დედაქალაქი

ახალი წლის დადგომა ყოველთვის განსაკუთრებულ ემოციებს უკავშირდება. ეს არის დღესასწაული, რომელიც ერთ მუშტად კრავს და აერთიანებს მთელ მსოფლიოს საერთო მიზნებითა და სურვილებით – იყოს მშვიდობა დედამიწაზე და მეტი სიყვარული ადამიანების გულებში, – ამის შესახებ თბილისის მერის, კახა კალაძის საახალწლო მილოცვაშია ნათქვამი.

როგორც კალაძე აღნიშნავს, ახალი წელი ყველაზე კეთილი დღესასწაულია, თანადგომის, მხარდაჭერის, უმწეოთა დახმარების, ერთმანეთის მიმართ სითბოსა და სიყვარული გამოხატვის დღე.

„ამ დღეს სამყარო გაცილებით კეთილი ხდება. ვისურვოთ, რომ ეს განწყობა არა მხოლოდ საახალწლო დღეებში, მთელი წელი იგრძნობოდეს ჩვენს ქალაქში და მთელ ქვეყანაში. დაე, იყოს 2026 წელი სავსე სიკეთით!!! მეგობრებო, 2025 წელს თან ახლდა უამრავი გამოწვევა და სირთულე, მაგრამ იყო მნიშვნელოვანი გამარჯვებები, რამაც მოგვცა წინსვლისა და განვითარების შესაძლებლობა და დღეს შეგვიძლია თამამად ვთქვათ, რომ საქართველომ ისეთი ნაბიჯები გადადგა წინ, უკან ვერასოდეს დაგვხევენ.

ამდენად, მინდა, მადლიერება გამოვხატო გასული წლის მიმართ; განსაკუთრებული მადლობა ვუთხრა ადამიანებს, ვინც გვენდო, გვერდით დაგვიდგა, გაგვაძლიერა და ყველას დაანახა, რამხელა ძალა აქვს ქვეყნის სიყვარულით გაერთიანებული ხალხის ნებას. არ არსებობს სამშობლოს წარმატებასა და გამარჯვებაზე დიდი დღესასწაული, რადგან სამშობლო ერთია და ერთადერთი. ამ საზეიმო წუთებსაც კი თან ახლავს უდიდესი პასუხისმგებლობა ქვეყნის მომავლის და მისი ხვალინდელი დღის წინაშე. ახალი წლის მიჯნაზე ვისურვოთ მშვიდობა და სტაბილურობა, მეტი სიკეთე და ურთიერთპატივისცემა, ზრუნვაზე დაფუძნებული საზოგადოება, განვითარება და კეთილდღეობა, ეკონომიკურად ძლიერი ოჯახები… მჯერა, თბილისი მუდამ იქნება „სიკეთით სავსე ქალაქი“. იქ, სადაც სიკეთე გვაერთიანებს, შენდება მომავალი. გილოცავთ ახალი წლის დადგომას. ბედნიერი იყოს 2026 წელი ჩვენი ქვეყნისთვის და ჩვენი ოჯახებისთვის“, – აცხადებს კახა კალაძე.

მეტეხის გვირაბში დაგეგმილი პროფილაქტიკური სამუშაოების გამო, 30 დეკემბრიდან ერთი თვის განმავლობაში, საავტომობილო მოძრაობა შეიზღუდება. ამის შესახებ ინფორმაციას თბილისის მერია ავრცელებს.

„შეზღუდვა ღამით, 00:00-დან 06:00 საათამდე პერიოდში იმოქმედებს.

ავტოტრანსპორტის მოძრაობა შეიზღუდება მხოლოდ გვირაბის ერთ მხარეს, ნიკოლოზ ბარათაშვილის ხიდიდან ორთაჭალის მიმართულებით.

შესაბამისად, ავტომობილები გადაადგილებას შეძლებენ ბარათაშვილის ხიდიდან ევროპის მოედნისკენ. თბილისის მერია ბოდიშს გიხდით შექმნილი დისკომფორტის გამო!“, - აცხადებენ მერიაში.

სამგორის რაიონის გამგეობამ მასწავლებლებისთვის ქალაქ თელავში გასვლითი ღონისძიება „სკოლა და თვითმმართველობა“ გამართა. 

პროექტის მიზანია, მასწავლებლებსა და ადგილობრივი თვითმმართველობის ორგანოებს შორის თანამშრომლობის გაძლიერება, ასევე, თემისა და ადგილობრივი თვითმმართველობის ორგანოების ჩართულობით, სასკოლო პროექტების განხორციელება. 

ღონისძიების ფარგლებში,  პედაგოგებმა ერთმანეთს პრფესიული გამოცდილება გაუზიარეს. ასევე, გაიმართა სამუშაო შეხვედრა რაიონის გამგებელ კახა სამხარაძესა და საკრებულოში ვარკეთილის რაიონის მაჟორიტარ დეპუტატ ვაჟა კოკაიასთან, სადაც  2026 წლისთვის დასაგეგმი სასკოლო და საგანმანათლებლო პროექტები განიხილეს. 

მონაწილეთა ტრანსპორტირების, სასტუმროში განთავსებისა და კვების ხარჯები სამგორის რაიონის გამგეობამ უზრუნველყო.

ნინო კორძაძე სოციალურ ქსელში პოსტს აქვეყნებს, სადაც აცხადებს, რომ უკვე რამდენიმე თვეა შვილთან ერთად რუსთავის მუნიციპალურ ავტობუსებში დისკრიმინაციასა და აგრესიას აწყდება. მისი თქმით, რუსთავის ზოგიერთი მგზავრი თბილისელებს ტრანსპორტით გადაადგილებას უკრძალავს და ბავშვებსაც კი ეუბნება, რომ „ეს ავტობუსი მხოლოდ რუსთაველებისთვისაა“.

“რამოდენიმე თვეა ელენე სკოლაში და სკოლიდან, რუსთავის ავტობუსებით დამყავს. ყოველ დღე ვისმენ მგზავრებისგან, რომ ჩვენ, თბილისელები არ უნდა ავდიოდეთ რუსთავის ტრანსპორტში, რომ ეს ტრანსპორტი მათია. ყოველ დღე, როცა ბავშვს მარტო ვუშვებ ამ ტრანსპორტით, ქალები(!!!!) ედავებიან ბავშვებს(!!!) ჩადით ტრანპსორტიდან, ეს რუსთაველებისთვის არისო. რამოდენიმეჯერ ვიკამათე, ვიჩხუბე, ვცადე ახსნა, რომ ეს საზოგადოებრივი ტრანსპორტია, რომ ეს ტრანსპორტი გაჩერებაზე არსებულ  განრიგში არის ნაჩვენები , ანუ ნებისმიერ ადამიანს საქართველოს მოქალაქეც რომ არ იყოს, აქვს უფლება იმგზავროს ამ ტრანსპორტით-საზოგადოებრივი ტრანსპორტით!!!

უკვე მერამდენედ, მძღოლები არ გვიჩერებენ ავტობუსს, უკვე მერამდენე ადამიანი ჩააგდეს ტრანსპორტიდან არ ვიცი. დაახლოებით 10 დღის წინ, ელენეს კლასელი, რომელიც ორთაჭალაში ცხოვრობს და ამ ტრანსპორტით მგზავრობს, შეაშინეს!!!! ბავშვმა მომიყვა ერთი ქალი ეუბნებოდა მძღოლს, არ გაუჩერო  მაგას გაჩერებაზე, ღირსია ჩავიყვანოთ რუსთავში და მერე იქიდან წამოვიდესო!! ქალი ეუბნებოდა ამას ხალხნო, ბავშვს აშინებდა, 10 წლის ბავშვს!!! მე არ ვიცი ვინ ცხოვრობს რუსთავში და სად გაქრა ამ ხალხის მორალი, აქ მორალზე ვერ ვისაუბრებ, რაც არაა, რთულია იმაზე საუბარი! მე მაინტერსებს სადაა თბილისის მერია / Tbilisi City Hall @ქალაქ რუსთავის მერია! რატომ არ გვპასუხობს @რუსთავის სატრანსპორტო ცხელი ხაზი,

გამაგებინეთ, რა საჭიროა თბილისში დადიოდეს ტრანსპორტი, რომელსაც აქვს ვალდებულება შევიდეს გაჩერებაზე და ტრანსპორტიდან აგდებს ბავშვებს, მხოლოდ იმიტომ რომ ის ფონიჭალამდე მიყვება ტრანსპორტს!!!!!!! საქართველოს სახალხო დამცველი Public Defender of Georgia

10 წლის ბავშვს სკოლაში ვუშვებ ქალების იმედად, რამე თუ გაუჭირდა, მიხედავენ თქო და ეს ქალები, კაცები, ახალგაზრდები ერთ სიტყვასაც არ ამბობენ, რომ ბავშვი დაიცვან, მეტიც, მთელი გზა საყვედურობენ რომ ტრანსპორტით მგზავრობს!! 10 წლის ბავშვს საყვედურობენ! უკვე მეშინია, რომ მართლა ჩამოაგდებენ ტრანსპორტიდან! მეშინია ამ ამორალური საზოგადოების!” - წერს მოქალაქე.