პოლიტიკა

აფხაზეთში რუსული შიდა პასპორტების გაცემის შეწყვეტასთან დაკავშირებული სკანდალისა და შედეგად გამოწვეული ფართოდ გავრცელებული უკმაყოფილების კონტექსტში, Telegram-არხი „აფხაზური ანალიტიკური ცენტრი“ განიხილავს როგორც რუსული, ასევე აფხაზური პასპორტების მნიშვნელობასა და „ფასს“.

აფხაზეთის ანალიტიკური ცენტრი იხსენებს, რომ ადრე აფხაზური პასპორტი პირველ პასპორტად ითვლებოდა, ხოლო რუსული მხოლოდ საზღვარგარეთ მოგზაურობისთვის გამოიყენებოდა (რადგან ეს შეუძლებელი იყო აფხაზური პასპორტით).

თუმცა, დროთა განმავლობაში, რუსული პასპორტი უფრო მნიშვნელოვანი გახდა, რადგან ის გაცილებით დიდ სოციალურ შეღავათებსა და პრივილეგიებზე წვდომას უზრუნველყოფს:

„მცირე პენსიების, სუსტი ეკონომიკისა და სოციალური გარანტიების არარსებობის გამო [აფხაზეთში] რუსული პასპორტი არა მხოლოდ „სამგზავრო დოკუმენტად“, არამედ გადარჩენაში დამხმარე დოკუმენტად იქცა.

პენსიები, შეღავათები და ჯანდაცვა – რუსული პასპორტი ამ ყველაფერს უზრუნველყოფს.

აფხაზური პასპორტი, მისი არასაკმარისი გამოყენების გამო, თანდათან ფორმალობად, სიმბოლოდ, თაროზე მიტოვებულ რაღაცად იქცა“, – წერს ცენტრი.

იმის გათვალისწინებით, რომ ეს ხდება „სუვერენიტეტის დელეგირების“ და აფხაზეთის უმწეობის შესახებ საუბრის ფონზე, არხის ავტორები თვლიან, რომ ეს უკვე „ჩვენივე სახელმწიფოს გაუფასურების“ საკითხია.

თუმცა, ისინი პრობლემას ჩვეულებრივ ადამიანებში არ ხედავენ, რომლებიც უბრალოდ დაცვასა და სტაბილურობას ირჩევენ.

„პრობლემა მთავრობაშია, რომელიც ჩაფლავდა და, როგორც ჩანს, არ აპირებს თავისი პასპორტის რეალური შინაარსით შევსებას.

რა იმალება ამ გზის ბოლოს?

დამოუკიდებლობის სრული უარყოფა?“ – წერს „აფხაზეთის ანალიტიკური ცენტრი“.

წყარო: JamNews 

პარასკევს, 13 თებერვალს, რუსეთის მიერ ოკუპირებულ სამხრეთ ოსეთში საზეიმოდ გაიხსნა რუსული პასპორტების გაცემის ცენტრი.

ცერემონია გაიმართა ცხინვალში, ინფორმაციისა და კოორდინაციის ცენტრში.

ვინ დაესწრო ცერემონიას?

შეხვედრას ესწრებოდნენ რუსეთის ელჩი მარატ კულახმეტოვი, სამხრეთ ოსეთის დე ფაქტო მთავრობის თავმჯდომარე ძამბოლატ ტადტაევი, დე ფაქტო შინაგან საქმეთა მინისტრის მოვალეობის შემსრულებელი ერისლავ მამიევი და რუსეთის შინაგან საქმეთა სამინისტროს უცხო ქვეყნის მოქალაქეობისა და რეგისტრაციის სამსახურის უფროსის მოადგილე დიმიტრი სერგიენკო.

მარატ კულახმეტოვმა საპასპორტო პუნქტის გახსნას „ორი ქვეყნის ინტეგრაციის გზაზე მნიშვნელოვანი ნაბიჯი“ უწოდა და თქვა:

„ამ პუნქტის გახსნა აჩვენებს, რომ ჩვენ გვაერთიანებს დიდი სამშობლო, დიდი საერთო ისტორია“.

ძამბოლატ ტადტაევის სიტყვებით კი, რომელმაც რუსეთის შინაგან საქმეთა სამინისტროს ხელმძღვანელობისადმი მადლობები არ დაიშურა, განაცხადა:

„ეს კიდევ ერთი ნაბიჯია ჩვენი მოქალაქეებისთვის ტვირთის შესამსუბუქებლად. მათ ახლა შეუძლიათ პასპორტების მიღება რუსეთის ფედერაციის დატოვების გარეშე. იმედი მაქვს, რომ ეს მჭიდრო ინტეგრაცია გაგრძელდება“.

ცერემონია კი მოქალაქეებისთვის ახალი შიდა რუსული პასპორტების ოფიციალური გადაცემით დაგვირგვინდა.

სააგენტო „რესის“ ცნობით, მანამდე პასპორტების მიმღებებმა „საზეიმო ფიცი დადეს რუსეთის საელჩოში“.

აფხაზეთში რა ხდება?

ცოტა ხნით ადრე, 6 თებერვალს, რუსეთმა დახურა პასპორტების გამცემი პუნქტები ოკუპირებულ აფხაზეთში და ამის მიზეზად დაასახელა ის, რომ „ზოგიერთი აფხაზი პოლიტიკური ფიგურა, მათ შორის პარლამენტის წევრები, ეჭვქვეშ აყენებენ ამ ოფისების კანონიერებას“.

აფხაზეთის დე ფაქტო პრეზიდენტმა ბადრა გუნბამ განაცხადა, რომ ის მოსკოვს გადაწყვეტილების გადახედვას სთხოვს.

13 თებერვალს, აფხაზურ ტელევიზიასთან ინტერვიუში მან თქვა, რომ ის რუსეთის ხელისუფლებას სთხოვს შიდა რუსული პასპორტების გაცემის განახლებას.

რუსეთის პასპორტებისა და მართვის მოწმობების გაფორმების პუნქტები აფხაზეთში - გაიხსნა 2025 წლის აპრილში სახელმწიფოთაშორისი შეთანხმების საფუძველზე, რომელიც ორმაგი მოქალაქეობის საკითხების მოწესრიგებას ეხება. პროცედურა ორგანიზებული იყო „ერთი ფანჯრის“ პრინციპით, ხოლო დოკუმენტების გაფორმებას რუსეთის ფედერაციის შინაგან საქმეთა სამინისტროს თანამშრომლები ახორციელებდნენ. ამასთან, დოკუმენტები გაიცემოდა უფასოდ, მაშინ როდესაც რუსეთში მათთვის საჭიროა სახელმწიფო მოსაკრებლის გადახდა 4 ათასიდან 6 ათას რუბლამდე ოდენობით. რუსეთის ე.წ. საელჩოს მონაცემებით, აფხაზეთის 245 ათასი მცხოვრებიდან დაახლოებით 190 ათასს აქვს რუსეთის მოქალაქეობა. თუმცა მათ უმრავლესობას არ გააჩნია შიდა პასპორტი, რაც ზღუდავს მათ წვდომას სახელმწიფო სერვისებსა და სოციალურ შეღავათებზე. რუსეთის პრეზიდენტის ბრძანება „რუსეთის ფედერაციის მოქალაქის პასპორტის გაცემის თავისებურებების შესახებ“ უფლებას აძლევს რუსეთს შს სამინისტროს შიდა პასპორტები გასცეს აფხაზეთსა და ცხინვალის რეგიონში სავალდებულო რეგისტრაციისა და დამატებითი ბიუროკრატიული პროცედურების გარეშე. ოკუპირებული აფხაზეთისა და სამხრეთ ოსეთის მცხოვრებლებისთვის რუსეთის მოქალაქეობის გამარტივებული მიღების შესახებ ბრძანებას ვლადიმირ პუტინმა 2025 წლის გაზაფხულზე მოაწერა ხელი. დოკუმენტის თანახმად, რუსეთის პასპორტის მიღების უფლება აქვს ორივე რეგიონის თითოეულ სრულწლოვან მცხოვრებს, რომელსაც 2008 წლისთვის (რუსეთის საქართველოში შეჭრის მომენტში) ე.წ. საკუთარი ქვეყნის მოქალაქეობა ჰქონდა. 2025 წლის ივლისში პუტინმა ხელი მოაწერა ბრძანებას, რომლის მიხედვითაც აფხაზეთსა და სამხრეთ ოსეთში რუსეთის პასპორტის მიღება შესაძლებელი იქნება 2028 წლის აგვისტომდე.

აფხაზეთის დე ფაქტო პრეზიდენტმა ბადრა გუნბამ განაცხადა, რომ ის მოსკოვს გადაწყვეტილების გადახედვას სთხოვს.

2022 წლის ბოლოს ევროკავშირის საბჭომ მიიღო საბოლოო გადაწყვეტილება რუსეთის მიერ უკრაინის ოკუპირებულ რეგიონებში ან საქართველოს სეპარატისტულ ტერიტორიებზე "გაცემული რუსული სამგზავრო დოკუმენტების" არაღიარების თაობაზე.

მანამდე ევროპარლამენტმა დაამტკიცაგადაწყვეტილება, არ აღიაროს რუსეთის მიერ "უკრაინისა და საქართველოს უკანონოდ ოკუპირებულ რეგიონებში" გაცემული პასპორტები და სხვა სამგზავრო დოკუმენტები.

საქართველო და ქვეყნის საერთაშორისო პარტნიორები აფხაზეთსა და ცხინვალის რეგიონს/სამხრეთ ოსეთს რუსეთის ფედერაციის მიერ ოკუპირებულ ტერიტორიებად მიიჩნევენ. ამ ე.წ. სახელმწიფოების დამოუკიდებლობას მხოლოდ რუსეთი, ნიკარაგუა, ვენესუელა, სირია და ნაურუ აღიარებენ.

წყარო: რადიო თავისუფლება 

სასურსათო პროდუქციის, მედიკამენტებისა და საწვავის ფასწარმოქმნის სტრუქტურის შემსწავლელი საქართველოს პარლამენტის დროებითი კომისია ადგილობრივი კომპანიების წარმომადგენლებსა და მწარმოებლებთან შეხვედრებს აგრძელებს. კომისიის დღევანდელ სხდომაზე კომისიის წევრებმა შეზღუდული პასუხისმგებლობის საწარმოების: „პლანტას“, „ტირიფონის ბაღების“, „ქალაქურის“, „ანიგოზის“ „აჩინებულის“, „მილმართისა“ და „ქართული აგროპროდუქტის“ წარმომადგენლებს მოუსმინეს.

სხდომის დასაწყისში კომისიის თავმჯდომარემ, შოთა ბერეკაშვილმა კომისიის შექმნის მიზნებსა და ამოცანებზე და იმ მოსალოდნელ შედეგებზე ისაუბრა, რომელსაც კომისიის საქმიანობა უკავშირდება.

„ჯერ პრობლემების იდენტიფიცირების ეტაპზე ვართ. შემდეგი ეტაპი ანალიტიკა იქნება და ბოლოს – შესაბამისი ინსტრუმენტების ამოქმედება, რომელიც საშუალებას მოგვცემს, სექტორი უფრო კონკურენტუნარიანი და ეფექტიანი გავხადოთ. მნიშვნელოვანია სექტორის სტრუქტურული პრობლემების გამოვლენა და სისტემური მიდგომა ამ პრობლემების გადასაჭრელად, რაც, საბოლოო ჯამში, დადებითად აისახება როგორც მომხმარებელზე, ასევე სექტორში მონაწილე ყველა მხარეზე და საშუალებას მოგვცემს სექტორში მნიშვნელოვან ფასის კორექციას მივაღწიოთ კლების მიმართულებით“, – განაცხადა შოთა ბერეკაშვილმა.

კომისიის სხდომაზე მწარმოებლებმა ყურადღება იმ პრობლემებზე გაამახვილეს, რომლებიც პროდუქციის ქსელური მარკეტების დახლებზე განთავსებას და საოპერაციო ხარჯებს უკავშირდება. თხილის და ნიგოზის მწარმოებელი კომპანიების წარმომადგენელთა თქმით, მათთვის ერთ-ერთ მნიშვნელოვან გამოწვევას საერთაშორისო კომპანიების მიერ პროდუქციაზე არაკონკურენტული ფასების დაწესება, იმპორტირებული ნედლეულის საქართველოში შემოტანა და არათანაბარი კონკურენტული გარემო წარმოადგენს.

პრობლემურ საკითხებზე საუბრისას ხილის და ბოსტნეულის გადამამუშავებელი კომპანიების წარმომადგენლებმა ადგილობრივი წარმოების ქსელურ მარკეტებში განთავსების და შემდეგ გაყიდული პროდუქციისთვის თანხის მიღების საკითხებზე ისაუბრეს. შპს „აჩინებულის“ დირექტორის, გოჩა ღვინეფაძის თქმით, პროდუქციის 85-90% ქსელურ მარკეტებში იყიდება, თუმცა კომპანიისთვის წარმოებული პროდუქციის ფასნამატი მძიმე წნეხს წარმოადგენს.

„კომპანიის მიერ წარმოებული პროდუქტის X ფასს მაღაზია 30-40%-ს ამატებს. ფასნამატის გარდა, ჩვენ დაახლოებით 45%-ის გადახდა გვიწევს, საიდანაც 20%-ს ე.წ. ქეშბექი შეადგენს. ასევე ვიხდით მარკეტინგის გადასახადს – 15%-ს, ლოიალობის გადასახადს – 1%-ს, ციფრული მომსახურების – 1%-ს და ლოგისტიკის ხარჯს – 7.5%-ს. ამას ემატება ქსელში შესვლის, დახლზე განთავსების და დამატებითი ღირებულების გადასახადი. საბოლოო ჯამში, პროდუქციის ფასი 185%-ით იზრდება“, – აღნიშნა გოჩა ღვინეფაძემ.

მსგავს პრობლემებზე ისაუბრეს „მილმართისა“ და „ქართული აგროპროდუქტის“ წარმომადგენლებმაც.

„მილმართის“ დირექტორის, გიორგი მაისურაძის თქმით, ქსელურ მარკეტებთან ურთიერთობები წლიდან წლამდე უარესდება და კომპანიამ უკვე ოთხი თვეა, მათთან პროდუქციის შეტანა შეაჩერა. როგორც მან აღნიშნა, ადგილობრივ მოსახლეობაში ქართული კომპანიების მიერ წარმოებული პროდუქციის ცნობადობა ნაკლებია, რადგან მათ პროდუქციის დახლებზე ადვილად განთავსების საშუალება არ ეძლევათ.

შპს „ქართული აგროპროდუქტის“ დირექტორის, იოსებ მანჯავიძის განცხადებით, ქსელური მარკეტების სამმა კომპანიამ მწარმოებელ კომპანიასთან ურთიერთობები გაწყვიტა და პროდუქცია უკან დაუბრუნა.

„ხილისა და ბოსტნეულის გადამამუშავებელი საწარმო, რომელიც ნატურალურ ხილფაფებსა და წვენებს აწარმოებს, თავის დროზე სახელმწიფოს დახმარებით და მხარდაჭერით გავხსენით. ადგილობრივ მარკეტინგულ ქსელებთან არსებული პრობლემების გამო იძულებულები ვართ, ჩვენი პროდუქცია ექსპორტზე გავიტანოთ და ამ პროცესში სახელმწიფო გვიდგას გვერდით“, – განაცხადა იოსებ მანჯავიძემ.

კომისიის წევრებმა ადგილობრივ მწარმოებლებს გულახდილი საუბრისთვის მადლობა გადაუხადეს.

„ღია დისკუსიის ფარგლებში ადგილობრივი კომპანიების წარმომადგენლების მოსაზრებების მოსმენა საინტერესო და ყურადსაღებია. სხდომაზე არაერთი პრობლემა მოვისმინეთ: სამუშაო კაპიტალის ნაკლებობა და კაპიტალის მაღალი ღირებულება; მარკეტინგის და გაყიდვების ხარჯების მაღალი მოცულობა, ასიმეტრიული კონტრაქტული ურთიერთობები მხარეებს შორის, რაც ზედა რგოლს გადამეტებულ მოლაპარაკების ძლაუფლებას ანიჭებს; გადახდების დაგვიანება და ნაშთების არაეფექტური მართვა. პროცესში მთავარია, ფასწარმოქმნის ჯაჭვის სრული ციკლი შევისწავლოთ; პრობლემების სწორი იდენტიფიცირება შევძლოთ; ანალიტიკური მიდგომით და ანალიზით ავამოქმედოთ ეფექტური მექანიზმები, რაც მნიშვნელოვან შედეგზე გაგვიყვანს“, – განაცხადა შოთა ბერეკაშვილმა.

ინფორმაციას საქართველოს პარლამენტი ავრცელებს. 

საქართველოს პრეზიდენტის სასახლეში ხორვატიის რესპუბლიკის პრეზიდენტის, ზორან მილანოვიჩის დახვედრის ოფიციალური ცერემონია გაიმართა.

ზორან მილანოვიჩს საქართველოს პრეზიდენტმა, მიხეილ ყაველაშვილმა უმასპინძლა. ცერემონიის ფარგლებში შესრულდა ორი ქვეყნის სახელმწიფო ჰიმნები, ამასთან, კოლეგებმა ერთმანეთს დელეგაციის წევრები წარუდგინეს.

ოფიციალური ვიზიტის ფარგლებში პრეზიდენტის სასახლეში დაგეგმილია მიხეილ ყაველაშვილისა და ზორან მილანოვიჩის შეხვედრა, როგორც პირისპირ, ისე გაფართოებულ ფორმატში, რის შემდეგაც მედიისათვის ერთობლივი განცხადება გაკეთდება.

„კოალიცია ცვლილებისთვის” ლიდერმა, ნიკა გვარამიამ რუსთავის N12 პენიტენციურ დაწესებულება დღეს, 12 თებერვალს დატოვა

მას პატიმრობის 8-თვიანი ვადა ამოეწურა. 

ნიკა გვარამიას ე.წ. თეა წულუკიანის საგამოძიებო კომისიაზე გამოუცხადებლობის გამო, 8 თვით თავისუფლების აღკვეთა 2025 წლის 1-ელ ივლისს შეეფარდა. 

გვარამიას აღკვეთის ღონისძიების სახით 30 000-ლარიანი გირაო ჰქონდა შეფარდებული, რომელიც პოლიტიკოსმა არ გადაიხადა, რის შემდეგაც, გირაო პატიმრობით შეეცვალა. ის სასამართლო პროცესს არ დაესწრო და რუსთავის ციხესთან თავად გამოცხადდა.