სამართალი - ვერსია - ვერსია http://www.versia.ge Thu, 17 Oct 2019 07:17:18 +0400 Joomla! - Open Source Content Management en-gb როგორ მივხვდეთ, რომ მოზარდი თითმკვლელობას აპირებს http://www.versia.ge/2013-07-31-11-23-46/item/6380-როგორ-მივხვდეთ,-რომ-მოზარდი-თითმკვლელობას-აპირებს.html http://www.versia.ge/2013-07-31-11-23-46/item/6380-როგორ-მივხვდეთ,-რომ-მოზარდი-თითმკვლელობას-აპირებს.html

სუიციდის საგანგაშო სტატისტიკა და ფსიქოლოგის რჩევები

ბოლო დროს, საქართველოში სუიციდის შემთხვევები გახშირდა. ყველაზე შემაშფოთებელი კი ისაა, რომ თავს არასრულწლოვნები და მოზარდები იკლავენ. „2018 წელს, სუიციდის 389 და სუიციდის მცდელობის 477 ფაქტი დაფიქსირდა, ხოლო 2019 წლის 6 თვის განმავლობაში, 219 ადამიანმა სცადა თვითმკვლელობა, 207-მა კი სიცოცხლე სუიციდით დაასრულა“,_ აცხადებს სახალხო დამცველი, ნინო ლომჯარია. 

მისივე თქმით, მიუხედავად იმისა, რომ ფსიქიკური ჯანდაცვა საქართველოში ერთ-ერთი ყველაზე პრობლემური სფეროა, ჩვენს ქვეყანას სუიციდის პრევენციის პროგრამა არ აქვს. ამ საგანგაშო სტატისტიკას, სამწუხაროდ, ახსნას ვერავინ უძებნის _ რატომ იკლავენ ადამიანები, მოზარდები თავს? _ „ვერსია“ გეშტალტ ფსიქოთერაპევტს, ზვიად ეკიზაშვილს იმის შესახებ ესაუბრა, თუ როგორ უნდა მივხვდეთ, რომ მოზარდი სუიციდზე ფიქრობს, როგორ უნდა მოიქცეს ამ დროს მოზარდის მშობელი და რა უნდა გავაკეთოთ, რომ ჩვენმა შვილებმა სიცოცხლე თვითმკვლელობით არ დაასრულონ:

_ მოზარდობის ხანა ხიდია ბავშვობასა და მოწიფულობას შორის. ეს პერიოდი 10-დან 16-წალმდე ასაკს მოიცავს და უმცროს და უფროს მოზარდობის პერიოდად იყოფა. უმცროსი მოზარდობის პერიოდი 10-დან 14 წლამდე გრძელდება, უფროსი კი _ 14-16 წლამდე, თუმცა ზოგ მეცნიერს მიაჩნია, რომ ეს პერიოდი 19 წლამდე გრძელდება. გარდამავალ ასაკში მკვეთრ ცვლილებებს განიცდის მოზარდის განვითარების ყველა მხარე, როგორც ანატომიურ-ფიზიოლოგიური, ასევე _ გონებრივი, სოციალური და პიროვნულიც. 

გარდამავალ ასაკში, მოზარდის ორგანიზმში კარდინალური ცვლილებები ხდება, იწყება ფიზიკური განვითარების ახალი ეტაპი და დგება სქესობრივი მომწიფების პერიოდი. შემეცნებითი სფეროს ძირითადი ნიშნები _ აბსტრაქტული აზროვნების ჩამოყალიბება, პიროვნული და სოციალური განვითარებაა. გარდამავალი ასაკის მთავარ სირთულედ მივიჩნევთ მოზარდების კონფლიქტს მშობლებსა და იმ უფროსებთან, რომლებიც მოზარდთა დამოუკიდებლობასა და ავტონომიისკენ სწრაფვას ეწინააღმდეგებიან, მაგრამ ეს არაა განვითარების აუცილებელი ატრიბუტი. ავტონომიის ცნების განსაზღვრის ძირითადი აქცენტი კეთდება უფროსების გავლენისგან გათავისუფლებაზე, მაგრამ შეუძლებელია, გარდამავალ ასაკში ადამიანი მათზე არ იყოს დამოკიდებული და ეს არცაა უსაფრთხო, სრული თავისუფლება არც მოზარდისთვისაა ხელსაყრელი. 

ამასთან, მოზარდები ეკონომიურადაც მშობლებზე არიან დამოკიდებულნი და უფრო მართებული იქნება, თუ ავტონომიას განვიხილავთ, როგორც თვითრეგულაციას. მოზარდი უსაფრთხო ოჯახურ გარემოცვაში ცდის, თუ რა სახის დამოუკიდებლობის მოპოვება შეუძლია ანუ რამდენად შეძლებს, საკუთარი მოსაზრებები და საზღვრები, სწორედ ამ უსაფრთხო გარემოში დაიცვას. მნიშვნელოვანია, რომ მოზარდისთვის ოჯახური გარემო უსაფრთხო იყოს. 

_ ბატონო ზვიად, რამ შეიძლება ადამიანი სუიციდამდე მიიყვანოს? 

_ თვითმკვლელობა ანუ საკუთარი სიცოცხლის ხელყოფა ავტოაგრესიის უკიდურესი ფორმაა, რაც ბევრი მიზეზით შეიძლება იყოს გამოწვეული, მათ შორის, ყველაზე ხშირია დეპრესია, სირცხვილი, დანაშაულის განცდა, გაუსაძლისი ფიზიკური ტკივილი, ემოციური გადატვირთვა, აღელვება, ფინანსური პრობლემები და ა.შ. 

ჯანდაცვის მსოფლიო ორგანიზაციის ცნობით, ყოველწლიურად, თავს ერთ მილიონზე მეტი ადამიანი იკლავს და სიკვდილიანობის ყველაზე დიდი ნაწილი მოზარდებსა და 35-წლამდე ახალგაზრდებზე მოდის. 10-20 მილიონი შემთხვევა კი არასასიკვდილო შედეგით მთავრდება. ფრანგი სოციოლოგი, ემილ დიურკემი ფიქრობს, რომ არსებობს სუიციდის ტიპები: ეგოისტური თვითმკვლელობა, რომელიც მიეკუთვნება დეპრესიას, ადამიანური ურთიერთობებისა და სოციალური ფაქტორების გამო ჩადენილ სუიციდს; ანომიური თვითმკვლელობა, რომელსაც ახასიათებს ეკონომიკური მიზეზებით გამოწვეული სუიციდური ფაქტები; ალტრუისტური თვითმკვლელობა _ ამ შემთხვევაში, ადამიანი საკუთარ სიცოცხლეს ხელყოფს სხვაზე ორიენტირებულობის გამო, ხშირად თვითმკვლელობა გამოწვეულია სიყვარულითა და იმედგაცრუებით; ფატალისტური თვითმკვლელობა, როცა ადამიანი სოცოცხლეს ასრულებს საზოგადოებრივი დოგმებისა და სტერეოტიპების გასაპროტესტებლად და არსებობს ე.წ. ფარული სუიციდი, რომელიც ხორციელდება ნარკოტიკებისა და ალკოჰოლის ჭარბი მიღების გამო. 

თვითმკვლელობა შეიძლება იყოს დაკავშირებული მძიმე სოციალურ ფონთანაც. ამის მიზეზი შეიძლება გახდეს მენტალური ჯანმრთელობაც, როცა ადამიანი კლინიკურად არაა ჯანმრთელი. მიზეზი ასევე, შეიძლება გახდეს სტრესი და ადამიანმა აფექტის მდგომარეობაში მიიღოს ეს გადაწყვეტილება. 

_ მშობელი როგორ უნდა მიხვდეს, რომ მისი შვილი სუიციდზე ფიქრობს ანუ რა ნიშნები ახლავს სუიციდისკენ მიდრეკილებას? 

_ საყურადღებო ნიშანი, როცა შეიძლება, მოზარდი თვითმკვლელობაზე ფიქრობდეს, ოჯახის წევრებსა და მეგობრებთან ურთიერთობის სურვილის დაკარგვაა; ასევე, კვებისა და ძილის რეჟიმის დარღვევა და იმ საქმიანობისადმი ინტერესის დაკარგვა, რაც ადრე სიამოვნებას ჰგვრიდა; ხასიათის მნიშვნელოვანი შეცვლა; რა თქმა უნდა, ნარკოტიკებისა და ალკოჰოლის ბოროტად გამოყენება; აგრეთვე, საყვარელი ნივთების გაჩუქება; გაუთავებელი ლაპარაკი სიკვდილსა და სიკვდილთან დაკავშირებულ თემებზე... 

დოქტორის, ქეთლინ მაკკოენის განმარტებით, მშობლების ყველაზე დიდი შეცდომა ისაა, რომ ამ საყურადღებო ნიშნებს უგულებელყოფენ: „არც ერთ მშობელს სურს იმის დაჯერება, რომ მის შვილს რაღაც სჭირს, ამიტომ ამას ყურადღებას არ აქცევენ და ამბობენ, ასაკის ბრალია, გაუვლის, ყოველთვის, ყველაფერს აზვიადებსო, _ ასე ინუგეშებენ ხოლმე თავს და ეს ნამდვილად საშიშია. საშიშროების მომასწავებელ ნებისმიერ ნიშანს, მშობელი ძალიან დიდი ყურადღებით უნდა მოეკიდოს“. 

_ ბატონო ზვიად, როგორ მოიქცეს მშობელი, თუ მოზარდი ფსიქოთერაპევტთან არ მიჰყვება? გვინდა, თუ არა, საქართველოში ფსიქოლოგთან მისვლის კულტურა სტიგმისა და სტერეოტიპების გამო, ჯერ კიდევ არ არსებობს... 

_ მნიშვნელოვანი შეკითხვაა. სტერეოტიპი არსებობს და ეს გამომდინარეობს საბჭოთადროინდელი ფსიქოთერაპიიდან. მაშინ, პრაქტიკულად, ფსიქოთერაპია არც არსებობდა, მხოლოდ ფსიქიატრია იყო. სხვათა შორის, საქართველოში ფსიქიატრიის ყოველთვის ძალიან ძლიერი სკოლა არსებობდა. ახლაც, უზნაძის სახელობის ინსტიტუტში, ამისთვის შესაბამისი ბაზაა. 

ფსიქოთერაპია, ფსიქიატრია არაა. ფსიქოთერაპია მეცნიერებაა, რომელიც აწყობილია დიალოგზე, შესაბამისად, ფსიქოთერაპევტთან რომ მიდიხარ, ეს არ ნიშნავს, რომ მენტალური პრობლემა გაქვს. ფსიქოთერაპევტს მიმართავენ ოჯახის წევრებთან, მეგობრებთან, ან საკუთარ თავთან ურთიერთობის პრობლემების შემთხვევაში. საერთოდ, ურთიერთობა ჩვენი სიცოცხლის წყაროა, რის გარეშეც ჩვენი იდენტობა დაკარგული იქნება ანუ მე, ჩემს თავს, სხვასთან ურთიერთობაში აღვიქვამ. 

რაც შეეხება თქვენს შეკითხვას, საჭიროა მოსახლეობის მეტი ინფორმირება იმ კუთხით, რომ ფსიქოთერაპია არ არის სტიგმა. ამ მხრივ, ვხედავ ცვლილებას _ უფრო მეტი პაციენტი მოდის, მეტი ადამიანი ინტერესდება. 2012 წლიდან, 4 საერთაშორისო ინსტიტუტი გაიხსნა თბილისში, რომელიც ევროპული ცენზის მქონე ფსიქოთერაპევტებს უშვებს. ეს იმას ნიშნავს, რომ დღეს გვაქვს ფუფუნება, ავირჩიოთ ფსიქოთერაპევტი, რაც ძალიან მნიშვნელოვანია. 

_ ბევრ მშობელს, დედას, შეიძლება არ მოსწონს შვილთან საკუთარი დამოკიდებულება, თუმცა ბევრი მიზეზის გამო, ფსიქოთერაპევტთან ვიზიტს ვერ ახერხებს... 

_ ზოგადად, საქართველოში კულტურალური მომენტია ანუ ქართველი დედა _ ესაა როლი, რომელიც ძალიან მნიშვნელოვანია საზოგადოებაში და ყოველთვის ასოცირდება პოზიტიურთან, მზრუნველთან, თავგადადებულთან _ ადამიანთან, რომელიც საკუთარ თავზე კი არა, მხოლოდ შვილებზე ფიქრობს. არადა, დედები სხვადასხვანაირები არიან და მომენტი, რაზეც შეიძლება ფსიქოთერაპევტთან წამუშავება, ეს არის _ „საიდან მოდის ჩემი სირცხვილის გრძნობა?“ _ ამის გარკვევა. 

_ ანუ დედები, საკუთარი თავისგან იდეალურობას ვითხოვთ? 

_ ამას ჩვენი სოციალური გარემო ითხოვს. ჩვენ ხომ კულტურის, ჩვენი მშობლების შვილები, მათი აღზრდილები ვართ. შესაბამისად, ის მოდელები, რომლებიც ვნახეთ, განაპირობებს ან იგივე მოდელს, ან ანტიმოდელს, რომელსაც ქმნი, როგორც მშობელი. 

ვმუშაობ გეშტალტ ფსიქოთერაპიაში, რომელიც ერთ-ერთი წამყვანი ფსიქოთერაპიული მოდულია მსოფლიოში და საქართველოშიც ძალიან პოპულარულია. გეშტალტ-თერაპევტთან არ მიდიხარ რაღაც რჩევების მისაღებად, ეს თერაპია არის აწყობილი ცნობიერების გაზრდაზე ანუ უნდა გავაცნობიერო, თუ რას ვგრძნობ, როცა შვილთან ვურთიერთობ. 

_ მოზარდისთვის სექსუალური, ფსიქოლოგიური და სხვა ტიპის ინფორმაციის გადაცემის პროცესში რა როლი აქვს ოჯახს, სკოლას, სახელმწიფოს და, საერთოდ, სკოლებსა და ბაღებში ფსიქოლოგები რამდენად აუცილებელნი და საჭირონი არიან? 

_ ვხედავ, რომ სწორ გზაზე ვდგავართ და ამაში გვეხმარება ევროპის განათლების მაგალითი, რომლისკენაც მივისწრაფვით. ეს კურსი გვაქვს აღებული და ვფიქრობ, დიდი ხნის მანძილზე, აღარ გადავუხვევთ. ისე, როგორც ვიცი, სკოლებსა და ბაღებში არიან ფსიქოლოგები... 

_ შესაძლებელია, ზოგ სკოლასა და ბაღში არიან, მაგრამ ბევრი ამბობს, რომ ეს მხოლოდ ფორმალურაია და ერთი ფსიქოლოგი, ასობით ბავშვის პრობლემას ვერ გასწვდება. 

_ რა თქმა უნდა, ბევრ ბავშვს ერთი ფსიქოლოგი ვერც აუვა და ამას ვერც მოვთხოვთ. ამასთან, საინტერესო იქნება, მუშაობა მასწავლებლებთან. ჩემი აზრით, ყველაზე მნიშვნელოვანი პროფესია სახელმწიფოსთვის მასწავლებელია, რომელიც ყველაზე მნიშვნელოვანი რგოლია სოციუმისა და სახელმწიფოსთვის. ტრენინგების ჩატარება, ფსიქოთერაპიული ჯგუფები მასწავლებლებისთვის აუცილებელია, რადგან არის გადაწვის პრობლემა იმის გამო, რომ ბავშვებთან მუშაობა იოლი არაა და მასწავლებლებსაც სჭირდებათ მხარდაჭერა.

თათია გოჩაძე

]]>
versiaprinti@yahoo.com (super admin) სამართალი Wed, 16 Oct 2019 13:41:52 +0400
როგორ ექცევიან „ზონაზე“ გაუპატიურებისა და ქალის მკვლელობისთვის გასამართლებულებს http://www.versia.ge/2013-07-31-11-23-46/item/6376-როგორ-ექცევიან-„ზონაზე“-გაუპატიურებისა-და-ქალის-მკვლელობისთვის-გასამართლებულებს.html http://www.versia.ge/2013-07-31-11-23-46/item/6376-როგორ-ექცევიან-„ზონაზე“-გაუპატიურებისა-და-ქალის-მკვლელობისთვის-გასამართლებულებს.html

საზარელი შემთხვევა თბილისში _ ყაჩაღებმა ბინის მეპატრონეები დახოცეს და გვამებზე მოისაქმეს

გასული კვირა ორი პრეცედენტული საქმით დაგვამახსოვრდა. უფრო ზუსტად კი იმ გამოხმაურებით, რომელიც ამ საქმეებს მოჰყვა. საუბარია თბილისის საკრებულოს დეპუტატის, ილია ჯიშკარიანსა და მის თანაშემწეს, თამთა თოდაძეს შორის მომხდარ ინციდენტსა და ხაშურში, ირაკლი დეკანოიძის მიერ მოკლული ყოფილი ცოლის, ნათია გოგალაძის საქმეებზე. 

რა თქმა უნდა, ორივე საქმეზე გამოძიება თავის სიტყვას იტყვის და ჩვენ არც ვაპირებთ, სამართლებრივ ჭრილში განვიხილოთ ერთი, ან მეორე საქმე, მით უმეტეს, როცა რეალურად, ორივე ძალიან მძიმე ბრალდებაა.

საქმე ის გახლავთ, რომ როგორც კი მომხდარის შესახებ გახდა ცნობილი, სოციალურ ქსელში დიდი ამბავი ატყდა. საზოგადოების ნაწილი ჯიშკარიანის მხარეს იდგა და მსხვერპლად ის გამოჰყავდა, ნაწილს კი თოდაძე მიაჩნია მსხვერპლად. 

რაც შეეხება მკვლელობას, ნაწილი მკვლელს ამართლებდა, ნაწილი _ მოკლულს. მერე იყო, სატელევიზიო ჩართვისას, ილია ჯიშკარიანმა რომ განაცხადა, მირჩევნია მკვლელობაში ვიყო ბრალდებული, ვიდრე _ ძალადობაშიო და ნეგატიური კომენტარების ახალი ტალღაც წამოვიდა. 

თოდაძის მხარდამჭერები ირონიით წერდნენ, რა თქმა უნდა, ურჩევნია მკვლელობის ბრალდებით იყოს, რადგან კარგად იცის, რა ელოდება გაუპატიურების ბრალდებით შესულს ციხეშიო. 

ატყდა მერე განხილვები, ვერსიები, ჯიშკარიანის სავარაუდო ბედზე მსჯელობა ციხეში და ა.შ. 

რაც შეეხება მეორე საქმეს, ძალიან, ძალიან დიდი ალბათობით, ყოფილი ცოლის მკვლელობაში ბრალდებულ დეკანოიძეს, არაერთი წლის გატარება მოუწევს გისოსებს მიღმა და, რაღა თქმა უნდა, ისიც საინტერესოა, რა ელის მას ციხეში? 

შევეცდებით, მოგიყვეთ, ოფიციალური სასამართლოს შემდეგ, რა ბედი ელით ქალის მკვლელებსა და მოძალადეებს ციხის ე.წ. სასამართლოზე, სადაც მსაჯულებიც, პროკურორებიც, მოსამართლეებიც, ადვოკატებიცა და დამსწრე საზოგადოებაც მხოლოდ და მხოლოდ პატიმრებისგან შედგება. 

შესაძლოა, ვინმესთვის საოცარია... პარადოქსულია, მაგრამ ფაქტია, რომ ყველაზე ადვილად, ცოლის მკვლელობის გამართლებაა შესაძლებელი ანუ ღალატის სიკვდილით დასჯა კრიმინალურ სამყაროში უცხო არ არის და ამიტომ, ღალატისთვის ქალის მოკვლაც, პირიქით, მისასალმებელია. 

შესაბამისად, თუ ციხეში შედის პირი, რომელსაც სასჯელი ქალის მკვლელობისთვის მიუსაჯეს და ის ქალი ღალატისთვის მოკლა (არ აქვს მნიშვნელობა, ცოლია, შეყვარებულია, თუ მეგობარი გოგონა), ის პატიმრებისგან შევიწროებას არ განიცდის ანუ ერთი პატიმარიც არ ეტყვის, არასწორად მოიქეციო. 

შესაძლოა, გულში ვინმე სხვა რამეს ფიქრობდეს, მაგრამ ღალატისთვის მოკლული ქალის დაცვას ხმამაღლა ვერავინ გაბედავს. ციხეში მარტივადაა _ ყველა მოღალატე ქალი ბოზია და ტერმინი „ბოზებს სიკვდილი“, მარტივად მუშაობს. 

თუ უფრო დავკონკრეტდებით და სიღრმეებში წავალთ, უფრო საინტერესო დეტალებსაც გიამბობთ. მაგალთად, ცოლ-ქმარი დაშორდა, ორივეს თავისი ცხოვრება აქვს და ქმარყოფილმა გაიგო, რომ ცოლს სხვა კაცთან აქვს ურთიერთობა. აღიქმება თუ არა ეს ღალატად? რა თქმა უნდა, კი იმიტომ, რომ ის კაცი მისი კანონიერი ქმარი არ არის ანუ ქალი „ბოზობს“ და, მით უმეტეს, თუ შვილები ჰყავს, მაშინ ხომ საერთოდ, რა უნდა ისწავლონ შვილებმა ასეთი დედისგან. 

კრიმინალური თვალსაზრისით, ამასაც გამართლება აქვს და ციხეში ამის გამო პასუხს არავინ მოგთხოვთ. 

გამართლება აქვს დის მკვლელსაც კი, თუ და არ არის გათხოვილი და ისე აქვს ურთიერთობა სხვასთან. რა თქმა უნდა, ამას ვიღაც შეიძლება გაგებით მოეკიდოს, ვინმესთვის ჩვეულებრივი ამბავი იყოს, მაგრამ თუ ამ მიზეზით ანუ იმის გამო, რომ დას სექსი აქვს ქორწინების გარეშე და მისი მკვლელობისთვის ციხეში მოხვდით, კრიმინალური სამყაროსგან დამატებითი სასჯელი არ გელოდებათ. 

მოკლედ რომ ვთქვათ, ღალატის გამო ჩადენილი დანაშაული „ციხის კანონებით“ გეპატიებათ და არ აქვს მნიშვნელობა, რა დონის სისასტიკე გამოავლინეთ. მთავარია, შურისძიების ობიექტი მოღალატე პირი იყოს ანუ ის, ვინც ღალატობს, თორემ სხვისი დასჯა გაუმართლებლად ითვლება. 

ახლა, რაც შეეხება გაუპატიურებას, ამ მიმართულებით, საქმე ცოტა რთულადაა. დავიწყოთ იმით, რომ ქართულ სინამდვილეში, შესაძლოა, გაუპატიურება გამართლებული იყოს არამარტო ციხეში, არამედ თავისუფლებაზეც. სამწუხაროდ და საუბედუროდ, დღესაც ხდება (არცთუ იშვიათად), რომ ცოლად მოყვანის მიზნით, ბიჭი გოგოს იტაცებს. რა თქმა უნდა, ძირითადად ეს მაშინ ხდება, როცა გოგო თანახმა არაა და რადგან ცოლობაზე არ არის თანახმა, იქ სხვა რამეებიც შედის. მამაკაცმა კი მოტაცებული ქალი რომ შეინარჩუნოს, ცდილობს, მასთან სქესობრივი კონტაქტი დაამყაროს და ეს, ხშირ შემთხვევაში, ძალის გამოყენებით ხდება. 

შემდეგ, საქმეში ერევიან მშობლები, ახლობლები, მოტაცებული ქალი ბევრს არ უნდა სახლში და ასე „მარტივად“ იქმნება ახალი ოჯახი. აი, თუ ქალმაც „გაჭედა“ და მშობლებმაც, გოგო შინ მიჰყავთ, ბიჭი _ ციხეში მიდის. ჰოდა, ციხეში ამ „გაუპატიურებისთვის“, მას არავინ არაფერს ეტყვის, რადგან „კეთილშობილური მიზნები“ ამოძრავებდა _ ცოლის მოყვანა უნდოდა, მაგრამ არ გამოუვიდა, გოგომ და მისმა ოჯახმა „ვერ გაუგო“. 

ისიც ვთქვათ, რომ არცთუ იშვიათად, ყველაფერი ეს არასრულწლოვნებთან მიმართებაში ხდება და ამისთვის ცალკე სასჯელია. ასეულობით შემთხვევაა, რომ არასრულწლოვანი გოგო რჩება ბიჭთან, შემდეგ შვილს აჩენს და უკვე სამშობიარო სახლი რეკავს, რომ არასრულწლოვანმა ბავშვი გააჩინა, საქმეში პოლიცია ერთვება და სრულწლოვანობის ასაკს მიუღწეველთან სექსუალური კავშირის გამო, ბავშვის მამა ძირითადად, პირობით სასჯელს იღებს (2-დან 3 წლამდე) და სამშობირაო სახლიდან შვილთან ერთად, პირობითი სასჯელით დაჯილდოვებული ბრუნდება. 

აი, როცა ისე ხდება გაუპატიურება, ან თუნდაც გაუპატიურების მცდელობა, რომ არც ოჯახია კავშირში და არც „სხვა კეთილშობილური გრძნობა“, შეიძლება ითქვას, რომ „კრიმინალური სამყარო“ იმაზე დაუნდობელია, ვიდრე სახელმწიფო სასამართლო. ასეთ შემთხვევაში „ზონაზე“ შესულ პირს, ჯერ გვარიანი ცემა-ტყეპა არ ასცდება (როცა ვამბოთ „გვარიანს“, ეს გულისხმობს ცემას კბილების ჩამტვრევითა და ნეკნების დამტვრევით), შემდეგ კი, ნაცემი პატიმარი ციხის საავადმყოფოდან რომ გამოვა, „ზონაზე“ აღარ აბრუნებენ და პირდაპირ „საქათმეში“ მიჰყავთ. იქ მოძალადეს ახალი განსაცდელი ელის და მოუწევს საკუთარ თავზე გამოსცადოს, რას ნიშნავს გაუპატიურება და სრულად შეიგრძნოს, რას გრძნობდა მისი მსხვერპლი, როცა ის აუპატიურებდა _ რას ფიქრობდა, რას განიცდიდა... 

ასეთი პატიმარი ვერასოდეს მოიპოვებს ციხეში თანაგრძნობას და ჯერ არ ყოფილა შემთხვევა, ვინმესთვის ანალოგიური დანაშაული ეპატიებინათ. მედალს მეორე მხარეც აქვს _ ხომ შეიძლება, სასამართლო შეცდეს, ვინმემ ვინმეს უსამართლოდ დააბრალოს გაუპატიურება (და არა მცდელობა) და სწორედ გაუპატიურებისთვის, კონკრეტულ ადამიანს ტყუილად მიუსაჯონ სასჯელი? 

რა თქმა უნდა, ასეთი შემთხვევებიც ყოფილა, მაგრამ გასამართლებულს გარეთ თუ შიგნით მთელი ამბები აუტეხავს, ჩაურევია „კრიმინალური ავტორიტეტები“, ისინი თავდებად დადგომიან, ჩვენც ვიცით, რომ ტყუილიაო და გადარჩენილა, მაგრამ ასეთი რამ ძალიან, ძალიან იშვიათად ხდება. 

კიდევ ერთი საინტერესო ნიუანსი _ ორმაგად ისჯება ის, ვინც გაუპატიურებას მაშინ ჩაიდენს, როცა „საქმეზეა“. მაგალითად, რომელიმე ოჯახის საყაჩაღოდ შევიდნენ და იქ ვინმე გააუპატიურეს, ეს ნიშნავს, რომ, პრაქტიკულად, სასიკვდილო განაჩენს მოაწერეს ხელი. ასეთებს დანდობა არ აქვთ. 

დანდობა არ აქვთ მათაც, ვინც ბავშვებს გააუპატიურებს და... 

* * * 

იყო ერთი შემთხვევა, როცა წლების წინ, თბილისში, კონკრეტულად კი, ვარკეთილში, საყაჩაღოდ შევიდნენ. ოჯახმა წინააღდეგობა გაუწია, უფრო სწორად, ორმა ქალმა, რომლებიც ყაჩაღებს ბინაში დახვდნენ. ორივე მათგანი მოკლეს, წამოსვლისას კი ერთ-ერთის სხეულზე, ერთ-ერთმა ყაჩაღმა მოისაქმა. 

დამნაშავეები დააკავეს, გაასამართლეს და „ზონაზეც“ გაჯგიმულები შემოვიდნენ, რადგან თავისუფლებაზე რომ იყვნენ, ქურდულად ცხოვრობდნენ, იქ საერთოს წირავდნენ ფულს, იქ ქურდებთან იყვნენ კონტაქტზე. ჰოდა, ძალიან გაუკვირდათ, როცა „მაყურებლები“ ცოტა აგრესიულად დახვდნენ. 

„მაყურებლებმა“ „მარტივი“ კითხვა დასვეს _ რატომ მიაყენეს მკვდრებს შეურაცხყოფა? 

როცა საყაჩაღოდ მიდიხარ, იმისთვისაც მზად ხარ, რომ შეიძლება, ყველაფერი გეგმის მიხედვით არ წავიდეს, ყველაფერი ვერ გათვალო და დათვალო და ვიღაცა შემოგაკვდეს კიდეც, მაგრამ როცა მკვდარს ასეთ შეურაცხყოფას აყენებ, ასახსნელია. ვინაიდან ამის ახსნა, უბრალოდ, შეუძლებელი იყო, „მაყურებელმა“ ჩუმად ჩაილაპარაკა _ „საქათმეში“ და იქ დასრულდა ყაჩაღების „კაი ბიჭობა“ და კრიმინალური მომავალიც. 

რამდენად „სამართლიანია“ ყველაფერი ეს ძნელი ასახსნელია, მაგრამ მოძალადემ უნდა იცოდეს, რომ ძალადობისთვის, თავზე ხელს არავინ გადაუსვამს.

პატიმარი #0578

]]>
versiaprinti@yahoo.com (super admin) სამართალი Wed, 16 Oct 2019 13:41:33 +0400
„ერთეული შემთხვევები ვერ მიაყენებს ჩრდილს 40 000 პოლიციელს, რომელიც ღირსეულად ემსახურება ქვეყანას!“ http://www.versia.ge/2013-07-31-11-23-46/item/6373-„ერთეული-შემთხვევები-ვერ-მიაყენებს-ჩრდილს-40-000-პოლიციელს,-რომელიც-ღირსეულად-ემსახურება-ქვეყანას-“.html http://www.versia.ge/2013-07-31-11-23-46/item/6373-„ერთეული-შემთხვევები-ვერ-მიაყენებს-ჩრდილს-40-000-პოლიციელს,-რომელიც-ღირსეულად-ემსახურება-ქვეყანას-“.html

გიორგი გახარია მძიმე დანაშაულში ეჭვმიტანილი პოლიციის თანამშრომლების დაკავებას აფასებს

საქართველოს პრემიერ-მინისტრი გიორგი გახარია მთავრობის სხდომაზე პოლიციელთა სკანდალური დაკავების ფაქტს გამოეხმაურა და განაცხადა, რომ როდესაც დადასტურებულად იქნება ფაქტი, რომ სამართალდამცველი კოლეგების, მთლიანად სისტემის ინტერესების გათვალისწინების გარეშე ჩაიდენს დანაშაულს, მიდგომა იქნება აბსოლუტურად დაუნდობელი და შეურიგებელი. პრემიერ-მინისტრის თქმით, ვერასოდეს ვერავინ დააყენებს ათასობით კეთილსინდისიერი პოლიციელის ყოველდღიურ საქმიანობას და ღირსებას კითხვის ნიშნის ქვეშ.

„მინდა შევეხო ბოლო კვირის განმავლობაში მომხდარ შემთხვევას, როდესაც მძიმე დანაშაულში ეჭვმიტანილ 5 ადამიანს შორის ორი აღმოჩნდა პოლიციის თანამშრომელი. რა თქმა უნდა, ეს არის უაღრესად მძიმე აღსაქმელი, მძიმე შედეგი, მაგრამ ჩვენ ასევე უნდა გავითვალისწინოთ ერთი რამ, რომ ერთეული შემთხვევები ვერცერთ შემთხვევაში მიაყენებს ჩრდილს 40 000 ადამიანს, რომელიც ღირსეულად ემსახურება ამ ქვეყანას და თავისი სიცოცხლის რისკის ქვეშ დაყენების ფასად იცავს თითოეული ჩვენი მოქალაქის ჯანმრთელობას, საკუთრებას და მის ღირსებას. 

ასევე უნდა გვესმოდეს ისიც, რომ მაშინ როდესაც დადასტურებულად გვექნება ფაქტი, რომ სამართალდამცველი თავისი კოლეგების, მთლიანად სისტემის ინტერების გათვალისწინების გარეშე ჩადის დანაშაულს, ჩვენ ბევრად უფრო მკაცრები ვიქნებით და ჩვენი მიდგომა აქ იქნება აბსოლუტურად დაუნდობელი და შეურიგებელი. რამეთუ, ვერასოდეს ვერავინ დააყენებს ათასობით პოლიციელის, კეთილსინდისიერი პოლიციელის ყოველდღიურ საქმიანობას და ღირსებას კითხვის ნიშნის ქვეშ ერთეული შემთხვევების გამო. 

თუმცა, რა თქმა უნდა, ჩვენ ამ ერთეულ შემთხვევებსაც არ უნდა შევურიგდეთ და სწორედ ამიტომ არის შინაგან საქმეთა სამინისტროში დაწყებული ის რეფორმები, რომელსაც ჰქვია სისტემური განახლება და სწორედ ამიტომ არის აუცილებელი, რომ ჩვენ ფასეულობების დონეზე, ჩვენს პოლიციაში შევცვალოთ როგორც მიდგომები, მათი ფუნქციების, მოვალეობის და ქვეყნის წინაშე ვალდებულებების ნაწილში, ასევე მათი ყოველდღიური შრომის ეფექტურობის ზრდის თვალსაზრისითაც“, - განაცხადა გიორგი გახარიამ.

]]>
versiaprinti@yahoo.com (super admin) სამართალი Thu, 10 Oct 2019 12:28:35 +0400
დიდი „რაზბორკები“ კრიმინალურ სამყაროში http://www.versia.ge/2013-07-31-11-23-46/item/6366-დიდი-„რაზბორკები“-კრიმინალურ-სამყაროში.html http://www.versia.ge/2013-07-31-11-23-46/item/6366-დიდი-„რაზბორკები“-კრიმინალურ-სამყაროში.html

როგორ შეიწყალა ლუკაშენკომ ქართველი „კანონიერი ქურდი“ და რა საფრთხის წინაშე დგას კალაშოვის „სასტავი“

წინა კვირას, ერთ-ერთი ყველაზე ცნობილი „კრიმინალური ავტორიტეტი“, მევლუდ ჭიჭიაშვილი, უკრაინელმა სამართალდამცავებმა სპეცოპერაციის დროს მოკლეს, თუმცა ჭიჭიაშვილის მისამართით „კრიმინალური ავტორიტეტის“ თქმა ცოტა უცნაურია, რადგან ის, უბრალოდ, იყო ადამიანი, რომელიც ყოველთვის მარტო მოქმედებდა და ანგარიშს მხოლოდ საკუთარ თავს უწევდა. ასეთ ადამიანებზე ამბობენ ხოლმე, მათი ქურდებსაც ეშინიათო. ვერ გეტყვით, რამდენად ეშინოდათ ჭიჭიაშვილის ქურდებს, მაგრამ მას რომ ანგარიშს უწევდნენ, ფაქტია. ის არასდროს მონაწილეობდა კრიმინალურ გარჩევებში, თუმცა მის სახელს არაერთი გახმაურებული საქმე უკავშირდება. დარწმუნებით შეიძლება ითქვას, რომ მისი გარდაცვალების შემდეგ, ჭიჭიაშვილს კიდევ ბევრ ისეთ საქმეს მიაწერენ და შეაწმენდენ ხელს, რომელიც არ ჩაუდენია. 

მოკლული ჭიჭიაშვილი კი იმიტომ გავიხსენეთ, რომ დაახლოებით, ანალოგიურ სიტუაციაშია ნადირ სალიფოვი, იგივე „გულიც“. ორი წელიც არაა გასული, რაც სალიფოვი ციხიდან გათავისუფლდა და ამ ხნის განმავლობაში იმდენი მოახერხა, რომ კრიმინალური სამყაროს „ნათლიმამად“ იქცა. მართალია, „გული“ „კანონიერი ქურდის“ სტატუსით სარგებლობს, მაგრამ დასამალი არაა, რომ მისი არაერთ ქურდს ეშინია. სწორედ რომ ეშინია, რადგან თავისი გავლენის სფერო სალიფოვს, არაერთმა ქურდმა უბრძოლველად გადაულოცა და თუ უცხოურ მედიას ვენდობით, მისი ქონება უკვე მილიარდს აჭარბებს. 

რა თქმა უნდა, ეს ამბავი ბევრმა ვერ აიტანა და, პირველ რიგში, შაქრო კალაშოვმა, რომელიც რუსმა სამართალდამცავებმა ხანგრძლივი ვადით გამოკეტეს ციხეში და ახლა კალაშოვი იქიდან ცდილობს სიტუაციის გაკონტროლებას, თუმცა ბერკეტები ნელ-ნელა ხელიდან ეცლება. ჯერ იყო და, მის მიერ დაწესებული აკრძალვა, „კანონიერ ქურდად“ აღარავინ ვაკურთხოთ, ჯერ იმაში გავერკვეთ, ჩვენს „ოჯახში“ მართლა ქურდი ვინ არისო, რამდენჯერმე უკვე დაირღვა და რაც მთავარია, დაირღვა მისი დაპატიმრების შემდეგ. ეს პირველი ნიშანია, რომ შაქროს ანგარიშს ბოლომდე აღარ უწევენ. ყველაზე ნათლად კი, კალაშოვისადმი უპატივცემულობა გასულ კვირას გამოჩნდა. ამ თემაზე, თურქეთში მცხოვრები ქართველი კრიმინალი გვესაუბრა. 

„კალაშოვის უახლოესი მეგობარი ბადრი კოღუაშვილია, „კანონიერი ქურდი“, რომელსაც „გული“ ერჩის. სწორედ „გულის“ გამო, კოღუაშვილს არაერთმა ქურდმა აქცია ზურგი და კალაშოვმაც ციხიდან შემოთვალა, „სხადნიაკი“ გააკეთეთ და იქ იმსჯელეთო, მაგრამ ამ საქმიდან ჯერჯერობით არაფერი გამოვიდა. 

საქმე ისაა, რომ „სხადნიაკზე“ აუცილებლად უნდა იყოს „გულიც“, მაგრამ ის დუბაიდან გამოსვლას არ აპირებს. როცა თურქეთის პოლიციამ დაკავებული სალიფოვი გაუშვა და რუსეთს არ გადასცა, მისგან გარანტიაც მიიღო, რომ თურქეთში აღარ დაბრუნდება. იყო საბერძნეთის ვარიანტიც, მაგრამ „გულიმ“ პირდაპირ თქვა, რომ საბერძნეთში ჩასვლა არ სურს, რადგან კოღუაშვილს იქაურ სამართალდამცავებთან კარგი ურთიერთობა აქვს და არ არის დარწმუნებული, რომ არ დაიჭერენ. ეს, ყველაფერთან ერთად, ცალკე ბრალდებაა ბადრისადმი, რადგან „გულიმ“ ის, პრაქტიკულად, დაადანაშაულა, რომ პოლიციასთან არის შეკრული. თავის მხრივ, „გული“ ყველას დუბაიში ეპატიჟება, მაგრამ იქ კოღუაშვილი არ მიდის, რადგან არ არის დარწმუნებული, რომ სადმე ქილერის ტყვია არ დაეწევა“, _ გვეუბნება თურქეთში მცხოვრები ქართველი კრიმინალი. 

მისივე თქმით, რამდენიმე დღის წინ, კოღუაშვილი თურქეთში იმყოფებოდა და ქვეყნის „მთავარ კრიმინალს“, სედატ პეკერს შეხვდა. როგორც გვიყვებიან, შეხვედრაზე კოღუაშვილმა პეკერს პირდაპირ უთხრა, როგორმე „გული“ თურქეთში ჩამოიყვანეო, რაზეც კატეგორიული უარი მიიღო. უფრო მეტიც, პეკერმა „გულის“ დაურეკა და შეხვედრის დეტალები უამბო. როგორც ჩანს, იქ ითქვა ისეთი რამ, რაზეც სალიფოვი ძალიან გაბრაზდა და თავისი გარემოცვის სამი წევრი, დუბაიდან თურქეთში, სასწრაფო წესით გაამგზავრა ბადრისთან „დასალაპარაკებლად“. 

კოღუაშვილი მიხვდა, რომ მათთან საუბარი „საინტერესო“ არ იქნებოდა და ამიტომ, მაშინ, როცა დუბაიდან წამოსული თვითმფრინავი სტამბოლში დაეშვა, სტამბოლიდან ჩეხეთის მიმართულებით აფრენილ ლაინერს კოღუაშვილი გაჰყვა. 

ყველაფერ ამის პარალელურად, ბელორუსში უპრეცედენტო რამ მოხდა: ქვეყნის ფაშიზმისგან გათავისუფლების 75-ე წლისთავის აღსანიშნავად, ალექსანდრ ლუკაშენკომ 2 000 პატიმარი შეიწყალა. ძირითადად ისინი, რომლებიც წვრილმან დანაშაულზე იხდიდნენ სასჯელს და რომლებზეც ციხის ადმინისტრაციამ დადებითი რეკომენდაცია გასცა. შეწყალებულთა შორის, ყველასთვის მოულოდნელად, მოხვდა გელა ქარდავაც, „კანონიერი ქურდი“, რომელიც 20 თვის წინ, ბელორუსის პოლიციამ ზარ-ზეიმით დააკავა და სამწლიანი ციხეც მიუსაჯა ანუ ქარდავას 16 თვე ჰქონდა დარჩენილი, მაგრამ შეწყალებულთა სიაში მოხვდა. როგორც ბელორუსული მედია წერს, ეს არის პირველი შემთხვევა, როცა პრეზიდენტმა „კრიმინალური სამყაროს“ უმაღლეს საფეხურზე მდგომი პირი ანუ „კანონიერი ქურდი“ შეიწყალა. სავარაუდოდ, ლუკაშენკოს არ უთხრეს, ვის იწყალებდა და ძალიან დიდი ალბათობით, ამ საქმეში ვიღაცებმა დიდი ფულიც აიღეს. სანამ ხმაური ატყდებოდა, ქარდავა თურქეთში გაფრინდა. 

ყველაფერი ეს საინტერესო იმიტომ არის, რომ ქარდავა ერთ-ერთ გავლენიან ქურდად ითვლება და მის მხარეს არაერთი ათეული „კანონიერი ქურდი“ იჭერს. საგულისხმოა ისიც, რომ ქარდავამ ჯერ 2002 წელს გამოთქვა პრეტენზია კოღუაშვილის მიმართ და მისთვის სტატუსის შეჩერება მოახერხა, მერე კი იგივე 2015 წელს გააკეთა. მაშინ დიდი ამბები ატყდა და სიტუაცია კალაშოვმა განმუხტა -„სხადნიაკი“ მოვიწვიოთ და ყველაფერი იქ განვიხილოთო. „სხადნიაკი“ დროში გაიწელა, მერე ქარდავაც დაიჭირეს, კალაშოვიც და ამ ამბავმაც გაურკვეველი ვადით გადაიწია, მაგრამ ახლა მთავარი მოქმედი პირები ანუ ქარდავა და კოღუაშვილი თავისუფლებაზე არიან და „სხადნიაკის“ მოწვევას ხელს არაფერი უშლის, თუმცა ყველაფერი ასე მარტივად არაა. 

„სხადნიაკის“ მოწვევას გეგმავს ტარიელ ონიანიც. მოგეხსენებათ, მისი ციხეში ყოფნის დროს, გავრცელდა „მალიავა“, რომელსაც არაერთი „კანონიერი ქურდი“ აწერდა ხელს და რომელშიც მითითებული იყო, რომ ონიანს სტატუსი შეუჩერდა. ტაროს სწორედ ამ ადამიანებთან სურს გასაუბრება და უნდა მოისმინოს, რის საფუძველზე მოაწერეს მათ ხელი აღნიშნულ წერილს. 

როგორც ვარაუდობენ, ყველა ხელისმომწერი ბოდიშს მოიხდის და ტარიელიც მათ „დიდსულოვნად“ აპატიებს. ჰოდა, თუ იმავე „სხადნიაკზე“ ქარდავასა და კოღუაშვილის საქმეც გაირჩევა, დიდი ამბები იქნება. ონიანის დაჭერის შემდეგ, ერთ-ერთი პირველი, ვინც მისი გავლენის სფეროებზე პრეტენზია განაცხადა, სწორედ ქარდავა იყო ანუ ტარიელს მასთან კარგი ურთიერთობა არ აქვს. 

მეორე საკითხია ის, რომ ქარდავას პრეტენზია აქვს, არცთუ მცირერიცხოვანი, მეგრელი „კანონიერი ქურდების“ ლიდერად ითვლებოდეს, რაზეც პრეტენზია ონიანის უახლოეს მეგობარს, მერაბ ჯანგველაძესაც გააჩნია, ამიტომ ქარდავას ერთადერთი გზა რჩება -„გულის“ უნდა შეეკრას და მისი მხარდაჭერა მოიპოვოს. სხვა საკითხია, რამდენად აწყობს თავად „გულის“ ეს ამბავი, რადგან მან კარგად იცის, რომ ონიანის გათავისუფლებით, მისი ტახტრევანი ისედაც გვარიანად შეირყევა და სალიფოვს არ სურს, ონიანთან თავიდანვე ომში ჩაებას, ამიტომ ქარდავას ძალიან გაუჭირდება მისი მხარდაჭერის მოპოვება. 

ეგ კი არა და, ერთ-ერთი პირველი, ვინც გათავისუფლებულ ონიანს უმასპინძლებს, სწორედ სალიფოვი იქნება. სხვა საკითხია, რამდენად მოინდომებს თავად ტარიელი ამ მასპინძლობის მიღებას, რადგან მან ზუსტად იცის, რომ თავისუფლებაზე გამოსვლით, არაერთ ადამიანს დაუფრთხობს ძილს და სიფრთხილე მართებს. ჯერჯერობით ერთადერთი, ვისაც ტარო ბოლომდე ენდობა, მერაბ ჯანგველაძეა და ონიანიც თავიდან, სწორედ მასთან ერთად იქნება. 

ასეა თუ ისე, „კრიმინალურ სამყაროში“ დიდი გადანაწილება რომ იწყება, ფაქტია, თუმცა ვარაუდობენ, რომ ეს ყველაფერი უსისხლოდ არ ჩაივლის. ვერ გეტყვით, ბოლოს როდის იყო, ქურდები ერთმანეთს იმ დონეზე აღარ ენდობოდნენ, რომ „სხადნიაკზე“ მისვლას ერიდებოდნენ, რადგან „ქურდული კარაბადინის“ მიხედვით, „სხადნიაკზე“ მისვლისგან თავის შეკავება, დანაშაულის პირდაპირი აღიარებაა, თუმცა როგორც ჩანს, დაუწერელ კანონებში, რაღაც ისევ დაუწერლად შეიცვალა. 

ჰოდა, სწორედ იმ შემთხვევასთან გვაქვს საქმე, თავში რომ ვახსენეთ -ჭიჭიაშვილი არ იყო ქურდი, მაგრამ მისი ყველას ეშინოდა. ახლა კი, ქურდები არიან და... ერთმანეთის ეშინიათ და დაუწერელ კანონებზე მეტად, საკუთარი სიცოცხლის გადარჩენაზე უფრო ფიქრობენ, ზემდეტად ფრთხილობენ და მათი დაცვაც იმ ოდენობის და შეიარაღებისაა, პრეზიდენტებს შეშურდებათ.

ბათო ჯაფარიძე

]]>
versiaprinti@yahoo.com (super admin) სამართალი Wed, 09 Oct 2019 13:10:19 +0400
სკანდალი: სახელმწიფო აუდიტი პროკურატურას 33 სახელმწიფო უწყებაზე გამოძიების დაწყებას სთხოვს http://www.versia.ge/2013-07-31-11-23-46/item/6365-სკანდალი-სახელმწიფო-აუდიტი-პროკურატურას-33-სახელმწიფო-უწყებაზე-გამოძიების-დაწყებას-სთხოვს.html http://www.versia.ge/2013-07-31-11-23-46/item/6365-სკანდალი-სახელმწიფო-აუდიტი-პროკურატურას-33-სახელმწიფო-უწყებაზე-გამოძიების-დაწყებას-სთხოვს.html

კორუფცია და ფინანსური გაფლანგვები _ რომელ უწყებებზე აღიძვრება სისხლის სამართლის საქმეები

2 ოქტომბერს, სახელმწიფო აუდიტის სამსახურის უფროსმა ერეკლე მექვაბიშვილმა, პარლამენტს 2018 წლის საქმიანობის ანგარიში წარუდგინა. ვრცელი, 112-გვერდიანი ანგარიშის მოკლე რეზიუმე ასეთია: შარშან, სახელმწიფო აუდიტის სამსახურმა აუდიტის 90 ანგარიში მოამზადა, აქედან 25 _ ფინანსური, 53 _ შესაბამისობისა და 12 ეფექტიანობის აუდიტი იყო. მათი აბსოლუტური უმრავლესობა ,,ვერსიაში'' დეტალურად განვიხილეთ. რაც შეეხება უწყების ბიუჯეტს, 2018 წლის ბიუჯეტიდან, სახელმწიფო აუდიტის სამსახურს 14 500 000 ლარი გამოუყვეს, რომლის 88% უწყების თანამშრომელთა შრომის ანაზღაურებაზე გაიხარჯა. ყველაზე მნიშვნელოვანი ისაა, რომ 2018 წელს, სამართალდამცავ ორგანოებში ერეკლე მექვაბიშვილის უწყებამ 33 ანგარიში გადააგზავნა, საიდანაც 23 _ საქართველოს სხვადასხვა მუნიციპალიტეტებში გამოვლენილ დარღვევებს ეხებოდა.

ფინანსური აუდიტის შედეგები 

2018 წელს, სახელმწიფო აუდიტის სამსახურმა ფინანსური აუდიტის 25 ანგარიში გამოაქვეყნა. სამწუხაროდ, საბიუჯეტო ორგანიზაციებში, ინფორმაციის აღრიცხვა-ანგარიშგების მხრივ, სისტემური ხარვეზები ფიქსირდება. კერძოდ, ამა თუ იმ საბიუჯეტო ორგანიზაციაში, ხანდაზმული და გაურკვეველი წარმოშობის დებიტორულ/კრედიტორული დავალიანებები; აქტივების აღრიცხვა/შეფასება; გამართული და რეგულარული ინვენტარიზაციის ჩატარება _ მთავარ გამოწვევად რჩება და დარღვევებიც ამ ნაწილში გვხვდება. 

კერძოდ, საქართველოს თავდაცვის სამინისტროს აპარატის 2017 წლის ფინანსურ აუდიტში აღნიშნულია, რომ 1997-2008 წლებიდან, უწყების ბალანსზე ირიცხება 193 მილიონი ლარის დებიტორული დავალიანება, რომლის მნიშვნელოვანი ნაწილი საინვენტარიზაციო კომისიის მიერ სათანადო შესწავლის შემდეგ, სავარაუდოდ, ჩამოწერას დაექვემდებარება. 

საქართველოს სასჯელაღსრულებისა და პრობაციის სამინისტროს 2017 წლის ფინანსური აუდიტის მიხედვით, სამინისტროს ბალანსზე 2004-2010 წლებიდან, 5 300 000 ლარის ლარის ღირებულების დებიტორული დავალიანება ირიცხება, რომლის მნიშვნელოვანი ნაწილი საინვენტარიზაციო კომისიის მიერ სათანადო შესწავლის შემდეგ, სავარაუდოდ, ჩამოწერას დაექვემდებარება. 

ცენტრალური საარჩევნო კომისიის (ცესკო) 2017 წლის ფინანსური ანგარიშგების აუდიტის მიხედვით, 1996-2003 წლებიდან, ცესკოს ფინანსურ ანგარიშგებაში 3 მილიონი ლარის ღირებულების კრედიტორული დავალიანება ირიცხება, რომლის მაიდენტიფიცირებელი პირველადი დოკუმენტაცია ცესკოში არ იძებნება. შესაბამისად, საინვენტარიზაციო კომისიის მიერ სათანადო შესწავლის შემდეგ, ეს დავალიანებაც ჩამოიწერება. 

საქართველოს ეკონომიკისა და მდგრადი განვითარების სამინისტროს 2017 წლის ფინანსური აუდიტის მიხედვით, ამ უწყების კონსოლიდირებულ ფინანსურ ანგარიშგებაში, 1997-2007 წლებიდან, 1 მილიონი ლარის ღირებულების კრედიტორული დავალიანება ირიცხება, რომლის მაიდენტიფიცირებელი პირველადი დოკუმენტაცია სამინისტროში არ იძებნება. შესაბამისად, საინვენტარიზაციო კომისიის მიერ სათანადო შესწავლის შემდეგ, ეს დავალიანებაც ჩამოიწერება. 

ამავე სამინისტროს საჯარო სამართლის იურიდიული პირის (სსიპ) „აწარმოე საქართველოში“ ფინანსურ ანგარიშგებაში, მოთხოვნების მუხლში არ არის ასახული 315 000 ლარის ოდენობის მოთხოვნა 46 ბენეფიციარის მიმართ, რომლებმაც არ შეასრულეს ხელშეკრულების პირობები და მათზე გაცემული თანხები სახელმწიფო ბიუჯეტში უნდა დაბრუნდეს! 

შესაბამისობის აუდიტები 

2018 წელს, სახელმწიფო აუდიტის სამსახურმა შესაბამისობის აუდიტის 53 ანგარიში გამოაქვეყნა. ცხადია, ხარვეზები ამ ანგარიშებშიც გვხვდება, კერძოდ, 2017 წელს, სსიპ ვეტერანების საქმეთა სახელმწიფო სამსახურმა, სამშენებლო სამუშაოების შესყიდვის მიზნით გამოცხადებულ ტენდერში, სავარაუდო ღირებულებით _ 1 200 000 ლარი, სამუშაოთა დასრულების ვადად 90 დღე და არანაკლებ _ 7 მილიონი ლარის შესრულებული სამუშაოების გამოცდილების მოთხოვნა განსაზღვრა. ტენდერში მხოლოდ ერთი პრეტენდენტი მონაწილეობდა, რომელთანაც 1 200 000 ლარზე, ხელშეკრულება გაფორმდა, სამუშაოები კი 170 დღეში დასრულდა. სამსახურის მიერ საკვალიფიკაციო მოთხოვნების სწორად განსაზღვრის შემთხვევაში, შესაძლოა, ამ ტენდერში სხვა პრეტენდენტებსაც მიეღოთ მონაწილეობა და შესყიდვა შედარებით ეკონომიურად განხორციელებულიყო. 

სსიპ შოთა რუსთაველის თეატრისა და კინოს სახელმწიფო უნივერსიტეტის მიერ განხორციელებული ხარჯვითი და არაფინანსური აქტივებით ოპერაციების 2015-2017 წლების შესაბამიბოსის აუდიტის მიხედვით, უნივერსიტეტმა დიმიტრი ალექსიძის სახელობის სასწავლო თეატრის მოწყობისა და აღჭურვის სამუშაოების შესასყიდად, ელექტრონული ტენდერი გამოაცხადა. სატენდერო დოკუმენტაციით, პრეტენდენტების სამუშაო გამოცდილების მიმართ განისაზღვრა არაპროპორციული საკვალიფიკაციო მოთხოვნები; სატენდერო კომისიამ არასამართლიანად მისცა უმცირესი ფასის მქონე პრეტენდენტს დისკვალიფიკაცია; შესყიდვის პროცესის სხვადასხვა ეტაპზე სატენდერო კომისიაში ექსპერტის სახით მოწვეულ პირს წარმოეშვა ინტერესთა კონფლიქტი. სატენდერო დოკუმენტაციით, არაპროპორციულმა, ერთ კონკრეტულ კომპანიაზე მორგების რისკის შემცველმა საკვალიფიკაციო მოთხოვნამ და პრეტენდენტის არასამართლიანმა დისკვალიფიკაციამ განაპირობა სატენდერო პროცედურებში მაღალი ფასის წინადადების მქონე კომპანიის გამარჯვება. 

შპს ,,საქართველოს აეროპორტების გაერთიანების'' 2017 წლის შესაბამისობის აუდიტის მიხედვით, ქუთაისის საერთაშორისო აეროპორტში მგზავრთა სახმელეთო ტრანსპორტირებაზე გამოცხადებულ აუქციონთან დაკავშირებით, შესაბამის ვებგვერდზე არ იყო გამოქვეყნებული აუქციონის დეტალური პირობები, რითაც დაირღვა აუქციონის ჩატარების მნიშვნელოვანი პრინციპები _ საჯაროობა და გამჭვირვალობა. კომპანია, რომელიც აუქციონში გამარჯვებულად გამოცხადდა, ვერ აკმაყოფილებდა აუქციონის პირობას, რადგან არ ჰქონდა მუშაობის, მინიმუმ, ორწლიანი გამოცდილება. ამასთან, ხელშეკრულებით განსაზღვრული 7 მიმართულებიდან, კომპანია ასრულებდა მხოლოდ 3 მიმართულებას _ თბილისის, ბათუმისა და ქუთაისის მიმართულებებით, ხოლო მგზავრები გუდაურიდან, ბაკურიანიდან, მესტიიდან და ზუგდიდიდან _ ქუთაისში და შემდეგ პირიქით, არ გადაჰყავდა. შესაბამისად, როგორც საქართველოს მოსახლეობისთვის, ასევე ტურ-ისტებისთვის ქუთაისის საერთაშორისო აეროპორტამდე ან/და დანიშნულების ადგილამდე ტრანსპორტირება გართულებული იყო. ხელშეკრულების სხვა პირობების, კერძოდ, ინფორმაციის წარდგენასა და საფასურის გადახდაზე ხელშეკრულებით დადგენილი ვადების დარღვევის მიუხედავად, შპს „საქართველოს აეროპორტების გაერთიანება'', კომპანიას არ არიცხავდა პირგასამტეხლოს _ 171 500 ლარის ოდენობით. 

შპს „საქართველოს ფოსტის'' 2017 წლის შესაბამისობის აუდიტის მიხედვით, ,,სახელმწიფო შესყიდვების შესახებ'' საქართველოს კანონის მოთხოვნების მიუხედავად, სახელმწიფო შესყიდვების წლიური გეგმის მომზადებისას, კომპანიაში სათანადოდ არ იყო გათვალისწინებული შესყიდვის განხორციელების აუცილებლობა, მისაწოდებელი საქონლის რაოდენობა, შესასრულებელი სამუშაოს ან გასაწევი მომსახურების მოცულობა. ამას ის ფაქტიც მოწმობს, რომ 2017 წლის გეგმა 76-ჯერ შეიცვალა. გარდა ამისა, გეგმა საბოლოოდ დაზუსტდა 2017 წლის 21 დეკემბერს და ითვალისწინებდა 18 400 000 ლარის ღირებულების შესყიდვების განხორციელებას, თუმცა ფაქტობრივმა ხარჯმა 11 800 000 ლარი ანუ 64% შეადგინა. 

რაც შეეხება საქართველოს სხვადასხვა მუნიციპალიტეტების შესაბამისობის აუდიტებს, 2018 წლის აუდიტის ანგარიშის მიხედვით, საკმაოდ სერიოზული დარღვევები გამოვლინდა ბათუმის, ხულოს, ხელვაჩაურის, ფოთის, ლენტეხის, სამტრედიის, ონის, წალენჯიხის, ხობის, ცაგერის, რუსთავის, კასპის, თიანეთის, ბაღდათის, საგარეჯოს, აბაშის, ჩოხატაურის, ოზურგეთის, ქობულეთისა და ჭიათურის მუნიციპალიტეტებში. 

პროკურატურაში გადაგზავნილი 33 ანგარიში 

2018 წელს, სახელმწიფო აუდიტის სამსახურმა პროკურატურაში, ფინანსური და შესაბამისობის აუდიტის 33 ანგარიში გადააგზავნა. ,,ვერსიაში'' ეს ანგარიშები დეტალურად განვიხილეთ, თუმცა აღსანიშნავი ისაა, რომ ამ 33 ანგარიშიდან 23 _ საქართველოს სხვადასხვა მუნიციპალიტეტებში გამოვლენილ დარღვევებს ეხება. კანონის მიხედვით, თუ სახელმწიფო აუდიტის დასკვნაში კორუფციის, თაღლითობისა და სისხლის სამართლის სხვა ტიპის დანაშაულებრივი ნიშნები იკვეთება, რაც სახელმწიფო აუდიტორის კომპეტენციის ფარგლებს სცდება, შემდგომი რეაგირების მიზნით, სამართალდამცავ სტრუქტურაში იგზავნება. ამის შემდეგ, პროკურატურამ დეტალურად უნდა განიხილოს ანგარიში, ხოლო სისხლის სამართლის დანაშაულის შემცველ ფაქტზე შესაბამისი რეაგირება განახორციელოს. 

ფაქტია, რომ შარშან, სახელმწიფო აუდიტის სამსახურმა პროკურატურას 33 ანგარიში გადაუგზავნა, სამართალდამცავი სტრუქტურის რეაგირება კი ჯერ არსად ჩანს. სახელმწიფო აუდიტის სამსახურს, რომელიც ძლიერი და დამოუკიდებელი სტრუქტურაა, ზედამხედველობას საქართველოს პარლამენტი უწევს. შესაბამისად, დეპუტატები კარგად უნდა იცნობდნენ იმ 90-ვე ანგარიშს, რომელიც ამ უწყებამ გასულ წელს გამოაქვეყნა. მეტიც, კანონმდებლებმა ისიც კარგად უნდა იცოდნენ, რომ პროკურატურაში გადაგზავნილ აუდიტის დასკვნებს დროული რეაგირება სჭირდება. ამიტომ, ერეკლე მექვაბიშვილის ანგარიშის მოსმენის შემდეგ, გაცილებით სამართლიანი იქნება, თუ პარლამენტში მთავარ პროკურორს დაიბარებენ. წინააღმდეგ შემთხვევაში, ისეთი შტაბეჭდილება რჩება, თითქოს პროკურატურას ,,აწყობს'' კიდეც, რეაგირების გარეშე, თაროზე შემოდებული 33 ანგარიში, რადგან თუკი ამ ანგარიშებში რომელიმე მუნიციპალიტეტის ხელმძღვანელის ბრალეულობა იკვეთება, პასუხს ამ დანაშაულზე, დაახლოებით, 10-12 წლის შემდეგ იმის მიხედვით მოსთხოვენ, გადაწყვეტს თუ არა ოპოზიციაში წასვლას, ან პარტიის შექმნას. დიახ, სწორედ ისე, როგორც მამუკა ხაზარაძესა და ბადრი ჯაფარიძეს მოექცნენ, რომლებსაც ზუსტად 11 წლის წინ, თიბისი ბანკში განხორციელებული უკანონო ტრანზაქციის დამადასტურებელი დოკუმენტი შარშან აუფრიალეს და პროკურატურაში დაიბარეს... 

ახლა კი იმ 33 ანგარიშის ჩამონათვალს გავეცნოთ, რაც 2018 წელს, სახელმწიფო აუდიტის სამსახურმა პროკურატურას გადაუგზავნა: ბათუმის მუნიციპალიტეტის მერიის 2016 წლის ფინანსური ანგარიშგების აუდიტი; საქართველოს თავდაცვის სამინისტროს 2017 წლის ფინანსური აუდიტი; საქართველოს შინაგან საქმეთა სამინისტროს მმართველობაში მოქმედი საჯარო სამართლის იურიდიული პირის დაცვის პოლიციის დეპარტამენტის მიერ განხორციელებული სახელმწიფო შესყიდვების 2017 წლის შესაბამისობის აუდიტი; საქართველოს ფინანსთა სამინისტროს მმართველობის სფეროში შემავალი სსიპ შემოსავლების სამსახურის 2014-2015 წლების შესაბამისობის აუდიტი; სსიპ – საჯარო რეესტრისა და სერვისების განვითარების სააგენტოს მიერ საკუთარი შემოსავლების განკარგვის 2015-2016 წლების შესაბამისობის აუდიტი; საქართველოს საგარეო საქმეთა სამინისტროს 2017 წლის კონსოლიდირებული ფინანსური ანგარიშგების აუდიტი; საქართველოს რეგიონული განვითარებისა და ინფრასტრუქტურის სამინისტროს ფინანსური აუდიტი; 2015-2016 წლებში ქ. თბილისის მუნიციპალიტეტის „გამწვანების ღონისძიებების“ პროგრამის ფარგლებში გაწეული ხარჯების შესაბამისობის აუდიტი; 2015-2016 წლებში ქ. თბილისის მუნიციპალიტეტის საკუთრებაში არსებული უძრავი ქონების მართვისა და განკარგვის შესაბამისობის აუდიტი; აბაშის მუნიციპალიტეტის 2016-2017 წლების ბიუჯეტებით გათვალისწინებული პროგრ-ამების შესაბამისობის აუდიტი; ადიგენის მუნიციპალიტეტის 2016 წლის ფინანსური ანგარიშგების ფინანსური აუდიტი და 2015-2016 წლებში წარმომადგენლობითი და აღმასრულებებლი ორგანოების დაფინანსების და ინფრასტრუქტურის მშენებლობა, რეაბილიტაცია და ექსპლოატაციის პროგრამების შესაბამისობისაუდიტი; ახალქალაქის მუნიციპალიტეტის 2016 წლის ფინანსური ანგარიშგების ფინანსური აუდიტის და 2015-2016 წლებში „წარმომადგენლობითი და აღმასრულებელი ორგანოების დაფინანსების“, „ინფრასტრუქტურის მშენებლობის, რეაბილიტაციის და ექსპლოატაციის“ პროგრამების ფარგლებში გაწეული ხარჯების შესაბამისობის აუდიტი; ახალციხის მუნიციპალიტეტის 2016 წლის ფინანსური ანგარიშგების აუდიტი და 2015-2016 წლებში „წარმომადგენლობითი და აღმასრულებელი ორგანოების დაფინანსების“ და „ინფრასტრუქტურის მშენებლობის, რეაბილიტაციისა და ექსპლოატაციის” პროგრამების ფარგლებში გაწეული ხარჯების შესაბამისობის აუდიტი; ბოლნისის მუნიციპალიტეტის 2016-2017 წლების ბიუჯეტით გათვალისწინებული პროგრამების შესაბამისობის აუდიტი; გარდაბნის მუნიციპალიტეტის 2016 წლის ფინანსური ანგარიშგების აუდიტი და 2015-2016 წლებში „წარმომადგენლობითი და აღმასრულებელი ორგანოების დაფინანსების“ და „ინფრასტრუქტურის მშენებლობის, რეაბილიტაციის და ექსპლოატაციის” პროგრამების ფარგლებში გაწეული ხარჯებისა და მუნიციპალიტეტის საკუთრებაში არსებული ქონების მართვისა და განკარგვის შესაბამისობის აუდიტი; გურჯაანის მუნიციპალიტეტის 2016 წლის ფინანსური ანგარიშგების აუდიტი და 2015-2016 წლებში „წარმომადგენლობითი და აღმასრულებელი ორგანოების დაფინანსების“ და „ინფრასტრუქტურის მშენებლობის, რეაბილიტაციისა და ექსპლოატაციის“ პროგრამების ფარგლებში გაწეული ხარჯების შესაბამისობის აუდიტი; დედოფლისწყაროს მუნიციპალიტეტის 2016 წლის ფინანსური ანგარიშგების აუდიტი და 2015-2016 წლებში „წარმომადგენლობითი და აღმასრულებელი ორგანოების დაფინანსების“ და „ინფრასტრუქტურის მშენებლობის, რეაბილიტაციის და ექსპლოატაციის” პროგრამების ფარგლებში გაწეული ხარჯების შესაბამისობის აუდიტი; დმანისის მუნიციპალიტეტის 2015-2016 წლების საფინანსო-ეკონომიკური საქმიანობის შესაბამისობის აუდიტი; ვანის მუნიციპალიტეტის 2016 წლის ფინანსური ანგარიშგების აუდიტი და 2015-2016 წლებში „წარმომადგენლობითი და აღ-მასრულებელი ორგანოების დაფინანსების“ და „ინფრასტრუქტურის მშენებლობის, რეაბილიტაციისა და ექსპლოატაციის” პროგრამების ფარგლებში გაწეული ხარჯების შესაბამისობის აუდიტი; ზესტაფონის მუნიციპალიტეტის 2014-2015 წლების საფინანსო-ეკონომიკური საქმიანობის შესაბამისობის აუდიტი; თეთრიწყაროს მუნიციპალიტეტის 2016 წლის ფინანსური ანგარიშგების ფინანსური აუდიტი და 2015-2016 წლებში წარ-მომადგენლობითი და აღმასრულებებლი ორგანოების დაფინანსების და ინფრასტრუქტურის მშენებლობა, რეაბილიტაცია და ექსპლოატაციის შესაბამისობისს აუდიტი; თემი თელავის მუნიციპალიტეტის 2014-2015 წლების საქმიანობის შესაბამისობის აუდიტი; თიანეთის მუნიციპალიტეტის 2016-2017 წლების ბიუჯეტებით გათვალისწინებული პროგრამების შესაბამისობის აუდიტი; ლანჩხუთის მუნიციპალიტეტის 2016 წლის ფინანსური ანგარიშგების ფინანსური აუდიტი და 2015-2016 წლებში „წარმომადგენლობითი და აღმასრულებელი ორგანოების დაფინანსების“ და „ინფრასტრუქტურის მშენებლობა, რეაბილიტაცია და ექსპლოატაციის” პროგრამების ფარგლებში გაწეული ხარჯების შესაბამისობის აუდიტი; მარტვილის მუნიციპალიტეტის 2016 წლის ფინანსური ანგარიშგების აუდიტი და 2016 წელს „წარმომადგენლობითი და აღმასრულებელი ორგანოების დაფინანსების“ პროგრამის ფარგლებში გაწეული ხარჯების შესაბამისობის აუდიტი; ნინოწმინდის მუნიცი-პალიტეტის 2016 წლის ფინანსური ანგარიშგების ფინანსური აუდიტი და 2015 2016 წლებში „წარმომადგენლობითი და აღმასრულებელი ორგანოების დაფინანსების“ და „ინფრასტრუქტურის მშენებლობის, რეაბილიტაციისა და ექსპლოატაციის” პროგრამების ფარგლებში გაწეული ხარჯების შესაბამისობის აუდიტი; ოზურგეთის მუნიციპალიტეტის 2016-2017 წლების ბიუჯეტით გათვალისწინებული პროგრამების ხარჯვის შესა-ბამისობის აუდიტი; ქალაქ ახალციხის მუნიციპალიტეტის 2016 წლის ფინანსური ანგარიშგების აუდიტი და 2015-2016 წლებში „წარმომადგენლობითი და აღმასრულებელი ორგანოების დაფინანსების“ და „ინფრასტრუქტურის მშენებლობის, რეაბილიტაციისა და ექსპლოატაციის“ პროგრამების ფარგლებში გაწეული ხარჯების შესაბამისობის აუდიტი; ქალაქ ზუგდიდის მუნიციპალიტეტის 2016 წლის ფინანსური ანგარიშგების აუდიტის და 2015-2016 წლებში „წარმომადგენლობითი და აღმასრულებელი ორგანოების დაფინანსების“ და „ინფრასტრუქტურის მშენებლობის, რეაბილიტაციისა და ექსპლოატაციის“ პროგრამების ფარგლებში გაწეული ხარჯების შესაბამისობის აუდიტი; ქარელის მუნიციპალიტეტის 2016 წლის ფინანსური ანგარიშგების აუდიტი და 2015-2016 წლებში „წარმომადგენლობითი და აღმასრულებელი ორგანოების დაფინანსების“ და „ინფრასტრუქტურის მშენებლობის, რეაბილიტაციის და ექსპლოატაციის“ პროგრამების ფარგლებში გაწეული ხარჯების შესაბამისობის აუდიტი; ყაზბეგის მუნიციპალიტეტის 2016 წლის ფინანსური ანგარიშგების აუდიტი და 2015-2016 წლებში „წარმომადგენლობითი და აღმასრულებელი ორგანოების დაფინანსების“, „ინფრასტრუქტურის მშენებლობის, რეაბილიტაციისა და ექსპლოატაციის“, „განათლების“, „კულტურის, რელიგიის, ახალგაზრდობის ხელშეწყობისა და სპორტის“ პროგრამების ფარგლებში გაწეული ხარჯების შესაბამისობის აუდიტი; ყვარლის მუნიციპალიტეტის 2016 წლის ფინანსური ანგარიშგების ფინანსური აუდიტი და 2015-2016 წლებში წარ-მომადგენლობითი და აღმასრულებებლი ორგანოების დაფინანსების და ინფრასტრუქტურის მშენებლობა, რეაბილიტაცია და ექსპლოატაციის პროგრამების ფარგლებში გაწეული ხარჯების შესაბამისობის აუდიტი; ჭიათურის მუნიციპალიტეტის 2016-2017 წლების ბიუჯეტებით გათვალისწინებული პროგრამების შესაბამისობის აუდიტი.

მაია მიშელაძე

 

]]>
versiaprinti@yahoo.com (super admin) სამართალი Wed, 09 Oct 2019 13:10:16 +0400
ვახტანგ გომელაური შს სამინისტროს დანაყოფილის ხელმძღვანელებსა და თანამშრომლებს შეხვდა http://www.versia.ge/2013-07-31-11-23-46/item/6363-ვახტანგ-გომელაური-შს-სამინისტროს-დანაყოფილის-ხელმძღვანელებსა-და-თანამშრომლებს-შეხვდა.html http://www.versia.ge/2013-07-31-11-23-46/item/6363-ვახტანგ-გომელაური-შს-სამინისტროს-დანაყოფილის-ხელმძღვანელებსა-და-თანამშრომლებს-შეხვდა.html

შინაგან საქმეთა მინისტრი ვახტანგ გომელაური სამინისტროს სხვადასხვა დანაყოფის ხელმძღვანელებსა და თანამშრომლებს შეხვდა.

შეხვედრაზე მინისტრმა უწყებაში სისტემური განახლების ფარგლებში მიმდინარე და დაგეგმილ ინფრასტრუქტურულ და სოციალურ პროექტებზე ისაუბრა.

ვახტანგ გომელაურმა თანამშრომლებს პირადად გააცნო ცვლილებები, რომელთა მიხედვითაც 2020 წლის 1-ლი ივლისიდან სამინისტროს ყველა თანამშრომელს ანაზღაურება 125 ლარით გაეზრდება.

როგორც შინაგან საქმეთა მინისტრმა აღნიშნა, სამინისტროს გამართული ფუნქციონირების, მართლწესრიგისა და საზოგადოებრივი უსაფრთხოების უზრუნველყოფისთვის მნიშვნელოვანია როგორც ინფრასტრუქტურული პროექტების განხორციელება და პოლიციელებისთვის კომფორტული სამუშაო პირობების შექმნა, ასევე, სამინისტროს თითოეული თანამშრომლისთვის ღირსეული სოციალური გარანტიების შექმნა.

ვახტანგ გომელაურმა სამინისტროს დანაყოფების წარმომადგენლებს სოციალური პირობების გაუმჯობესების პროექტების ფარგლებში მიმდინარე შეღავათიანი ბინათმშენებლობის პროცესის შესახებ ინფორმაცია მიაწოდა.

]]>
versiaprinti@yahoo.com (super admin) სამართალი Thu, 03 Oct 2019 11:56:14 +0400
შსს-მ „ქურდული სამყაროს“ წევრობისთვის და „კანონიერი ქურდისთვის“ მიმართვის ბრალდებით 4 პირი დააკავა http://www.versia.ge/2013-07-31-11-23-46/item/6361-შსს-მ-„ქურდული-სამყაროს“-წევრობისთვის-და-„კანონიერი-ქურდისთვის“-მიმართვის-ბრალდებით-4-პირი-დააკავა.html http://www.versia.ge/2013-07-31-11-23-46/item/6361-შსს-მ-„ქურდული-სამყაროს“-წევრობისთვის-და-„კანონიერი-ქურდისთვის“-მიმართვის-ბრალდებით-4-პირი-დააკავა.html

საქართველოს შინაგან საქმეთა სამინისტრო აგრძელებს ქურდული სამყაროს წინააღმდეგ უკომპრომისო ბრძოლას, რომლის მიზანია ქვეყანაში ქურდული სამყაროსა და მასთან დაკავშირებული კრიმინალური მენტალიტეტის საბოლოოდ აღმოფხვრა.

ცენტრალური კრიმინალური პოლიციის დეპარტამენტის ორგანიზებულ დანაშაულთან ბრძოლის მთავარი სამმართველოს თანამშრომლებმა, გენერალურ პროკურატურასთან ერთად, თბილისსა და ახალციხეში ერთდროულად ჩატარებული სპეციალური ოპერატიული ღონისძიებების შედეგად, მოსამართლის განჩინების საფუძველზე, „ქურდული სამყაროს“ წევრობის და „კანონიერი ქურდისთვის“ მიმართვის ბრალდებით 4 პირი დააკავეს.

შსს-ს ინფორმაციით, 1976 წელს დაბადებული წარსულში ნასამართლევ ი.კ.-ს და 1982 წელს დაბადებული გ.გ. „ქურდული სამყაროს“ წევრობაში, ხოლო წარსულში ნასამართლევ ორ პირს - 1979 წელს დაბადებულ გ.მ.-ს და 1981 წელს დაბადებულ კ.ა.-ს „კანონიერი ქურდისთვის“ მიმართვაში ედებათ ბრალი. მათ მიერ ჩადენილი დანაშაული 3-დან 10 წლამდე ვადით თავისუფლების აღკვეთას ითვალისწინებს.

პოლიციამ, ერთ-ერთი დაკავებულის - კ.ა.-ს საცხოვრებელი სახლის ჩხრეკისას ნივთმტკიცებად ამოიღო დიდი ოდენობით თანხა - 87 ათასი ამერიკული დოლარი. ასევე, ამოღებულია კომპიუტერული ტექნიკა და ბრალდებულების მობილური ტელეფონები, რომელთა საშუალებითაც ისინი ერთმანეთს და საზღვარგარეთ მცხოვრებ ქართველ „კანონიერ ქურდებს“ უკავშირდებოდნენ.

გამოძიებით დადგინდა, რომ 2018 წლის ნოემბერში ბიზნესპარტნიორებმა - გ.მ.-მ და კ.ა.-მ ფინანსური დავის გადასაწყვეტად, მატერიალური უპირატესობის მიღების მიზნით, ქურდული სამყაროს წევრების - ი.კ.-სა და გ.გ.-ს მეშვეობით, ცალ-ცალკე მიმართეს თურქეთის რესპუბლიკასა და რუსეთის ფედერაციაში მყოფ ე.წ. კანონიერ ქურდებს - ჯეირან კინწურაშვილს (მეტსახელად „ჯეირანას“) და ედუარდ ასატრიანს (მეტსახელად „ასატრინას“).

კანონიერმა ქურდებმა დავის გადაწყვეტამდე ბიზნესპარტნიორების ფინანსური დავის შესწავლა ქურდული გარჩევით დაავალეს თავიანთ ნდობით აღჭურვილ პირებს, რომლებიც შეხვდნენ ბიზნესპარტნიორებს და მათ შუამავლებს - ქურდული სამყაროს წევრებს.

ე.წ. კანონიერმა ქურდმა ჯეირან კინწურაშვილმა ფინანსური დავის გადასაწყვეტად და ქურდულ გარჩევაში მონაწილეობის მისაღებად მოდავე მხარეები თურქეთის რესპუბლიკაში დაიბარა. შეხვედრაზე კინწურაშვილმა დავა ნაწილობრივ ერთ-ერთი ბიზნესპარტნიორის სასარგებლოდ გადაწყვიტა და მეორე პირის შუამავალს 45 ათასი აშშ დოლარის თურქეთში ჩატანა დაავალა.

დავის საბოლოოდ გადაწყვეტის მიზნით, ე.წ. კანონიერმა ქურდმა ჯეირან კინწურაშვილმა ქურდული გარჩევა თურქეთში კიდევ ორჯერ - 2019 წლის 22 და 29 იანვარს მოაწყო, თუმცა ფინანსური დავა საბოლოოდ ვერ გადაწყდა.

გამოძიება მიმდინარეობს ქურდული სამყაროს წევრობის, ასევე, „კანონიერი ქურდისთვის“ და „ქურდული სამყაროს წევრისთვის“ მიმართვის ფაქტებზე, საქართველოს სისხლის სამართლის კოდექსის 223-ე პრიმა მუხლის 1-ლი ნაწილით და 223-პრიმა ოთხი მუხლის 1-ლი ნაწილით.

შეგახსენებთ, რომ 2018 წელს, ქურდული სამყაროსა და მასთან დაკავშირებული კრიმინალური მენტალიტეტის აღმოფხვრის მიზნით, შინაგან საქმეთა სამინისტროს მიერ სისხლის სამართლის კოდექსში განხორციელებული ცვლილებების საფუძველზე, „ქურდულ სამყაროსთან“ დაკავშირებული დანაშაულებრივი ქმედებების წრე გაფართოვდა.

კერძოდ, „კანონიერ ქურდობასა“ და „ქურდული სამყაროს წევრობასთან“ ერთად, სისხლის სამართლის წესით დასჯადი გახდა „ქურდულ შეკრებაში მონაწილეობა“, „ქურდული სამყაროს საქმიანობის მხარდაჭერა“ და „ქურდული სამყაროს წევრისთვის ან კანონიერი ქურდისთვის მიმართვა“.

შედეგად, 2018 წლის იანვრიდან დღემდე, შინაგან საქმეთა სამინისტროს მიერ, მათ შორის ევროპის ქვეყნების სამართალდამცავ ორგანოებთან თანამშრომლობის შედეგად, ჯამში, პასუხისგებაში მიცემულია კანონიერი ქურდობის, ქურდული სამყაროს წევრობისა და კრიმინალურ სამყაროსთან დაკავშირებული სხვა მძიმე დანაშაულებების ბრალდებით 274 პირი, მათ შორის 16 კანონიერი ქურდი.

]]>
versiaprinti@yahoo.com (super admin) სამართალი Wed, 02 Oct 2019 12:03:13 +0400
სკანდალური ექსკლუზივი _ პოლიციელის მკვლელობაში მსჯავრდებულის შეწყალებაზე რეკომენდაცია მარგველაშვილის შეწყალების კომისიამაც გასცა! http://www.versia.ge/2013-07-31-11-23-46/item/6359-სკანდალური-ექსკლუზივი-_-პოლიციელის-მკვლელობაში-მსჯავრდებულის-შეწყალებაზე-რეკომენდაცია-მარგველაშვილის-შეწყალების-კომისიამაც-გასცა.html http://www.versia.ge/2013-07-31-11-23-46/item/6359-სკანდალური-ექსკლუზივი-_-პოლიციელის-მკვლელობაში-მსჯავრდებულის-შეწყალებაზე-რეკომენდაცია-მარგველაშვილის-შეწყალების-კომისიამაც-გასცა.html

„ხელი გამიშვი, სად მიმათრევ, ბიჭოო!“ _ დევაძის სკანდალური ჩვენება და თარაშ მუკბანიანის მკვლელობის აქამდე უცნობი დეტალები!

 

საქართველოს პრეზიდენტის, სალომე ზურაბიშვილის მიერ, ბოლოს გამოცემული შეწყალების აქტი კიდევ კარგა ხანს იქნება განხილვის თემა. შეწყალებულთა სიაში მკვლელობისთვის გასამართლებულები, ნარკორეალიზატორები და ერთი ძებნილიც მოხვდა, რამაც საზოგადოების აღშფოთება გამოიწვია. პირველი, ვისზეც ხმაური ატყდა, რამაზ დევაძე იყო, პირი, რომელსაც ბათუმის ღამის კლუბში, პოლიციელ თარაშ მუკბანიანის მკვლელობის გამო, 12 წელი ჰქონდა მისჯილი. მოგვიანებით, ამ საქმეში ბევრი საინტერესო დეტალი გამოიკვეთა და ისიც ითქვა, რომ მუკბანიანის ოჯახის წევრები დევაძის შეწყალების წინააღმდეგნი არ იყვნენ. 

ჩვენ საქმის დეტალებზე, ადვოკატ ირაკლი გაბრიჭიძეს ვესაუბრეთ. სწორედ გაბრიჭიძე იყო პირველი, რომელმაც დევაძე დაკავების შემდეგ ნახა და დღემდე მის ინტერესებს იცავს. მოკლედ, „ვერსია“ სკანდალური საქმის არანაკლებ სკანდალურ გაგრძელებას გთავაზობთ.

_ ბატონო ირაკლი, გაიხსენეთ როგორ გახდით დევაძის ადვოკატი და რა მოხდა საწყის ეტაპზე? 

_ ღამის ორ საათზე, დამირეკეს დევაძის ოჯახის წევრებმა და მითხრეს, რომ რამაზი დააკავეს. დილის 8 საათზე, უკვე ბათუმში ვიყავი. თავიდან პოლიციელები ვნახე, რომლებმაც თქვეს, ჩვენი თანამშრომელი დახვრიტა, ორი ტყვია ესროლა მიბჯენით, დაბლა წაქცეულსო. რა თქმა უნდა, გული დამწყდა, რადგან თუ პოლიციელების სიტყვებით ვიმსჯელებდი, გამართლების შანსი არ იყო. ვნახე დევაძე და პირველი ეჭვი მაშინ გამიჩნდა _ ის ამბობდა, რომ არავინ მოუკლავს. 

შემდეგ გავარკვიე, რომ მუკბანიანს ორი კი არა, ერთი ტყვია ჰქონდა მოხვედრილი, ხოლო საქმე ბოლომდე სუფთა რომ არ იყო, საბოლოოდ, მას შემდეგ დავრწმუნდი, რაც სათვალთვალო კამერის ჩანაწერი, უბრალოდ, გაქრა. 

_ კამერის ჩანაწერები პირადად მაქვს ნანახი, თან რამდენიმე რაკურსით და რას ნიშნავს, გაქრა? 

_ ღამის კლუბში, სადაც მკვლელობა მოხდა, რამდენიმე კამერა დგას. ამოიღეს ყველა ჩანაწერი, გარდა იმ კამერისა, რომელიც ყველაზე ახლოს იყო შემთხვევის ადგილთან. რომ ვკითხე, ამ კონკრეტული კამერის ჩანაწერი სად არის-მეთქი, მიპასუხეს, ვერ ამოვიღეთო ანუ კამერა მუშაობდა, ყველაზე ახლოს იყო და ვერ ამოიღეს? 

გამაკვირვა იმანაც, რომ დევაძე სარფის საბაჟო პუნქტზე დააკავეს. სასაზღვრო პოლიციისადმი პატივისცემის მიუხედავად, კაცი, რომელსაც ქვეყნიდან გაქცევა სურს, საბაჟოს არ მიადგება, სხვა გზით წავა და, დამიჯერეთ, სურვილის შემთხვევაში, დევაძეს ბათუმიდან თურქეთში არაოფიციალურად გადასვლა არ გაუჭირდებოდა. ამის ნაცვლად, ის პირდაპირ მივიდა საბაჟოზე და იქ დააკავეს მკვლელობის ბრალდებით, რამაც ძალიან გააკვირვა, რადგან დარწმუნებული იყო, რომ არავინ მოუკლავს. 

_ თუ ასეა, მაშინ, მომხდარიდან 2 საათში, რატომ მიდიოდა ქვეყნიდან? 

_ მას დაძაბული ურთიერთობა ჰქონდა ადგილობრივ ძალოვანებთან. ბარში მომხდარი ჩხუბის გამო კი იფიქრა, რომ მისი დაკავების მიზეზი ექნებოდათ და სიტუაციიდან განრიდება სცადა. აი, ამონარიდი რამაზის ჩვენებიდან: 

„2014 წლის 26 დეკემბერს, მე, ჩემს მეგობრებთან _ ბესიკ მამულაძესთან, რამინ შაქარიშვილთან და გელა ჩხაიძესთან ერთად, ვიმყოფებოდი ქ. ბათუმში, გ. ტაბიძის ქუჩაზე მდებარე კაფე-ბარ „კიდობანში“. იქ მივედით, დაახლოებით, დღის 13:00 საათზე, დავიწყეთ ალკოჰოლური სასმელების _ არყისა და კონიაკის დალევა, თავდაპირველად, გელა არ გვახლდა და ის მოგვიანებით შემოგვიერთდა. ჩვენ ხსენებულ კაფე-ბარში გავჩერდით, დაახლოებით, სამი საათი, რის შემდეგაც ავედი გონიოს დასახლებაში პირად საქმეზე, მეგობრებთან ერთად, იქედან მალე დავბრუნდით და კვლავ მივედით კაფე-ბარ „კიდობანში“, სადაც კვლავ გავაგრძელეთ ქეიფი, იქ გავჩერდით რამდენიმე საათი, რის შემდეგაც გასული წლის 27 დეკემბრის, დაახლოებით, 01:00 საათზე, მე, ბესიკ მამულაძე, რამინ შაქარიშვილი და გელა ჩხაიძე, წავედით ქ. ბათუმში, ანგისის ქუჩაზე მდებარე დისკო-კლუბ „ლეგასში“. იქ მივედით ბესიკ მამულაძის მართვის ქვეშ არსებული ავტომაქანით, ჩვენ ცოტა გართობა და დროის გაყვანა გვინდოდა, რადგანაც შუაღამისას, ველოდებოდი სტუმარს თურქეთის რესპუბლიკიდან და მოგვიანებით, იმას უნდა დავხვედროდი თურქეთის რესპუბლიკაში, ქალაქ ქემალ ფაშაში, იქედან კი ორივე ერთად გადმოვიდოდით საქართველოში, სარფის გავლით. 

დისკო-კლუბში მისულებმა, მანქანა გავაჩერეთ კლუბის წინ ეზოში და ჩვენ, ოთხივე, შევედით დისკო-კლუბის დარბაზში, სადაც იყო უამრავი ხალხი. მე წავედი მეგობრებთან ერთად დარბაზის ბოლოსკენ, სადაც სარკის წინ არის საცეკვაო ადგილი და ბოლოში არის შემაღლებული ბაქანი, მასზე არსებული მაგიდებითა და სავარძლებით, ასევე, სხვა ინვენტარით. როდესაც მიუახლოვდით ხსენებულ ბაქანს, დავინახე, რომ ბაქნიდან ხელს მიქნევდა ჩემი ნაცნობი ზვიად თავაძე, კონკრეტულად, საიდან ვიცნობ, ვერ გავიგე, გვყავს საერთო მეგობრები, ის გვეპატიჟებოდა ბაქანზე არსებულ მაგიდასთან და მივხვდი, რომ ის იყო ხსენებულ მაგიდასთან შეკრებილი სტუმრებიდან ერთ-ერთი. მე მივიღე მისი მიპატიჟება და ავედი ბაქანზე, უკან ამომყვა ბესიკ მამულაძე, ხოლო 2-3 წუთში კი _ გელა ჩხაიძე და რამინ შაქარიშვილი. მე და ბესიკი მივედით მაგიდის თავთან, სადაც ზვიად თავაძემ შეგვივსო ჭიქები. ვერ ვიხსენებ, იმ მაგიდასთან დავლიე თუ არა, რადგანაც კაფე-ბარ „კიდობანიდან“, ფაქტიურად, მთვრალები წამოვედით, მისვლიდან დაახლოებით, 20 წუთში, ბაქანზე, როგორც ზემოთ აღვნიშნე, ამოვიდნენ გელა და რამინი, რომლებსაც მე შევეგებე მოაჯირებთან, რის შემდეგაც, ყველანი ერთად მივედით მაგიდასთან. 

მისვლიდან რამდენიმე წამში, მე დავინახე, რომ ჩემს სიახლოვეს მყოფი ბესიკ მამულაძე, ეკამათებოდა ჩემთვის უცნობ პირს, როგორც შემდეგში გავიგე, ეს პიროვნება იყო თარაშ მუკბანიანი. სანამ მათთან მივიდოდი, დავინახე, რომ თარაშმა ამოიღო პისტოლეტი და მიმართა ბესიკის სახისკენ. ამ დროს მაგიდიდან წამოდგნენ იქ მყოფი მამაკაცები, მათ შორის, ზვიად თავაძე და ცდილობდნენ, რომ მოკამათეები დაეშოშმინებინათ და თარაში დაეწყნარებინათ. დავინახე, რომ მოკამათეებს შორის, გასაშველებლად ჩადგა გელა ჩხაიძე, ხოლო თარაშმა მისი სახის მიმართულებით მიმართა იარაღი. მე არ მინდოდა, რომ რაიმე ცუდი მომხდარიყო, რის გამოც მე მივედი თარაშთან და უკანა მხრიდან, უსიტყვოდ, წელში შემოვხვიე ხელები და ვცდილობდი, რომ ჯერ ბაქნიდან ჩამომეყვანა, ხოლო შემდეგ კლუბიდან გამეყვანა და დამეწყნარებინა.

ამ დროს თარაში, იარაღით ხელში, იწევდა ბაქანზე, უკან მყოფი ჩემი მეგობრების მიმართულებით. მე მოვახერხე და თარაში მივიყვანე ბაქნიდან ჩამოსასვლელ კიბეებთან, რის შემდეგაც დავიწყეთ კიბეებზე ჩამოსვლა. ჩამოსვლის დროს, მე ფეხი დამისხლტა საფეხურზე და კიბეებზე ჩამოვედი ბორძიკით. სწორედ ამ მომენტში შემომხედა მან მე და მიხვდა, რომ მე არ ვიყავი მისი მეგობარი, მანამდე, მიუხედავად იმისა, რომ მე აქტიურად მოვუწოდებდი დამშვიდებისაკენ, ის ყურადღებას არ მაქცევდა და ჩემსკენ არ იხედებოდა. სწორედ კიბეზე წაბორძიკების დროს, უფრო სწორად, შემდეგ შემომხედა მან და როდესაც დამინახა უცნობი პირი, აგრესიულად დამიყვირა _ „ხელი გამიშვი, სად მიმათრევ, ბიჭოო!“ 

მე კვლავ მოვუწოდე, რომ დამშვიდებულიყო და იარაღი შეენახა, რაზეც თარაშმა შემაგინა დედის მისამართით, იმავდროულად დავინახე, რომ თარაშმა ხელში დაკავებული პისტოლეტი მომართა დაბლა, ჩემი ფეხის მიმართულებით. მე მივხვდი, რომ ის აპირებდა ჩემზე სროლას, რის გამოც გავწიე სწრაფად ფეხი და, მართლაც, გავიგონე გასროლის ხმა. ამის შემდეგ, მან მომართა იარაღი მეორე ფეხის მიმართულებით. მე მოვასწარი და ამჯერად, იარაღიდან მოშორებით, მეორე მხარეს გავიწიე და გაწევისთანავე, გავიგონე მეორე გასროლის ხმა. მე მაინც არ გავუშვი ხელი, რის გამოც თარაშმა უკვე ჩემი სახის მიმართულებით დამიმიზნა იარაღი და კვლავ გინებით მითხრა, ხელი გამიშვიო. მივხვდი წამიერად, რომ ის აპირებდა ჩემი მიმართულებით გასროლას, რის გამოც მე მყისიერად, ჭიდაობის ერთ-ერთი ილეთით გავიქნიე თარაში ზურგის მხარეს, მისი უკუგდების დროს. მე კვლავ მომესმა გასროლის ხმა, სწორედ უკუგდების მომენტში. ილეთიდან გამომდინარე, თარაშთან ერთად, მეც დავეცი მეტლახის იატაკზე და დავარტყი თავი იატაკს, ცოტა გავბრუვდი, მაგრამ გონება არ დამიკარგავს. 

მე დავინახე, რომ თარაში იყო უმოძრაოდ, უგონოდ, რის გამოც მე მისი განიარაღების მიზნით, ხელი გავაშვებინე პისტოლეტს, რომელზეც ხელის გაშვება თარაშს არ უნდოდა და წავართვი პისტოლეტი. 

ამის შემდეგ, მე წამოვდექი ფეხზე, ხელში მეკავა პისტოლეტი და ვიცოდი ისიც, რომ გასროლის შემდეგ, პისტოლეტი იქნებოდა დამუხტულ, შეყენებულ მდგომარეობაში, რის გამოც იარაღს მყარად მოვკიდე ხელი და ვცდილობდი მის განმუხტვას, რა დროსაც ვერ ვიგრძენი მე, რა დროს მიმედო ხელი სასხლეტ კავზე, უეცრად გავიგონე გასროლის ხმა და მივხვდი, რომ ჩემს ხელში არსებული იარაღი გავარდა. 

მე, ამ ფაქტის შედეგად, დავიბენი, ვერ დავინახე, რა მიმართულებით წავიდა ტყვია და სად მოხვდა. წამიერად, მე მოვედი გონს და შევიხედე სარკისა და მისი იარაღის მიმართულებით, რა დროსაც დავინახე, რომ თარაში კვლავ იატაკზე იწვა გაუნძრევლად. მე იმ მომენტში არ ვიცოდი, ჩემი ხელიდან შემთხვევით გავარდნილი ტყვია ვინმეს თუ მოხვდა, რის გამოც თარაშზე განაწყენებულმა, იმის გამო, რომ მისი არასწორი ქმედების გამო, კინაღამ მე დავიღუპე, რადგანაც ის აპირებდა ჩემზე სროლას, მივედი თარაშთან და მივარტყი ფეხი, რის შემდეგაც ხელში დაკავებული იარაღი დავაგდე იატაკზე, მწოლიარე თარაშის გვერდით და მე, ბესიკთან და რამინისთან ერთად, გამოვედი დისკო-კლუბიდან. 

მე, დისკო-კლუბიდან გამოსვლის შემდეგ, მომხდარი ფაქტები მახსოვს ნაწილობრივ, კერძოდ, ვაჩვენებ, რომ კლუბიდან გამოსვლისას, მე არ ვიცოდი, ჩემი ხელიდან შემთხვევით გავარდნილი ტყვიით თუ იყო ვინმე მკვდარი. ასევე, მქონდა განცდა, რომ მე მკლავდნენ და გადავურჩი სიკვდილს. მე, მომხდარის შედეგად, ვიყავი აღგზნებული და როგორც მახსოვს, დისკო-კლუბიდან გამოსვლის შემდეგ, ერთ, თუ ორ პიროვნებას დავარტყი ხელი...“ 

_ შემდეგ რა მოხდა? 

_ შემდეგ უკვე, მოწმეების გაქრობა დაიწყო. ვინმემ სადმე ახსენა, რომ მუკბანიანმა ბარში სამი ადამიანი დაჭრა მანამ, სანამ დევაძე იარაღს წაართმევდა? ამ სამიდან ერთი, თურქეთის მოქალაქე იყო, რომელიც, უბრალოდ, გააქრეს, დაცვის ერთი თანამშრომელი, რომელსაც ტყვია თითში მოხვდა და თითი დაკარგა, ისიც გააქრეს. ჩვენება აგებული იყო დაცვის ორ თანამშრომელზე, რომლებიც ამბობდნენ, რომ წაქცეულ მუკბანიანს, დევაძემ დამიზნებით, ზემოდან ქვემოთ ესროლა. ამ დროს, სასამართლოზე წარვადგინეთ ექსპერტიზის დასკვნა, სადაც ეწერა, რომ გასროლა მოხდა ქვემოდან ზემოთ ანუ დევაძეს მუცელთან ეჭირა იარაღი, მუკბანიანი ფეხზე იდგა და უნებური გასროლის შედეგად, ტყვია მას ლოყაში მოხვდა. 

საქმეში იდო ფსიქოლოგის დასკვნა, რომელიც პირდაპირ ამბობს: კლუბიდან გამოსვლის დროს, დევაძის მდგომარეობა ნათლად მიუთითებდა იმაზე, რომ მან არ იცოდა,დაშავდა თუ არა ვინმე გასროლილი ტყვიით. 

_ მოწმეები თუ ამბობდნენ, წაქცეულ მუკბანიანს ესროლა დევაძემო, ხოლო ექსპერტიზამ გასროლა პირიქით _ ქვემოდან ზემოთ დააფიქსირა, სასამართლომ ეს როგორ არ გაიზიარა? 

_ არ გაიზიარა. სასამართლოზე ახლიდან დაკითხეს მოწმეები და მათ ჩვენება შეცვალეს. როცა მოსამართლეს მათი ჩვენებები დავუდეთ წინ, მან არ გაიზიარა და განაცხადა, რომ ადრე მიცემული ჩვენებები არ აინტერესებდა და იზიარებდა მხოლოდ იმას, რასაც სასამართლოზე ისმენდა. ამ დროს, ჩვენ ვაპელირებდით, რომ გასროლა მოხდა შემთხვევით. რაც შეეხება იარაღს, ამ კონკრეტულ იარაღზე, საუბარია „Hშ-9“-ზე, ექსპერტს პირდაპირ უწერია: 

„პისტოლეტ Hშ-9“-ს არ გააჩნია ჩახმახი, რომლითაც შეიძლება დადგინდეს, არის თუ არა მოყვანილი იგი საბრძოლო მდგომარეობაში, ამავე დროს, საკეტის გადმოწევა ლულაში არსებული ვაზნის ამოსაგდებად სახელურის ანუ ტარის მცველის დაჭერის გარეშე, შეუძლებელია. ე.ი. ცერა თითისა და ხელის გულის გადაბმის ადგილით უნდა ჩაიძიროს ტარის მცველი, უნდა მოხდეს სახელურზე ე.წ. მუშტის შეკვრა, მაგრამ ამ დროს, თუ თითი სასხლეტზე არის მოთავსებული, სასხლეტის მცველის ჩაწევას (გათიშვას) თითი ვერ გრძნობს, რა დროსაც შესაძლებელია, მოხდეს გაუთვალისწინებელი გასროლა. უსაფრთხოების მაღალი დონის მიუხედავად, გამოუცდელ და კონსტრუქციას გაუცნობიერებელ, ეიფორიაში მყოფი ადამიანის ხელში, შესაძლებელია მოხდეს შემთხვევითი გასროლა იმ დროს, როცა იგი დააპირებს სავაზნიდან ვაზნის ამოგდებას, ან სავარაუდოდ, ჩახმახის დაშვებას, რომელიც მას არ გააჩნია ანუ განმუხტვას...“ 

პრაქტიკულად, ექსპერტი ჩვენ გვეთანხმებოდა და სასამართლომ ესეც არ გაითვალისწინა. სასამართლომ არ გამოითხოვა ყველაზე ახლოს მყოფი კამერის ჩანაწერები, სასამართლომ არ გაიზიარა კადრი, რომ მუცელზე მიბჯენილი იარაღით ვერ მოახერხებ დამიზნებას და ეს იყო შემთხვევითი გასროლა. 

_ ანუ, თქვენ თანახმა იყავით გაუფრთხილებელ მკვლელობის მუხლზე? 

_ რა თქმა უნდა. ჩვენ ხომ არ ვამბობდით, რომ დევაძეს არავინ მოუკლავს, მაგრამ ეს იყო შემთხვევით, განზრახვის გარეშე და არა ისე, როგორც ამბობდნენ. ამ მუხლზე სასჯელი 2-დან 4 წლამდეა და ჩვენც, სწორედ ამას ვითხოვდით. მოსამართლემ არაფერი გაიზიარა და არაფერი გაითვალისწინა, სააპელაციომ, დავაკონკრეტებ, ქუთაისის სააპელაციომ განაჩენი ძალაში დატოვა და ვისაც ამ უწყებასთან ჰქონია შეხება, დამეთანხმება, რომ ქუთაისის სააპელაციოში განცხადების შეტანას, უბრალოდ, აზრი არ აქვს, ხოლო უზენაესმა, საქმე წარმოებაში არ მიიღო. არადა, დარწმუნებული ვარ, უზენაესში შანსი გვექნებოდა, რადგან მტკიცებულებები ძალიან, ძალიან სერიოზული იყო. 

_ და მივედით მთავარზე _ შეწყალებაზე. 

_ პროცესი ბევრად ადრე დაიწყო. თავიდან, გიორგი მარგველაშვილის ადმინისტრაციას მივმართეთ. მაშინ შეწყალების კომისიაც ფუნქციონირებდა და საქმის მასალების დეტალური განხილვა კატეგორიულად მოვითხოვეთ. კომისიამ ეს საქმე შეისწავლა და დადებითი რეკომენდაცია გასცა. 

_ ანუ, მარგველაშვილის დროს არსებულმა შეწყალების კომისიამ ამ საქმეზე დადებითი რეკომენდაცია გასცა? 

_ დიახ. 

_ და რატომ არ შეიწყალა მარგველაშვილმა დევაძე? 

_ მან მოითხოვა დაზარალებულების თანხმობა და... 

_ და თქვენ ეს თანხმობა არ გქონდათ... 

_ გვქონდა, როგორ არ გვქონდა. მთელი ამ დროის განმავლობაში, ჩვენ მაქსიმალურად ვცდილობდით, რომ ამ საქმეზე სიმართლე გაეგო ყველას. იქნებოდნენ ეს დევაძის მეგობრები, დაზარალებულები, თუ ნებისმიერი დაინტერესებული პირი. მოხდა ისე, რომ მუკბანიანის მეუღლეს გააცნეს საქმე, როგორც მე ვიცი, მან ნახა ფირიც და დარწმუნდა, რომ გასროლა იყო შემთხვევითი და არა _ მიზანმიმართული. მინდა, მკაფიოდ ვთქვა, რომ მუკბანიანის მეუღლემ, ყოველგვარი ანგარებისა და ძალდატანების გარეშე, საკუთარი პოზიცია დააფიქსირა და ნოტარიულად დაამოწმა, რომ დევაძის გათავისუფლების წინააღმდეგი არ იყო. 

_ მაშინ, რატომ არ შეიწყალა მარგველაშვილმა? 

_ მე ასე ვიტყვი, მას არ ეყო სიმამაცე, ვერ გაბედა გადაწყვეტილების მიღება და ეს, იმის მიუხედავად, რომ მაგიდაზე ედო შეწყალების კომისიის დასკვნა, დაზარალებულის თანხმობა და სხვადასხვა ფედერაციისა, თუ ცნობილი ადამიანების ათეულობით შუამდგომლობა. 

_ დევაძის საქმეზე რომ განცხადება არაერთმა ფედერაციამ და, მაგალითად, სუმოისტმა ლევან გორგაძემ, იგივე ტოშინოშინმა შეიტანა, მართალია? 

_ დიახ. 

_ შემდეგ რა მოხდა? 

_ შემდეგ ანალოგიური განცხადებით მივმართეთ სალომე ზურაბიშვილის ადმინისტრაციას. მან მიიღო დოკუმენტაცია და მოითხოვა ახალი თანხმობა დაზარალებულებისგან ანუ ჩათვალა, რომ ძველი თანხმობა არ იყო საკმარისი. მოხერხდა დაკავშირება მუკბანიანის მეუღლესთან და მან ზურაბიშვილის ადმინისტრაციაში ახალი დოკუმენტი, ისიც ნოტარიულად დამოწმებული, თავად დატოვა. ამის შემდეგ მოხდა შეწყალება. 

_ უშუალოდ სასამართლოს მიმდინარეობის დროს რატომ არ ანახეთ დაზარალებულებს ფირი და რატომ არ გააცანით საქმის მასალები? 

_ მაშინ ამის შესაძლებლობა არ იყო. ოჯახი შოკში იყო, დაიღუპა ახალგაზრდა კაცი და ვერავინ მივიდოდა და ვერავინ ეტყოდა, მოდით, საქმის მასალებს გაეცანითო. თავად მეუღლეც უმძიმეს მდგომარეობაში გახლდათ, ექიმების დახმარება სჭირდებოდა, ისეთ შოკურ და სტრესულ მდგომარეობაში იყო. 

_ სულ რამდენი მოიხადა დევაძემ? 

_ 4 წელი და 8 თვე ანუ იმაზე მეტი, რაც გაუფრთხილებლობით ჩადენილი დანაშაულისთვისაა გათვალისწინებული. 

_ დევაძისა და მინდია გორაძის, იგივე ლავას ოღლის ურთიერთობაზეც უნდა გკითხოთ. მაშინ აპელირებდნენ, რომ დევაძე ლავას ოღლის უახლოესი მეგობარი და დაჯგუფების წევრი იყო. 

_ მაშინ ეს ყველაფერი ოპოზიციამ თქვა, რადგან სჭირდებოდა ხმაური და სახელმწიფოს წინააღმდეგ წასვლა, სჭირდებოდა იმის თქმა, რომ კრიმინალებმა პოლიციელებზე ნადირობა დაიწყეს. რაც შეეხება დევაძეს, თავის დროზე, ის გორაძესთან ერთად დადიოდა ჭიდაობაზე ანუ ისინი ერთ დარბაზში ვარჯიშობდნენ ზუსტად ისე, როგორც ვარჯიშობდა კიდევ ასი კაცი. ბავშვობაში, შეიძლება, მეც დავდიოდი სპორტის სახეობაზე რომელიმე ცნობილ, თუ უცნობ ადამიანთან ერთად და მერე რა? ადამიანს რომ იცნობ, ეს დანაშაულია? 

რაც შეეხება მეგობრობასა და დაჯგუფების წევრობას, პროკურატურამ ვერ დადო ვერც ერთი მტკიცებულება, რომ ბოლო წლებში, დევაძესა და ლავას ოღლის რაიმე კავშირი ჰქონიათ, ან ტელეფონით უსაუბრიათ, ან შეხვედრიან. ეს იყო ოპოზიციის მიერ, თითიდან გამოწოვილი ინფორმაცია. ვიღაცამ უთხრა, რომ ისინი ბავშვობაში ერთ დარბაზში ვარჯიშობდნენ და ეს დაიხვია ხელზე. დაახლოებით, 200-300 კაცი იტყვის ბათუმში, რომ ბავშვობაში, დევაძესთან ერთად ვარჯიშობდა და შესაბამისად, გორაძესთან ერთადაც და ეს დანაშაული არ არის. 

_ ახლა რას აკეთებს დევაძე? 

_ მალე ჭიდაობაში ვეტერანთა პირველობა გაიმართება. რამაზს სურდა, ციხიდან მიეღო ამ ტურნირში მონაწილეობა, ახლა კი თავისუფლებაზე მყოფი ვარჯიშობს და აუცილებლად იჭიდავებს. ის სპორტსმენი კაცია, არ არის მილიონერი, როგორც ამას აშუქებდნენ. მისი დაჭერის შემდეგ, ოჯახს ისე გაუჭირდა, რომ ბინა ბანკში ჩადეს და დიდი ალბათობით, ამ ბინას დაკარგავენ. კიდევ ვიმეორებ, რაც ჩაიდინა დევაძემ, იმისთვის უკვე მოიხადა სასჯელი. 

_ ითქვა ისიც, რომ შეწყალების თხოვნით პრეზიდენტს, პატრიარქის ძმისშვილმა, მეუფე დიმიტრიმაც მიმართა. 

_ შეწყალების საქმეში მეუფე დიმიტრის განცხადება არ დევს, შესაბამისად, ამას ვერ დავადასტურებ. იყო დევაძის პირადი მოძღვრის განცხადება, მაგრამ არა მეუფე დიმიტრისა.

ბათო ჯაფარიძე

 

]]>
versiaprinti@yahoo.com (super admin) სამართალი Wed, 02 Oct 2019 12:03:05 +0400
რატომ იკლავენ თავს მოზარდები http://www.versia.ge/2013-07-31-11-23-46/item/6354-რატომ-იკლავენ-თავს-მოზარდები.html http://www.versia.ge/2013-07-31-11-23-46/item/6354-რატომ-იკლავენ-თავს-მოზარდები.html

რამდენი ადამიანია დასჯილი თვითმკვლელობამდე მიყვანის მუხლით და როგორ უნდა დავიცვათ ბავშვები ბულინგისგან

ბოლო დროს, სუიციდის შემთხვევები გახშირდა და ასეთ დროს, შსს გამოძიებას, როგორც წესი, თვითმკვლელობამდე მიყვანის მუხლით იწყებს, თუმცა საინტერესოა, თვითმკვლელობამდე მიყვანის გამო, ვინმე დაისაჯა თუ არა? „ვერსიამ“ გაარკვია, როგორია სისხლის სამართლის 115-ე მუხლით აღძრული და გახსნილი საქმეების სტატისტიკა. ამასთან, ფსიქოლოგსაც ვესაუბრეთ, რომელმაც აგვიხსნა, რა უყალიბებს ადამიანებს და, განსაკუთრებით, მოზარდებს ისეთ სისასტიკეს, რასაც ბულინგი ჰქვია და რის გამოც, მათი თანატოლები სიცოცხლეს თვითმკვლელობით ამთავრებენ. ფსიქოლოგმა ისიც გვითხრა, თუ რა უნდა გააკეთოს ოჯახმა, საზოგადოებამ და სკოლამ ბავშვის სწორად აღსაზრდელად... ამავე სტატიაში გაგაცნობთ შსს-ს მიერ მოწოდებულ ინფორმაციას და თვითმკვლელობამდე მიყვანის მუხლით აღძრულ ქეისებსაც...

რამდენიმე დღის წინ, ვარკეთილში, 16 წლის ბიჭი კორპუსის სახურავიდან გადმოხტა და სიცოცოცხლე სუიციდით დაასრულა. გავრცელებული ინფორმაციით, თანატოლებმა მას დამამცირებელ გარემოებაში, მობილური ტელეფონი წაართვეს და დაალომბარდეს. 16 წლის მოზარდის სუიციდის მიზეზი ბულინგი გახდა. 

შინაგან საქმეთა სამინისტრო ვარკეთილში, მეცხრე სართულიდან 16 წლის ბიჭის გადმოვარდნის საქმეზე ინფორმაციას ავრცელებს, სადაც ნათქვამია: 

„შსს-ს თბილისის პოლიციის დეპარტამენტის ისანი-სამგორის სამმართველოს თანამშრომლებმა, ჩატარებული ოპერატიულ-სამძებრო და საგამოძიებო ღონისძიებების შედეგად, ძარცვის ბრალდებით, 6 პირი დააკავეს. დანაშაული 2-დან 8 წლამდე ვადით თავისუფლების აღკვეთას ითვალისწინებს. 

მოსამართლის განჩინების საფუძველზე, დაკავებულები არიან: 1999 წელს დაბადებული გ.შ., 2002 წელს დაბადებული, წარსულში ქურდობისთვის მრავალჯერ ნასამართლევი გ.ბ., 1998 წელს დაბადებული გ.გ., 2002 წელს დაბადებული გ.მ. და 1998 წელს დაბადებული, წარსულში ძალადობისა და ძარცვისთვის ნასამართლევი გ.წ. 

გამოძიებით დადგინდა, რომ ბრალდებულებმა, მიმდინარე წლის 23 სექტემბერს, ვარკეთილის მე-3 მასივში, 2003 წელს დაბადებულ გ.ყ.-ს, მეგობრების თანდასწრებით სიტყვიერი შეურაცხყოფა მიაყენეს და დამამცირებელ გარემოებაში, ძალის გამოყენებით წაართვეს მობილური ტელეფონი. აღნიშნული ფაქტის შემდეგ არასრულწლოვანმა თავი მოიკლა. მომხდარიდან მეორე დღეს, ამავე ფაქტზე პოლიციამ 1999 წელს დაბადებული, წარსულში ქურდობისა და ძარცვისთვის ნასამართლევი გ.მ.-ც დააკავა, რომელსაც, ძარცვასთან ერთად, ბრალად ედება ცეცხლსასროლი იარაღისა და საბრძოლო მასალის უკანონო შეძენა-შენახვა-ტარება. მისი პირადი ჩხრეკისას, ამოღებულია „ნაგანის“ ტიპის რევოლვერი და საბრძოლო ვაზნები. 

გამოძიება მიმდინარეობს ძარცვის ფაქტზე, რამაც მნიშვნელოვანი ზიანი გამოიწვია, ასევე, თვითმკვლელობამდე მიყვანის, ცეცხლსასროლი იარაღისა და საბრძოლო მასალის მართლსაწინააღმდეგო შეძენა-შენახვა-ტარების ფაქტებზე, საქართველოს სსკ-ის 178-ე მუხლის მე-2 ნაწილის „ა“ ქვეპუნქტითა და მე-3 ნაწილის „ბ“ ქვეპუნქტით, 115-ე მუხლის 1-ლი ნაწილით და 236-ე მუხლის მე-3 და მე-4 ნაწილებით“. 

თვითმკვლელობამდე მიყვანის ბრალდებით, შსს-მ რამდენიმე თვის წინ, გურიაში მომხდარ ფაქტზეც ერთი პირი დააკავა: 

„შსს-ს გურიის პოლიციის დეპარტამენტის თანამშრომლებმა, ცხელ კვალზე ჩატარებული ოპერატიულ-სამძებრო და საგამოძიებო მოქმედებების შედეგად, 1996 წელს დაბადებული მ.თ., თვითმკვლელობამდე მიყვანისა და წინასწარი შეცნობით არასრულწლოვნის მიმართ გარყვნილი ქმედების ბრალდებით, ოზურგეთში დააკავეს. ჩადენილი დანაშაულის უმაღლესი სასჯელი 7 წლამდე თავისუფლების აღკვეთას ითვალისწინებს. 

გამოძიებით დადგინდა, რომ ბრალდებულმა, ოზურგეთის მუნიციპალიტეტის სოფელ ნატანებში მცხოვრები, 2002 წელს დაბადებული ნ.ბ., სოციალური ქსელის -Fაცებოოკ-ის საშუალებით გაიცნო. მ.თ.-ს, გარკვეული დროის განმავლობაში, ამავე ქსელის საშუალებით, გოგონასთან მიმოწერა ჰქონდა. მოგვიანებით, ბრალდებული ნ.ბ.-ს, აღნიშნული მიმოწერის მისივე მშობლებისთვის გაგზავნით დაემუქრა, რის შედეგადაც, არასრულწლოვანი გოგონა ინტიმური ხასიათის ფოტოსურათებისა და ვიდეოკადრების გადაღებასა და გაგზავნაზე დაითანხმა. მას შემდეგ, რაც ნ.ბ.-მ გადაღებული ფოტოები და ვიდეომასალა გადაუგზავნა, ბრალდებულმა გოგონას დაშანტაჟება დაიწყო, რის გამოც, ამ უკანასკნელმა საკუთარი საცხოვრებელი სახლის ეზოში თავი ჩამოიხრჩო. დაკავებული ჩადენილ დანაშაულს აღიარებს. 

გამოძიება თვითმკვლელობამდე მიყვანის, ასევე, წინასწარი შეცნობით არასრულწლოვნის მიმართ ჩადენილ გარყვნილი ქმედების ფაქტზე, საქართველოს სსკ-ს 115-ე მუხლით და 141-ე მუხლის 1-ლი ნაწილით მიმდინარეობს“. 

შინაგან საქმეთა სამინისტროს ვებგვერდზე განთავსებულ საჯარო ინფორმაციაში, 115-ე მუხლით აღძრული საქმეების სტატისტიკა კი ასეთია: 

2018 წელი _ სულ რეგისტრირებულია 1 253 საქმე; გახსნილია _ 3. 

2019 წელი _ რეგისტრირებულია 1 392 საქმე; გახნსილია _ 6. 

„ვერსია“ ფსიქოლოგ ზურა მხეიძეს ესაუბრა: 

_ ბატონო ზურა, რა უყალიბებს ადამიანებს, განსაკუთრებით, მოზარდებს იმგვარ სისასტიკეს, რასაც სხვები თვითმკვლელობამდე მიჰყავს? 

_ საერთოდ, ბავშვები განსწავლას ახორციელებენ გარკვეული ქცევითი მოდელებით და სოციალური გარემოთი ანუ რაც გარეთ ტრიალებს, მათთვის ჩვეულებრივი რამაა. მასმედიასა და ურთიერთობებში რა აგრესიასაც ვხედავთ, ამის კულტივირება ხდება. აგრესია ყოველდღიური, ჩვეულებრივი მოვლენა და დასაშვებია, თან მე რასაც მინდა, იმას ვიტყვი თქვენ შესახებ და ეს გადის აზრისა და თავისუფლების გამოხატვაში ანუ წახალისებულია ეს აგრესია. მაშინ ნუღარ გვიკვირს, რომ მოზარდებმა და ბავშვებმა ეს შეითვისონ და ხშირად განახორციელონ კიდეც ასეთი ქცევები. 

_ ასეთ დროს რა როლი ენიჭება ოჯახსა და მშობლებს? 

_ ოჯახს ერთ-ერთი, გადამწყვეტი მნიშვნელობა აქვს აღზრდის პროცესში იმიტომ, რომ გარემო იმდენად აგრესიული და არასწორია, ერთადერთ იმედად, რომელმაც ბავშვს სწორი ღირებულებები უნდა ჩამოუყალიბოს, ოჯახის ინსტიტუტი რჩება. რა თქმა უნდა, სკოლასაც თავისი პასუხისმგებლობა აქვს, ოჯახსაც და ზოგადად, საზოგადოებასაც. უბრალოდ, კარგად ვიცით, რომ არავის უნდა, თვითონ დაიბრალოს ეს საკითხი და მარტო ერთ მხარეზე ხდება გადაბრალება. გადამწყვეტი მნიშვნელობა აქვს ოჯახს, რას ხედავს ბავშვი, რა ღირებულებებია მის ოჯახში და ა.შ. 

_ მშობელმა რა უნდა გააკეთოს, რომ მისი შვილი მსხვერპლი არ გახდეს? შეიძლება, კარგ მოქალაქედ აღვზარდო შვილი და სხვას არაფერი დაუშავოს, მაგრამ როგორი მეთოდით გავზარდო, რომ თავად არ გახდეს სხვების მსხვერპლი? 

_ ზოგადად, მოზარდების ასაკი, განსაკუთრებით, 12 წლიდან ზემოთ, ძალიან მგრძნობიარეა. ოჯახთან ერთი პრობლემაა: ეს აღარ არის ბავშვი, არც ზრდასრულია, ამ ასაკში ხდება თავისი სოციალური სტატუსის დამკვიდრება. თუ ბავშვისთვის მნიშვნელოვანია მასწავლებლისა და მშობლის შეფასება, შემდეგ უკვე, ამგვარი შეფასება საკმარისი არაა და მას აინტერებს თავისი სტატუსი თანატოლებში. აქედან გამომდინარე, იწყება ამბოხი, მათ შორის, მშობლის მიმართაც იმის დასამტკიცებლად, რომ პიროვნებაა. ამიტომ, ამ ასაკში ბულინგი და ის, რაც ხელს უშლის მის რეალიზებას, სოციალურ სივრცეში ადგილის დამკვიდრებას, გაცილებით მგრძნობიარედ აღიქმება. ოჯახმა რა უნდა გააკეთოს? პირველ რიგში, მნიშვნელოვანია, რა სიტუაციაა, რა ღირებულებებს ხედავს ოჯახში მოზარდი. ეს მგრძნობიარე, გარდატეხის პერიოდი, მაქსიმალურად ფრთხილად უნდა გაიაროს მშობელმა იმიტომ, რომ მოზარდები მგრძნობიარენი არიან ისეთი რაღაცის მიმართ, რასაც ზრდასრული საერთოდ არ მიაქცევს ყურადღებას, მოზარდისთვის კი ეს მნიშვნელოვანია მანამ, სანამ თავის თავზე შეხედულება არ განუვითარდება. მშობლებს ხშირად არ გვახსოვს, იმ პერიოდში რა განცდები გვქონდა, გეგონება, ბავშვობიდან უცებ გავიზარდეთ, მაგრამ რთული პერიოდია გასავლელი... 

_ სახელმწიფომ ამ კუთხით მარეგულირებლის როლი როგორ უნდა მოირგოს? 

_ სახელმწიფომ უნდა გაარკვიოს, რა ტიპის მოქალაქე უნდა, რომ მიიღოს. სახელმწიფოს აქვს მოვალეობები თავისი მოქალაქეების მიმართ, მაგრამ მოქალაქესაც აქვს მოვალეობები სახელმწიფოს მიმართ. მარტო უნარების, ინგლისურის ცოდნაზე კი არა, ღირებულებების ჩამოყალეიბებაზეც უნდა იფიქრონ. მე, მაგალითად, არ ვიცი, რანაირ მოქალაქეს ზრდის სახელმწიფო. ცოდნით ნაწილში, ასე თუ ისე, იციან, რა უნდა ასწავლონ, მაგრამ რა ღირებულებებით უნდა დააფორმირონ, ეს არ ჩანს. ჩვენ პროპაგანდას სალანძღავ სიტყვად ვიყენებთ, არადა, მას თავის მნიშვნელობა აქვს ღირებულებით ნაწილში. პროპაგანდა მიწოდების მეთოდია. ჯანსაღი ცხოვრების პროპაგანდას რომ ეწევი, ესეც პროპაგანდაა. ჯანსაღი ცხოვრება ჩვენთან ფიტნესსა და დიეტასთანაა გაიგივებული, სინამდვილეში, სოციალურ გარემოზე, სამსახურში კარგ პირობებსა და მთელ რიგ ფაქტორებზეა საუბარი. მოკლედ, სახელმწიფომ ყველაფერ ამის ფორმირება საბავშვო ბაღიდან, ნელ-ნელა უნდა განსაზღვროს.

თათია გოჩაძე

]]>
versiaprinti@yahoo.com (super admin) სამართალი Wed, 02 Oct 2019 12:02:50 +0400
„კლანის წევრი“ მოსამართლეების „გრეხები“ http://www.versia.ge/2013-07-31-11-23-46/item/6342-„კლანის-წევრი“-მოსამართლეების-„გრეხები“.html http://www.versia.ge/2013-07-31-11-23-46/item/6342-„კლანის-წევრი“-მოსამართლეების-„გრეხები“.html

ოდიოზური სახეების გამდიდრებისა და „გაქოცების“ სკანდალური ანატომია

მიმდინარე კვირა პარლამენტში უზენაესი სასამართლოს მოსამართლეობის კანდიდატებს დაეთმობათ. თავდაპირველად დეპუტატებმა თამარ ალანიას მოუსმინეს, თუმცა რაღა მოუსმინეს, ისეთი კითხვები დაუსვეს, რომლებზე პასუხიც მრავლასმნახველ მოსამართლესაც გაუჭირდა, თუმცა ეს ყველაფერი არ არის და ალანია არ იქნება გამონაკლისი. სხვებს ბევრად მწვავე კითხვები ელოდებათ და თუ რატომ, შევეცდებით ამაზე ქვემოთ მოგითხროთ. 

მაშ ასე, „ვერსია“ უზენაესი სასამართლოს მოსამართლეობის კანდიდატთა სკანდალურ საქმეებს და დოსიეებს გთავაზობთ.

რადგან პარლამენტში პირველად ქალბატონი თამარი დაიბარეს, ჩვენც მისით დავიწყოთ. ალანიას კარიერაში ერთ-ერთი, ყველაზე სკანდალური გვანცა ყუფარაძის საქმეა. 2007 წელს, სააპელაციო სასამართლოს სისხლის სამართლის საქმეთა პალატამ, მოსამართლე თამარ ალანიას თავმჯდომარეობით, განიხილა არასრულწლოვან გვანცა ყუფარაძის სისხლის სამართლის საქმე, განზრახ მკვლელობის მცდელობისთვის, რომელიც დამნაშავემ ჩაიდინა წინასწარი შეცნობით არასრულწლოვნისა, ან უმწეო მდგომარეობაში მყოფის მიმართ, ხულიგნური ქვენაგრძნობით, განსაკუთრებული სისასტიკით. 

გვანცა ყუფარაძე 2006 წლის ნოემბერში დააკავეს თანაკლასელის მკვლელობის მცდელობისთვის. 2007 წლის ივნისში, პირველი ინსტანციის სასამართლომ მას 10 წლით თავისუფლების აღკვეთა მიუსაჯა, აქედან ნახევარი ჩაეთვალა პირობითად. გადაწყვეტილება ძალაში დატოვა სააპელაციო სასამართლომ, ხოლო უზენაესმა სასამართლომ საჩივარი დაუშვებლად სცნო. საინტერესოა, რომ ახლაც, ამ გადასახედიდან, თამარ ალანია ამბობს, რომ ყუფარაძეს ბევრი არ მიუსაჯა და განაჩენი სავსებით ლოგიკური და ადეკვატური იყო. 

ალანიას ხელში გაიარა „მუხროვანის ამბოხის“ საქმემაც. ქალბატონმა თამარმა არც ამჯერად „იძუნწა“ და კობა ოთანაძეს 29, ლევან ამირიძეს _ 28, ხოლო მამუკა გორგიაშვილს 19 წელი მიუსაჯა. 

არანაკლებ საინტერესოა გიორგი მიქაუტაძის კარიერა და მის ხელში გავლილი საქმეები: 2012 წელს, სწორედ გიორგი მიქაუტაძის გადაწყვეტილებით, დააჯარიმეს 17 პირი, რომელმაც „ქართულ ოცნებას“ თანხა შესწირა. მაშინდელ ხელისუფლებას ოფიციალური დევნა ჰქონდა გამოცხადებული „ოცნების“ აქტივისტებზე და მაშინ მიქაუტაძეს ოპოზიცია ხელისუფლების დაკვეთის შემსრულებელს ეძახდა, თუმცა მიქაუტაძის კარიერაში არის ერთი გამორჩეული საქმე, სადაც ის არა, როგორც მოსამართლე, არამედ, როგორც მხარე ფიქსირდება. 

2016 წლის აგვისტოში, აჭარაში, დაბა გონიოს სანაპიროზე მოხდა ინციდენტი მოსამართლე გიორგი მიქაუტაძესა და მოქალაქე თამარ ხაჭაპურიძეს შორის, რომლის ადმინისტრაციული სამართალდარღვევის საქმეც, მოსამართლე მიქაუტაძემ, განიხილა ინციდენტამდე 1 წლით ადრე. თამარ ხაჭაპურიძის განცხადებით, მის 13 წლის შვილს მოსამართლემ სცემა. გამოძიება არასრულწლოვნის ცემის მუხლით დაიწყო. გამომძიებლის განცხადებით, მოზარდის ცემის ფაქტზე დაკითხეს იუსტიციის უმაღლესი საბჭოს მდივანი, გიორგი მიქაუტაძე, თუმცა საქმე არ გამოძიებულა, ხოლო დღეის მდგომარეობით, გამოძიება ხანდაზმულია, თუმცა გონიოს ინციდენტთან დაკავშირებით, პროკურატურამ არასრულწლოვნის ცემის მუხლით დაწყებულ საქმეს კვალიფიკაცია შეუცვალა და გამოძიება გააგრძელა მოსამართლის სიცოცხლის ხელყოფის მუქარის ფაქტზე, რის შედეგადაც, არასრულწლოვანი პირის მშობლები სასამართლომ 4 000 ლარით დააჯარიმა. 

გოჩა ჯეირანაშვილი, ერთი შეხედვით, ფართო საზოგადოებისთვის უცნობი მოსამართლეა, თუმცა მასთან კითხვები არასამთავრობოებს ქონებრივი დეკლარაციის გამო აქვთ. საქმე ისაა, რომ 2018 წელს, მისი გასავალი შემოსავალს აჭარბებს და საუბარი 100 ათას ლარზეა ანუ მოსამართლეს 100 ათასით მეტი ხარჯი აქვს, თუმცა არ ჩანს, საიდან მოიტანა ეს ფული. ალბათ, დაგვეთანხმებით, როცა საუბარი მოსამართლეზეა და არსაიდან 100 ათასი ლარი ჩნდება, კითხვები სხვა უწყებებმაც უნდა დასვან. 

კიდევ ერთ კანდიდატს, ზაზა თავაძეს არასამთავრობო სექტორი ზურაბ ადეიშვილის კადრად მიიჩნევს. საქართველოს გენერალური პროკურატურის საკადრო უზრუნველყოფის დეპარტამენტის უფროსის მოადგილედ მუშაობისას (2004-2007), მისი უშუალო ხელმძღვანელი იყო ვასილ როინიშვილი (ამჟამად უზენაესი სასამართლოს თავმჯდომარის მოადგილე და ადმინისტრაციულ საქმეთა პალატის თავმჯდომარე), ამავე დეპარტამენტის უფროსად მუშაობისას (2007-2008) კი – ზურაბ ადეიშვილი. საქართველოს იუსტიციის მინისტრის მოადგილედ მუშაობისას (2008-2010 წლები), მინისტრი იყო ნიკა გვარამია (2008 წელი), ხოლო შემდეგ – ზურაბ ადეიშვილი (2008-2010 წლები). ზაზა თავაძესთან ერთად, მინისტრის მოადგილე გახლდათ მაია კოპალეიშვილი (2007-2009 წლები). ზაზა თავაძე საკონსტიტუციო სასამართლოს მოსამართლედ დანიშნა საქართველოს უზენაესი სასამართლოს პლენუმმა შემდეგი შემადგენლობით: კონსტანტინე კუბლაშვილი, მიხეილ ჩინჩალაძე, ლევან მურუსიძე, ზაზა მეიშვილი, ვალერი ცერცვაძე, ვასილ როინიშვილი, პაატა სილაგაძე. 

კიდევ ერთი საინტერესო საკითხი ის გახლავთ, რომ სახელმწიფოსგან სიმბოლურ ფასად მიღებული ბინა, თავაძემ მეოთხედ მილიონ დოლარად გაყიდა, თუმცა... ისევ იმ ბინაში ცხოვრობს. ზაზა თავაძე საქართველოში ერთ-ერთი, ყველაზე მაღალშემოსავლიანი მოსამართლეა. 2010-2018 წლებში, მისმა ანაზღაურებამ თითქმის მილიონ ლარს მიაღწია. ყველაზე მაღალი ხელფასი 2017 წელს უფიქსირდება, ჯამში, 138 484 ლარი. 

კანდიდატის გამოკვეთილად მაღალი ანაზღაურება მედიის ყურადღების საგანი არაერთხელ გახდა, მათ შორის, 2016 წელსაც, როდესაც 2 თვეში, ხელფასის სახით, 37 478 ლარი მიიღო. 2010 წელს, ზაზა თავაძე საკონსტიტუციო სასამართლოს წევრი გახდა და სახელმწიფოსგან ბათუმში ბინა სიმბოლურ ფასად მიიღო. 2016 წელს, მან აღნიშნული ბინა, სავარაუდოდ, მეუღლის ძმის სიდედრს, ირმა ირემაძეს 250 000 აშშ დოლარად მიჰყიდა. ამ ბინის შეძენამდე, რომელიც ნახევარ მილიონ ლარზე მეტი დაჯდა, ქალბატონ ირმა ირემაძეს რაიმე ტიპის მნიშვნელოვანი ქონება არ უფიქსირდება: მის სახელზე რეგისტრირებული იყო მხოლოდ მემკვიდრეობით გადმოცემული ბინა (2006 წელი). 

ეჭვებს აჩენს ის გარემოებაც, რომ ირმა ირემაძემ, შეძენიდან რამდენიმე დღეში, უძრავი ქონება, ვინმე ტატიანა ოსოტოვაზე გაასხვისა. მხარეებს შორის ნასყიდობის შეთანხმების პირობები უცნობია. ბათუმის ბინის გასხვისების შემდეგ, მოსამართლე ზაზა თავაძე და მისი ოჯახი კვლავ იმავე სახლში ცხოვრობდნენ. ერთ-ერთ მედიასაშუალებასთან საუბრისას, კანდიდატის მეუღლემ აღნიშნა, რომ მათ ორივე ახალ მფლობელთან ჰქონდათ შეთანხმება, რომლის თანახმადაც, გაყიდულ ბინაში ცხოვრების გაგრძელება შეეძლოთ. უკანასკნელ წლებში, აღნიშნული უძრავი ქონება კიდევ რამდენჯერმე გაიყიდა. 

როცა კომპანია აქტიური აღარ არის, ეს იმას ნიშნავს, რომ მას შემოსავალი არ მოაქვს. ამის მიუხედავად, მოსამართლე თამარ ზამბახიძის მეუღლემ და მისმა პარტნიორებმა, „ქართულ ოცნებას“ სოლიდური თანხა შესწირეს და ეს მაშინ, როცა ის კომპანია, რომლის მეწილეებიც არიან, უბრალოდ, გაჩერებულია. 2017 წელს, მოსამართლე თამარ ზამბახიძე საჯარო სამსახურის ბიურომ დააჯარიმა, ვინაიდან კანდიდატის მიერ წარდგენილ ქონებრივ დეკლარაციაში არ იყო სრული ინფორმაცია მისი მეუღლის სამეწარმეო საქმიანობაზე. კერძოდ, მან არ მიუთითა მეუღლის კავშირი ორ საწარმოსთან, რომლებიც დეკლარაციის შევსების მომენტისთვის არ ეწეოდნენ ეკონომიკურ საქმიანობას, არ ჰქონდათ ბრუნვა და შემოსავალი. 

აღსანიშნავია, რომ დღეს მოქმედი კანონმდებლობით, ასეთ საწარმოზე მიუთითებლობა აღარ არის დაჯარიმების საფუძველი. კანდიდატის მეუღლე შპს „ყაზბეგი +“-ის 17%-იანი წილის მფლობელი და დირექტორია. აღსანიშნავია, რომ კომპანიის წილებს ინაწილებენ სხვა პარტნიორები, რომელთაგან 3 პირი – ირაკლი თოფაძე (20 000 ლარი), ნიკოლოზ სვანიძე (20 000 ლარი), ნიკოლოზ ბახტაძე (70 000 ლარი) – მმართველი პარტიის „ქართული ოცნების“ შემომწირველია. მათ პარტია „ქართულ ოცნებას“, ჯამში, 120,000 ლარი შესწირეს. 

ქალბატონი ლალი ფაფიაშვილი ის კანდიდატია, რომელიც პარლამენტში თავს შინაურულად იგრძნობს. მას დეპუტატის მანდატი 2004-07 წლებში ჰქონდა და საკანონმდებლო ორგანოში ნაციონალური მოძრაობის სიით მოხვდა. რაც შეეხება შემოსავალს, ლალი ფაფიაშვილს 2007-2017 წლებში, პროფესიული და აკადემიური საქმიანობის შედეგად, შრომის ანაზღაურების სახით, მიღებული აქვს 1,638,413 ლარი. 

კანდიდატი ლაშა ქოჩიაშვილი საზოგადოებას რუსთავის მეტალურგიული ქარხნის საქმით უნდა ახსოვდეს. მაშინ ქოჩიაშვილის გადაწყვეტილებით, დაახლოებით 5 ათასლარიანი დავალიანების გამო, 120 მილიონის აქტივები დაყადაღდა. 

„აღმაშფოთებელია, რომ რუსთავის მეტალურგიული ქარხანა არის დღეს დაყადაღებული. დაახლოებით, 4 500 ლარის დავალიანების გამო, 120 მილიონი დოლარის ღირებულების საწარმო არის დაყადაღებული. ეს არის კატასტროფა, ეს არის პირდაპირ დივერსია. ამ საწარმოში არის დასაქმებული 2 500 ადგილობრივი მოსახლე და მე მინდა მივმართო იმ ადამიანს, ვინც ეს აბსოლუტურად გაუმართლებელი, მე ვიტყოდი, დივერსიული გადაწყვეტილება მიიღო. მას მოუწევს პასუხი აგოს, როგორც მინიმუმ 2 500 კაცის ოჯახის წინაშე. მე იმედი მაქვს, რომ სასამართლოს ახალი თავმჯდომარე დაინტერესდება ამ საქმით იმიტომ, რომ მოსამართლე, რომელმაც მიიღო ეს გადაწყვეტილება, აუცილებლად უნდა წარდგეს, პირველ რიგში, საზოგადოების წინაშე და განმარტოს, თუ რატომ ახდენს ასეთ დივერსიულ გადაწყვეტილებებს“, _ ეს განცხადება პრემიერ-მინისტრის პოსტზე ყოფნის დროს, ირაკლი ღარიბაშვილმა გააკეთა. 

რაც შეეხება ქოჩიაშვილის ფინანსებს, ყველაზე საინტერესო, ალბათ, მისი მეუღლის სამსახურია. ანა ხიჯაკიძე სტომატოლოგია და ერთი წლის განმავლობაში, კლინიკიდან მისმა შემოსავალმა 535 ლარი ანუ პრაქტიკულად, ერთი კბილის ფასი შეადგინა. 

მაია ვაჩაძე ერთ-ერთი, ყველაზე გამოცდილი და, რაღა თქმა უნდა, ერთ-ერთი, ყველაზე მაღალშემოსავლიანი მოსამართლეა. 2010-2016 წლებში, სასამართლო სისტემიდან, ანაზღაურების სახით, მიღებული აქვს 872 406 ლარი და რაც მნიშვნელოვანია, არ აქვს საბანკო ვალდებულება, რაც ასე სანატრელია საქართველოს მოსახლეობის აბსოლუტური უმრავლესობისთვის. 

მერაბ გაბინაშვილი საქართველოს სამართლის ისტორიაში აუცილებლად შევა. მას წილად ხვდა ნიკანორ მელიას საქმე, როცა დეპუტატს იმუნიტეტი შეუჩერეს და სამართალში მისცეს. ეს გახლდათ უპრეცედენტო ქმედება და ამ საქმის განსჯა ბედმა, თუ უბედობამ, სწორედ მერაბ გაბინაშვილს არგუნა. რა გადაწყვეტილება მიიღო გაბინაშვილმა, კარგად მოგეხსენებათ და სავარაუდოდ, მელია თავის სამაჯურს მოსამართლეს აუცილებლად ანახებს. გაბინაშვილს არასამთავრობო სექტორი ე.წ. კლანის აქტიურ წევრად მოიაზრებს და თამამად შეიძლება ითქვას, რომ მას პარლამენტში იოლი საათები არ ექნება. 

2013-2017 წლებში, მოსამართლე მერაბ გაბინაშვილი იყო იუსტიციის უმაღლესი საბჭოს წევრი. ამავე პერიოდში, თბილისის საქალაქო სასამართლოს თავმჯდომარე მამუკა ახვლედიანი, საბჭომ თანამდებობიდან გაათავისუფლა. ასევე, მოსამართლე გაბინაშვილის საბჭოში მოღვაწეობის პერიოდს ემთხვევა მოსამართლეთა საგამოცდო ტესტების გამჟღავნების საქმე. 

2016 წელს, ცნობილი გახდა, რომ მოსამართლე ნათია გუჯაბიძის საცხოვრებელი ბინის ქირა, წლების განმავლობაში, სახელმწიფო ბიუჯეტიდან იფარებოდა იმ პირობებში,

როდესაც მოსამართლე ბინას, საკუთარი დედისგან ქირაობდა. იუსტიციის უმაღლესი საბჭოს განცხადების მიხედვით, ინფორმაცია სახელმწიფო თანხების გაფლანგვის შესახებ, სიმართლეს არ შეესაბამება. არასამთავრობო ორგანიზაციები მიიჩნევენ, რომ ამ საკითხზე იუსტიციის უმაღლეს საბჭოს უნდა დაეწყო დისციპლინური სამართალწარმოება, ხოლო პროკურატურას – გამოძიება. საზოგადოებისთვის უცნობია, მოჰყვა თუ არა რეაგირება ამ ფაქტს. 

კანდიდატ მერაბ გაბინაშვილის იუსტიციის უმაღლესი საბჭოს წევრობის პერიოდში, აქტიურად გამოიყენებოდა მოსამართლეთა უკონკურსოდ გადაყვანისა და დაწინაურების მექანიზმი. ამ პერიოდში, მოსამართლე უკონკურსოდ დაწინაურდა თბილისის სააპელაციო სასამართლოში. მოსამართლე გაბინაშვილის იუსტიციის უმაღლესი საბჭოს წევრობის პერიოდში, საბჭომ მხარი დაუჭირა ლევან მურუსიძისა (3 წლის ვადით) და მიხეილ ჩინჩალაძის (უვადოდ) თბილისის სააპელაციო სასამართლოს მოსამართლეებად გამწესებას, ასევე, მიხეილ ჩინჩალაძის თბილისის სააპელაციო სასამართლოს თავმჯდომარედ დანიშვნას. 

დეკლარაციის მიხედვით კი... ბატონ მერაბთან კასპის ნაკვეთის გაქრობაზე აქვთ კითხვები. მერაბ გაბინაშვილმა 2017 წელს, 60 000 დოლარის სესხი აიღო და ეს თანხა დუშეთში სახლის შეძენას მოახმარა. 2009-2015 წლების მდგომარეობით, მერაბ გაბინაშვილის საკუთრებაში იყო მიწის ნაკვეთი კასპში, საერთო ფართობით 2100 კვ.მ., თუმცა შემდგომ, დეკლარაციებში აღნიშნულის შესახებ ინფორმაცია ყოველგვარი დასაბუთებისა და კონკრეტული მონაცემების გარეშე იკარგება. 

კიდევ ერთმა კანდიდატმა, მირანდა ერემაძემ, 2009 წელს ანუ მაშინ, როცა რეალურად არანაირი წინაპირობა არ არსებობდა იმისა, რომ ხელისუფლება 3 წელიწადში შეიცვლებოდა, განიხილა დაჩი ცაგურიას საქმე. საინტერესოა, რომ კანონი, რომლის საფუძველზეც პირი გასამართლდა, საბჭოთა პერიოდშია მიღებული. სასამართლო სხდომა ჩატარდა იმავე დღეს, რა დღესაც პოლიციამ შეადგინა სამართალდარღვევის ოქმი, შესაბამისად, პირს ფაქტობრივად, არ მიეცა სათანადო დრო და შესაძლებლობა მტკიცებულებების შესაგროვებლად და საკუთარი არგუმენტაციის ჩამოსაყალიბებლად. პროცესის განმავლობაში, დაჩი ცაგურიას მიეცა მხოლოდ 30 წუთი იმისთვის, რომ უზრუნველეყო მისი ინტერესების დამცველის/ წარმომადგენლის საქმეში ჩართვა. 

მოსამართლე მირანდა ერემაძის მეუღლე, მალხაზ გრიგალავა კომერციული საქმიანობით არის დაკავებული. იგი შპს „დიარონის“ 100%-იანი წილის მფლობელი და ამავდროულად, დირექტორია. მალხაზ გრიგალავა საკუთარი კომპანიისთვის ფართს შპს „გეგასგან“ ქირაობს, რომლის 92.5%-იანი წილი გრიგოლ ლეკვეიშვილის საკუთრებაშია. ბატონმა გრიგოლ ლეკვეიშვილმა, 2017-2018 წლებში, პარტია „ქართულ ოცნებას“ 107 000 ლარი შესწირა. 

შპს „გეგას“ გარდა, გრიგოლ ლეკვეიშვილის საკუთრებაში არაერთი კომპანიაა, რომლებიც აქტიურად მონაწილეობენ სახელმწიფო ტენდერებში და საკმაოდ მსხვილ საბიუჯეტო კონტრაქტებს იღებენ. უკანასკნელი მონაცემებით, გრიგოლ ლეკვეიშვილის კომპანიებს 167 გამარტივებულ შესყიდვაში აქვთ მონაწილეობა მიღებული. 

მოსამართლე ნინო ქადაგიძის კარიერაში კი ყველაზე საინტერესო მისი შემოსავლებია. მან 6 წელიწადში, ხელფასის სახით, თითქმის მილიონი მიიღო. უფრო კონკრეტულად კი, 2002-2018 წლებში, მოსამართლე ნინო ქადაგიძემ სამოსამართლო საქმიანობიდან 911 000 ლარი მიიღო. უზენაეს სასამართლოში იგი 2002-2012 წლებში მუშაობდა და მიღებულმა ანაზღაურებამ 475 105 ლარი შეადგინა, ხოლო 2013 წლიდან, სააპელაციო სასამართლოში გადავიდა და 2018 წლის ჩათვლით, ჯამში, 435 985ლარი გამოიმუშავა. მის კარიერაში ყველაზე მაღალი ხელფასი 2018 წლით თარიღდება, მიღებული თანხა 84 675 ლარი იყო. 

მოსამართლე ნინო ქადაგიძე 2013 წელს იყო „სს რუსთავ გაზის“ იურისტი, საიდანაც ანაზღაურების სახით, 4000 ლარი მიიღო. იგი საქართველოს უზენაესს სასამართლოში მოსამართლედ 2012 წლის ბოლომდე მუშაობდა, ხოლო სააპელაციო სასამართლოში, 2013 წლის ივნისიდან შეუდგა საქმიანობას. კონკრეტული თარიღი დასახელებული არ არის, თუმცა სავარაუდოა, რომ მან „სს რუსთავ გაზს“ მომსახურება იმ მოკლე პერიოდში გაუწია, რა დროსაც მოსამართლის ფუნქციას არ ასრულებდა. მოსამართლის მეუღლე, ირაკლი ანთაძე 2011-2016 წლებში, საქართველოს ნოტარიუსთა პალატაში ლოგისტიკის სპეციალისტად მუშაობდა, სადაც მან, ჯამში, 109,464 ლარი გამოიმუშავა. 

ისტორიაში შევა ბატონი ნუგზარ სხირტლაძეც, როგორც ერთ-ერთი პრეცენდენტული საქმის მოსამართლე. ტრანსგენდერი პირი სასამართლოში ითხოვდა იუსტიციის სამინისტროს საქვეუწყებო დაწესებულების ინდივიდუალური ადმინისტრაციული სამართლებრივი აქტების ბათილობას, რომლითაც უარი ეთქვა სააქტო ჩანაწერში სქესის ცვლილებაზე იმ მოტივით, რომ არ ჰქონდა ჩატარებული სქესის შეცვლის ოპერაცია. იგი ასევე, ითხოვდა ადმინისტრაციული ორგანოების მიერ ახალი აქტის გამოცემას, სადაც მისი სქესის ცვლილება აისახებოდა. თბილისის საქალაქო და სააპელაციო სასამართლოებმა სარჩელი არ დააკმაყოფილეს. 

საქართველოს უზენაესი სასამართლოს ადმინისტრაციულ საქმეთა პალატამ, სამი მოსამართლის შემადგენლობით, რომელსაც მოსამართლე ნუგზარ სხირტლაძე თავმჯდომარეობდა, ტრანსგენდერი პირის საკასაციო საჩივარი დაუშვებლად სცნო და არ მიიღო არსებითად განსახილველად. 

რაც შეეხება ფინანსებს, ბატონ ნუგზარს მილიონზე მეტი აქვს მიღებული. 2000-2018 წლებში, მოსამართლე ნუგზარ სხირტლაძემ, სასამართლო სისტემიდან შემოსავლის სახით 1,183,314 ლარი მიიღო. ამ დროისთვის მას საბანკო ვალდებულება არ უფიქსირდება. 

პაატა სილაგაძის კარიერაში გია გვიჩიანის და ნიკა ჩემიას საქმეს უჭირავს განსაკუთრებული ადგილი. გია გვიჩიანი და ნიკა ჩემია 2006 წელს, საერთო სასამართლოებმა დამნაშავედ სცნეს ნიკოლოზ ლომინაძის მკვლელობაში და სასჯელის სახედ უვადო თავისუფლების აღკვეთა შეუფარდეს. მედიაში გავრცელებული ინფორმაციით, 2012 წელს, პროკურატურამ მსჯავრდებულთა მიერ დანაშაულის ჩადენის ვერსია ეჭვქვეშ დააყენა. მან მიუთითა, რომ 2006 წელს, პროკურატურას ჰქონდა აშშ-ის ფედერალური ბიუროს საექსპერტო დაწესებულების დასკვნა, რომლის მიხედვითაც, მკვლელობის ადგილიდან ამოღებული თითის ორი ანაბეჭდი არ ეკუთვნოდათ მსჯავრდებულებს. პროკურატურამ განაცხადა, რომ აღნიშნული დასკვნა არ დართვია სისხლის სამართლის საქმეს და არ წარდგენილა სასამართლოში. პროკურატურის განცხადებით, ,,ექსპერტიზის დასკვნები ზრდის ვარაუდს იმის შესახებ, რომ მკვლელობაში მსჯავრდადებულ პირებს მკვლელობა არ ჩაუდენიათ“. 

2017 წლის 20 თებერვალს, თბილისის სააპელაციო სასამართლოს მოსამართლემ, მანუჩარ კაპანაძემ, გაიზიარა პროკურატურის შუამდგომლობა, მსჯავრდებულები უდანაშაულოდ სცნო და პატიმრობიდან გაათავისუფლა. 

ძალიან დიდი ალბათობით, ქალბატონ ქეთევან ცინცაძეს კითხვებს მიხეილ ჩინჩალაძესთან მუშაობის პერიოდსა და სამსახურში ხატია ჯავახიშვილის აყვანასთან დაკავშირებით დაუსვამენ. ჯავახიშვილის მეუღლე კი იუსტიციის უმაღლესი სკოლის დირექტორი, ვანო ბოლქვაძე გახლავთ. ყოველ შემთხვევაში, ცინცაძეს იუსტიციის უმაღლეს საბჭოში გასაუბრებაზე, სწორედ ამ ორ ფაქტზე დაუსვეს არაერთი კითხვა. 

საქართველოს პრეზიდენტის 2011 წლის 11 ოქტომბრის ბრძანებულებით, საქართველოს მოქალაქეობა შეუწყდათ ბიძინა ივანიშვილსა და მის მეუღლეს, ეკატერინა ხვედელიძეს. აღნიშნული გადაწყვეტილება თბილისის საქალაქო სასამართლოში გასაჩივრდა 2011 წლის დეკემბერში. ბიძინა ივანიშვილისა და ეკატერინა ხვედელიძის ადვოკატები, საქართველოს პრეზიდენტის 2011 წლის 11 ოქტომბრის ბრძანებულების გაუქმებასა და მოსარჩელეთათვის მოქალაქეობის აღდგენას ითხოვდნენ. მოსამართლე შოთა გეწაძემ, სასარჩელო მოთხოვნა ნაწილობრივ დააკმაყოფილა. მან დაადგინა, რომ უკანონოა ბრძანებულების ის ნაწილი, რომლითაც ეკატერინა ხვედელიძეს საქართველოს მოქალაქეობა შეუწყდა და მას მოქალაქეობა უნდა აღუდგეს. რაც შეეხება ბიძინა ივანიშვილისთვის მოქალაქეობის ჩამორთმევას, სასამართლომ ამ ნაწილში, პრეზიდენტის ბრძანებულება ძალაში დატოვა. ეს საქმე კი შოთა გეწაძემ განიხილა, რომელიც პარლამენტში გასაუბრებაზე აუცილებლად მივა და აღნიშნულ საქმეს აუცილებლად გაახსენებენ. ცნობისათვის, აღნიშნულ საქმეში ივანიშვილის ადვოკატები შალვა თადუმაძე, ეკა ბესელია, ალექსანდრე ბარამიძე, ზაქარია ქუცნაშვილი და არჩილ კბილაშვილი იყვნენ. 

არასამთავრობო სექტორი გეწაძეს „კლანის წევრად“ მოიხსენიებს და, რაღა თქმა უნდა, ამ მიმართლებითაც სერიოზული შეკითხვები იქნება. ის 2007-2009 წლებში, საქართველოს უზენაესი სასამართლოს ადმინისტრაციულ საქმეთა პალატის სამდივნოს უფროსი გახლდათ და ეს მაშინ, როცა ადმინისტრაციული პალატის თავმჯდომარე, მიხეილ ჩინჩალაძე იყო. სწორედ ამიტომ, მას ჩინჩალაძის კადრად აღიქვამენ.

ბათო ჯაფარიძე

]]>
versiaprinti@yahoo.com (super admin) სამართალი Wed, 25 Sep 2019 11:13:16 +0400