ბიუროს სხდომის პარალელურად, პარლამენტთან საპროტესტო აქცია მიმდინარეობს

ბიუროს დღევანდელი სხდომა, სადაც "ხალხის ძალის" მიერ ინიციირებულ კანონპროექტებს განიხილავენ, აქციის ფონზე მიმდინარეობს. არა რუსულ კანონს! - ამ ლოზუნგით, პარლამენტთან მოქალაქეები, ოპოზიციის წევრები, სამოქალაქო აქტივისტები, სხვადასხვა სფეროს წარმომადგენლები კიდევ ერთხელ შეიკრიბნენ. ბიუროს სხდომაზე შესვლის საშუალება არ მისცეს ოპოზიციონერების ნაწილს.

შეგახსენებთ, რომ კანონპროექტი "უცხოური გავლენის გამჭვირვალობის შესახებ" ინიცირებულია მოძრაობა "ხალხის ძალის" მიერ. მოძრაობა გასულ წელს შექმნა მმართველი პარტიიდან, "ქართული ოცნებიდან" წასული, თუმცა, საპარლამენტო უმრავლესობაში დარჩენილი დეპუტატების ჯგუფმა.

კანონპროექტის მიხედვით, ყველა, ვინც "უცხოური გავლენის აგენტად" მოიაზრება, ვალდებულია დარეგისტრირდეს საჯარო რეესტრში, ამავე სახელწოდების ბაზაში.

დოკუმენტის მიხედვით, "უცხოური გავლენის აგენტებად" მოიაზრებიან:

• 
  ყველა არასამეწარმეო(არაკომერციული) იურიდიული პირი, მათ შორის ყველა არასამთავრობო ორგანიზაცია, რომლის წლიური შემოსავლის 20 პროცენტზე მეტი "უცხოური ძალაა". თუმცა, არა - სახელმწიფო ორგანიზაციები ან საქართველოს კანონმდებლობით დაფუძნებული სპორტული ფედერაციები;
• 
  ტელევიზიები, რომელთა შემოსავლის 20 პროცენტზე მეტი "უცხოური ძალაა"(არ იგულისხმება რეკლამა);
• 
  მასობრივი ინფორმაციის საშუალებები, მათ შორის გაზეთები და ონლაინ მედიასაშუალებები, რომელთა შემოსავლის 20 პროცენტზე მეტი "უცხოური ძალაა"(არ იგულისხმება რეკლამა).