონკრეტულ თანხებზე საუბარი ჯერ არ არის. 

რადგან ფულზე ვსაუბრობთ, რობინიოც ვახსენოთ. 36 წლის ბრაზილიელი, მადრიდის „რეალში“ თამაშის დროს, წლიურად, 12 მილიონ ევროს იღებდა, თითქმის ამდენივე ჰქონდა „მანჩესტერ სიტიშიც“, შემდეგ კი მისი კარიერა დაბლა დაეშვა და რობინიომაც ჩინეთი და აშშ მოიარა. ჰოდა, ახლა ის მშობლიურ „სანტოსში“ დაბრუნდა, კლუბში, სადაც ბურთის გაგორება ისწავლა და 5-თვიან კონტრაქტსაც მოაწერა ხელი. ხელშეკრულების მიხედვით, რობინიო წლიურად თვეში... 230 ევროს აიღებს. ეს არის ის მინიმუმი, რომლის ქვემოთაც გადახდის უფლება კლუბებს აღარ აქვთ. სიმბოლურ თანხად თამაშს, რობინიო „სანტოსის“ სიყვარულის გამო დათანხმდა. 

* * * 

მდიდრები მხოლოდ ფეხბურთელები არ გეგონოთ. აგერ, ამერიკულმა „ფორბსმა“, გასულ კვირას მონაცემები გამოაქვეყნა და დაადასტურა, რომ მაიკლ ჯორდანი არა მარტო საკალათბურთო მოედანზე ყოფილა გამორჩეული. მან კალათბურთით გამომუშავებულ ქონებას სწორი მიმართულება მისცა და მისი ქონება... 2 მილიარდ 100 მილიონ დოლარად შეფასდა. ცნობისთვის: ჯორდანი ერთადერთი კალათბურთელია, რომლის ქონებამაც მილიარდს გადააჭარბა. ასეულობით მილიონი კი ძალიან ბევრს აქვს. 

მილიარდერ სპორტსმენებზე როცა ვსაუბრობთ, აუცილებლად უნდა ვახსენოთ გოლფისტი ტაიგერ ვუდსი, რომლის ქონებამ მილიარდს გადააჭარბა, მაგრამ ცოლთან დაშორების შემდეგ, ქონების 70%, სწორედ ქალს ერგო, რადგან საქორწინო კონტრაქტით, ღალატის შემთხვევაში, ფული სწორედ ასე ნაწილდებოდა. ვუდსს კი ღალატი ოფიციალურად დაუმტკიცდა _ პირზე ორი ქალი დაადგა. 

 

ჰო, მილიარდიან შემოსავალს, თავის დროზე, მიხაელ შუმახერმაც გადააჭარბა, თუმცა უკვე წლებია, შუმი კომაშია და ქონებას დიდად ვეღარ ზრდის. 

* * * 

თუ ვინმემ როლან გაროსის კორტებზე გამარჯვების გემო იცის, ეს, პირველ რიგში, რაფაელ ნადალია. ესპანელმა ჩოგბურთელმა, კარიერაში მეცამეტედ მოიგო საფრანგეთის ღია პირველობა, საერთო ჯამში, დიდი მუზარადის 20 ტურნირის მოგება მოუგროვდა და ამ მაჩვენებლით, როჯერ ფედერერს გაუთანაბრდა. სერიოზული ეჭვი გვაქვს, ნადალის მიღწევას ამ ტურნირზე, საუკუნეების განმავლობაში, ვერავინ გააუმჯობესებს. რაფას „როლან გაროსის“ თიხნარზე, კარიერაში 102 მატჩი აქვს ჩატარებული და... 100-ჯერ იმარჯვა. 

P.S. გასულ კვირას, საქართველოს ეროვნული ჩემპიონატის რანგით მეოთხე ლიგაში, საინტერესო რამ მოხდა. ერთმანეთს ჩხოროწყუს „სამეგრელო“ და თბილისის „იბერია“ ხვდებოდნენ. მეგრულ კლუბს ძირითადი მეკარე დამტვრეული ჰყავდა, კარში სათადარიგო კიპერი უნდა ჩამდგარიყო, მაგრამ მატჩის წინ, მოთელვაზე, ისიც დაშავდა და კარში ვერ ჩადგა. თათბირის შემდეგ, კარში გუნდის ნახევარმცველი ჩააყენეს და, რა თქმა უნდა, „იბერიას“ მოგების უდიდესი შანსი გაუჩნდა. მეკარის გარეშე მოთამაშე ჩხოროწყუელებმა... 3:1 იმარჯვეს.

ბათო ჯაფარიძე

 

]]>
versiaprinti@yahoo.com (super admin) საზოგადოება Wed, 14 Oct 2020 12:52:56 +0400
„შემაშფოთებელი არაფერია!“ _ ექსკლუზიური ინტერვიუ თენგიზ ცერცვაძესთან https://www.versia.ge/2013-07-31-11-23-15/item/6960-„შემაშფოთებელი-არაფერია-“-_-ექსკლუზიური-ინტერვიუ-თენგიზ-ცერცვაძესთან.html https://www.versia.ge/2013-07-31-11-23-15/item/6960-„შემაშფოთებელი-არაფერია-“-_-ექსკლუზიური-ინტერვიუ-თენგიზ-ცერცვაძესთან.html

მართლა იგეგმება თუ არა სპორტის სასახლეში საველე ჰოსპიტალის გახსნა, რითი ხსნის ეპიდვითარების დამძიმებას და რა დამატებით რეკომენდაციას აძლევს მოსახლეობას ქვეყნის მთავარი ინფექციონისტი

 

2020 წლის 6 ოქტომბრის მონაცემებით, საქართველოში კორონავირუსის დადასტურებულ შემთხვევათა საერთო რაოდენობა 9245-ია, საიდანაც გამოჯანმრთელებულია 4887 ადამიანი. ბოლო დროს, ვირუსით გარდაცვლილთა რაოდენობაც გაიზარდა... მოკლედ, სექტემბრიდან მოყოლებული, საქართველოში ვირუსის შემთხვევები მკვეთრად იმატებს და ჩნდება არაერთი კითხვა, მაგალითად: რამდენადაა მზად საქართველოს ჯანდაცვის სისტემა, რომ არსებულ პანდემიურ ვითარებას გაუმკლავდეს, ან ხომ არ გამოცხადდება განმეორებით საგანგებო მდგომარეობა? „ვერსიამ“ არსებული ეპიდვითარება თბილისის ინფექციური საავადმყოფოს დირექტორს, თენგიზ ცერცვაძეს შეაფასებინა.

_ ბატონო თენგიზ, ვითარება საგანგაშოა? 

_ შემთხვევების მატება კარგი არასდროსაა, მაგრამ მინდა, ცალსახა კომენტარი გავაკეთო _ ეს შემაშფოთებელი არაა! მეტიც, მსოფლიო ტენდენციასა და ევროპის ქვეყნებსა და აშშ-სთან შედარებით, პირიქით, ნაკლებია. შემთხვევების ასეთი ზრდა მოსალოდნელი იმიტომ იყო, რომ ზაფხულში შიდა შეზღუდვები მოიხსნა და მობილობა გაიზარდა. 

საერთოდ, ზაფხული დასვენების სეზონია და ეს დრო ხალხმა საკმაოდ აქტიურად გამოიყენა აჭარაში, სადაც ახლა ეპიდემიის პიკია. იქ ბევრი დამსვენებელი იყო ჩასული და შეუძლებელია, ამას მატება არ მოჰყოლოდა. 

 

რა თქმა უნდა, კარგი იქნება, რომ არ იყოს შემთხვევების მატება, მაგრამ ეს გარდაუვალია, ვერც ერთი ქვეყანა ამას ვერ გადაურჩა. ჩვენთან კი ეს ძალიან გვიან დაიწყო ანუ ერთეული შემთხვევებით, ჩვენ 7-8 თვე მოვიგეთ და მატება მხოლოდ ახლა დაიწყო. 

_ მესმის, მაგრამ ეს მოსახლეობისთვის რამდენად სახიფათოა, ვირუსის მართვის სადავეები ხომ არ დაკარგეთ? 

_ ეს ყველაზე მთავარი კითხვაა და პასუხიც მაქვს _ არა, რადგან ამ შემთხვევების გაზრდილ რაოდენობას მომსახურების ყველანაირი სერვისი ისე ეწევა, რომ სისტემის არც ერთი რგოლი არ ჩავარდნილა და გამართულად მუშაობს. 

ტესტირება უტარდება ყველა პაციენტს, ვისაც სჭირდება და ყველა მათგანს, ვინც რისკჯგუფშია, მაგალითად, ავტობუსებისა და სამარშრუტო ტაქსების მძღოლებს, სასწრაფო დახმარების სამსახურის პერსონალს, სამედიცინო პერსონალს... 

ეს ჩამონათვალი ძალიან დიდია, რაც შორს წაგვიყვანს. მოკლედ, ყველას უტარდება ტესტირება. არც ერთი ავადმყოფი, განსხვავებით წამყვანი ქვეყნებისა, როგორებიცაა საფრანგეთი, გერმანია, ესპანეთი, იტალია და სხვები, ექიმის გარეშე არ დარჩენილა. უცხოეთში კი ძალიან ბევრი ადამიანი რჩებოდა ექიმის გარეშე. 

სანამ საქართველოში შემთხვევები ცოტა იყო, ყველა პაციენტის ჰოსპიტალიზაციას ვახერხებდით, ახლა კი ეს შეუძლებელია, მაგრამ უსიმპტომო და მსუბუქ პაციენტებს ბინაზე ვტოვებთ და იქ ვმკურნალობთ. ისინი კი, რომლებსაც დაავადების სერიოზული გამოვლინებები აქვთ, ჰოსპიტალიზებულნი არიან. დღეს არც ერთი პაციენტი, რომელსაც აქვს სერიოზული სიმპტომები, არაა დარჩენილი კლინიკის გარეთ. ეს არის კონტროლი, რომ სადავეები არ გაგვქცევია. უცხოეთში კი მძიმე ავადმყოფებიც ვერ ხვდებოდნენ კლინიკებში. ზოგი, სამწუხაროდ, სახლში ისე კვდებოდა, რომ ექიმთან ერთხელაც ვერ ახერხებდა შეხვედრას. თავად პრეზიდენტმა ტრამპმა განაცხადა, 3 დღე ველოდი ტესტის პასუხსო და ეს მაშინ, როცა ჩვენთან, 24 საათშია პასუხები. ჩვენთან, ბინაზე, ჯერ ერთი პაციენტიც არ დაღუპულა, რაც ნიშნავს, რომ ყველაფერი კონტროლდება. 

რაც შეეხება სიკვდილის შემთხვევების რაოდენობას, რა თქმა უნდა, ერთი ადამიანის დაკარგვაც ცუდია, მაგრამ 600 შემთხვევიდან 4 დაღუპული, 0.6%-ია, რაც ევროპასა და ჩრდილოეთ ამერიკის ქვეყნებთან შედარებით, ყველაზე დაბალი პროცენტული მაჩვენებელია. საქართველო ინარჩუნებს იმ ქვეყნის სტატუსს, რომელსაც ევროპის 49 ქვეყანასა და ჩრდილოეთ ამერიკის ქვეყნებს შორის, ყველაზე ნაკლები გარდაცვალების შემთხვევა აქვს ერთ მილიონ მოსახლეზე. ესაა ძირითადი პარამეტრები, რითაც ფასდება, თუ როგორ უმკლავდება ქვეყანა პანდემიას. ამიტომ ვამბობ, რომ საგანგაშო არაფერია, ძალიან გამოცდილები არიან ჩვენი ეპიდემიოლოგები _ დაავადებათა კონტროლის ცენტრი, ასევე, სახელისუფლებო ვერტიკალი და ძალიან დიდი იმედი მაქვს, რომ ყველაფერს მალე გაუმკლავდებიან. დღეში 4 გარდაცვლილი, ასეთი მატების პერიოდში... მერწმუნეთ, სხვა ქვეყნები ამაზე იოცნებებდნენ. სხვა ქვეყნებში სიკვდილიანობა ათჯერ და ასჯერ მეტია. 

_ გასაგებია, მაგრამ საინტერესოა, რამდენად ემზადება ჯანდაცვის სისტემა ყველაზე ცუდი სცენარისთვის. ვთქვათ, ის რომ მოხდეს, რაც გაზაფხულზე, იტალიაში ხდებოდა, საამისოდ სისტემა მზადაა? 

_ ამ შემთხვევაში, პირდაპირი რესპონდენტი არ ვარ იმიტომ, რომ მე კლინიცისტი ვარ, კოვიდკლინიკებს ვაკონტროლებ და იქ მკურნალობას კოორდინაციას ვუწევ. ჩემი ამოცანაა, რომ კლინიკაში შემოსული პაციენტებისგან რაც შეიძლება, ნაკლები გარდაიცვალოს და ამას ძალიან წარმატებით ვაკეთებთ. 

რაც შეეხება სარეანიმაციო საწოლების, ექიმების მობილიზაციას, ეს მთლიანად ჯანდაცვის სამინისტროს პრეროგატივაა, მაგრამ რამდენადაც მაქვს ინფორმაცია, პრობლემა ამ კუთხითაც არ იქნება. თუ კატასტროფული მატება იქნა, როგორც ჩინეთში, ან იტალიაში, მაშინ... საერთოდ, მზადყოფნას რაღაც ზღვარი აქვს, როგორია ეს ზღვარი, არ ვიცი, მაგრამ იმაზე ბევრად მეტია, ვიდრე ახლაა დატვირთვა. 

ახლა მობილიზებულია 3000 საწოლი და შემთხვევების ასეთი მატების მიუხედავად, საწოლების ნაწილი თავისუფალია იმიტომ, რომ ახლადგამოვლენილების ნაწილი ბინაზე, ან სასტუმროში მკურნალობს. 

_ ანუ, საქართველოში კოვიდინფიცირებულთათვის საწოლების დეფიციტი არ არის? 

_ არა, ჯერჯერობით საწოლების დეფიციტი არ არის. პირიქით, ჩემს საავადმყოფოშიც არის თავისუფალი გარკვეული რაოდენობის საწოლები. ბათუმში იყო 1-2 დღე, როცა ახალი იყო შემთხვევათა მატება და უცებ ვერ გაერკვნენ ვითარებაში. საწოლების დეფიციტი ახლა აღარაა. თუ შემთხვევები მოიმატებს, როგორც სამინისტროს ხელმძღვანელობა აცხადებს, მას შეუძლია, კიდევ ერთი ამდენი საწოლის მობილიზება, მაგრამ არ მგონია, საქართველოში ამაზე მეტი საწოლი დაგვჭირდეს. 

_ ესე იგი, სულ 6000 საწოლზეა საუბარი, არა? 

_ ასე ამბობენ. 3000 მობილიზებულია, კიდევ 3000 შერჩეულია და მოლაპარაკებულები არიან საავადმყოფოების მეპატრონეებთან, რომ საჭირო შემთხვევაში, ეს საწოლები დაიკავონ. 

_ ბატონო თენგიზ, ბიძინა კულუმბეგოვმა განაცხადა, რომ ყველაზე რთული ვითარების დროს , შესაძლოა, სპორტის სასახლე საავადმყოფოდ გადაკეთდეს. ეს საკითხი მართლა განიხილება? 

_ ასეთი რაღაცები უცხოეთში გაკეთდა. მაგალითად, ჩინეთში, ერთჯერადი საავადმყოფო, ერთ კვირაში აშენდა. ჩვენთან ჯერ საწოლები იმდენია, რომ სპორტის სასახლეში ჰოსპიტალის გაშლის საჭიროება არ დგას, ეს პირველად მესმის, არც გამიგია და ამის საჭიროება, ძალიან დიდი ალბათობით, არ იქნება. 

_ კეთილი... და ბოლოს, მოსახლეობას რა რეკომენდაცის მისცემთ, ბატონო თენგიზ? 

_ რეკომენდაცია სტანდარტული... ჩვენ უარი ვთქვით საგანგებო მდგომარეობის ხელმეორედ შემოღებაზე, რაც ზოგმა ქვეყანამ, მაგალითად, ისრაელმა გააკეთა იმიტომ, რომ იქ ბოლო დროს, დღეში 6000 შემთხვევა იყო. საქართველოში ეს არ იქნება, ვამჯობინეთ, რომ გვყავდეს გარკვეულად მომატებული რაოდენობა, რომელსაც ვუმკურნალებთ, ვიდრე ხელმეორედ გამოვაცხადოთ საგანგებო სიტუაცია და კარანტინი. 

მოკლედ, რეგულაციები სტანდარტულია და ყველას ვთხოვ, რომ ატაროს პირბადე დახურულ სივრცეში, დაიცვას სოციალური დისტანცირება ანუ ყველგან, მათ შორის, რესტორანში, სასწავლო დაწესებულებასა თუ დაკრძალვაზე, 1-1.5-მეტრიანი დისტანცია დაიცვას. 

 

ჩვენთვის, საქართველოსთვის მთავარი ისაა, რომ თავი შევიკავოთ ხალხმრავალი შეკრებებისგან, ძირითადად, ქორწილებისა და ქელეხებისგან. ასევე, აუცილებელია ხელების ხშირი დამუშავება და დაბანა. 

ამ ძირითად რეკომენდაციებს ერთსაც დავამატებ: ხანდაზმულებს გავუფრთხილდეთ! არ არის კარანტინი და ჩაკეტვები, მაგრამ ცოტა ხანს, ხანდაზმულები დარჩნენ სახლში, თუ არ არიან მარტო და არ სჭირდებათ საკვებზე ან წამალზე გასვლა, გაუფრთხილდნენ უფრო მეტად თავს. ახალგაზრდებს შეუძლიათ, თავისუფლად იარონ ყველგან. ხანდაზმულ ადამიანებს კი უნდა გავუფრთხილდეთ, თუ ოჯახის წევრი გვყავს ასაკოვანი, ჩვენ აქტიური ვართ და შეიძლება, კონტაქტში ვიყოთ ვინმესთან, მოვერიდოთ ხანდაზმულთან ახლო კონტაქტს. შეიძლება, მოხდეს სახლში დისტანცირება ცალკე ოთახში, ვისაც ამის შესაძლებლობა აქვს. 

ერთადერთ საფრთხეს იმაში ვხედავ, რომ არ იყოს ასაკოვნების დაინფიცირების მატება, დანარჩენს ყველაფერს გავუძლებთ!

 

თათია გოჩაძე

 

]]>
versiaprinti@yahoo.com (super admin) საზოგადოება Wed, 07 Oct 2020 11:39:45 +0400
„თბილისი გახდეს მშვიდობის ქალაქი“ _ ანი რეხვიაშვილის საერთაშორისო ინიციატივა https://www.versia.ge/2013-07-31-11-23-15/item/6955-„თბილისი-გახდეს-მშვიდობის-ქალაქი“-_-ანი-რეხვიაშვილის-საერთაშორისო-ინიციატივა.html https://www.versia.ge/2013-07-31-11-23-15/item/6955-„თბილისი-გახდეს-მშვიდობის-ქალაქი“-_-ანი-რეხვიაშვილის-საერთაშორისო-ინიციატივა.html

როგორ გაჩნდა სამშვიდობო იდეა და ვინ იქნება სახალხო მოძრაობის ჯანდაცვის მინისტრობის კანდიდატი

 

სახალხო მოძრაობა ქრისტიან-დემოკრატების თავმჯდომარე, ანი რეხვიაშვილი გამოდის საერთაშორისო ინიციატივით, რომ თბილისი მშვიდობის ქალაქი გახდეს. რას ითვალისწინებს თბილისის მშვიდობის ქალაქად გამოცხადება? _ „ვერსია“ დეტალებზე ანი რეხვიაშილს ესაუბრა.

_ ანი, ახალი სამშვიდობო ინიციატივის იდეა როგორ და რატომ გაგიჩნდა? 

_ პირველ რიგში, გულწრფელ მადლობას მოგახსენებთ, რომ სახალხო მოძრაობის ახალი პოლიტიკური და საერთაშორისო ინიციატივით დაინტერესდით. 

რაც შეეხება თავად იდეას, გვინდა, რომ თბილისი მშვიდობის ქალაქად გამოცხადდეს. 

ამ დღეებში, როცა სომხეთსა და აზერბაიჯანს შორის კონფლიქტი განახლდა, ჩემი სომეხი მეგობრები, რომლებთანაც დიდი ხნის ინსტიტუციური თანამშრომლობაც მაქვს, მწერდნენ, რომ ეს მათი სამამულო ომია, რომ ახლა მთელი სომხეთი ჯარისკაცია და ამ ომში უკან არ დაიხევენ. აზერბაიჯანელებიც იგივეს აცხადებენ და რაიმე კომპრომისზე წასვლას არ აპირებენ. 

საერთოდ, ამ ომში, შეიძლება, რუსეთი და თურქეთიც ჩაერთოს და აქედან გამომდინარე, ჩვენი არასტაბილური რეგიონის უმძიმესი რეალობა ძნელი წარმოსადგენი არაა. 

სხვათა შორის, ამას წინათ, მიუნხენში ვიყავი და ჩემი ევროპელი კოლეგების მეშვეობით, მცირე ხნით, უსაფრთხოების კონფერენციაზე მოვხვდი, სადაც ალიევ-ფაშინიანის დებატებიც მოვისმინე... მაშინ ისტორიული მტრები და მოწინააღმდეგეები ცდილობდნენ, ფორმატის სტილი შეენარჩუნებიათ, პოლემიკისადმი დიდი ინტერესი გამოეჩინათ და ამავდროულად, ქვეყნის პირველი პირებისთვის დამახასიათებელი გალანტურობაც შეენარჩუნებინათ, მაგრამ დენთის სუნი ტრიალებდა, აშკარად... 

სიმართლე გითხრათ, მაშინ უკვე ჩაფიქრებული მქონდა, რომ თბილისი მშვიდობის ქალაქად გამოცხადებულიყო და ვფიქრობდი, ეს იდეა „ლიდერ ქალთა გეოპოლიტკური ალიანსის“ ფორმატში გამეხმიანებინა, მაგრამ ახლა, როგორც საქართველოსა და რეგიონის მშვიდობისა და განვითარებისთვის უმნიშვნელოვანეს ინიციატივას, სახალხო მოძრაობის პოლიტიკური პლატფორმიდან ვახმოვანებ. 

საერთოდ, მშვიდობა სურვილი ან იმედი კი არა, არამედ, მშვიდობა უფლებაა! ეს სერთაშორისო ინიციატივაც, სწორედ ამ უფლების ძალით გამოვაცხადე! 

დიახ, იმ დროს, როდესაც საქართველოს მეზობლებსა და ძმებს შორის, განახლებული ომის უმძიმესი რეალობაა და როდესაც სამხედრო შეიარაღებული კონფლიქტის გეოგრაფია ყოველდღე ფართოვდება, დიდი ადამიანური მსხვერპლია და მხარეები ჯერ კიდევ არ არიან მზად, რომ ცეცხლის შეწყვეტის შესახებ მოლაპარაკების მაგიდას მიუსხდნენ, როდესაც საქართველო აღმოსავლეთის პარტნიორობის რეგიონის ნაწილია და ამ პარტნიორობაში შემავალი ყველა ქვეყანა პერმანენტული აგრესიის, ოკუპაციის, ომისა და მშვიდობის ზღვარზეა, ან პოლიტიკური კონფლიქტებისა და პოლიტიკური დესტაბილიზაციის რეალობით ცხოვრობს, როდესაც საქართველო კიდევ ერთი _ ახლო აღმოსავლეთის რეგიონის გავლენის ნაწილია, სადაც გეოგრაფიულად, ასევე, ახლოსაა კიდევ ერთი ომის თეატრი და სადაც რეგიონის ყველა დიდი აქტორის ინტერესი იკვეთება, ჩვენ უნდა შევძლოთ, რომ მშვიდობის კუნძული, მშვიდობის ადგილი და მშვიდობის მუდმივი ინსტიტუციური სივრცე შევქმნათ. 

_ თბილისის მშვიდობის ქალაქად გამოცხადება, ცხადია, გადასარევი ინიციატივაა, მაგრამ როგორ ფიქრობ, ამ იდეას გამოხმაურება მოჰყვება? 

_ პირველ რიგში, ეს იდეა, შესაძლოა, სხვებსაც ჰქონდათ, მაგრამ იდეის დონეზე დარჩა. მეორეც, ახლა ჩვენ არა მხოლოდ იდეაზე, არამედ, პოლიტიკურ და საერთაშორისო ინიციატივაზე ვლაპარაკობთ, რომელსაც მსოფლიო პოლიტიკურ დედაქალაქებს, საერთაშორისო ინსტიტუტებს, საქართველოს ახალ პარლამენტს და ნებისმიერი კონფიგურაციის ახალ მთავრობას შევთავაზებთ. 

მშვიდობის ქალაქის გამოცხადებას თავისი საერთაშორისო პრაქტიკა და გამოცდილება, თავისი შესაბამისი პროცედურები და მექანიზმები აქვს, მაგრამ მთავარია, ზუსტად ვიცოდეთ, რომ რეგიონში სტაბილურობის გარეშე, ქართულ სახელმწიფოებრიობას მომავალი არ გააჩნია! 

ამიტომაც, სულ ძიებაში ვარ და ჩვენი ოკუპირებული და დაშლილი სამშობლოსთვის დამცავ იმუნიტეტს, მის განსაკუთრებულ ფუნქციას და თუ გნებავთ, რეგიონში ისტორიულ როლს, მუდამ ვეძებ! 

პოლიტიკურმა არენამ კი, როგორც შესაძლებლობების აქტიურმა პლატფორმამ, ჩემი კონკრეტული ინიციატივები და გზავნილები კიდევ უფრო გაააქტიურა. 

ისე, ერთ საიდუმლოსაც გეტყვით: თბილისის მშვიდობის ქალაქად გამოცხადების ინიციატივაზე ფიქრისას, ხშირად ვსვამდი კითხვას: რამ შეიძლება ამ ახალ ინიციატივას ხელი შეუშალოს-მეთქი და ცოტა იუმორისტულად რომ ვთქვა, ამ კითხვას თავადვე ვპასუხობდი ხოლმე, მხოლოდ რეგიონალურ „შურს“-მეთქი, თუმცა ალბათ, არც უამისობაა, მაგრამ რეალურად, ეს ისტორიული გადაწყვეტილებები ახლა ჩვენს გაბედულებაზე, ნებასა და თანმიმდევრულობაზეა დამოკიდებული. ამიტომაც, ამ შანსის ხელიდან გაშვება არ შეიძლება! 

_ სხვათა შორის, მედიატორის სურვილი საქართველოს ხელისუფლებამაც გამოთქვა, ანუ შენი იციატივა და ხელისუფლების სურვილი თანხვედრაშია? 

_ არა, რასაკვირველია. ეს ორი სხვადასხვა საკითხი, სხვადასხვა შეთავაზება, სხვადასხვა პლატფორმა და სხვადასხვა შინაარსია. 

_ რატომ? 

_ მოდით, ეს თემა „ჩავშალოთ“. 

_ კი ბატონო, გისმენთ. 

_ ბოლო 30 წელიწადია, მეზობელი ქვეყნების კონფლიქტის მიმართ, საქართველო ნეიტრალიტეტის პოლიტიკას მისდევს და ეს საკმაოდ წარმატებულად გამოსდის. ახლა კი, ოფიციალურმა თბილისმა, განახლებულ ომში შესულ ორ უახლოეს მეზობელსა და მეგობარ სახელმწიფოს, ნეიტრალიტეტის ფარგლებში, მოლაპარაკების სივრცე შესთავაზა. ეს სწორი პოზიცია და შეთავაზებაა, თუმცა აქვე შევნიშნავ, რომ უსაფრთხოების საბჭოსა და პრეზიდენტის მიერ გაჟღერებული ეს განცხადება დაგვიანებულია, რადგან ომი, რომელიც საქართველოს მეზობლებს შორის მიმდინარეობს და რომლის გეოგრაფიაც ყოველდღე ფართოვდება, უკვე აღარაა კონფლიქტი ყარაბაღის გამო ანუ ეს იმას ნიშნავს, რომ ომის თეატრი ჩვენს რეგიონში გადმოვიდა. 

მართალია, საქართველოში შეფასებებიც და შეთავაზებაც დაგვიანებით გაკეთდა, მაგრამ გაკეთდა. სხვა თემაა, ის უმძიმესი რეალობა, რომ ომის მხარეები მოლაპარაკებისათვის მზად დღესაც არ არიან. 

რაც შეეხება შენს სრულიად ლეგიტიმურ კითხვას _ სივრცის გახსნაზე ხელისუფლების შეთავაზება და სახალხო მოძრაობის იდეა, რომ თბილისი მშვიდობის ქალაქი გახდეს, არის თუ არა ერთი და იგივე, გიპასუხებ, რომ არა. სახალხო მოძრაობა მსოფლიოს სთავაზობს, რომ ჩვენი ქვეყნის დედაქალაქი მშვიდობის ქალაქი გახდეს. ეს კი ნიშნავს, რომ თბილისს კონსენსუსისა და სამშვიდობო გადწყვეტილებების მისაღებად გამორჩეული სტატუსი, გავლენა, ფუნქცია, მუდმივი მდგომარეობა და განსაკუთრებული ადგილი ჰქონდეს ანუ სამშვიდობო ორგანიზაციების ნაწილი საქართველოში გადმოვიდეს, რეგიონში დიპლომატია გაძლიერდეს და მუდამ მოვლენებისა თუ ყურადღების ცენტრში ვიყოთ. თბილისის მშვიდობის ქალაქად გამოცხადება, მინიმუმ, საქართველოს უსაფრთხოებას, მის სტაბილურ ეკონომიკურ განვითარებას, მომავალს და ჩვენი ქვეყნის მშვიდობისა და განვითარების გზით გამთლიანების შესაძლებლობის მიღწევას ნიშნავს. 

ეს უმნიშვნელოვანესი შეთავაზება გაზრდის ჩვენი ქვეყნის გავლენას, პრესტიჟს, მშვიდობის მანიფესტაციას და საქართველოს განსაკუთრებულ როლს რეგიონში. ამ შემთხვევაში, ვგულისხმობ, რა თქმა უნდა, როგორც სამხრეთ კავკასიას, აგრეთვე, აღმოსავლეთის პარტნიორობას და ახლო აღმოსავლეთსაც, სადაც რეგიონის ყველაზე გავლენიანი აქტორებისა და აშშ-ის ინტერესები იკვეთება. 

საქართველოს ნებისმერ ხელისუფალს მუდამ უნდა ახსოვდეს, ჩვენი ქვეყნისთვის კრიტიკულად მნიშვნელოვანოვანია, რომ რეგიონში სტაბილურობა იყოს. 

_ ისე, სახალხო მოძრაობა, არჩევნებამდე რამდენიმე კვირით ადრე, ამომრჩეველს ამ ინიციატივის გარდა, სხვა არაფერს სთავაზობს? 

_ პირიქით, სახალხო მოძრაობა, როგორც ლიდერების ახალი თაობის მოძრაობა, ამომრჩეველსა და საზოგადოებას ბევრ სიახლეს, ახალ ხედვებს, საინტერესო და სასარგებლო ინიციატივებს სთავაზობს. 

ეს სახალხო მოძრაობაა, ჩვენთვის მთავარია, რომ ყოველი ადამიანი და ყველა ინტერესი ხალხის კეთილდღეობისკენ იყოს მიმართული. 

ერთ ექსკლუზივსაც გაგიმხელ: სახალხო მოძრაობა ქრისტიან-დემოკრატები, ნებისმიერი კონფიგურაციის მთავრობას ჯანმრთელობის მინისტრის კანდიდატურას წარუდგენს და ეს ათენის საუნივერსიტეტო კლინიკის დასტაქარი და პროფესორი, გიორგი ებრალიძე გახლავთ, რომელიც უმაღლესი კლასის პროფესიონალია ევროპული განათლებითა და პრაქტიკით, ფართო ერუდიიცითა და უდიდესი პასუხისმგებლობით. გიორგი ებრალიძე საინტერესო პროგრამის ავტორიცაა, რომელიც საქართველოს ჯანმრთელობის დაცვის სისტემის განვითარებაზე, ერთდროულად, პაციენტისა და ექიმის ინტერესებზეა მორგებული. 

ახალი მთავრობისათვის, ჯანმრთელობის მინისტრის პოსტზე გიორგი ებრალიძის კანდიდატურის შეთავაზებას კიდევ ერთი უმნიშვნელოვანესი აქცენტი აქვს _ გიორგი შვედეთის, დიდი ბრიტანეთისა და სხვა ქვეყნების სამედიცინო ორგანიზაციებში მუშაობის შემდეგ, ახლა ათენის უნივერსიტეტის კლინიკის დოქტორი და პრაქტიკოსი ქირურგია, რაც იმას მიშნავს, რომ ქართულმა პოლიტიკამ უნდა გაააქტიუროს ეს ხაზი და საქართველოში ღირსეულად დააბრუნოს უცხოეთის სხვადასხვა ქვეყანაში მოღვაწე პროფესიონალები.

ნინო დოლიძე

]]>
versiaprinti@yahoo.com (super admin) საზოგადოება Wed, 07 Oct 2020 11:39:19 +0400
დასავლეთ საქართველოში სასულიერო პირი მოკლეს https://www.versia.ge/2013-07-31-11-23-15/item/6953-დასავლეთ-საქართველოში-სასულიერო-პირი-მოკლეს.html https://www.versia.ge/2013-07-31-11-23-15/item/6953-დასავლეთ-საქართველოში-სასულიერო-პირი-მოკლეს.html

რომელმა „კანონიერმა ქურდმა“ მისცა მღვდელს „შავი ფული“ ეკლესიის ასაშენებლად

დასამალი არავისთვისაა, რომ კომუნისტები საეკლესიო პირებს არ სწყალობდნენ. ახალი ეკლესიები კი არა, აშენებულებს ანგრევდნენ და სასულიერო პირებსაც სდევნიდნენ. მერე და მერე, ეს დევნა შემცირდა, მაგრამ ეკლესიაში სიარული კარგ ტონად მაინც არ ითვლებოდა. თანამდებობის პირებს ეკლესიაში შესვლა აკრძალული ჰქონდათ და არც დადიოდნენ, მრევლი თითებზე დასათვლელი იყო და ხელისუფლება მაქსიმალურად ცდილობდა, დიდ ქალაქებში მოქმედი ეკლესიები ნაკლები ყოფილიყო. ამის მიუხედავად, მამაოები, განსაკუთრებით სოფლებში, მაინც ახერხებდნენ პატარა ეკლესიების ისე მოწყობას, რომ წირვის ჩატარება შესაძლებელი ყოფილიყო და გლეხებს იქ სიარულსა და სანთლის დანთებას, შესაწირავსა და ნათლობას ვერ უკრძალავდნენ.

„დასავლეთ საქართველოს ერთ-ერთ რაიონში განყოფილების უფროსი ვიყავი, როცა არცთუ ახლოს მდებარე სოფლის რწმუნებული მოვიდა და მიპატაკა, ადგილობრივი მღვდელი გარდაცვლილი იპოვესო. ერთი შეხედვით, საქმე უბედურ შემთხვევასთან გვქონდა, რადგან რწმუნებული ამბობდა, მღვდელი ფუტკრებმა დაკბინეს, მას კი ფუტკრის ნაკბენზე ალერგია ჰქონდა და რადგანაც ტყეში მარტო იყო, ვერავინ უშველაო“, _ გვიყვება პოლიციის გადამდგარი პოლკოვნიკი, ბატონი თენგიზი. 

შემთხვევის ადგილზე გასულ სამართალდამცავებს ზუსტად ისეთი სურათი დახვდათ, როგორიც რწმუნებულმა აღწერა _ მამაო ტყის ბილიკზე იწვა, ძალადობის ნიშნები არ ეტყობოდა, ფუტკრის ნაკბენი კი სამ ადგილზე ჰქონდა. მილიციის თანამშრომლებმა, ყოველი შემთხვევისთვის, მიმდებარე ტერიტორია დაათვალიერეს და მინის პატარა ქილა იპოვეს. ექსპერტი ქილას ყურადღებით დააკვირდა, შემდეგ გამომძიებელს შეხედა და ნაღვლიანად უთხრა _ მკვლელობაა! 

ქულაში ფუტკრის ორი ფრთა იპოვეს, ორივე მარცხენა, რაც იმას ნიშნავდა, რომ ქილაში, მინიმუმ, ორი ფუტკარი იყო. ტყეში, უბედური შემთხვევის ადგილზე ქილა ფუტკრის ფრთებით, აშკარად იძლეოდა იმის საფუძველს, რომ სამართალდამცავებს ეჭვი გასჩენოდათ _ იქ ფუტკარი სპეციალურად მიიყვანეს, რათა მამაოსთვის ეკბინა. 

 

„ძალიან მარტივია _ ქილას ფუტკრებით აავსებდნენ, მამაოს მიეპარებოდნენ, კისრის მხარეს ჩაუყრიდნენ და სანამ აზრზე მოვიდოდა, ფუტკრები თავის საქმეს იზამდნენ. სამივე ნაკბენი გარდაცვლილს კისერზე აქვს, რაც იმას ნიშნავს, რომ მას სამმა ფუტკარმა უკბინა და ისინი მაინცდამაინც კისერში ეცნენ“, _ ამბობდა ექსპერტი. 

ექსპერტიზით ისიც დადგინდა, რომ მამაოს სხეულზე არაერთი სვირინგი ჰქონდა, რაც გამომძიებელს არ გაჰკვირვებია. მან ზუსტად იცოდა, რომ ადრე, მამაო ნასამართლევი იყო, რწმენაში სასჯელაღსრულების დაწესებულებაში შევიდა, ციხიდან გათავისუფლების შემდეგ კი მღვდლად ეკურთხა და სოფელში ძველი ეკლესიის რემონტი დაიწყო, თუმცა რემონტს სერიოზული თანხა სჭირდებოდა და ყველაზე საინტერესო ის იყო, რომ მამაოს ეს თანხა ჰქონდა. უხეში დათვლით, უკვე 15 ათას მანეთზე მეტი იყო დახარჯული, ამასთან, გამორიცხული იყო, ადგილობრივ მრევლს ამ ოდენობის თანხა შეეწირა. 

მამაო სასჯელს ბინის ქურდობისთვის იხდიდა ანუ ისიც გამორიცხული იყო, რომ ბინიდან ისეთი რამ წაეღო, რაც გაყიდა და ეკლესიას მოახმარა. ეკლესიის რემონტში, პრაქტიკულად, მთელი სოფელი იყო ჩართული და ვისაც სურვილი ჰქონდა, უფასოდ მუშაობდა, ვისაც არა _ ჯამაგირს იღებდა და მამაო ხელფასს არასოდეს უგვიანებდა. 

იმის გათვალისწინებით, რომ მამაო სოფლიდან თითქმის არასდროს გადიოდა და საჭირო რამეებს სოფლელებს აბარებდა, ადვილი მისახვედრი იყო, რომ თანხა შინ უნდა ჰქონოდა, თუმცა სახლის ჩხრეკამ გამოძიებას არაფერი მისცა. გარდაცვლილის ცოლიც, ფოფოდიაც ამბობდა, რომ დიდი თანხა სახლში არასოდეს უნახავს, მაგრამ ვერც იმას ხსნიდა, მოძღვარს ეკლესიის რემონტის ფული საიდან მოჰქონდა. 

რაც მთავარია, სოფელში ვერავინ ხვდებოდა, რისთვის შეიძლებოდა მოეკლათ მოძღვარი. სხვათა შორის, ის, რომ ფუტკრების ნაკბენზე ალერგია ჰქონდა, მხოლოდ ცოლმა იცოდა და არავისთვის უთქვამს. ამიტომ, სამართალდამცავებს მამაოს მკვლელობის მიზეზი, მის წარსულში უნდა ეძებნათ.  

„სასჯელაღსრულების დაწესებულებაში გარდაცვლილი არაფრით გამოირჩეოდა. მას შემდეგ კი, რაც რწმენაში შევიდა, ერთ-ერთ „კანონიერ ქურდს“ დაუახლოვდა და მის საკანშიც კი გადავიდა საცხოვრებლად. ქურდის საკანში ცხოვრება პრივილეგია იყო. ისინი ერთი კვირის სხვაობით გათავისუფლდნენ, თუმცა გათავისუფლებიდან რამდენიმე თვეში, „კანონიერი ქურდი“ გარდაიცვალა _ მას სიმსივნე ჰქონდა და ყველამ იცოდა, რომ დიდი დღე არ ეწერა“, _ ასეთი პასუხი მიუვიდა გამოძიებას იმ სასჯელაღსრულების დაწესებულებიდან, სადაც მღვდელი სასჯელს იხდიდა და პასუხს იმ პატიმართა სიაც ერთვოდა, რომლებთანაც პატიმრობის დროს, მამაო ერთ საკანში იმყოფებოდა. 

გამოძიებამ სიის შესწავლა დაიწყო და აღმოაჩინა, რომ ერთ-ერთი ყოფილი პატიმარი, იმავე სოფელში მძღოლად მუშაობდა. ავტოფარეხის უფროსმა დაადასტურა, რომ მძღოლის წარსულის შესახებ იცოდა, თუმცა მაინც აიყვანა, რადგან სოფლად სამუშაოდ არავინ მიდიოდა. მკვლელობის დღეს, გამოძიებამ მისი ალიბი გადაამოწმა და გაარკვია, რომ დილიდან მძღოლი გვერდით სოფელში, სიმინდის წამოსაღებად იყო წასული, ამიტომ მკვლელობის ადგილზე ვერ იქნებოდა. სამაგიეროდ, უბნის რწმუნებულმა სოფლის განაპირას მეფუტკრე იპოვა, რომელსაც ორასამდე სკა ჰქონდა და ზუსტად იმდაგვარი ქილებიც, როგორიც ტყეში იპოვეს. რაც მთავარია, ნაპოვნ ქილაზე არსებული ანაბეჭდიც მეფუტკრისას დაემთხვა. 

„თქვენ ხომ არ გადაირიეთ? მამაოს სიკვდილი ყველაზე მეტად მე მეწყინა, რადგან სანთლისთვის ფიჭას სწორედ ჩემგან ყიდულობდა და შემოსავალი დავკარგე. რაც შეეხება ქილას, სახლის წინ, ასობით ქილა მიდევს და ყველაზე ჩემი ანაბეჭდია. შეიძლება, ვინმემ მოიპარა და ჩემი ფუტკრებიც წაიყვანა“, _ თავს იმართლებდა მეფუტკრე და სამართალდამცავებიც გრძნობდნენ, ის მკვლელი არ იყო. 

რადგან სხვა ვერაფერი იპოვეს, მილიცია ისევ იმ ყოფილ პატიმარს დაუბრუნდა და მისი ალიბი კიდევ ერთხელ, საფუძვლიანად გადაამოწმა. როგორც გაირკვა, დილით მან, მართლაც მიიყვანა მანქანა გვერდით სოფელში, სიმინდიც დაუტვირთეს, მაგრამ საღამომდე კაცი გაქრა და მანქანას მხოლოდ შებინდებისას მიაკითხა. 

სად იმყოფებოდა მთელი დღის განმავლობაში? _ ამ კითხვაზე პასუხი თავად უნდა გაეცა. როგორც ხდება ხოლმე, „მკაცრმა“ დაკითხვამ შედეგი გამოიღო. 

„ჯერ კიდევ ციხეში გავიგე, რომ „კანონიერი ქურდი“ მამაოსთვის ფულის მიცემას აპირებდა ეკლესიის გასარემონტებლად. ვიფიქრე, რომ გავალ, მეც იმ ეკლესიის რემონტზე ვიმუშავებ-მეთქი და როცა ვნახე, რა უნდა გაგვერემონტებინა, პირი დავაღე _ რაღაც ნანგრევისგან უნდა აგვეშენებინა ახალი ეკლესია, შეგვეძინა ხატები და როგორც მამაოს წამოსცდა, ყველაფერი ეს, 50 ათას მანეთამდე დაჯდებოდა. ქურდთან მივედი, ვუთხარი, 10 ათასიც რომ მომცე, ახალ ცხოვრებას დავიწყებ, ბინას ვიყიდი-მეთქი და იმან კიდევ, არაო, სული უნდა გადავირჩიონოო. მისი გარდაცვალების შემდეგ, რემონტი არ შეჩერებულა ანუ ქურდმა მთელი ფული მამაოს დაუტოვა. სახლში როცა არ იყო, რამდენჯერმე შევიპარე და საფუძვლიანად გავჩხრიკე იქაურობა, თუმცა ვერ ვიპოვე. ფულისთვის სოფლიდან არ გადიოდა ანუ ახლოს ჰქონდა და ამიტომ, მუშაობა აქეთ დავიწყე, მისი ცხოვრების წესი რომ შემესწავლა. დილის წირვის შემდეგ, მუდმივად ტყეში მიდიოდა სასეირნოდ და ყოველთვის მარტო ანუ ლოგიკურად, სამალავი ტყეში უნდა ჰქონოდა. ფუტკრების და ალერგიის შესახებ ადრევე ვიცოდი, ამიტომ წინასწარ მოვიმარაგე ფუტკარი და უკან გავყევი. ვიცოდი, სამალავიდან ფული ჩუმად რომ წამეღო, ეჭვს ჩემზე მოიტანდა და ამიტომ, მთავარი იყო, სამალავთან მისულიყო, შემდეგ ფუტკრებიც თავის საქმეს იზამდნენ და მეც. 

იმ ადგილზე, სადაც კისერში ფუტკრები ჩავაყარე, გაჩერდა, მიიხედ-მოიხედა და ერთ ფუღუროიან ხეს მიაშტერდა. ვიფიქრე, სამალავი იქ არის-მეთქი და საქმეს შევუდექი. ფუტკრებმა მაშინვე დაკბინეს და ალერგიამ იქვე გაგუდა, მაგრამ რად გინდა, სამალავი ვერ ვიპოვე, იმ ფუღუროში არაფერი იდო“, _ ასეთი „აღსარება“ ჩააბარა მკვლელმა სამართალდამცავებს. 

მილიცია ტყეში სამალავს ორი კვირის განმავლობაში ეძებდა და საბოლოოდ, მკვლელობის ადგილიდან, დაახლოებით, ნახევარ კილომეტრში მიაგნო. სამალავში 15 ათასი მანეთიღა იყო დარჩენილი და ფული... სახელმწიფოს გადაეცა, რადგან ჩაითვალა, რომ „კანონიერი ქურდი“ მას კანონიერი გზით ვერ იშოვიდა. 

რაც შეეხება მკვლელს, მას სასამართლომ მხოლოდ რვა წლით თავისუფლების აღკვეთა მიუსაჯა. მაშინ ამბობდნენ, მამაო რომ არ ყოფილიყო მკვდარი, ეგებ, დაეხვრიტათ კიდეცო, მაგრამ სასულიერო პირის მიმართ ჩადენილ დანაშაულს კომუნისტები ლოიალურად მიუდგნენ.

ბათო ჯაფარიძე

 

]]>
versiaprinti@yahoo.com (super admin) საზოგადოება Wed, 07 Oct 2020 11:39:12 +0400