Category Blog

უმაღლესმა რადამ უკრაინის პრემიერ-მინისტრის თანამდებობაზე „ნაფტოგაზისა“ და „უკრნაფტას“ ყოფილი ხელმძღვანელი, სერგეი კორეცკი დანიშნა. შესაბამის გადაწყვეტილებას სახალხო დეპუტატებმა მხარი სულ ცოტა ხნის წინ დაუჭირეს. გადაწყვეტილების მიღებას ხმა 289-მა სახალხო დეპუტატმა მისცა.

მთავარი პრიორიტეტები, რომლებიც კორეცკის დანიშვნამდე პრეზიდენტმა ვოლოდიმირ ზელენსკიმ გააჟღერა, არის ქვეყნის მომზადება ზამთრისთვის, ენერგეტიკული და საწვავის ინფრასტრუქტურის დაცვა, ეკონომიკური სიტუაციის სტაბილიზაცია და საერთაშორისო დახმარების ეფექტური მართვა. ხელისუფლება მოელის, რომ მომავალი ზამთარი ომის მთელი წლების განმავლობაში ყველაზე მძიმე იქნება.

უმაღლეს რადაში დანიშვნამდე სიტყვით გამოსვლისას, კორეცკიმ მთავრობის მომავალი მუშაობის ძირითადი პრიორიტეტები გამოყო.

„ეს არის თავდაცვის ძალების სრული უზრუნველყოფა, უკრაინის თავდაცვისა და სამრეწველო კომპლექსის პოტენციალის გაზრდა, მოსახლეობის მხარდაჭერა და სოციალური დაცვა, პირველ რიგში - ფრონტისპირა დასახლებების მცხოვრებლებისთვის“, - ხაზგასმით აღნიშნა მან.

პრიორიტეტებს შორის მან ასევე დაასახელა ბიზნესის მხარდაჭერა ეკონომიკური სტაბილურობის უზრუნველსაყოფად, საერთაშორისო პარტნიორებთან თანამშრომლობის გაღრმავება, საერთაშორისო დახმარების ეფექტური გამოყენება და უკრაინელებისთვის განკუთვნილი საბინაო პროგრამების რეალიზაცია.

ევროპის ცხრა ქვეყანამ და უკრაინამ კონტინენტის დასაცავად ანტიბალისტიკური კოალიცია დააფუძნეს. არსებული ინფორმაციით, ახალი გაერთიანება მიზნად ევროპაში ანტიბალისტიკური შესაძლებლობების განვითარებასა და გაძლიერებას ისახავს.

დეკლარაციის თანახმად, კოალიცია წმინდად თავდაცვითი ხასიათისაა და ის მტრული სახელმწიფოებისგან სამომავლო სარაკეტო საფრთხეების შეკავებაზე იქნება ორიენტირებული. მასში გაწევრიანდნენ: გაერთიანებული სამეფო, გერმანია, დანია, ესპანეთი, იტალია, ნიდერლანდები, ნორვეგია, საფრანგეთი, შვედეთი და უკრაინა.

ახალი ინიციატივის შესახებ განცხადება 13 ივლისს, პარიზში მიმდინარე სამიტის ფარგლებში გაჟღერდა. საერთაშორისო შეხვედრას, რომელსაც ერთობლივად ხელმძღვანელობენ საფრანგეთი და გაერთიანებული სამეფო, 25-ზე მეტი ქვეყნის ლიდერი ესწრებოდა. შეხვედრის მთავარი თემა კი უკრაინის მხარდაჭერა და რუსეთზე ზეწოლის გაძლიერება იყო. საფრანგეთის პრეზიდენტმა სოციალურ ქსელ X-ში დაწერა, რომ ახალი ალიანსის დაფუძნებით ევროპამ მკაფიო არჩევანი გააკეთა უკრაინის დაცვასა და კოლექტიური უსაფრთხოების გაძლიერებაზე.

სამიტის ფარგლებში უკრაინის პრეზიდენტი ფრანგ კოლეგას პირისპირაც შეხვდა. ლიდერებმა ფრონტზე არსებული ვითარება და უკრაინის საჰაერო თავდაცვის საჭიროებები დეტალურად განიხილეს. უკრაინის პრეზიდენტის განცხადებით, ევროპული ანტიბალისტიკური შესაძლებლობების განვითარებისას საფრანგეთს გადამწყვეტი როლის შესრულება შეუძლია.

მნიშვნელოვანია ითქვას, რომ "მსურველთა კოალიაციის" პარიზის დღევანდელ სამიტში პირველად მონაწილეობენ მოლდოვა და ჩრდილოეთ მაკედონია. თავად ალიანსის წევრთა რაოდენობა კი 37-მდე გაიზარდა.

რაც შეეხება კრემლის პოზიციას, მოსკოვმა ეს სამიტი მკაცრად გააკრიტიკა. რუსეთის ხელისუფლების განცხადებით, ეს შეხვედრა "ომის გამჩაღებლების კოალიციაა". კრემლში მიიჩნევენ, რომ ჩამოთვლილი 37-ვე ქვეყნების ლიდერებს რეალური მშვიდობის დამყარება არ სურთ.

Reuters-ის ცნობით, ივნისის ბოლოს დასავლეთ ევროპაში დაფიქსირებული რეკორდული სიცხის ტალღის შედეგად 10,000-ზე მეტი ადამიანი დაიღუპა. ჯანდაცვის მსოფლიო ორგანიზაციის მიერ მხარდაჭერილი არასამთავრობო ქსელის, EuroMOMO-ს მონაცემებით, ჭარბი სიკვდილიანობის მაჩვენებელმა უკვე 10,650 შეადგინა. სტატისტიკა კი 27 ქვეყნის მონაცემებს დაეყრდნო და ის 22-დან 28 ივნისამდე პერიოდს ასახავს.

აღსანიშნავია, რომ გარდაცვლილთა დიდი უმრავლესობა, 9,000-ზე მეტი პირი, 65 წელს გადაცილებული იყო. დანიის წამყვანი სამედიცინო ინსტიტუტის მთავარი ექიმის, ლასე ვესტერგარდის განცხადებით, წლის ამ დროს მსგავსი მაჩვენებლის დაფიქსირება უჩვეულოა. მისივე თქმით, ჭარბი სიკვდილიანობის ახსნა ექსტრემალური სიცხის გარდა სხვა ფაქტორებით თითქმის შეუძლებელია.

განსაკუთრებით მძიმეა ვითარება საფრანგეთსა და ბელგიაში, სადაც ივნისის ბოლო კვირაში სიკვდილიანობის ძალიან მაღალი მაჩვენებელი დაფიქსირდა. ბრიტანეთის მეტეოროლოგიურმა სამსახურმა კი დამოუკიდებელი სამეცნიერო კვლევაც გამოაქვეყნა, რომლის თანახმადაც, მაისსა და ივნისში მხოლოდ ინგლისსა და უელსში სიცხესთან დაკავშირებული მიზეზებით 2,700 ადამიანი დაიღუპა.

კლიმატოლოგების შეფასებით, კლიმატის გლობალური ცვლილების გარეშე მსგავსი ანომალიის განვითარება პრაქტიკულად შეუძლებელი იქნებოდა.

ამერიკის შეერთებულ შტატებსა და ირანს შორის მოლაპარაკებების მორიგი რაუნდი 11 ივლისს, პაკისტანში გაიმართება.

 მედიის ინფორმაციით, შეხვედრაზე სამ მთავარ საკითხს განიხილავენ: შტატების მიერ თეირანისთვის დაწესებულ სანქციებს, ირანის გაყინულ აქტივებსა და ირანის ბირთვულ პროგრამას.

მანამდე დონალდ ტრამპმა განაცხადა, რომ მოლაპარაკებებში ერთკვირიანი პაუზა გამოცხადდა, ვიდრე აიათოლა ალი ხამენეის დაკრძალვის ღონისძიებები არ დასრულდება.