ეკონომიკა

სტატისტიკის ეროვნული სამსახურის 2025 წლის წინასწარი მონაცემებით მთლიანი შიდა პროდუქტის მოცულობა მიმდინარე ფასებში 104 598.1 მლნ. ლარს გაუტოლდა, რაც 12.4 პროცენტით აღემატება წინა წლის შესაბამის მაჩვენებელს, ხოლო რეალური მთლიანი შიდა პროდუქტის ზრდამ 2025 წელს, წინა წელთან შედარებით 7.5 პროცენტი შეადგინა. მთლიანი შიდა პროდუქტის დეფლატორის პროცენტული ცვლილება 2025 წელს 4.6 პროცენტით განისაზღვრა.

საქსტატის ცნობით, მთლიანი შიდა პროდუქტის დარგობრივ სტრუქტურაში ყველაზე დიდი წილით გამოირჩევა საბითუმო და საცალო ვაჭრობა; ავტომობილების და მოტოციკლების რემონტი და უძრავ ქონებასთან დაკავშირებული საქმიანობები. შემდგომ პოზიციებს იკავებს დამამუშავებელი მრეწველობა (9.1 პროცენტი), ინფორმაცია და კომუნიკაცია (8.0 პროცენტი), მშენებლობა (8.0 პროცენტი), სახელმწიფო მმართველობა და თავდაცვა; სავალდებულო სოციალური უსაფრთხოება (6.7 პროცენტი), განათლება (6.4 პროცენტი), ტრანსპორტი და დასაწყობება (6.1 პროცენტი), სოფლის სატყეო და თევზის მეურნეობა (5.9 პროცენტი).

ამასთან, უწყების ანგარიშით, 2025 წელს წინა წლის შესაბამის პერიოდთან შედარებით ზრდის მიმართულებით მნიშვნელოვანი წვლილი შეიტანა ისეთმა დარგებმა, როგორიცაა ინფორმაცია და კომუნიკაცია (28.7 პროცენტი), განათლება (24.5 პროცენტი), სახელმწიფო მმართველობა და თავდაცვა; სავალდებულო სოციალური უსაფრთხოება (9.3 პროცენტი), საფინანსო და სადაზღვევო საქმიანობები (12.9 პროცენტი), საბითუმო და საცალო ვაჭრობა; ავტომობილების და მოტოციკლების რემონტი (3.8 პროცენტი), ტრანსპორტი და დასაწყობება (8.9 პროცენტი), უძრავ ქონებასთან დაკავშირებული საქმიანობები (5.0 პროცენტი).

ხოლო კლების მიმართულებით მნიშვნელოვანი წვლილი შეიტანა შემდეგმა დარგებმა: სოფლის, სატყეო და თევზის მეურნეობა (-5.7 პროცენტი), ელექტროენერგიის, აირის, ორთქლის და კონდიცირებული ჰაერის მიწოდება (-4.5 პროცენტი).

საქართველოს მთავრობამ საგარეო საქმეთა სამინისტროსთვის მთავრობის სარეზერვო ფონდიდან 545 000 ევროს ეკვივალენტი ლარი გამოყო, სპეციალური ავიარეისების განხორციელებასთან დაკავშირებული ხარჯების დასაფინანსებლად.

შესაბამისი განკარგულების მიხედვით, თანხა გამოიყო ახლო აღმოსავლეთის რეგიონში შექმნილი ვითარების გამო, როდესაც რიგი ქვეყნების საჰაერო სივრცის დახურვამ სხვადასხვა ქალაქში მყოფი საქართველოს მოქალაქეების სამშობლოში დაბრუნება გაართულა.

დოკუმენტის თანახმად, თანხა მოხმარდება სპეციალური რეისების განხორციელებასთან დაკავშირებული საჭირო ხარჯების ანაზღაურებას. განკარგულება ძალაშია ხელმოწერისთანავე და ვრცელდება 2026 წლის 3 მარტიდან წარმოშობილ სამართლებრივ ურთიერთობებზე.

უწყების ინფორმაციით, საქართველოს 600-ზე მეტი მოქალაქე, რომლებმაც საქართველოს შესაბამის საელჩოებს სპეციალური რეისებით დაბრუნების თხოვნით მიმართეს, უკვე დაბრუნდა საქართველოში.

მათ შორის, მოქალაქეები საქართველოში დაბრუნდნენ მასკატიდან (ომანის სასულთნო) და რიადიდან (საუდის არაბეთი) განხორციელებული სპეციალური რეისებით.

საგარეო საქმეთა სამინისტროს ცნობით, რეისები შესრულდა შემდეგ თარიღებში:

მასკატი – თბილისი: 3 მარტი, 5 მარტი და 6 მარტი;
რიადი – თბილისი: 4 მარტი;
ბოლო სპეციალური რეისი 8 მარტს შესრულდა.
უწყების განცხადებით, ყველა მოქალაქე, ვინც საელჩოებს მიმართა სპეციალური რეისებით დაბრუნების თხოვნით, უსაფრთხოდ დაბრუნდა საქართველოში.

საქართველოს ენერგეტიკისა და წყალმომარაგების მარეგულირებელი ეროვნული კომისიის (სემეკ) თავმჯდომარემ, დავით ნარმანიამ მონაწილეობა მიიღო ქ. წყალტუბოში გამართულმომხმარებლის დაცვის IV საერთაშორისო კვირეულის შემაჯამებელ ღონისძიებაში. შეხვედრას ესწრებოდნენსაქართველოს პარლამენტის, ადგილობრივი თვითმმართველობის, მარეგულირებელი კომისიების, სხვადასხვა სექტორში მოქმედი კომპანიების წარმომადგენლები და ადგილობრივი მოსახლეობა.

სემეკის თავმჯდომარემ, მოხსენების ფარგლებში ისაუბრა კვირეულის მნიშვნელობაზე, ენერგეტიკისა და წყალმომარაგების საკითხების შესახებ საზოგადოებისინფორმირებისა და ცოდნის დონის ამაღლებისაუცილებლობაზე.

„სემეკის მიერ შემუშავებული რეგულაციებიემსახურება ერთ ძირითად მიზანს - ხელი შეეწყოს სექტორების განვითარებას და დაცული იყოს მომხმარებელთა უფლებები. ენერგეტიკისა და წყალმომარაგების სექტორებში მომხმარებლის უფლებების დაცვასთან ერთად, უმნიშვნელოვანესია მისი დროული ინფორმირება კომუნალურ საკითხებზე. კომისიის მიერ მიღებული ნებისმიერი რეგულაცია თუ გადაწყვეტილება საჯაროა და ხელმისაწვდომი დაინტერესებული პირისებთვის. მომხმარებლის ინფორმირებისა და ცნობიერების ამაღლების   მიზნით, სემეკმა შშმ პირებისთვის ადაპტირებული საინფორმაციო ბუკლეტები შეიმუშავა, მომზადდა საინფორმაციო კლიპი სურდო თარგმანით, ბუკლეტები აზერბაიჯანულ და სომხურ ენებზე.

სემეკის მიერ დაფუძნებული ენერგეტიკის სასწავლო ცენტრის მიერ, რომელიც მიზნად ისახავს მომხმარებელთა ცნობიერების ამაღლებას, 2025 წელს 5000-მდე პირს ჩაუტარდა ტრენინგები კომუნალურ საკითხებთან დაკავშირებით. მიმდინარე წელსაც ასევე აქტიურად გრძელდება მომხმარებელთა ინფორმირების დონის ამაღლებაზე მუშაობა“, - აღნიშნა დავით ნარმანიამ.

9-16 მარტს ექვსი მარეგულირებელი უწყების - სემეკის, კონკურენციისა და მომხმარებლის დაცვის სააგენტოს, კომუნიკაციების კომისიის, ეროვნული ბანკის, დაზღვევის სახელმწიფო ზედამხედველობის სამსახურისა და სურსათის ეროვნული სააგენტოს ერთობლივი ორგანიზებით მომხმარებლის დაცვის IVსაერთაშორისო კვირეული ჩატარდა. კვირეულის მიზანს წარმოადგენდა მომხმარებელთა უფლებების დაცვის მექანიზმების გაუმჯობესება.  

15 მარტს, მომხმარებელთა უფლებების დაცვის საერთაშორისო დღესთან დაკავშირებით, ქ. ბათუმში მომხმარებლის დაცვის IV საერთაშორისო კვირეულის ფარგლებში შეხვედრა გაიმართა. შეხვედრას ესწრებოდნენ ადგილობრივი თვითმმართველობის, სხვადასხვა სექტორში მოქმედი კომპანიების წარმომადგენლები და ადგილობრივი მოსახლეობა.
შეხვედრაზე სიტყვით წარდგნენ საქართველოს მთავრობის, პარლამენტის,  აჭარის ავტონომიური რესპუბლიკის მთავრობის წარმომადგენლები და მარეგულირებელი უწყებების ხელმძღვანელი პირები.
საქართველოს ენერგეტიკისა და წყალმომარაგების მარეგულირებელი ეროვნული კომისიის (სემეკ) თავმჯდომარემ დავით ნარმანიამ სიტყვით გამოსვლისას ისაუბრა მომხმარებელთა უფლებების დაცვის კუთხით  სემეკის საქმიანობაზე:
„მნიშვნელოვანია, რომ მომხმარებლის უფლება დაცული იყოს ყველა სექტორში. შესაბამისად, აუცილებელია მომხმარებლის ინფორმირება მის პასუხისმგებლობაზე, ასევე კომუნალური კომპანიის ვალდებულებებზე. სემეკის მიზანია, რომ მინიმუმამდე დავიდეს ენერგეტიკისა და წყალმომარაგების კომუნალური მომსახურების სექტორებში არსებული ხარვეზები, შემცირდეს წყვეტების ხანგრძლივობა და სიხშირე. ხაზგასასმელია რეგულაციების ეფექტიანობა. ნებისმიერი რეგულაცია, რომელსაც სემეკი შეიმუშავებს მომხმარებლის საუკეთესო ინტერესს ემსახურება“,  - აღნიშნა დავით ნარმანიამ.  
სემეკის თავმჯდომარემ ყურადღება გაამახვილა სხვადასხვა რეგულაციაზე, რომელიც ხელს უწყობს ეფექტიანი პროექტების განხორციელებას:
„საგულისხმოა, რომ სემეკმა არაერთი ახალი რეგულაცია აამოქმედა. მათ შორის, აღსანიშნავია საერთო ცენტრალური გათბობის სისტემების რეგულაცია, რომლის საფუძველზეც მრავალბინიან სახლებში წარმატებით მიმდინარეობს საერთო ცენტრალური გათბობის სისტემების მოწყობა. რამდენიმე ობიექტზე უკვე დასრულდა ჭკვიანი თბომრიცხველების მონტაჟი და დაიწყო ცენტრალური გათბობის სისტემის მიერ მოხმარებული ბუნებრივი გაზის საერთო მოხმარებიდან საყოფაცხოვრებო წილის გამოყვანა, რაც მნიშვნელოვნად ამცირებს ბუნებრივი გაზის გადასახადს მომხმარებლისთვის, “ - აღნიშნა დავით ნარმანიამ.  
მისივე თქმით, სემეკი განსაკუთრებულ მნიშვნელობას ანიჭებს ენერგეტიკისა და წყალმომარაგების საკითხების  შესახებ  საზოგადოების ცოდნის დონის ამაღლებას. ამ მიზნით, სემეკის მიერ დაფუძნებული ენერგეტიკის სასწავლო ცენტრი სხვადასხვა პროექტებს ახორციელებს, რომლის ფარგლებშიც 2025 წელს 5000-მდე პირს ტრენინგები ჩაუტარდა.  
​ 9-16 მარტს ექვსი მარეგულირებელი უწყების - სემეკის, კონკურენციისა და მომხმარებლის დაცვის სააგენტოს, კომუნიკაციების კომისიის, ეროვნული ბანკის, დაზღვევის სახელმწიფო ზედამხედველობის სამსახურისა და სურსათის ეროვნული სააგენტოს ერთობლივი ორგანიზებით მომხმარებლის დაცვის IV საერთაშორისო კვირეული მიმდინარეობს. კვირეულის მიზანს წარმოადგენს მომხმარებელთა უფლებების დაცვის მექანიზმების გაუმჯობესება.