პოლიტიკა

აფხაზეთის პარლამენტის ოპოზიციონერი წევრისთვის, კან კვარჩიასთვის დეპუტატის იმუნიტეტის მოხსნა ისევ დღის წესრიგშია. გენერალურმა პროკურატურამ უზენაეს სასამართლოში შუამდგომლობა შეიტანა, ბრალდებით, რომ დეპუტატის ქმედებები დანაშაულის ნიშნებს შეიცავს. ეს ეტაპი კანონის თანახმად აუცილებელია, რათა პარლამენტმა გადაწყვიტოს, დაუშვას თუ არა დეპუტატის მიმართ სამართლებრივი დევნა.

გენერალურმა პროკურატურამ სასამართლოში მსგავსი შუამდგომლობა პირველად თებერვლის დასაწყისში წარადგინა, თუმცა, პროცედურული დარღვევების მოტივით, ის უკან გაიწვია. პროკურატურამ მაშინ სასამართლოს განუცხადა, რომ მასალები სრულად გასწორდება და შუამდგომლობა ხელახლა წარედგინება.

კან კვარჩია ერთ-ერთია ოპოზიციონერებს შორის, რომლებიც მოხვდნენ კრიმინალურ სკანდალში. საქმეში ფიგურირებენ რუსი პოლიტიკური სტრატეგები, რომლებიც 2025 წლის ნოემბრის მუნიციპალურ არჩევნებში უკანონოდ საქმიანობდნენ პროსამთავრობო კანდიდატების სასარგებლოდ. სტრატეგები საბოლოოდ რუსეთში დაბრუნდნენ, რის შემდეგაც რუსულმა სამართალდამცავმა ორგანოებმა სისხლის სამართლის საქმე აღძრეს სამი აფხაზი ოპოზიციონერის წინააღმდეგ.

აფხაზეთის სამართალდამცავებმა მიიღეს შესაბამისი ზომები ადგილობრივ აქტივისტებზე: ოთხ მათგანს შინაპატიმრობა დაუწესდა, ორ მათგანს აფხაზეთის დატოვება აეკრძალა, ხოლო კან კვარჩიას საქმე საპარლამენტო იმუნიტეტის გამო რთულ მდგომარეობაში აღმოჩნდა. კანონის მიხედვით, სასამართლომ უნდა მიიღოს გადაწყვეტილება იმუნიტეტის მოხსნის შესახებ, ხოლო საბოლოო სიტყვა პარლამენტის ხელშია.

კვარჩიას ადვოკატის, მვრინა ტანიას თქმით, “პოლიტიკური სტრატეგების საქმე“ მრავალი გაურკვევლობით არის სავსე.

ნახიჩევანის ავტონომიურ რესპუბლიკაში დრონებით განხორციელებულ შეტევასთანდაკავშირებით სატელეფონო საუბარი მქონდა აზერბაიჯანის პრეზიდენტთან, ილჰამ ალიევთან, – ამის შესახებ საქართველოს პრემიერ-მინისტრი ირაკლი კობახიძე X-ზე წერს.

როგორც მთავრობის მეთაური აღნიშნავს, საუბრისას დაადასტურეს ქვეყნებს შორის არსებული ძლიერი პარტნიორობა და ხაზი გაუსვეს რეგიონში მშვიდობისა და სტაბილურობის მნიშვნელობას.

„ნახიჩევანის ავტონომიურ რესპუბლიკაში დრონებით განხორციელებულ შეტევასთანდაკავშირებით სატელეფონო საუბარი მქონდა აზერბაიჯანის პრეზიდენტთან, ილჰამ ალიევთან. გამოვთქვი საქართველოს სოლიდარობა და დაშავებულებს მალე გამოჯანმრთელება ვუსურვე. ჩვენ დავადასტურეთ ჩვენს ქვეყნებს შორის არსებული ძლიერი პარტნიორობა და ხაზი გავუსვით რეგიონში მშვიდობისა და სტაბილურობის მნიშვნელობას“, – აღნიშნავს პრემიერი.

საქართველოს პრემიერ-მინისტრი ირაკლი კობახიძე აზერბაიჯანის რესპუბლიკის პრეზიდენტ ილჰამ ალიევს ტელეფონით ესაუბრა. 

მთავრობის მეთაურმა შეშფოთება გამოთქვა აზერბაიჯანის რესპუბლიკის ნახიჩევანის ავტონომიურ რესპუბლიკაში დრონებით განხორციელებულ შეტევასთან დაკავშირებით. 

ირაკლი კობახიძემ ილჰამ ალიევს სოლიდარობა გამოუცხადა და მომხდარის შედეგად დაშავებულ მოქალაქეებს მალე გამოჯანმრთელება უსურვა.

მხარეებმა ხაზი გაუსვეს ორ ქვეყანას შორის არსებულ სტრატეგიულ პარტნიორობას, მჭიდრო პოლიტიკურ ურთიერთობებს და რეგიონში მშვიდობის და სტაბილურობის შენარჩუნების განსაკუთრებულ მნიშვნელობას.

საქართველოს საგარეო საქმეთა მინისტრმა, მაკა ბოჭორიშვილმა აზერბაიჯანის რესპუბლიკის საგარეო საქმეთა მინისტრთან, ჯეიჰუნ ბაირამოვთან სატელეფონო საუბარი გამართა.

საქართველოს საგარეო საქმეთა მინისტრმა გამოხატა ღრმა შეშფოთება აზერბაიჯანის რესპუბლიკის ნახიჭევანის ავტონომიურ რესპუბლიკაში დრონებით განხორციელებულ შეტევასთან დაკავშირებით, რომლის შედეგადაც რამდენიმე მოქალაქე დაშავდა.

მინისტრმა ხაზი გაუსვა რეგიონში მშვიდობისა და სტაბილურობის შენარჩუნების მნიშვნელობას.

მინისტრებმა კიდევ ერთხელ დაადასტურეს საქართველოსა და აზერბაიჯანს შორის არსებული სტრატეგიული და მეგობრული ურთიერთობის სიმტკიცე.

ინფორმაციას საგარეო საქმეთა სამინისტრო ავრცელებს.

მიხეილ ყაველაშვილმა პარლამენტის მიერ გუშინ, 4 მარტს მიღებულ საკანონმდებლო პაკეტს ხელი იმავე დღეს მოაწერა. ცვლილებები, რომლებიც სისხლის სამართლისა და ადმინისტრაციულ კოდექსებში რიგი შემზღუდავი მუხლების დამატებას ითვალისწინებს, „საკანონმდებლო მაცნეზე“ უკვე გამოქვეყნდა და ძალაში შევიდა.

კერძოდ, საპარლამენტო უმრავლესობამ მესამე მოსმენით დაჩქარებული წესით მიიღო ცვლილებები „გრანტების შესახებ” და “მოქალაქეთა პოლიტიკური გაერთიანების შესახებ” კანონებში, ასევე სისხლის სამართლისა და ადმინისტრაციულ სამართალდარღვევათა კოდექსებში.

საკანონმდებლო ცვლილებების შედეგად, სისხლის სამართლის წესით დასჯადი ხდება:

• კონსტიტუციური ორგანოების არაღიარება;
• გრანტების შესახებ კანონის დარღვევა;
• ბიზნესსუბიექტის მიერ პოლიტიკური აქტივობის განხორციელება;
• პარტიების მიერ დეკლარაციის წარუდგენლობა.

ახალი ნორმით, ნებისმიერი დანაშაულის ჩადენისას სასჯელის დამამძიმებელი გარემოება ხდება „კონსტიტუციური წყობილების ან კონსტიტუციური ორგანოების არაღიარების მოტივი“. ასეთ შემთხვევაში, პირს ძირითად სასჯელზე დამატებით ერთი წელი პატიმრობა დაემატება.

მნიშვნელოვანი ცვლილება შევიდა სისხლის სამართლის კოდექსის 194-ე მუხლში (ფულის გათეთრება). მუხლს დაემატა დამამძიმებელი გარემოება - „საქართველოს პოლიტიკურ საკითხებზე აქტივობის განხორციელების მიზნით“. აღნიშნული ქმედება ითვალისწინებს თავისუფლების აღკვეთას 9-დან 12 წლამდე ვადით.

სისხლის სამართლის კოდექსს დაემატა სრულიად ახალი მუხლი, რომელიც 3 წლამდე პატიმრობას, ჯარიმას ან გამასწორებელ სამუშაოს ითვალისწინებს მოქალაქის მიერ შემდეგი ქმედებების სისტემატურადჩადენისთვის:

• საჯარო მოწოდება კანონმდებლობის მასობრივი დარღვევისკენ;
• ხელისუფლების ორგანოებისადმი მასობრივი დაუმორჩილებლობისკენ;
• ხელისუფლების ალტერნატიული ორგანოების შექმნისკენ;
• საკუთარი თავის ან სხვისი თვითნებურად წარმოჩენა ხელისუფლების წარმომადგენლად.

კანონში გაჩნდა ჩანაწერიც, რომლის მიხედვითაც პირი დაისჯება ნებისმიერი „სისტემატური მოქმედებისთვის“, რომელიც მიმართულია „კონსტიტუციური ორგანოების არალეგიტიმურობის შესახებ აღქმის დამკვიდრებისკენ“, თუ ეს აზიანებს ქვეყნის ინტერესებს.

ამავე მუხლით, იურიდიული პირები დაისჯებიან ჯარიმით ან ლიკვიდაციით.

ადმინისტრაციულ სამართალდარღვევათა კოდექსში კი ჩაიწერა, რომ ნებისმიერი სამართალდარღვევისას პასუხისმგებლობა დამძიმდება, თუ ის ჩადენილია „კონსტიტუციური ორგანოების არაღიარების მოტივით“.

ოკუპირებული აფხაზეთის აღმოსავლეთ ნაწილში ჩამოვარდნილი დრონის ფრაგმენტები აღმოაჩინეს. უპილოტო საფრენი აპარატის ნამსხვრევები ოჩამჩირის რაიონის ერთ-ერთ სოფელში იპოვეს. ვარდნისას დრონმა ელექტროგადამცემი ხაზი დააზიანა. 

ტელეგრამ-არხებით გავრცელებული ინფორმაცია ТАСС-ს დაუდასტურა აფხაზეთის ე.წ. თავდაცვის სამინისტრომ; დაწყებულია დაზიანებული ელექტროგადამცემი ხაზის აღდგენითი სამუშაოები.

როგორც ე.წ. საგანგებო სიტუაციების მართვის სამინისტროში განაცხადეს, გავრცელდა ინფორმაცია, რომ უპილოტო საფრენი აპარატის ფრაგმენტები ჩამოვარდა ახალ ათონსა და გულრიფშშიც, თუმცა მაშველებმა მათი პოვნა ვერ შეძლეს - ინფორმაცია ჯერჯერობით არ დასტურდება.

ე.წ. საგამოძიებო უწყებამ მოქალაქეებს მოუწოდა, „შეინარჩუნონ სიმშვიდე, ხოლო საფრენი აპარატების ან მათი ნამსხვრევების აღმოჩენის შემთხვევაში, არ მიუახლოვდნენ მათ, არ შეეხონ და დაუყოვნებლივ შეატყობინონ“ შესაბამის სტრუქტურებს.

ინფორმაციის ოფიციალურ დადასტურებამდე, სოციალურ ქსელებში გავრცელდა ვიდეოკადრები, რომლებზეც აფხაზეთის ცაში მფრინავი დრონებია ასახული.

4 მარტის საღამოს, „ფსოუს“ საკონტროლო-გამშვები პუნქტის მუშაობაც შეჩერდა „დრონების საფრთხის“ გამო.