პოლიტიკა - ვერსია - ვერსია http://www.versia.ge Tue, 29 Sep 2020 09:08:24 +0400 Joomla! - Open Source Content Management en-gb ,,მიშას ვავალებ, დაურეკოს ალეკოს!’‘ http://www.versia.ge/2013-07-31-11-22-32/item/6937-,,მიშას-ვავალებ,-დაურეკოს-ალეკოს-’‘.html http://www.versia.ge/2013-07-31-11-22-32/item/6937-,,მიშას-ვავალებ,-დაურეკოს-ალეკოს-’‘.html

დასცინიან თუ არა პოლიტიკოსები ხალხს _ წლევანდელი საარჩევნო კამპანიის თავისებურებანი

2020 წლის საპარლამენტო კამპანია, კორონაპანდემიის ფონზე, მეტ-ნაკლებად, მშვიდად მიმდინარეობს. როგორ კამპანიას აწარმოებენ და პიარის რა ელემენტებს იყენებენ პარტიები? _ ეს პოლიტტექნოლოგების შესაფასებელია, თუმცა აღსანიშნავია რამდენიმე პარტიის ორიგინალური სლოგანი. აი, მაგალითად, ერთიანი ნაციონალური მოძრაობის სლოგანი ასეთია _ „დაავალე მიშას“. პარტიაში აცხადებენ, რომ ყველა დავალება, რომელსაც პარტიის მაჟორიტარი დეპუტატობის კანდიდატები მოსახლეობისგან მიიღებენ, ნაციონალური მოძრაობის პრემიერობის კანდიდატს, მიხეილ სააკაშვილს გადაეცემა. ცოტა უცნაურია, საქართველოს მოსახლეობამ უკრაინის მოქმედ მაღალჩინოსანს „რაღაცები“ რატომ უნდა „დაავალოს“, ან მიხეილ სააკაშვილმა ეს დავალებები როგორ უნდა შეასრულოს, რადგან მის მიმართ საქართველოში სამართლებრივი პასუხისმვებლობის საკითხი დგას, მაგრამ ფაქტია: პარტიამ მთავარი საარჩევნო სლოგანი სწორედ მესამე პრეზიდენტს დაუკავშირა. 

„ნაციონალებს“ კრეატივში არც პარტია „მოქალაქეების“ ლიდერი, ალეკო ელისაშვილი ჩამორჩა და საარჩევნოდ, სარეკლამო ბილბორდებზე _ არც მეტი, არც ნაკლები _ საკუთარი ტელეფონის ნომერი გამოაქვეყნა, სლოგანით: „ალეკო გისმენთ“. 

თავად ელისაშვილი გადაწყვეტილებას ცესკო-ს მიერ პარტიისთვის საარჩევნო ნომრის მინიჭების გაჭიანურებით ხსნის. „ველოდეთ, ველოდეთ და ბანერზე დავწერეთ ჩემი ტელეფონის ნომერი“, – თქვა ელისაშვილმა... 

„ვერსია“ დაინტერესდა, რას დაავალებენ პოლიტიკოსები და რიგითი მოქალაქეები უკრაინაში მყოფ საქართველოს მესამე პრეზიდენტს?

ექსპერიმენტისთვის, აღნიშნული კითხვით, პირველად ალეკო ელისაშვილს მივმართე. აქვე, უნდა აღვნიშნო, რომ ელისაშვილმა მყისიერად მიპასუხა და განმიცხადა, მიხეილ სააკაშვილს არაფერს დავავალებო. 

ისე, ჯერ მსგავსი სლოგანები _ „დაავალე მიშას“ და „ალეკო გისმენთ“ სად იყო, როცა თბილისის მერის არჩევნებში, ლეიბორისტული პარტიის კანდიდატის სლოგანი _ „გუგავა მოვა“, თითქმის მთელმა ერმა რომ აიტაცა და „პიარული“ თვალსაზრისით, ამ სლოგანმა კარგადაც იმუშავა, თუმცა გუგავა თბილისის მერი მაინც ვერ გახდა... 

სხვათა შორის, გიორგი გუგავამაც, ელისაშვილის მსგავსად, განმიცხადა, რომ მიხეილ სააკაშვილს არაფერს დაავალებს. სააკაშვილისთვის რამის დავალებას არც პოლიტიკიდან წასული, რესპუბლიკური პარტიის ყოფილი წარმომადგენელი, დავით ზურაბიშვილი აპირებს. 

 

პარტია გირჩის ერთ-ერთი ლიდერი, იაგო ხვიჩია კი ჩვენს კითხვას ასე პასუხობს: 

„ზოგადად, სააკაშვილის მიმართ სკეპტიკურად ვარ განწყობილი და ჩემი კომპეტენცია არაა, მას რამე დავავალო“. 

სამაგიეროდ, მიხეილ სააკაშვილისთვის დავალება აქვს ქართული მარშის ლიდერ სანდრო ბრეგაძეს: 

„მე დავავალებდი, გაჩერდეს და ჩაბარდეს მართლმსაჯულებას. აგოს პასუხი იმ ბრალდებებზე, რაც მის მიმართაა წარდგენილი!“. 

ბრეგაძის მსგავსად, სააკაშვილისთვის დავალებები აქვს მემარცხენე ალიანსის ლიდერ სოსო შატბერაშვილსაც: 

„როგორ არ დავავალებ?! 3 მოთხოვნა მაქვს _ გატაცებული 4 მილიარდი, რომელიც 2018 წლის ომის შემდეგ წაიღო და გაიტაცა კეზერაშვილთან ერთად, მოიტანოს უკან. ასევე, ის, რაზეც მოიხადა ბოდიში, მძიმე შეცდომები მქონდაო, გამოასწოროს და დაანებოს საქართველოს თავი!“ 

თბილისის საკრებულოს დამოუკიდებელი დეპუტატი და „ქართული ოცნების“ ყოფილი წევრი, ვატო შაქარაშვილი აცხადებს, რომ სააკაშვილისთვის მოსათხოვნი ბევრია, დასავალებელი კი _ არაფერი. 

„მას ჩვენი ქვეყნისა და ხალხისთვის კარგის მოტანა არ შეუძლია! დავავალებდი „ქართულ ოცნებას“, რომ თავი დაანებოს ფსევდოდაპირისპირებას და კვლავ მიშას აქტუალიზაციას, ჩამოიყვანოს და პასუხი აგებინოს ჩადენილი დანაშაულებებისთვის!“ _ აცხადებს შაქარშვილი. 

დაიცავი საქართველოს ერთ-ერთი ლიდერი, კახა მიქაია ჩვენს შეკითხვას იუმორით პასუხობს და სააკაშვილს ავალებს, „ელისაშვილს დაურეკოს!“ 

ალეკო ელისაშვილის თანაგუნდელი, გენრი დოლიძე კი მიხეილ სააკაშვილს ავალებს, შეეშვას პოლიტიკას: 

„იკითხოს ლექციები, ეს თავის გუნდსაც წაადგება, ქვეყანასაც და ოპოზიციასაც, ივანიშვილის ხელისუფლების უმტკივნეულო ცვლილებაში“. 

* * * 

იმის გასარკვევად, დაავალებენ თუ არა რამეს მოქალაქეები მიხეილ სააკაშვილს, სოციალურ ქსელში მცირე გამოკითხვა ჩავატარე. მომხმარებელთა უმეტესობა ამ სლოგანს სერიოზულად არ აღიქვამს და ფიქრობს, რომ მიხეილ სააკაშვილი ქართულ პოლიტიკურ პროცესებში უშუალოდ ჩართული არაა და თუ ის საქართველოში რეალურად არ დაბრუნდა, მისთვის რაიმეს დავალებას, უბრალოდ, აზრი არ აქვს. 

ზოგი ფიქრობს, რომ ადამიანებმა პოლიტიკოსებს არაფერი უნდა დაავალონ ანუ ეს მიდგომა ამომრჩევლის მიმართ, ერთგვარად, შეურაცხმყოფელია და ამომრჩევლის დონის დაბალ შეფასებაზე მეტყველებს. 

ასეა თუ ისე, ფაქტია, რომ ოპოზიციური პარტიები ერთმანეთს არა ქვეყნის განვითარებისა და ეკონომიკური კრიზისიდან გამოსვლის კონკრეტულ გეგმებს, არამედ, პიარტექნოლოგების მიერ შექმნილ „კრეაწიულ“ სლოგანებს აჯიბრებენ.

თათია გოჩაძე

]]>
versiaprinti@yahoo.com (super admin) პოლიტიკა Wed, 23 Sep 2020 12:26:16 +0400
რა აკავშირებს სანდრო ბრეგაძეს რუს დეპუტატთან _ „მარშის“ ლიდერი სკანდალური ჩანაწერის დეტალებზე http://www.versia.ge/2013-07-31-11-22-32/item/6934-რა-აკავშირებს-სანდრო-ბრეგაძეს-რუს-დეპუტატთან-_-„მარშის“-ლიდერი-სკანდალური-ჩანაწერის-დეტალებზე.html http://www.versia.ge/2013-07-31-11-22-32/item/6934-რა-აკავშირებს-სანდრო-ბრეგაძეს-რუს-დეპუტატთან-_-„მარშის“-ლიდერი-სკანდალური-ჩანაწერის-დეტალებზე.html

„თავი დავიმდაბლე, მაგრამ... ყველასთვის სერიოზულ საფრთხეს წარმოვადგენ!“

წლევანდელ საარჩევნო კამპანიას პატარ-პატარა სკანდალები ახლავს. ასე მაგალითად, ქართული მარშის საარჩევნო სიის პირველი ნომერი, სანდრო ბრეგაძე, გლდანში კენჭს აღარ იყრის _ პოლიტიკოსმა ამის შესახებ სოციალურ ქსელში დაწერა: 

„მოგეხსენებათ, რომ გლდანში დავაყენე ჩემი კანდიდატურა მაჟორიტარი დეპუტატობის კანდიდატად!!! გულუბრყვილოდ მქონდა ილუზია, რომ ყველა ეროვნული ძალა გვერდით დამიდგებოდა!!! ეტყობა, მოხდა დისკომუნიკაცია და ჩემმა მეგობრებმა პატრიოტთა ალიანსიდან, დააყენეს თავიანთი კანდიდატურა ჩემს წინააღმდეგ!!! სიმართლეს ვიტყვი _ ამას არ ველოდი!!! ამიტომ კიდევ მე დავიმდაბლებ თავს და ვხსნი ჩემს კანდიდატურას გლდანის საარჩევნო ოლქში, რათა არ შევუშალო ხელი ჩვენ ბრძოლას ლიბერასტების წინააღმდეგ!!! მხოლოდ ერთიანობით მიიღწევა გამარჯვება და ჭირსაც წაუღია პარლამენტარის მანდატი!!!“... 

მას შემდეგ, რაც კანდიდატურა მოხსნა, მარშის ლიდერი კიდევ ერთ ახალ სკანდალში გაეხვა _ „ტვ პირველმა“ გაავრცელა ფარული სატელეფონო ჩანაწერი, რომელშიც სანდრო ბრეგაძე და რუსი დეპუტატი, იგორ მოროზოვი საუბრობენ. რუსი დეპუტატი „მარშის“ ლიდერს პირდება, რომ დავალებების შესრულების შემთხვევაში, ბრეგაძე რუსეთისთვის პირველი გახდება. ამ და სხვა მიმდინარე პოლიტიკურ საკითხებზე „ვერსია“ ქართული მარშის ლიდერს ესაუბრა:

_ ეს ადამიანი ჩემი ძალიან ახლობელია და ვსაუბრობთ ბიზნესზე, კერძოდ, საქართველოსთვის თხევადი აირის შესაძლო მოწოდებაზე. ეს ბიზნესი არ გამოვიდა, მაგრამ რომ გამოსულიყო, ძალიან კარგი იქნებოდა. 

პირდაპირ გეტყვით, ეს ჩანაწერი ფალსიფიცირებულია. ატვირთულია უკრაინიდან და კარგად ვიცი, ამის უკან რა ძალებიც დგანან. უბრალოდ, რაღაცას ველოდები, რათა ეს დავადასტურო. 

ყველაფერი ეს იმისთვისაა, რომ ქართულმა მარშმა არჩევნებში მონაწილეობა არ მიიღოს, რადგან საკმაოდ კარგი რეიტინგი გვაქვს. 

_ მოკლედ, ამტკიცებთ, რომ რუს დეპუტატთან პოლიტიკაზე არ გისაუბრიათ? 

_ ამ ადამიანს დიდი ხნის მეგობრად ვთვლი და ჩემ მეგობრებთან ვსაუბრობ სპორტზე, ხელოვნებაზე, ბიზნესზე, პოლიტიკაზეც... 

_ სხვათა შორის, ოპოზიცია ამ ჩანაწერთან დაკავშირებით, გამოძიების დაწყებას ითხოვს. 

_ ავადმყოფები არიან, რუსეთიდან ახლობელი ბიზნესზე მელაპარაკება და გამოძიება უნდა დავიწყოთო. გამოძიება კი არა, ეგენი, ყველანი დასაჭერები არიან სამშობლოს ღალატის მუხლით! 

_ ისე, გლდანში კანდიდატურა რატომ მოხსენით? 

_ ამ არჩევნებისთვის გამოვდიოდი ინციატივით, რომ პატრიოტულად და ეროვნულად მოაზროვნე ძალები გავერთიანებულიყავით და პირადი ამბიციები დაგვევიწყებინა. სხვათა შორის, თავი დავიმდაბლე და გაერთიანება ჩვენზე ბევრად ნაკლებრეიტინგულ პარტიებსაც კი შევთავაზე. 

_ რომელ პარტიებს გულისხმობთ? 

_ ყველას, ვინც ეროვნულ ფლანგზეა, იგივე, პატრიოტთა ალიანსს და სხვა პარტიებს... 

_ პატრიოტთა ალიანსი თქვენზე დაბალრეიტინგული გგონიათ? 

_ არა. სხვებზე ვამბობ, მაგრამ არ მინდა დავასახელო _ შეიძლება, ვინმე გამომრჩეს, თუმცა მათ ერთმანეთთან დასხდომის სურვილი არ გამოავლინეს. ეტყობა, ყველას ლიდერობა უნდა, თორემ ერთიანი ეროვნული ფრონტი რომ შექმნილიყო, დარწმუნებით შემიძლია გითხრათ, რომ არჩევნებში სერიოზული წარმატება იქნებოდა. 

მართალია, ეს არ მოხერხდა, მაგრამ მუდმივად მაქვს მათთან კომუნიკაცია და ჩვენ არავისთვის, მათ შორის, ირმა ინაშვილისთვის, დიმა ლორთქიფანიძისა და სხვა პარტიული ლიდერებისთვის არ ვაპირებდით ჩვენი კანდიდატების დაყენებას, რადგან მომხდარიყო შეთანხმება და მაჟორიტარულ ოლქებში მაინც ვყოფილიყავით ერთიანნი. 

მიუხედავად იმისა, რომ რამდენიმე კანდიდატურა დაყენებული გვყავდა, სამწუხაროდ, ეტყობა, დისკომუნიკაცია მოხდა და დააყენეს მაჟორიტარი დეპუტატობის კანდიდატები. 

აქედან გამომდინარე, კიდევ ერთხელ დავიმდაბლე თავი, ვეცადე, ერთიანობის მაგალითი მეჩვენებინა ყველასთვის და მეთქვა, რომ ეროვნულად მოაზროვნე ადამიანებმა, ერთმანეთის წინააღმდეგ არ უნდა იბრძოლონ! 

თუ ამას რეაქცია მოჰყვება, ეს პროცესი არ განვითარდება და ერთმანეთს არ დაუყენებენ ეს პარტიები კანდიდატებს მაჟორიტარულ ოლქებში, ძალიან კარგი იქნება, მაგრამ თუ კვლავ იგნორირებული იქნება, გავალთ არჩევნებში ისე, როგორც საჭიროდ ჩავთვლით. 

_ ანუ გლდანში თქვენი კანდიდატურა, შესაძლოა, მეორედ დააყენოთ? 

_ არა, ერთხელ ვთქვი და აღარ ვიყრი კენჭს, მაგრამ თუ არ იქნა შეთანხმება მიღწეული, რა თქმა უნდა, ყველგან ჩვენ კანდიდატურას დავაყენებთ იმიტომ, რომ სხვა გზას არ გვიტოვებენ. 

_ ბატონო სანდრო, სანამ კანდიდატურას მოხსნიდით, „ედისონ რისერჩის“ კვლევა გამოქვეყნდა, რომლის თანახმადაც, გლდანში 1-პროცენტიანი რეიტინგი გაქვთ. ამიტომ ხომ არ გადაწყვიტეთ, რომ მაჟორიტარობისთვის აღარ გებრძოლათ? 

_ საინტერესო ისაა, რომ ჩვენი პარტია „ედისონ რისერჩის“ კვლევის ჩამონათვალში არ იყო და უამრავმა ადამიანმა ქართული მარში ხელით მიაწერა. მე როგორ აღმოვჩნდი გლდანის ჩამონათვალში, საინტერესო და გასაკვირია, მაგრამ ჩემი ინფორმაციით, უამრავმა ადამიანმა საწერი კალმით მიაწერა სანდრო ბრეგაძე. არადა, გლდანში საარჩევნო კამპანია დაწყებული არ მქონდა _ ჩემ ერთ პლაკატსა და ბილბორდს ვერ ნახავთ, ოფისიც არ მაქვს და ხალხსაც არ შევხვედრივარ. 

მათ ძალიან კარგად იციან ჩემი პოტენციალი და იცით, რისი ეშინიათ? _ ერთხელ ვთქვი ლევან კობიაშვილზე, კაშიას მხარი დაუჭირა მამათმავლობის სამკლაურის გაკეთებაში-მეთქი და ლევან კობიაშვილის რეიტინგი 45%-დან 30%-ზე ჩამოვიდა. 

_ ეს რა შუაშია? 

_ იგივე კლასტერის წარმომადგენელია ნიკა მელიაც. გლდანი ტრადიციული, ვაჟკაცური უბანია და გარწმუნებთ, რომ მამათმავლების დამცველები ხმას ვერ მიიღებენ და ვერ გაიმარჯვებენ! აქედან გამომდინარე, რა თქმა უნდა, ყველასთვის სერიოზულ საფრთხეს წარმოვადგენდი, მაგრამ ეს საფრთხე არ განელებულა. ველოდები, რომ ეროვნული ძალების ერთიანობა შედგება მაჟორიტარებთან დაკავშირებით, მაგრამ თუ ეს არ მოხდება, სანდრო ბრეგაძეზე ბევრად უკეთესი კანდიდატი ეყოლება ქართულ მარშს და გლდანში იქნება ვაჟკაცების ბრძოლა მამათმავლებისა და გარყვნილების პროპაგანდისტების წინააღმდეგ. 

ნიკა მელიაზე პირდაპირ გეტყვით: ადამიანი, რომელიც აცხადებს, რომ ჰომოფობების ხმა არ მჭირდებაო, აი, ზუსტად გლდანის მოსახლეობის 90%-გან მიიღებს უარს, რადგანაც ისინი არ არიან მამათმავლობისა და გარყვნილების მხარდამჭერები. 

_ ისე, თუ მართლაც ასეთი მხარდაჭერის იმედი გაქვთ, კანდიდატურა რა ლოგიკით მოხსენით? პატრიოტთა ალიანსთან ერთად, სხვა კანდიდატებს ხომ უფრო მეტ ხმას „წაართმევდით“? 

_ რა თქმა უნდა, მაგრამ მუხლებზე ვერავის დავუჩოქებ. ხომ გეუბნებით, პატრიოტთა ალიანსის გარდა, ორკაციანი პარტიების ლიდერებსაც კი შევხვდი და ვუთხარი, რომ გავერთიანდეთ და ვიბრძოლოთ ერთად-მეთქი. მათ აქვთ იმედი, რომ 1%-ს მაინც გადალახავენ და პარლამენტში შევლენ.  

ჩვენი მიზანი კი ისაა, რომ შეიქმნას ერთიანი ეროვნული კოალიცია პარლამენტში, რომელიც შეაჩერებს ამ ლიბერასტების აღვირახსნილ პროპაგანდასა და დიქტატურას, მაგრამ ადამიანს თუ არ უნდა, ვერ დავაძალებ.

თათია გოჩაძე

 

]]>
versiaprinti@yahoo.com (super admin) პოლიტიკა Wed, 23 Sep 2020 12:25:59 +0400
„სააკაშვილი იდიოტი არ არის!“ http://www.versia.ge/2013-07-31-11-22-32/item/6933-„სააკაშვილი-იდიოტი-არ-არის-“.html http://www.versia.ge/2013-07-31-11-22-32/item/6933-„სააკაშვილი-იდიოტი-არ-არის-“.html

რა გეგმები აქვს და რას აპროტესტებს ჯონდი ბაღათურია

 

საქართველოს მესამე პრეზიდენტმა მიხეილ სააკაშვილმა, ცოტა ხნის წინ, სკანდალური განცხადება გააკეთა ანუ თქვა, რომ კოალიციურ თანამშრომლობას არავისთან გეგმავს, რადგან ერთიანმა ნაციონალურმა მოძრაობამ უმრავლესობა დამოუკიდებლად უნდა მოიპოვოს. ისე, თუ უახლეს ისტორიას თვალს ზედაპირულად მაინც გადავავლებთ, სააკაშვილისგან ეს გასაკვირი არცაა, რადგან საქართველოდან უკრაინაში გადაბარგებულ პოლიტიკოსს სხვა პოლიტიკურ ძალებთან კოალიციურ რეჟიმში თანამშრომლობა არასოდეს ხიბლავდა. მოკლედ, სააკაშვილის ზემოხსენებულმა განცხადებამ ოპოზიციაში აჟიოტაჟი გამოიწვია. უკრაინის მაღალჩინოსანს ყველაზე მწვავედ ყოფილი თანაგუნდელები დაუპირისპირდნენ, თუმცა ასევე, მწვავე შეფასებას აკეთებენ ე.წ. შუაშისტური პარტიების წარმომადგენლებიც. აი, მაგალითად, ქართული დასის ლიდერი, ჯონდი ბაღათურია მიიჩნევს, რომ სააკაშვილმა, აღნიშნული განცხადებით, წყალი „ქართული ოცნების“ წისქვილზე დაასხა, რადგან ისევ საზოგადოების რადიკალიზაცია და პოლარიზება სურს...

_ ბატონო ჯონდი, თქვენმა პარტიამ თბილისის ზოგ ოლქში მაჟორიტარობის კანდიდატი არ წარადგინა. რატომ? 

 

_ საბურთალოს, ისნისა და სამგორის გარდა, კანდიდატი თბილისის ყველა ოლქში წარვადგინეთ და ამის მარტივი დასაბუთება გვაქვს _ ამ რაიონებში კენჭს სამი წარმატებული რეფორმის ავტორი იყრის. ამიტომ ამ ადამიანებს არ ვებრძვით და ისანში მხარს კახა კახიშვილს ვუჭერთ, სამგორში კი _ სოზარ სუბარს, თუმცა აქვე, ჩემს ამომრჩეველს მოვუწოდებ, რომ არჩევნებზე მოვიდეს და პარტიულად ხმა ჩვენ მოგვცეს. ისე, წარმატებულ რეფორმებსაც თავი რომ გავანებოთ, სოზარ სუბარსა და კახა კახიშვილს დიდი ხანია ვიცნობ _ 20 წლის წინ, ევროსაბჭოს პოლიტიკური სწავლების სკოლა ერთად დავამთავრეთ ანუ ჩათვალეთ, რომ მათ სტუდენტობიდან ვიცნობ და ძალიან წესიერი ადამიანები არიან, რომელთა წინააღმდეგ ბრძოლაც საჭიროდ არ ჩავთვალე. 

_ კეთილი, მაგრამ თქვენს საარჩევნო ბლოკში რომელი პარტიებია გაერთიანებული? 

_ დღეისთვის, სამი ორგანიზაციაა გაერთიანებული _ ქართული დასი, ხალხის პარტია და საზოგადოებრივი მოძრაობა _ დემოკრატიული საქართველო. დღეს ვასრულებთ მოლაპარაკებას და კიდევ ერთი ორგანიზაცია შემოგვიერთდება. ასევე, გვაქვს დიალოგი ცალკეულ პოლიტიკურ ფიგურებთან, სამოქალაქო სექტორთან, ეროვნულ უმცირესობებთან. ისინი საკუთარ კანდიდატებს იმ რეგიონებში გვთავაზობენ, სადაც ეთნიკური უმცირესობები ცხოვრობენ. ამით ვცდილობთ, ეთნიკური უმცირესობები პოლიტიკურ პროცესებში მაქსიმალურად ჩავრთოთ, რადგან ეს ადამიანები მხარს საქართველოს ერთიანობასა და ძლიერებას უჭერენ. 

_ ეს გასაგებია, მაგრამ თქვენ, როგორც პატარა პარტიის ლიდერი, თუ პარლამენტში შეხვალთ, კოალიციურ თანამშრომლობას ვისთან გეგმავთ და ვისთან _ არა? 

_ თქვენს ტერმინს დავაზუსტებ _ ჩვენ სუსტი ფინანსური რესურსების პოლიტიკური პარტია ვართ ანუ ჩვენს უკან რომელიმე „ფულის ტომარა“ არასოდეს მდგარა და არც ახლა დგას. ეს ნაკლია, თუ, პირიქით – კარგი, ამომრჩეველმა გადაწყვიტოს. 

რაც შეეხება კოალიციურ თანამშრომლობას, ამას მოცემულობა გვაჩვენებს და გადაწყვეტილებას იმის მიხედვით მივიღებ, სახელმწიფო ინტერესი რაც იქნება. 

ისე, თანამშრომლობა არ გამოგვდიოდა და არც გამოგვივა „ნაცმოძრაობასა“ და მის დანაყოფებთან, რომლებიც „ქართული ოცნების“ სატელიტები არიან. მათთან თანამშრომლობას არ ვგეგმავთ. თუ ამ არჩევნებში წარმატებით გამოვედით და იმედი გვაქვს, რომ რამდენიმე მანდატს მივიღებთ, ასეთ შემთხვევაში, ამ ხალხს მოუწევს, პროკურატურასთან ითანამშრომლოს... 

_ ნაციონალური მოძრაობის წარმომადგენლებს გულისხმობთ? 

_ დიახ, ყოფილი ხელისუფლების წარმომადგენლებს _ ეს უფრო ზუსტი ტერმინია იმიტომ, რომ ნაციონალურ მოძრაობაში ამ პარტიის წარმომადგენელი დღეს უფრო ნაკლებია, ვიდრე _ „ქართულ ოცნებაში“. ამიტომ როცა ვლაპარაკობთ სამართლიანობის აღდგენაზე, უფრო მეტად, ეს „ქართული ოცნების“ იმ წევრებს ეხებათ, რომლებიც წარსულში ნაციონალურ მოძრაობაში იყვნენ და დანაშაულს ჩადიოდნენ. დღეს, ნაციონალურ მოძრაობაში, სამადაშვილის გარდა, ძველ „ნაციონალს“ ვერავის ვხედავ, „ქართული ოცნება“, მისი სატელიტი ბოკერია და სხვა პარტიები კი იმ „მიშისტებითაა“გატენილი, რომლებსაც მძიმე დანაშაული აქვთ ჩადენილი! 

_ სააკაშვილმა განაცხადა, რომ პარტიულ კოალიციას ვერ ხედავს და უმრავლესობა ნაციონალურმა მოძრაობამ დამოუკიდებლად უნდა მოიპოვოს. ამას როგორ აფასებთ? 

_ ეს, ივანიშვილის ტერმინით რომ ვთქვათ, ისევ იმ ოპერიდანაა, რომელსაც „შუაგაკრეფა“ ჰქვია, პოლიტტექნოლოგიური ტერმინით კი, ეს ამომრჩევლის პოლარიზაცია და პროცესების რადიკალიზაციაა, რაც ქვეყნისთვის კარგი არ არის. ივანიშვილი და სააკაშვილი თამაშობენ, რომ შუა გაკრიფონ, რათა თვითონ მეტი ხმა მიიღონ და ის პარტიები, რომლებიც ორივე პოლიტიკურ ორგანიზაციას ოპოზიციაში რეალურად უდგანან, ელექტორალური თვალსაზრისით, მაქსიმალურად დაასუსტონ. 

რეგიონში საქართველო, გეოპოლიტიკური თვალსაზრისით, მარგალიტია და ძალიან ბევრი ქვეყანაა დაინტერესებული, რომ მღვრიე წყალში თევზი დაიჭიროს და შეიძლება, პოლარიზებისა და დაპირისპირების პროვოცირება ქვეყნის გარედანაც მოხდეს. რა, მეზობელი ან არამეზობელი ქვეყნიდან ასეთი მართული ცოტაა?! პოლიტიკურ სპექტრში, პრაქტიკულად, 90% ან რუსეთთან ჩაბარებას ითხოვს, ან აშშ-სა და სხვა ქვეყნებთან. სამწუხაროდ, ძალიან ცოტაა პოლიტიკური პარტია, რომელიც გააზრებულად, რაციონალურად იქცევა და სახელმწიფო ინტერესების მიხედვით მოქმედებს. 

 

_ თუ სააკაშვილი, მართლაც პოლარიზებას ცდილობს, როგორ ფიქრობთ, გამოუვა? 

_ პოლარიზება 2012 წლიდან გამოსულია... 

_ შეიძლება, მაგრამ ახალი საარჩევნო სისტემით, პატარა პარტიებსაც გეძლევათ შანსი, რომ პარლამენტში თუნდაც თითო ადამიანით შეხვიდეთ და ეს რეალობას ხომ შეცვლის? 

_ კიდევ ერთხელ ვაპროტესტებ ტერმინს _ „პატარა პარტია“, სუსტი ფინანსური რესურსების მქონე პარტიები ვართ, ეს ნახევრად ხუმრობით (იცინის). 

სწორად შენიშნეთ, პროცესის რადიკალიზაცია კი არის, მაგრამ ამ საკენკს რომ კენკავენ, იმ ელექტორატის რაოდენობა იკლებს და სწორედ ამიტომ, ივანიშვილი და სააკაშვილი ახალ-ახალი დაპირისპირების ინსცენირებას ახდენენ, რომ ის ამომრჩეველი, რომელიც ორივემ დაკარგა და საქართველოს განვითარების გზას „ოცნებისა“ და ნაცმოძრაობის გარეშე ეძებს, ისევ თავის მხარეს შეაბრუნონ. მოკლედ, ისინი ერთმანეთს ხელს ძალიან უწყობენ. სააკაშვილის ბოლო განცხადება, პირდაპირ, ივანიშვილის წისქვილზე წყლის დასხმაა და იმას ნიშნავს, ვინც ჩემკენ არ ხართ, ივანიშვილს დაუჭირეთ მხარიო. 

სააკაშვილს, შეიძლება, ბევრი რამ დააბრალო, მაგრამ პოლიტტექნოლოგიაში იდიოტი არ არის და კარგად ესმის, რასაც აკეთებს. ამას შეგნებულად და მიზანმიმართულად აკეთებს, რომ ივანიშვილის ჯინაზე, ქართულ პოლიტიკაში მაქსიმალურად დიდხანს იტივტივოს! 

საზოგადოებამ უნდა მიიღოს გადაწყვეტილება და ქვეყნის განვითარებაზე არჩევანი ივანიშვილისა და სააკაშვილის პარტიების გარეშე გავაკეთოთ!

თათია გოჩაძე

]]>
versiaprinti@yahoo.com (super admin) პოლიტიკა Wed, 23 Sep 2020 12:25:54 +0400
დედის ფაქტორი http://www.versia.ge/2013-07-31-11-22-32/item/6926-დედის-ფაქტორი.html http://www.versia.ge/2013-07-31-11-22-32/item/6926-დედის-ფაქტორი.html

რატომ შემოჰყავს სააკაშვილს პოლიტიკურ ავანსცენაზე დედა და რას შეცვლის გიული ალასანიას მაჟორიტარობის კანდიდატობა პოლიტიკაში

არის, ასრულდა... არა, ოცნება კი არ ასრულდა, არამედ, საარჩევნო ბლოკმა „ძალა ერთობაშიამ“, რომლის ხერხემალიც ნაციონალური მოძრაობაა, რამდენიმე მაჟორიტარულ ოლქში საკუთარი კანდიდატი წარადგინა. არსებობდა მოლოდინი, რომ ეს ოპოზიციური გაერთიანება მთავარ ინტრიგასაც გახსნიდა ანუ იტყოდა, რომ ზუგდიდში, ბლოკის სახელით, მაჟორიტარობისთვის ეპქსპრეზიდენტ მიხეილ სააკაშვილის დედა იბრძოლებდა, მაგრამ ასე არ მოხდა, თუმცა ეს იმას როდი ნიშნავს, რომ ქალბატონი გიული მაჟორიტარობის კანდიდატი არ იქნება. მოარული კი არა, თითქმის დადასტურებული ინფორმაციით, დიახ, „ძალა ერთობაშიას“ ზუგდიდის მაჟორიტარულ ფრონტს, სწორედ მიხეილ სააკაშვილის დედა გაამაგრებს. ახლა, ჩვენთვის რომ ვთქვათ, ამაში მოულოდნელი, შესაძლოა, არაფერია. რატომ? იმიტომ, რომ... ჯერ ერთი, სააკაშვილისთვის დედა, ბებიასი არ იყოს, კუმირია: ალბათ, გახსოვთ, მთელი პრეზიდენტობის განმავლობაში, მუდმივად დედა-ბებიაზე ლაპარაკობდა, რაც არაა გასაკვირი _ მიშა, ხომ, სწორედ დედამ და ბებიამ გაზარდეს. მეორეც, სააკაშვილმა ზუსტად იცის, პოლიტიკურ მოწინააღმდეგეებს წელს ქვემოთ როგორ უნდა დაარტყას. ასე მოიქცა ზუგდიდის მერის და ასევე, შარშან, ზუგდიდის მაჟორიტარის რიგგარეშე არჩევნების დროსაც, როცა ორივეჯერ კანდიდატად მეუღლე, სანდრა რულოვსი დაასახელა.

სანდრას კანდიდატობას გამართლება ჰქონდა, რადგან სამეგრელოსა და, კერძოდ, ზუგდიდში, ის იმთავითვე რეიტინგული იყო. ამასთან, ყოფილი პირველი ლედი პოლიტიკაში პირდაპირ არა, მაგრამ ირიბად ყოველთვის ტრიალებდა, მაგრამ აი, აბსოლუტურად სხვა მოცემულობაა გიული ალასანიას შემთხვევაში ანუ ქალბატონ დედას, მიუხედავად იმისა, რომ აქტიურ საზოგადოებრივ ცხოვრებას ეწევა, პოლიტიკური ბეგრაუნდი არ აქვს. ყოველ შემთხვევაში, გიული ალასანია პოლიტიკაში ღიად ჩართული არასოდეს ყოფილა (ისე, ხმა დადის, რომ პრეზიდენტობის დროს, მიშა ძალიან ბევრ თუ არა, ბევრ რამეს, სწორედ დედასა და ბებიას უთანხმებდა). არაპოლიტიკური ბეგრაუნდის მიუხედავად, გიული ალასანიაზე ფსონის დადება, შესაძლოა, გამართლებული იყოს ანუ ვინმეს მოსწონს თუ არა, ფაქტია _ სააკაშვილს მთელ საქართველოსა და, მათ შორის, ზუგდიდში, საკუთარი მიმდევრები ჰყავს. ეს მიმდევრები, როგორც ამბობენ, პოლიტიკური სექტანტები არიან _ მიშამ მათ თვალწინ, სულ რომ „ბავშვები შეჭამოს“, მაინც მისი ფანები იქნებიან. აქედან გამომდინარე, ამ პოლიტიკური ფანკლუბისთვის ყველა და ყველაფერი მისაღებია, ვინც და რაც ხუთიანის „ქოლგის“ ქვეშაა, თან ამას იმასაც თუ დავამატებთ, რომ გიული ალასანია მიშას მშობელია, ყველაფრის მარტივად ახსნა შეიძლება _ ის ხმებს „ოცნების“ მაჟორიტარობის კანდიდატს თუ ვერა, მინიმუმ, გიგი უგულავას წაართმევს, აი, იმ უგულავას, რამდენიმე წლის წინ, სააკაშვილს ზურგი რომ აქცია და, ბოკერიასთან ერთად, ევროპული საქართველო შექმნა. 

ადამიანურ ენაზე რომ ვთქავთ, უგულავას მიერ, სააკაშვილისთვის ზურგის ქცევა ჩვეულებრივი ღალატი იყო. არადა, გიგი, როგორც პოლიტიკური ფიგურა, სწორედ მიშამ შექმნა. ყოველ შემთხვევაში, რომ არა „ვარდების რევოლუცია“ და სააკაშვილი, უგულავა დღესაც ერთი ჩვეულებრივი, ჯიბეგაფხეკილი ჟურნალისტი იქნებოდა და მეტი არაფერი. 

მოკლედ, მიშას გადასახედიდან, სავსებით გასაგებია, გიგისთვის „აბაროტის“ აღება რომ უნდა და აქვე, ისიც უნდა ვთქვათ, რომ გიული ალასანია, როგორც მიშას საარჩევნო დესპანი, იგივე მმართველი გუნდის მაჟორიტარობის კანდიდატსაც სერიოზულ „თავის ტკივილს“ გაუჩენს. იმ შემთხვევაში კი, თუ სასწაული მოხდა და გიული ალასანია უმაღლეს საკანონმდებლო ორგანოში შევიდა, მისი საშუალებით, მიშა მხოლოდ ნაციონალურ მოძრაობას კი არა, მთელ ოპოზიციურ სპექტრს გააკონტროლებს და საკუთარ ჭკუაზე ატრიალებს, თუმცა ყველაფერ ამის დანამდვილებით თქმა 31 ოქტომბერს, საარჩევნო უბნების დახურვისა და ხმების პირველადი დათვლის შემდეგ შეგვეძლება. ჰოდა, მანამდე, მოდით, თვალი გიული ალასანიას ბიოგრაფიას გადავავლოთ და ისიც გავიხსენოთ, რომ მისი ძმა, თემურ ალასანია ნაციონალური მოძრაობის მმართველობის დროს, ქართული პოლიტიკის ერთგვარ რუხ კარდინალად ითვლებოდა და, როგორც მაშინ ამბობდნენ, ყველა ღია თუ ფარული გადაწყვეტილება, სწორედ თემურ ალასანიასთან შეთანხმებით მიიღებოდა. მაშასადამე, თუ გიული ალასანია დეპუტატი გახდება, უნდა ვივარაუდოთ, რომ ის მხოლოდ შვილის, მიხეილის კი არა, ძმის პოლიტიკურ იდეებსაც გაახმოვანებს. 

ისე, არ დაგვავიწყდეს, რომ თემურ ალასანიას საბჭოთა უშიშროების წარსული აქვს და, როგორც არცთუ კეთილი ხმები ამბობენ, მას რუსეთის უსაფრთხოებისა თუ უშიშროების სამსახურებთან გარკვეული კომუნიკაცია დღემდე აქვს, მიუხედავად იმისა, რომ ბატონი ალასანია, წლებია, ოკეანის გაღმა ანუ აშშ-ში ცხოვრობს. 

მოკლედ, ვინ არის გიული ალასანია? ქართული ვიკიპედიის თანახმად, ის 1946 წლის 11 ნოემბერს, თბილისში დაიბადა. მომავალი პრეზიდენტის დედა 1969 წელს, თბილისის სახელმწიფო უნივერსიტეტის აღმოსავლეთმცოდნეობის ფაკულტეტის ისტორიის განყოფილებას ამთავრებს და თურქეთის ისტორიის სპეციალისტის დიპლომს იღებს. 1969-2006 წლებში, გიული ალასანია ივ. ჯავახიშვილის სახელობის ისტორიისა და ეთნოლოგიის ინსტიტუტის საქართველოს ძველი და შუა საუკუნეების ისტორიის წყაროთმცოდნეობის განყოფილებაში ჯერ უმცროს, შემდეგ _ უფროს მეცნიერ-თანამშრომლად მუშაობს. 1989 წელს კი ამავე განყოფილების გამგე ხდება და ამ თანამდებობას 2006 წლამდე იკავებს. 

1973 წელს, გიული ალასანია საკანდიდატო, 1987 წელს კი სადოქტორო დისერტაციას იცავს. 

ქართული „ვიკიპედიის“ თანახმადვე, გიული ალასანია საქართველოს მეცნიერებათა აკადემიის საქართველოს ისტორიის წყაროების შემსწავლელი კომისიის წევრი, თსუ-ს ისტორიის მიმართულების პროფესორი და თბილისის შავი ზღვის საერთაშორისო უნივერსიტეტის ერთ-ერთი დამფუძნებელი და პრორექტორია. 

ამასთან, 2006 წელს, გიული ალასანია საქართველოს უნივერსიტეტის (ყოფილი საზოგადოებრივ მეცნიერებათა უნივერსიტეტი) სამეურვეო საბჭოს თავმჯდომარე ხდება, 2005 წელს კი _ საერთაშორისო ასოციაციის _ „ქართული კულტურა საქართველოში და მის ფარგლებს გარეთ“ პრეზიდენტი. 

2009 წელს, გიული ალასანიას ხელოვნებისა და მეცნიერების მსოფლიო აკადემიის ნამდვილ წევრად ირჩევენ, ხოლო 2012 წელს კი _ გენეალოგიის, ჰერალდიკისა და დოკუმენტურ მეცნიერებათა ამერიკული სკოლის საპატიო წევრად. 

ოფიციალური დოსიეს თანახმად, ზუგდიდის მაჟორიტარობის კანდიდატს, საქართველოს შუა საუკუნეების ისტორიისა და წყაროთმცოდნეობის საკითხებზე, 140-ზე მეტი სამეცნიერო შრომა აქვს გამოქვეყნებული. ამასთან, მრავალი საერთაშორისო სამეცნიერო და კულტურული ფორუმის, მათ შორის, ფესტივალ „ჩვენებურების“ მონაწილე და ორგანიზატორია. 

ერთია ოფიციალური ბიოგრაფია და მეორეა საზოგადოებასა თუ მედიაში, სხვადასხვა დროს გავრცელებული არაოფიციალური ინფორმაცია, რომელიც ექსპრეზიდენტის დედის დადებით მხარეებზე ნამდვილად არ მეტყველებს. ასე, მაგალითად, 2012 წლის მარტში, ქართული ინტერნეტ-გამოცემა „ფორ.გე“ ვრცელ სტატიას აქვეყნებს, რომელშიც გიული ალასანია ქართული განათლების მონოპოლისტადაა მოხსენიებული. კერძოდ, სტატიაში ვკითხულობთ: 

„პრეზიდენტის დედა, გიული ალასანია განათლების სფეროში მონოპოლისტია. მან ქონება შვილის გაპრეზიდენტების შემდეგ იშოვა და მანამდე, მხოლოდ ერთი რიგითი მეცნიერ-მუშაკი იყო“, _ ეს განცხადება ქართული დასის ლიდერმა და ფრაქცია „ერთობა სამართლიანობისთვის“ წარმომადგენელმა, ჯონდი ბაღათურიამ 21 მარტს გამართულ ბრიფინგზე გააკეთა და გიული ალასანიას საქმიანობის სქემა წარადგინა. 

შეგახსენებთ, რომ პრეზიდენტის ოჯახის წევრების ქონების შესახებ განცხადება ჯინდი ბაღათურიამ პრეზიდენტის პარლამენტში გამოსვლისას გააკეთა და ამან პრეზიდენტი ისე გააბრაზა, რომ ჯერ ბაღათურიას დაემუქრა, შემდეგ კი სხდომათა დარბაზიდან გაიქცა. 

ბაღათურიას ამ განცხადების შემდეგ, უმრავლესობის წევრებმა პრეზიდენტისთვის თავის მოწონება იმით სცადეს, თუ ვინ უფრო მეტად გალანძღავდა ბაღათურიას. 

ამის შემდეგ, ბაღათურია დიპლომატიური კორპუსის წარმომადგენლებს შეხვდა და საკუთარი განცხადების დამადასტურებელი დოკუმენტები გადასცა. შემდეგ კი საგანგებო ბრიფინგი გამართა, სადაც იმ სქემებზე ისაუბრა, რომლითაც პრეზიდენტის ოჯახი ფულს შოულობს. 

„საქართველოში ორი მონოპოლისტური კლანი ჩამოყალიბდა. ერთს თურქული კაპიტალით, პრეზიდენტის დედა ხელმძღვანელობს, მეორეს _ რუსული კაპიტალით, ეკონომიკის ყოფილი მინისტრი, კახა ბენდუქიძე“, _ განაცხადა ბაღათურიამ. 

დეპუტატის თქმით, გიული ალასანია, რომელიც 2004 წლამდე, რიგითი მეცნიერი იყო, სააკაშვილის გაპრეზიდენტების შემდეგ, საქართველოს უნივერსიტეტს აფუძნებს, სადაც გიული ალასანიასა და მანანა სანაძეს, რომელიც ბაღათურიას თქმით, ალასანიას მეგობარია, თითოეულს 37.5 პროცენტიანი წილი აქვს, 12.5–12.5 პროცენტი კი პრეზიდენტის ბიძაშვილს, ნიკოლოზ ალასანიასა და ედუარდ რობერტ რაუპს ეკუთვნით. 

ბაღათურიამ პრეზენტაციაზე სლაიდები და საჯარო რეესტრიდან ამონაწერი წარადგინა, რომელიც გიული ალასანიას მიერ, სხვადასხვა დაწესებულების ფლობას ეხება. 

იგი პრეზიდენტის დედის კიდევ რამდენიმე სასწავლებელთან კავშირის შესახებ საუბრობს. მან წარადგინა რეესტრიდან ამონაწერი, რომლის მიხედვით, შპს საქართველოს უნივერსიტეტის საჯარო სკოლის (საქართველოს უნივერსიტეტი მისი 100 პროცენტიანი წილის მფლობელია) დირექტორები გიული ალასანია და მანანა სანაძე არიან, ხოლო მისი 100 პროცენტიანი წილის მფლობელი საქართველოს უნივერსიტეტია. 

კიდევ ერთი: შპს „საქართველოს უნივერსიტეტის სპორტული სკოლის“ (ასევე, 100 პროცენტით საქართველოს უნივერსიტეტის მფლობელობაშია) დირექტორები გიული ალასანია და მანანა სანაძე არიან. საქართველოს უნივერსიტეტის სასწავლო ავეჯიც ამავე უნივერსიტეტის მფლობელობაშია. 

შპს კაფე „ხადილი“, რომელიც ბაღათურიას წარმომადგენელთა დაკვირვებით, ყოველდღიურად, დაახლოებით, 1000–1500 სტუმარს მასპინძლობს, ასევე, საქართველოს უნივერსიტეტის მფლობელობაშია. 

ჯონდი ბაღათურიამ ქართულ–ამერიკული უნივერსიტეტის შესახებაც ისაუბრა. მან წარადგინა რეესტრიდან ამონაწერი, რომლის მიხედვით, მასში საქართველოს უნივერსიტეტის წილი 14 პროცენტია. 

ოპოზიციონერმა დეპუტატმა ჯერ კიდევ პრეზიდენტის ანგარიშის მოსმენისას, პარლამენტში სიტყვით გამოსვლისას წარადგინა პრეზიდენტის განკარგულება, რომლის მიხედვით, შავი ზღვის საერთაშორისო უნივერსიტეტს, რომლის დამფუძნებელი და პრორექტორი გიული ალასანიაა, პრეზიდენტმა თავისი განკარგულებით, 10 ჰექტარზე მეტი მიწის ფართობი გადასცა. 

ბაღათურიას თქმით, სწორედ შავი ზღვის უნივერსიტეტი არის რგოლი, რომლითაც პრეზიდენტის ოჯახი უცხოურ კაპიტალს უკავშირდება. 

როგორც დეპუტატი მიიჩნევს, უცხო ქვეყნის კაპიტალთან პრეზიდენტის ოჯახის კავშირი სახელმწიფო უსაფრთხოებისთვის საფრთხის შემცველია.

 

„ამ სქემის უკან, თურქი მოქალაქე, ფეთჰულაჰ გიულენი დგას, რომელიც საკუთარ ვებ-გვერდზე (მისი ვებ-გვერდი ქართულ ენაზეც არის გაკეთებული), თავს ისლამის მქადაგებელს უწოდებს. ის რადიკალური ისლამისტური დაჯგუგების მონაწილეა და ამის გამო, თურქეთში არაერთთგზის იყო დაკავებული“, – ამბობს ბაღათურია. 

დეპუტატის თქმით, გიულენი მდიდარი ადამიანია და მისი ბიზნესკომპანია „ჩაღლარი“, შავი ზღვის უნივერსიტეტში ფინანსური კაპიტალით არის შესული. როგორც გიულენის ვებ-გვერდზეა აღნიშნული, შავი ზღვის უნივერსიტეტში „ჩაღლარის“ ინვესტიცია სამაგალითოა. 

გარდა ამისა, ჯონდი ბაღათურია ამბობს, რომ ეს კომპანია საქართველოში რამდენიმე სასწავლო დაწესებულებას ფლობს, ესენია: დემირელის სახელობის საბავშვო ბაღი; თბილისის სკოლა-ლიცეუმი „სხივი“; ბათუმის რ.შაჰინის სახ. დაწყებითი სკოლა; ქუთაისის ნიკო ნიკოლაძის სახელობის დაწყებითი სკოლა; რუსთავის რუსთაველის სახელობის სახელოვნებო დაწყებითი სკოლა; ბათუმის უნივერსიტეტის მოსამზადებელი კურსები და ენათა ცენტრი; დემირელის სახელობის კერძო კოლეჯი; ნიკოლოზ წერეთლის სახ. საერთაშორისო სკოლა; ბათუმის რ. შაჰინის სახ. დაწყებითი ლიცეუმი; ქუთაისის ნიკო ნიკოლაძის სახელობის ლიცეუმი; რუსთავის რუსთაველის სახელობის ლიცეუმი; მარნეულის უნივერსიტეტის მოსამზადებელი კურსები და ენათა ცენტრი. 

„16-მდე საგანმანათლებლო ორგანიზაციის ხელში ჩაგდება პრეზიდენტის დედამ მხოლოდ მას შემდეგ მოახერხა, რაც სააკაშვილი პრეზიდენტი გახდა“, – ამბობს ბაღათურია, – „ჩაღლარი,“ როგორც კაპიტალი, იდეოლოგი _ გიულენი და პრეზიდენტთან დამაკავშირებელი რგოლი _ პრეზიდენტის დედა, გიული ალასანიაა. 

მისი თქმით, ფეთჰულაჰ გიულენი თურქეთის ხელისუფლებამ არაერთგზის დააპატიმრა. ამჟამად კი ძებნილი არ არის, თუმცა ამის მიუხედავად, ქართველი სამართალდამცავები მისი საქმით უნდა დაინტერესდნენ. 

„საქართველოში თურქული თუ ირანული კაპიტალის შემოსვლას არ ვეწინააღმდეგებით, მაგრამ როცა უცხო ქვეყნის ფული რადიკალურ ისლამისტურ დაჯგუფებასთან დაკავშირებული საეჭვო პირის გზით შემოდის, ეს უკვე სახელმწიფო უსაფრთხოების საკითხია“, _ აღნიშნა ჯონდი ბაღათურიამ“. 

როგორც გითხარით, ყველა ეს ბრალდება ჯონდი ბაღათურიამ გიული ალსანიას 8 წლის წინ წაუყენა. მართალია, ბოლო დროს, ბატონი ბაღათურია პოლიტიკაში მაინცდამაინც აღარ აქტიურობს, მაგრამ სავსებით დასაშვებია, რომ მის მიერ, თავის დროზე გასაჯაროვებული ფაქტები, რომელთა სიზუსტეზეც ჩვენ თავს ვერ დავდებთ, მხოლოდ ამჟამინდელმა ხელისუფლებამ კი არა, არამედ, ოპოზიციის იმ ფრთამაც გამოიყენოს, რომელიც სააკაშვილს დასანახად ვერ იტანს. 

საერთოდ, პოლიტიკურ კულუარებში უკვე ღიად ამბობენ, რომ ოპოზიციური ბაზრის ორი ისეთი „გიგანტი“, როგორიც ნაცმოძრაობა და ევროპული საქართველოა, 31 ოქტომბერს გამარჯვებისთვის კი არა, არამედ, მთავარი ოპოზიციური ძალის სტატუსისთვის იბრძოლებს. სხვათა შორის, ამ მოსაზრებას პირდაპირ თუ ირიბად, „ძალა ერთობაშიას“ აწ უკვე ყოფილი წევრი, „სტრატეგია აღმაშენებლის“ ლიდერი, გიორგი ვაშაძეც იზიარებს და ერთ-ერთი ქართული გამოცემისთვის მიცემულ ინტერვიუში ამბობს, ნაცმოძრაობის ანკლავური ლიდერები მხოლოდ იმას ცდილობენ, რომ ხელისუფლებაში სავარძლები დაიკავონო, თუმცა „სტრატეგია აღმაშენებლის“ ლიდერისა და „ძალა ერთობაშიას“ გზის გაყრაზე სხვა დროს ვისაუბროთ. ახლა კი, ორიოდე სიტყვით, თემურ ალასანიას ბეგრაუნდიც გავიხსენოთ. 

მოკლედ, როგორც ზემოთ აღვნიშნეთ, თემურ ალასანია იმთავითვე საბჭოთა უშიშროების კადრად ითვლება და ზოგი იმასაც ამბობს, რომ რუსებთან დისშვილი ანუ მიშა, სწორედ მან დააახლოვა. ზოგადად, ენას ძვალი არ აქვს და ბევრის თქმა შეუძლია, მაგრამ რაც უნდა იყოს, თემურ ალასანია, ბოლო წლების ქართულ პოლიტიკაში, ერთ-ერთი ყველაზე საინტერესო და იდუმალი ფიგურაა, ფიგურა, რომელიც ღიად არასოდეს ჩნდებოდა და ჩნდება, თუმცა ისინი, ვინც პოლიტიკის სამზარეულოს კარგად იცნობენ, ამბობენ, რომ ბიძის გარეშე, მიხეილი არასოდეს არაფერს აკეთებდა და აკეთებს. 

2018 წლის თებერვალი, რუსულ ტელეკომპანია „НТВ“-ზე, პროგრამაში _ „ახალი რუსული სენსაციები“, მიხეილ სააკაშვილის ბიძასთან, თემურ ალასანიასთან ექსკლუზიური ინტერვიუ გადაიცა. ვიდეოსიუჟეტში კი, მიხეილ სააკაშვილის ოჯახის საბჭოთა „კაგებე“-სა და ამერიკულ „ცეერუს“-სთან კავშირებზე საქართველოს უშიშროების ექსმინისტრმა, იგორ გიორგაძემ ისაუბრა. 

„თემურ ალასანიას დაბადების თარიღს ღია წყაროებშიც კი გრიფი „საიდუმლო“ ადევს. მისი არაოფიციალური საქმიანობა მჭიდროდაა დაკავშირებული აშშ-ის სპეცსამსახურებთან. როცა გასული წლის ბოლოს, მიხეილ სააკაშვილის ბიძა მოულოდნელად კიევში არ შეუშვეს, ცხელმა სისხლმა იძალა: მან კადნიერად, მოურიდებლად მიმართა მსოფლიოს ისე, რომ შედეგებზე არც დაფიქრებულა“, _ ნათქვამი იყო ინტერვიუს შესასავალში. თავად ინტერვიუში კი თემურ ალასანია ამბობდა: „მე ჩემი პირველი შეხვედრები ლეონიდ ბრეჟნევის პერიოდში დავიწყე და აშშ-ის თითქმის ყველა იმდროინდელი პრეზიდენტით დავასრულე“. 

იგორ გიორგაძე: „_ არა, იგი გადაბირებული არ ყოფილა, მან თვითონ შესთავაზა თავისი სამსახური აშშ-ის ცენტრალურ სადაზვერვო სამმართველოს. „გადაბირება“ და „შეთავაზება“ ერთმანეთისგან განსხვავდება“. 

ისტორიაში თავისი როლის შესახებ, მიხეილ სააკაშვილის ბიძა ბუნდოვნად საუბრობს. მხოლოდ იმას აღიარებს, რომ დისწული მან საწყის ეტაპზე ამერიკული ელიტის კონკრეტულ პიროვნებებს გააცნო. 

იგორ გიორგაძე: „ _ მან ასე თქვა: „დისწული მყავს, მას საერთაშორისო ურთიერთობების ფაკულტეტი აქვს დამთავრებული, ორი ენა იცის, გამოიყენეთ“. ამერიკელებმაც მოსინჯეს, ყურადღება მიაქციეს. მოგვიანებით კი მიხეილ სააკაშვილს „ოქროს ბიჭუნა“ უწოდეს“. 

ჰოდა, „ოქროს ბიჭუნა“ თავის მომავალ მეორე ნახევარს _ სანდრა რულოვსს შეახვედრეს. 

თემურ ალსანია: „_ ვფიქრობ, რომ ეს იყო ორი გულის, ორი ინდივიდუმის, ორი ადამიანის ერთმანეთთან კარგად შეხამება“. 

სხვათა შორის, 2018 წელსვე, ერთ-ერთ უკრაინულ ვებგვერდზე ფარული აუდიოჩანაწერი გამოქვეყნდა და, როგორც ვებგვერდის ადმინისტრაცია აღნიშნავდა, ჩანაწერში მიხეილ სააკაშვილი და ბიძამისი, თემურ ალასანია საუბრობდნენ: 

„მიხეილ სააკაშვილი: _ გვარამია ხომ არ გამოჩენილა, ხომ არ გილაპარაკია? დაწყნარდა ბოლომდე? 

თემურ ალასანია: _ ძაან კარგად არის, უსმენს ამათ, მაგრამ არაფერს ამათ მიხედვით არ აკეთებს. ამიტომ ჩვენი ერთადერთი ნიშა არის საზოგადოების რადიკალიზაცია. 

მიხეილ სააკაშვილი: _ მოახდინოს რადიკალიზაცია. 

თემურ ალასანია: _ აი, როგორ იცი, ნამდვილად იმიტომ, რომ ფეხზე დავდგებით. აი, ნახავ თუ არა. 

მიხეილ სააკაშვილი: – კვესიტაძე არის ის, რაც უნდა იყოს. აწი პროპაგანდაა სულ, მარა რაღაცა სეგმენტი გვინდა პროპაგანდის თბილისის მიდდლე ცლასს-თვის, უნდა ვისწავლოთ თუნდაც ინტერნეტსეგმენტის გამოყენება. 

თემურ ალასანია: _ ზუსტად ეგრეა. 

მიხეილ სააკაშვილი: – ჩვენ ორი ელემენტის გაძლიერება გვჭირდება: რევოლუციური ახალგაზრდობის და თბილისის მიდდლე ცლასს-ის იმიტომ, რომ საბოლოო ჯამში, რევოლუციას ეგენი ახდენენ. მანდ გვაქვს სერიოზული ჩავარდნა იმიტომ, რომ ამათ წარმოიდგინეს, რომ თბილისი ეს არის ბაზრობებზე სიარული და გლდანის მეტროში. ეგ ეგრე არ არის. ისიც არის, მარა გადამწყვეტი რევოლუციური მუხტი არის აი ეს სელფ მადე ბიზნესები თბილისის ცენტრში. თან ამ სირ..ს რომ ჰგონიათ, რომ ამათთან რაღაც დიდს მიაღწევ. 

თემურ ალასანია: – ეს ავადმყოფი ერია, რა. ამათ სანამ არ დააჯ..მ თავზე და დედას არ მოუტ...ვ, ვერ იგებენ ვერაფერს. 

მიხეილ სააკაშვილი: _ ეგრე იყო ეგ ხალხი მთელი ცხოვრება. ეხლა რატომ იქნება… 

თემურ ალასანია: – მაგათი დედა მოვტ..ნ მე, ქართველების, პროსტა, რა. ქართველების დედა მოვ..ნ. ვინ არიან ესენი, ტო, ეს ავადმყოფი ერი, ვინ არის, ტო. დავიღალე, იცი, „პროსტო“ ცდისგან. ვზივარ, ვზივარ, ვზივარ. რაღაც ზარებს ველოდები. რაღაცას მიდივარ-მოვდივარ, სულ რაღაცა ხვალ, ზეგ, აი, ეხლა მოხდება. 

მიხეილ სააკაშვილი: – ამათ სულ აჭრილი აქვთ ყველაფერი, რამსები. ეს არჩევნები კიდევ უფრო დააბნევთ იმიტომ, რომ დააყენეს უსუსტესი კანდიდატი და ცუდი კამპანიები. 

თემურ ალასანია: – დავიღალე, რა, იმიტომ კი არა, რომ ცუდად არის რამე საქმე. არა. პროსტა აი, ცდამ დამღალა. სულ რაღაცას ვუცდი. ერთ მილიონს გადავუხდი, ვინც „სნაიპერსკი ვინტოვკით“ მოკლავს ბიძინას. 

მიხეილ სააკაშვილი: – ეხლა ჟურნალისტებს მიხედე ჯობია და გვარამიას“. 

ამ ჩანაწერის გავრცელების მერე, თემურ ალასანიამ სოციალურ ქსელში დაწერა: 

„ჩემსა და პრეზიდენტს შორის ვითომ შემდგარი სატელეფონო საუბარი, რომელიც სამთავრობო „მხილებების“ ბოლო ჰიტად უნდა იქცეს, წარმოადგენს სრულ ფაბრიკაციას და არ გამოიწვევს არავითარ ვნებათაღელვას. შემოვიფარგლები მარტო ორი კომენტარით. ამათ ან ჩვენ ვგონივართ სრული იმბეცილები, რომ ასეთ თემებზე ვისაუბროთ, ან ქართველი ხალხი, რომელმაც ეს უნდა უპირობოთ გადაყლაპოს. ეს არც ჩემი საუბრის სტილია, განსაკუთრებით გინება და არც ჩემი ხმა. მკვლელობებს საერთოდ არ ვუკვეთავ და მითუმეტეს ტელეფონით. და მეორე. ეტყობა, ძალიან გაუჭირდათ და დამარცხება მათთვის გარდაუვლია. საიდან ვიცი? იქიდან, რომ ოჯახის წევრებზე ქმნიან კომპრომატს“. 

ზოგადად, თემურ ალასანიაზე საუბარი დაუსრულებლად შეიძლება, თუმცა ვინმემ ზუგდიდის მაჟორიტარობის მომავალი კანდიდატის ანტიპიარად რომ არ ჩაგვითვალოს, მოდით, წერტილი აქ დავსვათ, თუმცა ერთიც ვთქვათ: პოლიტიკური სპექტრიდან გიული ალსანიას მაჟორიტარობის შესაძლო კანდიდატობა, ღიად ნინო ბურჯანაძემ გააპროტესტა. სხვები კი ჯერჯერობით ამ კუთხით, როგორც იტყვიან, სტატუს-კვოს ინარჩუნებენ.

ნინო დოლიძე

]]>
versiaprinti@yahoo.com (super admin) პოლიტიკა Wed, 16 Sep 2020 11:56:54 +0400
იქნება თუ არა დიმიტრი ხუნდაძე „ოცნების“ პროპორციულ სიაში http://www.versia.ge/2013-07-31-11-22-32/item/6923-იქნება-თუ-არა-დიმიტრი-ხუნდაძე-„ოცნების“-პროპორციულ-სიაში.html http://www.versia.ge/2013-07-31-11-22-32/item/6923-იქნება-თუ-არა-დიმიტრი-ხუნდაძე-„ოცნების“-პროპორციულ-სიაში.html

„სააკაშვილს საქართველოში ამომრჩეველი კი არა, მართლმსაჯულება ელოდება!“

საქართველოში საარჩევნო კამპანია კორონაპანდემიის ფონზე მიმდინარეობს. ვირუსის დადასტურებული შემთხვევები დღითი დღე მატულობს, თუმცა ხელისუფლება აცხადებს, რომ საყოველთაო ,,ლოკდაუნი’‘ აღარ გვემუქრება და ე.წ. ჩაკეტვები წერტილოვნად განხორციელდება. კორონა ციებ-ცხელების პარალელურად, ხელისუფლებამ და ოპოზიციამ ხელი საარჩევნო ქცევის კოდექსს მოაწერეს. დოკუმენტი ცესკო-ს მიერაა მომზადებული, რაშიც საერთაშორისო ორგანიზაციები _ USAID და IRI-იც იყვნენ ჩართულები. კოდექსში გაწერილია, თუ რა ქცევებია საარჩევნო კამპანიის დროს მიუღებელი. კერძოდ, საუბარია სიძულვილის ენაზე, ამომრჩევლის მოსყიდვასა და შეურაცხმყოფელ განცხადებებზე. როგორც ხედავთ, კორონაქაოსის მიუხედავად, ქართული პოლიტიკური სპექტრი არჩევნებისთვის აქტიურად ემზადება, თუმცა საინტერესოა, როგორ განვითარდება მოვლენები პანდემიის კუთხით ანუ ხომ არ გადაიდება არჩევნები და როდის გვექნება ქვეყანაში ვირუსის აფეთქების მეორე ტალღა? _ ამ საკითხებზე ,,ვერსია’‘ ჯანდაცვის კომიტეტის თავმჯდომარეს, დიმიტრი ხუნდაძეს ესაუბრა.

 

_ იმის პროგნოზი, რაც დღეს ეპიდვითარებასთან დაკავშირებით ხდება, არაერთხელ გავაკეთეთ და ვთქვით, რომ შემოდგომის პირას ინფიცირებულთა რაოდენობა მოიმატებდა, თუმცა ასეთი ნახტომისებური ზრდა იმაზე მეტია, ვიდრე მოსალოდნელი იყო. ეს განაპირობა საზოგადოების ყურადღების მოდუნებამ, რაც საგანგაშო არა, მაგრამ საყურადღებოა და ვფიქრობ, რეკომენდაციების დაცვა ისე, როგორც აქამდე იყო საჭირო, ახლაც აუცილებელია. ეს რეკომენდაციებია: პირბადის ტარება, თავშეყრის ადგილებზე მაღალი სიმჭიდროვის მორიდება, ფიზიკური დისტანცირება. ამ პროცესის მართვა თავისუფლად შეგვიძლია, რადგან ამ კუთხით, უკვე გარკვეული გამოცდილება მივიღეთ. თავიდან, როგორც მსოფლიო, ჩვენც გამოუცდელი ვიყავით, მაგრამ ამ ხნის განმავლობაში გამოცდილება დავაგროვეთ და აქამდე პროცესი კარგად ვმართეთ, რასაც მთელი მსოფლიო აღიარებს, თუმცა იმ ფონზე, როცა ეპიდემიოლოგების უდიდესი ნაწილი შესაძლო მეორე ტალღას ვარაუდობს, რა თქმა უნდა, მეტი სიფრთხილე და იმ რეკომენდაციების უფრო მაღალ ხარისხში დაცვა გვმართებს, რაც ჯანმო-ს (ჯანდაცვის მსოფლიო ორგანიზაცია, _ ავტ.) მიერაა გაცემული და რა რეკომენდაციებსაც საკოორდინაციო საბჭო იძლევა. 

ასე რომ, დავიცვათ წესები. ამ ვირუსის ხასიათი ამგვარია _ თუ რეკომენდაციებს ითვალისწინებენ, ზიანი მინიმალურია, მაგრამ თუ შესაძლო ზიანს ანგარიშს არ უწევენ, რა თქმა უნდა, ვირუსის ნეგატიური გავლენა უფრო დიდია, რაც არაერთი ქვეყნის მაგალითზე ვნახეთ. სიფრთხილე ნამდვილად გვმართებს, კლინიკები მზადაა, რომ საჭიროების შემთხვევაში, მაქსიმალური შესაძლებლობები გამოავლინონ, მაგრამ ჯანდაცვის სფეროსაც აქვს რეალური შესაძლებლობების ზღვარი. ჩვენ ვართ მაქსიმალურად მზად, მაგრამ აუცილებელია, რომ საზოგადოებამ საკუთარი თავი რისკის ქვეშ არ დააყენოს. 

_ ისე, დამძიმებული კოვიდვითარების ფონზე, არჩევნების გადადება ხომ არ განიხილება? 

_ ჩვენ გვაქვს ორი ძირითადი მიმართულება _ მოქალაქეების ჯანმრთელობის დაცვა და ის, რომ ეკონომიკაში შეუქცევადი პროცესი არ მივიღოთ. ამას ემატება მესამეც _ არჩევნები უსაფრთხოდ და მაქსიმალურად თავისუფალ გარემოში, დამატებითი შეზღუდვების გარეშე და დემოკრატიულად ჩავატაროთ. დღევანდელი ეპიდვითარება საარჩევნო პროცესს საფრთხეს არ უქმნის, მაგრამ უნდა გავითვალისწინოთ, რომ არჩევნებზე უფრო მეტი სიმჭიდროვე იქნება, ვიდრე ახლაა და ამიტომ, უნდა ვიფიქროთ არა მხოლოდ არჩევნების დღეზე, არამედ, შემდგომ პერიოდზეც, რათა ქვეყანას დამატებითი პრობლემები არ გაუჩნდეს. 

_ რაც შეეხება არჩევნების პოლიტიკურ კონტექსტს, ,,ქართული ოცნების’‘ სიის ოცეულში არაერთი ახალი სახე გამოჩნდა. ამას როგორ აფასებთ? 

_ ეს ოცეული საკმაოდ საინტერესოდ გამოიყურება, არიან გუნდის ძველი წევრებიც _ ძირითადად, ლიდერები და ვფიქრობ, მათ საკუთარი პოლიტიკური ცხოვრებით აჩვენეს, რომ შეუძლიათ, ქვეყანაში პოლიტიკური პროცესების მართვის სადაავებთან იყვნენ, მაგრამ რა თქმა უნდა, საჭიროა განახლება და ახალი სახეებიც, თავისი განათლებით, კომპეტენციით, საკმაოდ საინტერესოდ გამოიყურებიან. 

_ მმართველი გუნდის ძველი სახეები, აი, მაგალითად, თქვენ, ,,ოცნების’‘ სიაში იქნებით? 

_ თქვენ სვამთ კითხვას იმის შესახებ, თუ ვინ იქნებიან სიის შემდეგი წევრები, თუმცა არ მინდა გავუსწრო მოვლენებს, რამეთუ ეს პოლიტსაბჭოს გადასაწყვეტია და ცნობილი გახდება, ვინ იქნება სიაში და ვინ _ არა. 

ერთი რამ შემიძლია გითხრათ _ ვაპირებ პოლიტიკური ცხოვრების გაგრძელებას და ჩემს პოლიტიკურ მომავალს ვხედავ მხოლოდ და მხოლოდ ,,ქართულ ოცნებასთან’‘, ვისთანაც პოლიტიკური ცხოვრება დავიწყე! 

_ როგორ ფიქრობთ, ხელისუფლება და ოპოზიცია ქცევის კოდექსს საარჩევნოდ დაიცავენ? 

_ შეთანხმება კარგია, მაგრამ მას შესრულება უნდა. მმართველი გუნდი წესებს ყოველთვის იცავდა და ახლაც დავიცავთ. ოპოზიციისგან კი დიდი მოლოდინი არ მაქვს, რომ ამას გააკეთებს, თუმცა ვნახოთ. 

_ მიხეილ სააკაშვილის შესაძლო დაბრუნებას როგორ აფასებთ? 

_ სააკაშვილის ჩამოსვლა-არჩამოსვლას სერიოზულად არ ვუყურებ, რადგან ყოველი არჩევნების წინ გვპირდება, რომ ჩამოვა, მაგრამ როგორც ჩანს, ამასაც ისე იტყუება, როგორც ყველაფერ დანარჩენს. 

ისე, ნამდვილად ელოდება, ოღონდ არა ამომრჩეველი, არამედ, მართლმსაჯულება, თუმცა ერთიც მაინტერესებს: მან ბოდიში მოიხადა 8 წლის შემდეგ და რაზე იხდის ბოდიშს? რას გულისხმობს? _ იმას, რომ აწამებდა ადამიანებს? ამას ბოდიში არ ყოფნის. სწორედ ამიტომ მაინტერესებს, რაზე იხდის ბოდიშს. მას ძალიან ბევრ საკითხზე აქვს სამართლებრივი პასუხისმგებლობა და მხოლოდ ბოდიში არ იქნება საკმარისი. 

_ თქვენი პროგნოზით, ,,ქართული ოცნება’‘ არჩევნებში როგორ შედეგს დადებს? 

_ ოპოზიციის მხრიდან წარმოდგენილი პოლიტიკური სპექტრი საკმაოდ უინტერესოა. მათი წარსული საკმაოდ სახიფათოა. ძირითადად, ნაციონალურ მოძრაობასა და მის განაყარს ვგულისხმობ. სხვა ძალიან ბევრი პარტია უცნობია, ორკაციანი და ერთკაციანია, ამიტომ დიდ კონკურენციას ვერ ვხედავ. კონკურენცია, სამწუხაროდ, პოლარიზებულია. ერთ მხარესაა ისევ ძველი ნაციონალური მოძრაობა, რომლის წარსულიც ახსოვს საზოგადოებას და მეორე მხარესაა ,,ქართული ოცნება’‘, რომელიც ყველაზე მეტად არის საზოგადოებასთან. 

შესაძლოა, ,,ქართულ ოცნებასაც’‘ ჰქონდა ხარვეზები, მაგრამ მას ერთი ისეთი შეცდომაც არ დაუშვია, რომელიც ადამიანის სიცოცხლეზე გადიოდა ან ქვეყნის ოკუპაციაზე... ასე რომ, ვინც არ მუშაობს, ის შეცდომებსაც არ უშვებს, მაგრამ ისეთი შეცდომა არ უნდა დაუშვა, რომელიც საზიანო ხდება ქვეყნისა და თაობებისთვის. 

_ ბატონო დიმიტრი, თქვენ ერთ-ერთი დეპუტატი იყავით, რომელიც მაჟორიტარულ სისტემას ბოლომდე იცავდა და პროპორციულ სისტემაზე გადასვლას მხარი არ დაუჭირეთ. ,,ოცნებამ’‘ მაჟორიტარად რომ არ დაგასახელათ, გული ხომ არ დაგწყდათ? 

 

_ მე ვიყავი ორი მოწვევის მაჟორიტარი დეპუტატი. როგორ ვაკეთებდი ჩემს საქმეს, ამას საზოგადოება შეაფასებს. ვფიქრობ, ჩემი მაჟორიტარობა არ იყო უინტერესო არც საკანონმდებლო მუშაობით და არც _ ადგილზე, სამაჟორიტარო ოლქში, თუმცა ალბათ, უკეთესადაც შეიძლებოდა, ამიტომ ვისურვებდი, რომ ჩვენი გუნდის წევრი ჩემზე ეფექტური იყოს. 

რაც შეეხება საარჩევნო სისტემას, მე ხომ ჩემთვის არ მიზრუნია და ეს იმიტომ არ გამიკეთებია, რომ მაინცდამაინც მე ვყოფილიყავი მაჟორიტარი? მწამდა და ახლაც მწამს, რომ ქვეყნის სტაბილურიბისთვის, მით უმეტეს, ამ პოლიტიკურ რეალობაში, არათუ სასურველი, არამედ აუცილებელია, რომ მაჟორიტარული შემადგენელი ყოფილიყო სისტემაში. რა თქმა უნდა, 30 მაჟორიტარი არაა ის, რაზეც ვსაუბრობდი, მაგრამ ამ ეტაპზე, სუფთა პროპორციულს მაინც სჯობს, თუმცა უნდა მივიდეთ იქამდე, რომ ქვეყანა პროპორციულ სისტემაზე გადავიდეს. თვითმმართველობა იყოს ძლიერი; მაჟორიტარული რგოლი აღარ იყოს საჭირო რაიონში კონკრეტული საკითხების განსახილველად; ქვეყანაში უნდა იყოს პოლიტიკური სპექტრი, რომ რეალური არჩევანის საშუალება არსებობდეს და აი, მაშინ, აღარ იქნება საჭირო მაჟორიტარული სისტემა. საბოლოოდ, პროპორციულ სისტემაზე უნდა გადავიდეთ.

თათია გოჩაძე

]]>
versiaprinti@yahoo.com (super admin) პოლიტიკა Wed, 16 Sep 2020 11:56:34 +0400
რატომ გადაწყვიტა ნანა დევდარიანმა პოლიტიკაში „პატრიოტების“ სიით დაბრუნება http://www.versia.ge/2013-07-31-11-22-32/item/6922-რატომ-გადაწყვიტა-ნანა-დევდარიანმა-პოლიტიკაში-„პატრიოტების“-სიით-დაბრუნება.html http://www.versia.ge/2013-07-31-11-22-32/item/6922-რატომ-გადაწყვიტა-ნანა-დევდარიანმა-პოლიტიკაში-„პატრიოტების“-სიით-დაბრუნება.html

„თუ საქმეს უშველის, დილას, შუა დღესა და საღამოს სულ ოკუპაციაზე ვილაპარაკებ!“

 

საარჩევნოდ პოლიტიკურ ავანსცენაზე, ახალ სახეებთან ერთად, კარგად ნაცნობი ,,ფეისებიც’‘ ჩნდებიან. ასე, მაგალითად, პატრიოტთა ალიანსის პროპორციული სიის ოცეულში ადა მარშანია ვერა, მაგრამ სამაგიეროდ, ჯემალ სეფიაშვილის ,,ჩემი ცისანა’‘ ანუ ცისანა სეფიაშვილი მოხვდა. პარტიის სიის მე-6 ნომერი კი ცესკო-ს ყოფილი თავმჯდომარე და ყოფილი სახალხო დამცველი, ნანა დევდარიანია. რატომ გადაწყვიტა პოლიტიკაში დაბრუნება? _ ამას ნანა დევდარიანთან ინტერვიუდან შეიტყობთ.

_ ქალბატონო ნანა, პოლიტიკაში დაბრუნება რატომ გადაწყვიტეთ, ან არჩევანი პატრიოტთა ალიანსზე რატომ გააკეთეთ? 

_ სიმართლე გითხრათ, პოლიტიკას მოწყვეტილი არასდროს ვიყავი. მართალია, ბოლო წლებში უფრო პოლიტოლოგიური კვლევებით ვარ დაკავებული, მაგრამ ეს საქმიანობა პოლიტიკურ პროცესებთან ახლოსაა. 

რაც შეეხება პატრიოტთა ალიანსს, ჩემთვის არათუ სრულიად მისაღებია, არამედ, წლებია, ვწერ და ვლაპარაკობ, რომ საქართველო ვერ გამთლიანდება, თუ აფხაზებთან, ოსებსა და რუსებთან პირდაპირი დიალოგი არ იქნება. ამასთან, ჩემთვის სრულიად მისაღებია საქართველოს ნეიტრალიტეტი. ამდენად, ალიანსის მიერ წინ წამოწეული ეს თემები ჩემთვის ორგანულია. 

ამას გარდა, სოციალური და ეროვნული პლატფორმა, რომელზეც ალიანსი დგას, ჩემ მსოფლმხედველობას მთლიანად ეთანხმება. 

_ ბოლო დროს, პატრიოტთა ალიანსს რამდენიმე სკანდალი დაუკავშირდა, მათ შორის, აფხაზეთში ხატის გადაბრძანება, რუსეთისგან დაფინანსების საკითხი და ა.შ. ყველაფერი ეს, თქვენი პარტიის საარჩევნო შედეგზე როგორ იმოქმედებს? 

_ უკვე იმოქმედა, ოღონდ დადებითი კუთხით. ეს თავდასხმები, როგორც მმართველი ძალისგან, ისე ე.წ. ოპოზიციისგან, შიშითაა განპირობებული. დახურული კვლევები აქვთ და იციან, რომ ,,პატრიოტთა ალიანსის’‘ რეიტინგი ძალიან მაღალია, რასაც პოლიტიკური მოწინააღმდეგის შიში მოჰყვება, მაგრამ ადამიანები ყველაფერს ხედავენ. 

ხომ იცით, ჩვენი მოძმე სომეხი ხალხი, თავისი მენტალიტეტით, როგორია _ რომელიმე სომეხს მსგავსი ნაბიჯი რომ გადაედგა, აფხაზეთში ხატის წაბრძანებას ვგულისხმობ, ამას მთელი სომხეთი აღტაცებით შეხვდებოდა, ჩვენთან კი პირუკუ ეფექტი ჰქონდა. ეს პოლიტიკური შურიანობაა და სხვა არაფერი, თუმცა ასეთი თავდასხმები ჩვენ გარშემო, სულ უფრო მეტი ადამიანის მობილიზებას ახდენს. 

_ შეიძლება, მაგრამ რუსეთის მიერ ოკუპირებულ აფხაზეთში ფარულად გადასვლა ნორმალურად მიგაჩნიათ ანუ სანამ ინფორმაციამ მედიაში არ გაჟონა, ამაზე პატრიოტთა ალიანსმა არაფერი თქვა... 

_ საკითხს ასე უნდა შევხედოთ _ ოკუპაცია დროებითი მოვლენაა, ყოველ შემთხვევაში, ჩემთვის და პატრიოტთა ალიანსისთვის ასეა. 

გარდა ამისა, ჩვენ კი არ უნდა ვიძახოთ, რომ აფხაზეთი და სამხრეთ ოსეთი ოკუპირებულია, არამედ, ეს იმ ხალხმა უნდა თქვას. 

ისინი ძალიან ბრაზობენ, როცა ეუბნები, უთავმოყვარეო ხარ და ოკუპირებულ ტერიტორიაზე ცხოვრობო. დიალოგი ასე არ გამოვა, თორემ თუ საქმეს უშველის, დილას, შუა დღესა და საღამოს, სულ ოკუპაციაზე ვილაპარაკებ. 

როცა ის ადამიანები გაკრიტიკებენ, რომლებსაც ოკუპაციასთან ბრძოლა შარვლის ჩახდა და საჯდომის მიშვერა ჰგონიათ, ვფიქრობ, ეს ფაქტი მათზე ნათლად მეტყველებს. 

რაც შეეხება რუსული ფულის საკითხს, ასეთ ,,ფეიკებს’‘ ის ხალხი ქმნის, რომლებსაც 1995 წლიდან, არჩევნები არ გამოუტოვებიათ, რომ რუსული ფული არ ჰქონოდათ და რუსი პიარტექნოლოგები არ ჰყოლოდათ. 

_ ვის გულისხმობთ? 

_ ყოფილ მოქალაქეთა კავშირს, რომელიც მერე ნაციონალური მოძრაობა გახდა. არსებობს რუსი პოლიტტექნოლოგების ინტერვიუები, რომლებიც პირდაპირ ამბობდნენ, ჩვენ ვეხმარებოდით ჟვანიასა და ბურჯანაძეს, მაგრამ საბოლოოდ, სააკაშვილმა იმარჯვა და ყველაფერი ეს, მიიწერაო. 

_ კი, მაგრამ რატომ უნდა სჭირდებოდეს ნაციონალურ მოძრაობას, პატრიოტთა ალიანსის მიმართ, ასეთი ,,ფეიკების’‘ გამოგონება? 

- იციან რეალური რეიტინგები და უნდათ, კონკურენტი დააზარალონ, ისეთი რამ მოიგონეს, რაც იუმორის სფეროსაც კი სცდება. 

ერთ ექსკლუზივს გაგიმხელთ ,,საიდუმლოდ’‘ _ პუტინი ფულს კი არ გვაძლევს, უბრალოდ, შესაბამის ქაღალდს გზავნის ფოსტით და მერე, ჩვენ ფერად პრინტერზე ამოგვაქვს დოლარები! მოკლედ, ყველაფერი ეს, სრული იდიოტიზმია! 

შემთხვევით, ეს ის ძალები ხომ არ არიან, რომელთა წარმომადგენლებიც საზღვარზე დააკავეს, მილიონი დოლარი ,,ქეშად’‘ რომ გადმოჰქონდათ? და კიდევ უამრავი რაღაც, რაც არ ჩანს, თორემ ამდენი ტელევიზიის შენახვას ეხუმრებით?! 

_ ისე, რადგან ,,ფეიკებზე’‘ ვსაუბრობთ, როგორ გგონიათ, იმოქმედებს საარჩევნოდ მიღებული ქცევის კოდექსი, რომელსაც ხელი ,,ოცნებამაც’‘ მოაწერა და ოპოზიციამაც? 

_ ქაღალდზე ყველაფრის დაწერა შეიძლება, მაგრამ ყველაფერი საარჩევნო კამპანიის განმავლობაში გამოჩნდება. ბინძურ ტექნოლოგიებზე ნაციონალური მოძრაობა უარს არ იტყვის. ,,ოცნება’‘ ასე არ იქცევა ხოლმე _ ერიდება ნეგატიურ პიარს, მაგრამ იქაც არის ფრთა, მაგალითად, კობახიძე-მდინარაძე, რომელიც, დაახლოებით, ამ ხელწერით მოქმედებს. ისე, დოკუმენტი რომ შეიქმნა, ამაში ცუდი არაფერია. 

_ ქალბატონო ნანა, NDI-ს ბოლო კვლევის მიხედვით, გამოკითხულთა 59%-მა არ იცის, რომელ პარტიას აძლევს ხმას. ეს როგორ იმოქმედებს ოპოზიციური პარტიების საარჩევნო შედეგზე? 

_ საერთოდ, ადამიანები არჩევანს ბოლო დღეებში აკეთებენ. საუბარი იმაზეა, თუ ვინ შეძლებს ამ ხმების თავისკენ მიზიდვას. სასურველია, რომ გადაუწყვეტელი ამომრჩევლიდან ყველამ ხმა პატრიოტთა ალიანსს მისცეს, მაგრამ NDI-ს რომელიმე კვლევის შედეგი, რომელიმე არჩევნების შედეგს ერთხელ მაინც დაემთხვა? _ არც ერთხელ! ამ კვლევებს ერთ-ერთ პარტიასთან მკვეთრად აფილირებული ორგანიზაცია ატარებს და როგორ ვენდო? 

_ არჩევნების შემდეგ, რომელ პარტიასთან აპირებთ კოალიციურ რეჟიმში თანამშრომლობას და რომელთან _ არა? 

_ ძალიან მიკვირს, როცა ,,ოცნებისა’‘ და ,,ნაციონალების’‘ ორივე ფრთის წარმომადგენლები კატეგორიულად აცხადებენ, არ ვითანამშრომლებთ პატრიოტთა ალიანსთან და არ შევქმნით კოალიციასო. 

ჯერ არჩევნების შედეგები უნდა დაიდოს, წინასწარ ამაზე ლაპარაკი უაზრობაა. ჯერ გადახტნენ და მერე ,,ჰოპლა’‘ დაიძახონ. 

ერთი რამ შემიძლია გითხრათ: პატრიოტთა ალიანსი არასოდეს ითანამშრომლებს ნაციონალური მოძრაობის ორ დანაყოფთან, დანარჩენს არჩევნები გვაჩვენებს.

თათია გოჩაძე

]]>
versiaprinti@yahoo.com (super admin) პოლიტიკა Wed, 16 Sep 2020 11:56:30 +0400
ხათუნა ლაგაზიძე: „თუ კატასტროფული შეცდომა არ დაუშვა, „ოცნებას“ არჩევნების მოგების მაღალი შანსი აქვს!“ http://www.versia.ge/2013-07-31-11-22-32/item/6917-ხათუნა-ლაგაზიძე-„თუ-კატასტროფული-შეცდომა-არ-დაუშვა,-„ოცნებას“-არჩევნების-მოგების-მაღალი-შანსი-აქვს-“.html http://www.versia.ge/2013-07-31-11-22-32/item/6917-ხათუნა-ლაგაზიძე-„თუ-კატასტროფული-შეცდომა-არ-დაუშვა,-„ოცნებას“-არჩევნების-მოგების-მაღალი-შანსი-აქვს-“.html

„პრორუსული ძალები სერიოზულ შედეგს ვერ დადებენ!“

 

შეუიარაღებელი თვალითაც ჩანს, რომ „ოცნების“ მიმართ დასავლეთის რიტორიკა შერბილებულია. ყოველ შემთხვევაში, ის კონგრესმენები და სენატორები, რომლებიც რამდენიმე თვის წინ, მმართველ გუნდს სანქციებით ემუქრებოდნენ, მოულოდნელად, საეჭვოდ დადუმდნენ ანუ იქმნება განცდა, რომ ივანიშვილის პარტიამ დასავლეთთან ურთიერთობა დაალაგა. ამასთან, ხელისუფლების წისქვილზე წყალი კორონამაც დაასხა და, როგორც ანალიტიკოსი ხათუნა ლაგაზიძე ამბობს, ამის გამო ოპოზიცია დაიბნა. 

მოკლედ, როგორ იქცა პანდემია „ოცნების“ შარავანდედად, ხომ არ სუსტდება საქართველოს მიმართ დასავლეთის ინტერესი და რა მესიანისტური იდეა გადაგვარჩენს? _ გთავაზობთ ინტერვიუს ხათუნა ლაგაზიძესთან.

_ ხათუნა, არ ვიცი, დამეთანხმები თუ არა, მაგრამ მეჩვენება, რომ წლევანდელი საარჩევნო კამპანია, წინა წლებისგან განსხვავებით, დუნედ და უღიმღამოდ მიდის. 

_ დიახ, საარჩევნო კამპანია მხოლოდ ხელისუფლების კი არა, არამედ, მთავარი ოპოზიციური ძალის მხრიდანაც დუნედ მიდის. საერთოდ, ყველაფერი შედარებითია და ყველაზე დუნედ, სწორედ ეს ოპოზიციური პოლიტიკური ძალა გამოიყურება, თუმცა „ნაციონალები“, „ოცნებაზე“ დუნედ მიდიან. 

„ოცნების“ დუნეობას ობიექტური მიზეზი აქვს, რადგან როგორც არასოდეს, ახლა „თეთრ ცხენზე“ ზის და ამ „თეთრ ცხენს“ კორონა ჰქვია ანუ პანდემია „ქართულ ოცნებას“ შარავანდედივით დაედგა. თუ ციფრებიდან ამოვალთ, საქართველოში კორონას გავრცელება, სიკვდილიანობის მსგავსად, სხვა ქვეყნებთან შედარებით, ნაკლებია, რაც ბუნებრივია, ხელისუფლებაში მყოფ ძალას მიეწერა. 

 

ამასთან, „ოცნებას“ კორონასთან დაკავშირებით, ხელ-ფეხს ამომრჩეველში ასეულობით მილიონის ჩაღვრაც უხსნის. ეს დახმარება, ნებისმიერ სხვა შემთხვევაში, უპრეცედენტო ტიპის მოსყიდვა იქნებოდა და ჯერ კიდევ არჩევნებამდე კარგა ხნით ადრე, სამართლიან არჩევნებზე, უბრალოდ, ვერ ვისაუბრებდით. ახლა კი, კორონას შარავანდედის გამო, ყველაფერ ამას სოციალური დახმარება ჰქვია და იმ ტიპის სოციალურ დახმარებებზეც კი, რომლებიც კორონათი არაა გამოვწეული, ხმას ვერც ოპოზიცია იღებს და ვერც _ არასამთავრობო სექტორი, რადგან ამას, მათ მიმართ მხოლოდ ნეგატივი მოჰყვება. 

მოკლედ, კორონას „თეთრ ცხენზე“ ხელისუფლების „შემოსკუპებამ“ ოპოზიციაზეც იმოქმედა. 

_ ესე იგი, არჩევნების წინ, კორონა „ოცნების“ ერთ-ერთ მოკავშირედ იქცა? 

_ დიახ, მთავარი მოკავშირეა. ყველაფერი ეს კი ოპოზიციისთვის სერიოზული ფსიქოლოგიური წნეხი აღმოჩნდა, რადგან არ იცის, „ოცნების“ ამ სრულიად მოულოდნელ წარმატებას საიდან შემოუაროს! სწორედ ეს განაპირობებს, რომ მთავარი ოპოზიციური ძალა ანუ „ნაციონალური მოძრაობა“ პასივშია გადასული. დანარჩენ ოპოზიციურ პარტიებს საარჩევნო კამპანია მეტ-ნაკლებად დაწყებული აქვთ. აი, „ნაციონალები“ კი ბევრ ოლქში მაჟორიტარებზეც არ არიან ჩამოყალიბებულნი. 

_ კორონობამ ოპოზიცია, შესაძლოა, დააბნია, მაგრამ რამდენიმე დღის წინ, მიხეილ სააკაშვილის განცხადებით, მე ვბრუნდებიო, „ნაციონალებს“ ახალი სუნთქვა ხომ არ გაეხსნებათ? 

_ კი, შეიძლება, ასე მოხდეს, მაგრამ აქამდე ოპოზიცია და განსაკუთრებით „ნაციონალური მოძრაობა“, ხელისუფლების შეცდომებს ითვლიდა. საერთოდ, 8 წლის განმავლობაში, „ოცნებამ“ უამრავი ბრიყვული შეცდომა დაუშვა, რასაც საკმაოდ მძიმე შედეგი მოჰყვა და რომ არა კორონა, ოპოზიცია იმედოვნებდა, ეს შეცდომები „ოცნებას“ გადაიყოლებსო, მაგრამ კორონას ტალღაზე, კრიმინალის აღზევებამაც კი „ოცნებას“ ბევრი ვერაფერი დააკლო, თუმცა ისიც უნდა ითქვას, რომ ოპოზიცია ძალიან პასიურია! 

მოკლედ, რომ არა კორონა, ფორმულა ძალიან მარტივი იყო: არჩევნებს ოპოზიცია კი ვერ იგებდა, მაგრამ შეიძლება, „ოცნებას“ წაეგო, მაგრამ კორონას გამო, „ოცნებას“ გაუჩნდა შანსი, რომ არჩევნები მოიგოს და ეს ოპოზიციისთვის დამთრგუნველი აღმოჩნდა. 

სააკაშილის ფაქტორი, რა თქმა უნდა, უმნიშვნელოვანესია. ჩემთვის სრულიად გასაგებია, როცა საუბარი მის პრემიერობაზე მიდის ანუ ამით პროცესები ისევ ორპოლუსიანობისკენ მიჰყავს. ყველაფერ ამას კი ძალიან მარტივი ახსნა აქვს _ საპარლამენტო სისტემის დროს, სამთავრობო კოალიციას პირველ ადგილზე გასული პოლიტიკური ძალა აკომპლექტებს. აქედან გამომდინარე, „ნაციონალურ მოძრაობას“ სჭირდება, რომ ოპოზიციის ფლანგიდან საპარლამენტო უმრავლესობის დაკომპლექტებაში არავინ შეეცილოს ანუ „ნაცმოძრაობის“ ამოცანა მხოლოდ ის კი არაა, რომ პროპორციული სიით „ოცნების“ შედეგს მაქსიმალურად მიუახლოვდეს, არამედ, ყველა დანარჩენ ოპოზიციურ პარტიას დიდი ნახტომით გაუსწროს. საამისოდ, სააკაშვილს საკუთარი ამომრჩევლისთვის ერთგვარი სტიმულატორი თუ მოტივატორი სჭირდებოდა და ეს განცხადება, ვბრუნდებიო, ამიტომაც გააკეთა, ამით საკუთარი ამომრჩეველი მკვეთრად მოხაზა ანუ მისგან წასულ პოლიტიკურ ძალებს „ნაციონალების“ ხმების წაღების სურვილი რომ არ გასჩენოდათ და ასევე, ამომრჩეველი არ დაბნეულიყო, „ძალა ერთობაშიადან“ გასულები ისევ ჩვენი ორბიტის წევრები ხომ არ არიან და ხმა მათ ხომ არ მივცეთო, სააკაშვილმა ზემოხსენებული განცხადება სწორედ ამიტომ გააკეთა. 

_ ერთი სიტყვით, „ნაციონალური მოძრაობა“ გამარჯვებისთვის კი არა, იმისთვის იბრძვის, რომ მთავარი ოპოზიციური ძალის სტატუსი 31 ოქტომბრის მერეც შეინარჩუნოს? 

_ „ნაციონალური მოძრაობა“ იმისთვის იბრძვის, რომ ოპოზიციიდან საპარლამენტო უმრავლესობის დაკომპლექტების პრეროგატივა მის გარდა არავის ჰქონდეს. ამის შემდეგ კი იწყება შემდგი პროცესი: თუ „ოცნება“ 40%-ს ვერ აიღებს და „ნაციონალები“ მოახერხებენ იმას, რომ ოპოზიციურ პარტიებს უარი ათქმევინონ „ოცნებასთან“ კოალიციის შეკვრაზე, სწორედ „ნაციონალებზე“ გადავა სამთავრობო კოალიციის შექმნის ვალდებულება. სააკაშვილი სწორედ ამ შანსზე ითვლის და ეს გათვლა სრულიად რეალისტურია. 

_ იმ ფონზე, როცა კორონამ „ოცნებას“ არჩევნების მოგების შანსი გაუზარდა, ოპოზიცია საპარლამენტო უმრავლესობას როგორ დააკომპლექტებს? 

 

_ როგორც მოგახსენეთ, „ნაციონალები“ ითვლიან იმაზე, რომ ოპოზიცია არ წავა „ოცნებასთან“ კოალიციაზე. თუმცა, დღეის მონაცემებით, თუ ოპოზიცია მაქსიმალურად არ გააქტიურდა დარჩენილ ორ თვეში და ხელისუფლებამ კატასტორფული შეცდომა არ დაუშვა, „ოცნება“ ახლოს დგას სანუკვარ 40%-თან. 

სხვათა შორის, ცუდად ის მენიშნა, რომ „ენ-დი-აი“-მ დამკვირვებლების გამოგზავნაზე უარი თქვა. მართალია, ამ უარს განმარტებითი ბარათი მოაყოლა, ადგილზე ვითარებას ჩემი ანალიტიკოსები შეისწავლიან და ოპოზიციური პარტიების რაპორტებიც მომივაო. ამასთან, დამკვირვებლების არგამოგზავნის მთავარ არგუმენდატ კორონა მოიყვანა, მაგრამ თუ სტრატეგიული პარტნიორისთვის საქართველოს ამ არჩევნების ბედი და შედეგი სასიცოცხლოდ მნიშვნელოვანია, მაშინ კორონა ხელს ვერ შეუშლიდა. ბოლოს და ბოლოს, ერთ ჩარტერულ რეისს წინ არაფერი დაუდგებოდა, მით უმეტეს, რომ პრაქტიკულად, ერთ-ერთ, ყველაზე კორონა-უსაფრთხო ქვეყანაში უნდა ჩამოსულიყვნენ. 

_ „ენ-დი-აი“-მ დამკვირვებლების გამოგზავნაზე უარი იმიტომ ხომ არ თქვა, რომ „ოცნებამ“ დასავლეთთან ურთიერთობა, როგორც იტყვიან, დაალაგა? 

_ „ოცნებამ“, ლობისტების მეშვეობით, დასავლეთთან ურთიერთობა რომ დაალაგა, ამას შტორმის შემდეგ, კონგრესმენებისა და სენატორების მკვეთრი სიჩუმეც მოწმობს. შარშან დეკემბერში რომ დაიწყო დასავლეთიდან განცხადებები, გაზაფხულამდე არ გაჩერებულა, მაგრამ მერე, თითქოს უხილავმა რეჟისორმა ხელი აიქნიაო, ეს განცხადებები შეწყდა.

მეტიც, ერთ-ერთ ბოლო ინტერვიუში, კიზინგერს საიდან არ შემოუარეს, მაგრამ „ოცნების“ მიმართ კრიტიკა კი არა, ერთი აუგიც ვერ დააცდენინეს და განაცხადა, ის მივიღეთ, რასაც ვითხოვდით ანუ პროპორციული არჩევნები და შიდა საქმეებში ჩარევის უფლება არ გვაქვსო. 

თავს ნამდვილად ვერ დავდებ, რომ „ენ-დი-აი“-ს დამკვირვებლების არჩამოსვლა, უშუალოდ, „ოცნების“ ლობისტების გამოძახილია, მაგრამ საქართველო რეგიონში აშშ-სთვის, პრაქტიკულად, ბოლო ციტადელია და თუ ამ არჩევნების შემდეგ, ჩვენთან რუსული გავლენა კიდევ უფრო გაძლიერდა, მაშინ აშშ საქართველოს კიდევ უფრო დაკარგავს და ამის ერთ-ერთი ყველაზე მნიშვნელოვანი სიმპტომი ისაა, რომ რუსეთმა ხელი მხოლოდ საქართველოს კი არა, არამედ, ჩვენს ქვეყანაში ამერიკულ ინფრასტრუქტურაზეც აღმართა. 

_ რას გულისხმობ, ხათუნა? 

_ ბოლო დროს, ლუგარის ლაბორატორიიდან ინფორმაციის გატანას. 

_ ჰოდა, ამ მოცემულობაში, იგივე აშშ-ს ინტერესში არ უნდა იყოს, რომ არჩევნებზე დამკვირვებლები გამოაგზავნოს, თუ ოპოზიცის იმედი აღარ აქვს, რადგან დაქსაქსულია და დასავლეთი „ოცნებასთან“ ურთიერთობის დალაგებაზე ამიტომაც წავიდა? 

_ მიუხედავად იმისა, რომ დაქსაქსულია, ოპოზიციას მაინც გარკვეული იმედით ვუყურებ. 

_ დამისაბუთე, რატომ? 

_ გარკვეული იმედის მომცემი პერსპექტივები გაჩნდა, თუმცა ვიდრე ამ თემაზე ვრცლად ვისაუბრებ, ერთს ვიტყვი: აშშ-ს გაციების მიზეზი იმედგაცრუება კი არა, ალბათ, უფრო აშშ-ის შიდა პროცესებია. ყოველ შემთხვევაში, ამ კუთხითაც ვფიქრობ, რადგან წინასაარჩევნოდ, აშშ-ში ძალიან დიდი რესურსი იხარჯება, ამას კოვიდიც ემატება, რომელმაც ყველაფერი თავდაყირა დააყენა. ამას გარდა, აშშ-ის იმ დიდი პრეზიდენტების სამარცხვინოდ, რომლებმაც აშშ-ს გავლენა მსოფლიოს „გადააფარეს“, ამ ქვეყნის გავლენა შაგრენის ტყავივით უფრო და უფრო ვიწროვდება და თვით აშშ-ის ძალიან „დიდი თავებიც“ შეშფოთებულნი კითხულობენ, მსოფლიოს კიდევ ერთი სუპერსახელმწიფოს დასუსტებისა და უკუსვლის ეპოქა ხომ არ დგებაო? 

ასეა თუ ისე, ფაქტია: გეოგრაფიულად თუ გადავხედავთ, ობამასდროინდელი და ობამასშემდგომი აშშ-ის გავლენა რადიკალურად შემცირებულია. სამწუხაროდ, საქართველოც ამ რეალობაშია მოქცეული! 

ამიტომ, ჩვენ ისეთი საერთაშორისო-გლობალური მესიანისტური იდეა გვჭირდება, როგორიც თავის დროზე ალიევის, დემირელისა და შევარდნაძის სამკუთხედმა „შექმნა“ _ მათ ამ სამი ქვეყნის უნიკალური გეოგრაფიული მდებარეობა გამოიყენეს და ეს იდეა დასავლეთს შესთვაზეს! 

_ სააკაშვილის გარდა, ქართულ პოლიტიკაში ისეთი ფიგურა გეგულება, რომელსაც შეიძლება, ეს მესიანისტური იდეა გაუჩნდეს? 

_ კარგი კითხვაა... ამას ჯერჯერობით ვერ ვხედავ. საერთოდ, ერთია სახელმწიფოს მისია და მეორე, ამ იდეის გარშემო გაერთიანება. 

რუსული სიანფორმაციო-ფსიქოლოგიური ომის მთავარი სამიზნე, სამიზნე ქვეყნების საზოგადოებებია. ამ სცენარის მთავარი მიზანი ისაა, რომ საზოგადოება რაც შეიძლება, მეტ დაპირისპირებულ ჯგუფად გაიყოს და ამ ჯგუფებში ისეთი მიუღებლობა ჩანერგოს, რომ მათ ერთიან სახელმწიფოებრივ იდეაზე ორიენტირება ვერ შეძლონ. სხვათა შორის, რუსეთი აშშ-შიც ამ სცენარით მოქმედებს. 

ყველაფერ ამის საპირწონე ისეთი ტიპის იდეა უნდა იყოს, რომელიც მხოლოდ საქართველოს საზოგადოებას კი არ გააერთიანებს, არამედ, დასავლეთისთვისაც საინტერესოს გაგვხდის, თორემ ყველაფრიდან ჩანს, რომ ეს ინტერესი, სამწუხაროდ, ილევა. 

_ ხათუნა, ხელმეორედ გკითხავ: ქართულ პოლიტიკურ ავანსცენაზე თუ არის ისეთი ვინმე, ვისაც შეიძლება, ასეთი იდეა გაუჩნდეს? 

_ სამწუხაროდ, ასეთ იდეას ჯერჯერობით ვერც ერთი პოლიტიკური ძალისგან ვერ ვხედავ, თუმცა რამდენიმე, ძალიან საინტერესო სტრატეგიული პროექტი არსებობს, რომელსაც პოლიტიკური ძალები გვთავაზობენ. აი, მაგალითად, „ლელომ“ ქვეყნის ეკონომიკურად წელში გამართვის სრულიად რეალისტური ხედვა წარმოადგინა, თუმცა ერთი რამ დამაკლდა _ მილიარდების მოზიდვასა და იმაზეა ლაპარაკი, რომ საქართველოში „ამაზონმა“ თავისი რეგიონალური ცენტრი უნდა გახსნას, საერთაშორისო საფონდო ბირჟა შეიქმნას, რაც ძალიან კარგია, მაგრამ ყველაფერ ამას განხორციელება მხოლოდ იმ შემთხვევაში უწერია, თუ საქართველოს მიმართ დასავლეთის ინტერესი ისეთივე იქნება, როგორიც დიდი სამკუთხედის _ ალიევ-შევარდნაძე-დემირელის დროს იყო და როცა დასავლეთისთვის უმნიშვნელოვანესი საერთაშორისო ფუნქცია პირველად შევიძინეთ.. 

_ გამორიცხავ, რომ მესიანისტური იდეის ლოკომოტივად გიორგი ვაშაძე მოგვევლინოს? 

_ არა, სახელმწიფოებრივი იდეის დეფიციტი, როგორც გითხარით, დღეს ყველა პარტიას აქვს, თუმცა ვაშაძემ სტრატეგიულ პროგრამაზე საუბარი ყველაზე ადრე _ 2019 წლის სექტემბერში დაიწყო. ჩემი ყურადღება კი ჯერ კიდევ თბილისის მერის არჩევნების დროს მიიქცია, როცა საუბარი მაღალტექნოლოგიურ საქართველოსა და ინოვაციებზე ღიად დაიწყო.. მაშინ ეს ქართულ პოლიტიკაში ახალი სიტყვა იყო. 

ძალიან საინტერესოა, ასევე, ლევან ბოძაშვილის ულტრათანამედროვე სახელმწიფოს _ ნეო საქართველოს ხედვა. 

მოკლედ, ვფიქრობ, ქართულ პოლიტიკაში სტრატეგიული აზროვნებისა და ხედვების, სასიამოვნო ცვლილებების ქარი ქრის: საქართველოს პოლიტიკური აზროვნება სხვა მოთხოვნებზე გადის და დღეს თუ არა ხვალ, ამ ტიპის პოლიტიკური ძალები კრიტიკულ უმრავლესობას შექმნის და ქვეყანაში არსებულ დაჭაობებულ გარემოს შეცვლის. 

_ ბოლოს, ხათუნა, მარტივად მითხარით: იმის შანსი, რომ 31 ოქტობრის შემდეგ საქართველოში პრორუსული ძალები გაძლიერდნენ, რეალურია თუ არა? 

_ ამის თქმა ცოტა რთულია, თუმცა კარგია, რომ პრორუსული ძალების მიმართ, საზოგადოება თავის რეაქციას არ აყოვნებს. 

მოკლედ, მართალია, თავიანთი ამომრჩეველი ჰყავთ, მაგრამ ვერ ვხედავ, რომ პრორუსულმა ძალებმა სერიოზული შედეგი დადონ _ ყველაზე მაქსიმუმი, შეიძლება, 7 პროცენტამდე აიღონ, მაგრამ სხვა თემაა, რომ ხელისუფლება ყველაფერს აკეთებს, რათა საზოგადება რუსული ფსიქოლოგიური და საინფორმაციო აგრესიისგან დაცული არ იყოს. არჩევნების შემდეგ, პარლამენტში პრორუსული ძალების გავლენა ვერ გაიზრდება, მაგრამ თუ „ოცნებას“ მთავრობის შესაქმნელად სხვებთან კოალიცია არ დასჭირდა, საქართველოში კიდევ უფრო მეტ რუსულ გავლენას მივიღებთ!

 

]]>
versiaprinti@yahoo.com (super admin) პოლიტიკა Wed, 09 Sep 2020 12:02:56 +0400
რა ცვლილებები შევიდა ახალ საარჩევნო კოდექსში http://www.versia.ge/2013-07-31-11-22-32/item/6913-რა-ცვლილებები-შევიდა-ახალ-საარჩევნო-კოდექსში.html http://www.versia.ge/2013-07-31-11-22-32/item/6913-რა-ცვლილებები-შევიდა-ახალ-საარჩევნო-კოდექსში.html

ვის ეკრძალება წინასაარჩევნო აგიტაცია და რა შემთხვევაში დაჯარიმდებით ან დაგეკისრებათ სისხლის სამართლებრივი პასუხისმგებლობა

2020 წლის 31 ოქტომბერს, საპარლამენტო არჩევნები ახალი კოდექსით ჩატარდება. კერძოდ, ესაა შერეული საარჩევნო სისტემა, რაც იმას ნიშნავს, რომ ახალ პარლამენტში 120 პროპორციული და 30 მაჟორიტარული წესით არჩეული დეპუტატი გვეყოლება. ახალი კოდექსი 1%-იან ბარიერსა და ე.წ. 40%-იან ჩამკეტ მექანიზმსაც აწესებს. გასულ კვირას, 81 ხმით, დეპუტატებმა მხარი დაუჭირეს საქართველოს ორგანულ კანონში _ ,,საქართველოს საარჩევნო კოდექსი“ ცვლილებების პროექტს. საკანონმდებლო პაკეტში წარმოდგენილი ცვლილებების დიდი ნაწილი ეუთოს დემოკრატიული ინსტიტუტებისა და ადამიანის უფლებების ოფისის _ OSCE/ODIHR-ის რეკომენდაციებს ეფუძნება.

ცვლილებების თანახმად, კენჭისყრის დღეს, სააგიტაციო მასალის განთავსება საარჩევნო უბნის გარდა, შენობის შესასვლელიდან 25 მეტრის რადიუსშიც კი იკრძალება. 

ამავე ცვლილებებით, კენჭისყრის შენობაში ან ამ შენობიდან 25 მეტრის მანძილზე, ამომრჩევლის გადაადგილების ფიზიკურად შეფერხებაც აკრძალულია, ოღონდ იმ დაშვებით, რომ ეს აკრძალვა ეგზიტპოლის მიზნით განხორციელებულ საქმიანობას არ შეეხება. 

ცვლილებების თანახმად, ფართოვდება იმ პირთა წრე, რომელთაც წინასაარჩევნო აგიტაციის გაწევა და მასში მონაწილეობა ეკრძალებათ. ეს ნიშნავს, რომ წინასაარჩევნო აგიტაციაში მონაწილეობის უფლება აღარ ექნებათ საჯარო სკოლების პედაგოგებს _ სამსახურებრივი ფუნქციების შესრულებისას, ასევე, სსიპ-ებისა და სახელმწიფოს ან ადგილობრივი თვითმმართველობის მიერ დაფუძნებული არასამეწარმეო იურიდიული პირების თანამშრომლებს. 

ამასთან, საარჩევნო კოდექსს დაემატა ჩანაწერი, რომელიც არჩევნებამდე 2 თვით ადრე, სამინისტროებსა და სხვა სახელმწიფო უწყებებს განხორციელებული პროექტების შესახებ სარეკლამო ვიდეორგოლების განთავსებას უკრძალავს. 

ცვლილებების თანახმადვე, არჩევნების მეორე ტური გაიმართება არჩევნებიდან მე-3 შაბათს, რომელსაც განკარგულებით ცესკო ნიშნავს. 

თუ მეორე ტურში მონაწილე ერთ-ერთმა საარჩევნო სუბიექტმა დაკარგა პასიური საარჩევნო უფლება, ასეთ შემთხვევაში, მეორე ტური არ გაიმართება და ცესკო-ს მიერ, მეორე საარჩევნო სუბიექტი გამოცხადდება გამარჯვებულად. 

* * * 

ახლა ვნახოთ, რა იცვლება წინასაარჩევნო რეკლამის მედიაში განთავსების ნაწილში. ზოგადად, მედია-კამპანიისა და პოლიტიკური სუბიექტებისთვის დათმობილი საეთერო დროის მიმართულებით, ახალ საარჩევნო კოდექსში მთელი რიგი ცვლილებებია. კერძოდ, ტელე ან რადიოკომპანიის მიერ, 1 დღის განმავლობაში გამოყოფილი ფასიანი დრო, მისი დღიური მაუწყებლობის საერთო მოცულობის 15%-ს არ უნდა აღემატებოდეს და არცერთ საარჩევნო სუბიექტს არ უნდა დაეთმოს ამ დროის ერთ მესამედზე მეტი. ფასიანი დროის ტარიფი ყველა საარჩევნო სუბიექტისათვის ერთნაირი უნდა იყოს. 

მაუწყებლის მიერ ფასიანი რეკლამის განსათავსებლად გადახდილ საფასურზე მეტი დროის დათმობა შესაბამისი (რეკლამის დამკვეთი) სუბიექტისთვის, ან უფასო რეკლამის განთავსებისას საარჩევნო სუბიექტისთვის კანონმდებლობით განსაზღვრულ დროზე მეტის დათმობა, უკანონო შემოწირულობად ჩაითვლება. აკრძალულ შემოწირულობად ჩაითვლება დაუსაბუთებელი შემოსავლით გაკეთებული შემოწირულობაც. 

ამავე ცვლილებებით, არჩევნებში მონაწილე პოლიტიკური სუბიექტები ვეღარ შეძლებენ, რომ მედიაში, ერთმანეთის შესახებ პოზიტიური საარჩევნო რეკლამა განათავსონ. უფრო კონკრეტულად, დაუშვებელია ერთი საარჩევნო სუბიექტის მიერ სარეკლამო დროის ფარგლებში ისეთი რეკლამის განთავსება, რომელიც სხვა საარჩევნო სუბიექტის სააგიტაციო მიზნებს ემსახურება. გარდა ამისა, მედია საშუალებას საარჩევნო უბანში, სამის ნაცვლად, მხოლოდ ორი წარმომადგენლის ყოლის უფლება ექნება. 

,,იმ შემთხვევაში, თუ ტელე და რადიო მაუწყებელი, საზოგადოებრივი აზრის გამოკითხვის შედეგებს კანონით დადგენილ ვადაზე ადრე გამოაქვეყნებს, ჯარიმა იზრდება. კერძოდ, საზოგადოებრივი აზრის გამოკითხვის შედეგების გამოქვეყნებასთან დაკავშირებული წესების დარღვევისას, მაუწყებელი 5 000 ლარით დაჯარიმდება. მედიის სხვა საშუალებებისთვის ჯარიმის ოდენობა კვლავ 1 500 ლარი იქნება. ამასთან, ცვლილებების თანახმად, საზოგადოებრივი მაუწყებელი უფლებამოსილია, რომ კვალიფიციური პარტიების გარდა, დებატებში მიიწვიოს არჩევნებში მონაწილე არაკვალიფიციური სუბიექტებიც. 

კანონში აღარ იქნება ასახული ნორმა, რომლის თანახმად, სახელმწიფო აუდიტის სამსახურს ენიჭება ფართო დისკრეციული უფლებამოსილება მედიის ფინანსური საქმიანობის რეგულირებისა და კონტროლის კუთხით. შესაბამისად, პროექტში აღარც სანქციაა გათვალისწინებული’‘, _ ვკითხულობთ კანონში. 

* * * 

ცვლილებების თანახმად, ზუსტდება საოლქო საარჩევნო კომისიების მიერ საუბნო კომისიის წევრთა არჩევის პროცედურებიც. კერძოდ, საუბნო საარჩევნო კომისიებში, არაპარტიული ნიშნით წევრთა არჩევა მოხდება შესაბამისი საოლქო საარჩევნო კომისიის არაპარტიული ნიშნით არჩეულ წევრთა უმრავლესობის მხარდაჭერით. ამასთან, საუბნო კომისიებთან მიმართებით, ფართოვდება ჩანაწერი ინტერესთა კონფლიქტის გამორიცხვაზე. 

,,უფრო კონკრეტულად, თუკი საოლქო საარჩევნო კომისიის წევრი, საუბნო საარჩევნო კომისიის წევრობის კანდიდატის ოჯახის წევრია, მას არჩევის პროცედურაში მონაწილეობის უფლება ეკრძალება. კანონპროექტის თანახმად, ოჯახის წევრად მიჩნეულია: მეუღლე, პირდაპირი აღმავალი, ან დამავალი შტოს ნათესავი, გერი, და, ძმა, მშობლის ან შვილის გერი, მეუღლის და, ძმა, მშობელი. ასევე, დაუშვებელი ხდება საუბნო საარჩევნო კომისიის წევრად იმ პირის არჩევა, რომელიც ბოლო საერთო არჩევნებში ნებისმიერი დონის საარჩევნო კომისიის წევრად, პოლიტიკური პარტიის მიერ იყო დანიშნული’‘. 

ცვლილებები ეხება გენდერული კვოტირების საკითხებსაც. კერძოდ, 2028 წლამდე ჩასატარებელ საპარლამენტო არჩევნებში, პარტიამ ცესკო-ს თავმჯდომარეს უნდა წარუდგინოს ისეთი პარტიული სია, რომლის ყოველ ოთხეულში, ერთი კანდიდატი მაინც იქნება განსხვავებული სქესის წარმომადგენელი, ხოლო 2028 წლიდან 2032 წლამდე ჩასატარებელ საპარლამენტო არჩევნებში, პარტია ვალდებული იქნება, ცესკო-სთვის წარდგენილ სიაში, ყოველი სამი კანდიდატიდან, ერთი მაინც იყოს განსხვავებული სქესის. 

,,აღსანიშნავია, რომ პარტია, რომელიც 2028 წლამდე ჩატარებული პარლამენტის არჩევნების საფუძველზე იღებს დაფინანსებას, მიიღებს ასევე დანამატს მისაღები დაფინანსების 30%-ის ოდენობით, თუ მის მიერ პარლამენტის ბოლო არჩევნებზე წარდგენილ პარტიულ სიაში, ყოველ სამეულში, ერთი კანდიდატი მაინც განსხვავებული სქესისაა. დანამატი პარტიის ქალთა ორგანიზაციის საქმიანობისთვის უნდა იყოს გამოყენებული. ცვლილებების თანახმად, ბლოკში შემავალი პარტიების სახელმწიფო დაფინანსების განაწილების წესი ბლოკის წესდებით შეიძლება განისაზღვროს’‘. 

საარჩევნო კოდექსით, საქართველოს პარლამენტის 2020 წლის არჩევნებში, ეტლით მოსარგებლე ამომრჩეველთა მონაწილეობის დროებითი წესიც განისაზღვრა. შესაბამისად, საარჩევნო უბნების ხელმისაწვდომობის უზრუნველსაყოფად, შშმ პირთათვის უბნების ადაპტირება აუცილებელია _ თითოეულ ოლქში, არანაკლებ 4-4 უბანი უნდა იყოს ეტლით მოსარგებლეთათვის. 

მნიშვნელოვანია ისიც, რომ საარჩევნო კოდექსის ცვლილებების პროექტის ერთ-ერთმა ავტორმა, რატი იონათამიშვილმა ძირითადი ორგანული კანონპროექტიც წარადგინა, რომლითაც ამომრჩევლის იძულების, დაშინებისა და ხმის მიცემის ფარულობის აკრძალვასთან დაკავშირებული საკითხები ზუსტდება. კერძოდ, აღნიშნული ქმედება გამოიწვევს დამრღვევის სისხლის სამართლებრივ პასუხისმგებლობას. 

რატი იონათამიშვილის განმარტებით, შემოდის მყარი გარანტიები ადამიანის ხმის უფლების მაქსიმალურად დასაცავად, მათ შორის, ახდენს იძულებისა და ძალადობის, ასევე, ფარულობის დარღვევის პრევენციას. ასეთ შემთხვევაში, მოიაზრებს პროპორციულ და სამართლიან რეაგირებასა და სამართლებრივ შეფასებას, მათ შორის, სისხლის სამართლებრივი პასუხისმგებლობით. 

,,არჩევნების შედეგებზე არამართლზომიერი ზეგავლენის, მათ შორის, ხმის მიცემის ფარულობის დარღვევის მიზნით ამომრჩევლის დაშინება ან იძულება, მათ შორის, ჩადენილი ამომრჩევლის, მისი ოჯახის წევრის ან ახლო ნათესავის მიმართ სიცოცხლის მოსპობის, ჯანმრთელობის დაზიანების, ქონების განადგურების ან დაზიანების მუქარით, ან/და მატერიალური, სამსახურებრივი ან სხვაგვარი დამოკიდებულების გამოყენებით, ისჯება ჯარიმით ან შინაპატიმრობით ვადით ექვსი თვიდან ორ წლამდე, ან/და თავისუფლების აღკვეთით ვადით სამ წლამდე’‘, _ ვკითხულობთ კანონში.

მაია მიშელაძე

]]>
versiaprinti@yahoo.com (super admin) პოლიტიკა Wed, 09 Sep 2020 12:02:35 +0400
რა მიზნით მოიპარეს ლუგარის ლაბორატორიიდან მასალები და მიდის თუ არა კვალი კრემლამდე http://www.versia.ge/2013-07-31-11-22-32/item/6912-რა-მიზნით-მოიპარეს-ლუგარის-ლაბორატორიიდან-მასალები-და-მიდის-თუ-არა-კვალი-კრემლამდე.html http://www.versia.ge/2013-07-31-11-22-32/item/6912-რა-მიზნით-მოიპარეს-ლუგარის-ლაბორატორიიდან-მასალები-და-მიდის-თუ-არა-კვალი-კრემლამდე.html

ამირან სალუქვაძე: „რუსეთის უტიფრობას საზღვარი არ აქვს!“

 

მას შემდეგ, რაც საქართველოში საარჩევნო კამპანია ოფიციალურად გაიხსნა, ერთ-ერთი ყველაზე აქტუალური კითხვა ისაა, კორონასტატისტიკის გაზრდის გამო, ქვეყანა ხელმეორედ ხომ არ ჩაიკეტება? ამასობაში კი ლუგარის ლაბორატორიაზე კიბერშეტევა ხორციელდება და მართალია, ოფიციალურად ჯერ არ დადასტურებულა, მაგრამ ეჭვი თითქმის არავის ეპარება, რომ ამ კიბერთავდასხმის უკან რუსეთი დგას. რატომ უნდა სჭირდებოდეს რუსეთს საქართველოში მდებარე ლაბორატორიის ინფორმაციის უკანონოდ მითვისება? _ ამას, ქართველ სამართალდამცავებთან ერთად, აშშ-ის ფედერალური ბიუროც გამოიძიებს. მანამდე კი „ვერსია“ უსაფრთხოების ექსპერტ ამირან სალუქვაძეს ესაუბრა.

 

_ ბატონო ამირან, რუსეთს ლუგარის ლაბორატორიიდან ინფორმაციის უკანონოდ მითვისება რისთვის უნდა სჭირდებოდეს? 

_ წლებია, რუსეთი ლუგარის ლაბორატორიას საქართველოს სოციუმზე ზემოქმედებისა და, ასევე, საკუთარი მოსახლეობის დასაშინებლად იყენებს. გარე „საფრთხობელების“ შექმნა რუსეთის ტრადიციული ხერხია. სამწუხაროდ, ამაში ჩვენი ყოფილი თანამოქალაქეც, ძებნილი ექსმინისტრი (იგორ გიორგაძე) არის ჩართული, რომელიც რუსულ თოქ-შოუებში მასალებს აფრიალებს ხოლმე. ამას საარჩევნო კამპანიაც ემატება და ყველაფერი ეს, ჩვენს შიდა პროცესებში ერთგვარი ჩარევაა. 

მოკლედ, საქართველოში არიან ადამიანები, რომელთა პოლიტიკურ განწყობებზეც ყველაფერი ეს გავლენას ახდენს და ამ კუთხით, პოლიტიკური ძალებიც მოიზარებიან. 

აქვე შევეხები ალექსეი ნავალნის მოწამვლას. დროში დამთხვევა, ალბათ, ზუსტად ამას ემსახურება. 

_ ანუ? 

_ რუსეთი ამბობს, როცა რუსეთიდან გავამგზავრეთ, ნავალნი „ნოვიჩოკით“ მოწამლული არ იყოო ანუ თუ „ნოვიჩოკით“ მოწამვლა დადასტურდება, ამას მოსკოვი გერმანულ მხარეს დააბრალებს, რაც ძალიან სასაცილოა, რადგან გერმანიაში კომაში მყოფი ადამიანი გაგზავნეს. 

ზუსტად ამის გასამართლებლად დასჭირდათ ლუგარის ლაბორატორიის თემა, რომ თითქოს „ნოვიჩოკს“ რუსეთი კი არა, არამედ, საქართველოში აშშ აწარმოებს ანუ მოპარული მასალები ამისთვის სჭირდებათ, რათა ამ მასალებს გიორგაძის შეთითხნილი მასალები მიაწებონ და არაა გამორიცხული, „ნოვიჩოკის“ თემაც შეთხზან, მაგრამ სინამდვილეში, „ნოვიჩოკის“ დედაც და მამაც რუსეთია! 

მოკლედ, ეს გაყალბების ჩვეულებრივი მეთოდია. 

_ ყველაფერ აქედან გამომდინარე, საქართველოს ხელისუფლებას გაორმაგებული სიფრთხილე მართებს, არა? 

_ ამ ფაქტების გამოძიება მოხდება _ პარტნიორები დაგვეხმარებიან, რადგან ამ თემაში მათი ინტერესიცაა, თუმცა რუსეთის უტიფრობას საზღვარი არ აქვს. 

ამ კიბერშეტევით, პრაქტიკულად, აღიარებას აწერენ ხელს ანუ ერთი მხრივ, ამბობს, არაა მოწამლული „ნოვიჩოკითო“ და ამ დროს, ეტყობა, იცის, რომ მოწამლულია და ეძებს ისრების გადასატან მიმართულებას, რაც აბსურდია. 

_ ბატონო ამირან, რუსეთს, ასევე, უკავშირდება ბელორუსში მიმდინარე მოვლენებიც. როგორ ფიქრობთ, ლუკაშენკო უკან დაიხევს? 

_ ლუკაშენკო უკან რომ არ დაიხევდა, პირველ დღესვე დავწერე. უკან არც რუსეთი დაიხევს. ძალიან ბევრია მოსახლეობაზე დამოკიდებული _ თუ აქტიური წინააღმდეგობა გაგრძელდა, ხალხი თავისას გაიტანს, თუმცა ლუკაშენკომ ოპოზიციის არათანმიმდევრული და ნაჩქარევი განცხადებებით დრო გაიყვანა და თუ ოპოზიციამ ტაქტიკა არ შეცვალა, არ ველოდები, რომ უახლოეს პერიოდში იქ რაიმე სერიოზულად შეიცვლება. იქაური ოპოზიცია, საქართველოსგან განსხვავებით, პრაქტიკულად, განადგურებულია! 

_ საქართველოს საპარლამენტო არჩევნებს აშშ-ის საპრეზიდენტო არჩევნები ემთხვევა. ჩვენთვის უკეთესი დონალდ ტრამპის გამარჯვება იქნება თუ ჯო ბაიდენის? 

_ ასეთ არჩევანს არ ვაკეთებ. სახელმწიფოსთან მყარ ღირებულებებზე დაყრდნობილი ურთიერთობები უნდა გვქონდეს. აშშ-ში ისეთი საარჩევნო სისტემა აქვთ, რომ პროგნოზის გაკეთებაც საკმაოდ რთულია. წინა არჩევნების დროს, საბოლოო შედეგებამდე, ჰილარი კლინტონი ლიდერობდა, მაგრამ არჩევნები დონალდ ტრამპმა მოიგო. დღეს აშშ-ში საკმაოდ მძიმე პროცესებია, მსგავსი პერიოდულად ყოფილა, თუმცა გადაუტანიათ. 

ძალიან მნიშვნელოვანი იქნება, რამდენად მოთოკავს მოქმედი პრეზიდენტი პროცესებს და დაამშვიდებს პოლიტიკურ ვითარებას. ამას ემატება პანდემია, რაც ძალიან ცუდად მოქმედებს ტრამპის საარჩევნო კამპანიაზე. 

_ მსოფლიოს მოვლენების ფონზე, საქართველოს საარჩევნო კამპანიას როგორ აფასებთ _ პანდემია არჩევნებზე რა როლს ითამაშებს? 

_ ალბათ, პანდემია ერთ-ერთი მიზეზია, რის გამოც ზაფხულში აქტივობა არ იყო, მაგრამ საკმაო გააქტიურებასაც ველოდები და მიუღებელი მეთოდების გამოყენებასაც. 

მინდა, ყველას მოვუწოდო, რომ პროგრამებით ინტელექტუალების შეჯიბრი იყოს, თუმცა იაფფასიანი და ძალიან პოპულისტური განცხადებები უკვე ისმის... 

_ ვისი მხრიდან _ ოპოზიციის, თუ ხელისუფლების? 

_ სხვათა შორის, ხელისუფლება ასეთ განცხადებებს ჯერჯერობით არ აკეთებს. რომ არ ჩამკითხვოდით, დაკონკრეტებას შეგნებულად არ ვაპირებდი, მაგრამ როცა პოლიტიკოსები არ გვაფასებენ და ამბობენ, მალე ცხინვალსა და სოხუმში დროშას ავაფრიალებთო, ეს ხომ ამომრჩევლის დაუფასებლობაა ანუ იმ დონეზე ბრბოდ უნდა თვლიდე საქართველოს მოსახლეობას, რომ მსგავსი დაპირება მისცე! 

ეს იმას კი არ ნიშნავს, რომ ვინმეს საქართველოს დროშის აფრიალება არ სურს, უბრალოდ, ეს მალე რომ არ მოხდება, ყველამ იცის და თვითონაც იციან. 

საერთოდ, მსგავსი ბევრი პოპულისტური განცხადება კეთდება, გვარებს არ დავასახელებ, უბრალოდ, ასეთ განცხადებებზე ვისაუბრებ. მაგალითად, ერთ-ერთია _ „შევქმნი 200 000 სამუშაო ადგილს“, მეორე ამბობს, 300 000-ს შევქმნიო... ტრამპი რომ მოვიდა, ხალხს დაპირდა, 10 წლის განმავლობაში, 25 მილიონ სამუშაო ადგილს შევქმნიო. ეს თითქოს დიდი ციფრია, მაგრამ ეს წელიწადში 2.5 მილიონი სამუშაო ადგილის შექმნას ნიშნავს, რაც აშშ-ის მოსახლეობის 0.6%-ია ანუ ეს რეალური დაპირებაა. 

როცა ჩვენთან პოლიტიკოსი ამბობს, 300 000 სამუშაო ადგილს შევქმნიო, ეს მოსახლეობის თითქმის 9%-ია, რაც არარეალურია... 

_ ისე, საქართველოში არარეალური დაპირებები ამომრჩეველს არ უკვირს _ ყველა ხელისუფლება ხომ ასეთი დაპირებებით მოვიდა! 

_ დიახ, მაგრამ ხომ უნდა გავიზარდოთ? მესმის, ჭარბი დაპირებებიდან რაღაც შეასრულეს და რაღაც _ ვერა, მაგრამ პოლიტიკოსებიც უნდა გაიზარდონ და მოსახლეობაც, თუმცა ეს პოლიტიკოსებს არ აწყობთ, რადგან პოპულიზმი და 400-ლარიანი პენსიის დაპირება ურჩევნიათ. 

რომ ამბობენ, ყველაფერი მკვდარია, გაჩერებულია და ჩვენ ავაყვავებთო, ამას ვერ მივიღებ იმიტომ, რომ ვხედავ, რაც კეთდება და ვაქვეყნებ ხოლმე, რადგან ყველამ დაინახოს, რა არის გაკეთებული. 

„ოცნება“ შეინარჩუნებს ხელისუფლებას, თუ ხელისუფლებაში სხვა ძალა მოვა, 2020-ში იქნება თუ 2028-ში, ყველა ახალმა ხელისუფლებამ ნულიდან კი არ უნდა დაიწყოს, არამედ, დაწყებული საქმე გააგრძელოს. დღეს კი იმაზე უნდა მელაპარაკონ, ამ რეალობას რას შემატებენ. 

მოკლედ, აპოკალიფსურ განწყობას ქმნიან, მთელი საქართველო უმუშევარიაო, ვადევნებთ თვალ-ყურს, რამდენად უმუშევარია მოსახლეობა _ გადაჭედილია კურორტები, იმის მიუხედავად, რომ ჩემს ახლობლებს უჭირთ... 

_ დიახ, სწორედ ამის თქმა მინდოდა, რომ ხალხს უჭირს... 

_ რა თქმა უნდა, აბსურდია, რომ ქუჩაში ხელგამოწვდილი ადამიანი ვერ დაინახო, მაგრამ გაცილებით უარესია ამ გაჭირვებულებისთვის დეპრესიული საინფორმაციო გარემოს და უიმედობის განწყობის შექმნა. ადამიანს იმედი უნდა მისცე, არარეალური კი არა, ნორმალური, რეალური სურათი უნდა დაუხატო და უთხრა, ხვალიდნელი დღე როგორი იქნება. 300 000 კი არა, თუ შესაძლებელია, 75 000 სამუშაო ადგილის შექმნა, ეს ციფრი უნდა მითხრა და ამის შესაბამისი პროგრამა წარმოადგინო ანუ უნდა დააფასო ამომრჩეველი და, პირველ რიგში, გაჭირვებული ხალხი. 

როგორც გაჭირვების დაუნახაობაა სიბრმავე, ანალოგიურად მავნეა, როცა ვერ ხედავ, თუ რა კეთდება ქვეყანაში. ადამიანს გათენება უნდა უხაროდეს, მაგრამ ჩვენთან, ხანდახან ისეთი საინფორმაციო ფონია, რომ... 

_ ესე იგი, თქვენც მედიას აკრიტიკებთ? 

_ თათია, მედიას კი არა, მის გარკვეულ ნაწილს ვაკრიტიკებ. ძალიან მიყვარს ეს პროფესია და ჟურნალისტები, მაგრამ ადამიანს, რომელიც მიზანმიმართულად მუდმივად იტყუება, ჟურნალისტად არ ვთვლი. მიზანმიმართულად საკუთარი მოსახლეობის დასტრესვა, ჩემი აზრით, ჟურნალისტიკა არაა. ებრძოლონ ხელისუფლებას, მაგრამ მოსახლეობას ნუ ებრძვიან! 

_ ბატონო ამირან, კარანტინის შემოღება საჭირო ისევ რომ გახდეს, ეს არჩევნებზე როგორ იმოქმედებს? 

_ მინდა, დავიჯერო ხელისუფლების დაპირება, რომ პანდემიას და საყოველთაო ჩაკეტვას არ გამოიყენებს არჩევნებისთვის. ამისთვის მოხდა საკანონმდებლო ცვლილება, რომ პარლამენტს არ დასჭირდეს განსაკუთრებული მდგომარეობის გამოყენება და პრემიერს მისცეს ინსტრუმენტები, თუ ლოკალურად იქნება ჩასაკეტი, გაატაროს ეს ზომები, რადგან არჩევნები შედგეს. 

ვხედავ, რომ ცუდი რეიტინგის გამო, არჩევნების ბოლომდე მიყვანა უფრო ოპოზიციას არ აწყობს, საკანონმდებლო ცვლილებების ბოიკოტირებაც ამას დავაბრალე და თუ ეს ასე არ არის, ჩაებან სააგიტაციო კამპანიაში, რათა მოსახლეობამ მოთხოვნები და ნორმები დაიცვას. 

ქვეყანაში არსებობენ ძალები, რომლებიც ახდენენ ჯანდაცვის სისტემის დისკრედიტაციას, რა თქმა უნდა, ეს გარე ძალებისგანაცაა მართული და ქვეყანაშიც არიან ადამიანები, რომელთაც უყვართ შეთქმულების თეორიები. საკმაოდ დიდი რაოდენობით არიან ადამიანები, რომელთაც არ სჯერათ კორონავირუსის. ახალგაზრდები, ასაკოვანი ხალხი წერს, კორონავირუსი აფერააო. უამრავი ადამიანი დებს ამ სულელურ პოსტებს. 

მინდა, მოსახლეობას მივმართო: ჯერ ერთი, ვირუსი არსებობს და ამის არდანახვა ძალიან დიდი უცოდინრობის გამომჟღავნებაა. თუ ადამიანს ვირუსის არსებობის არ სჯერა, მასთან საუბარი ძალიან რთულია და მას უნდა ვუთხრათ, რომ დაემორჩილოს კანონმდებლობას და საფრთხეს სხვას ნუ შეუქმნის! 

არ გჯერა? _ იყავი შენთვის სახლში და ნუ დაიჯერებ! როცა გადიხარ საჯარო სივრცეში, დაიცავი ის წესები, რომლითაც საზოგადოება ცხოვრობს. გიჭირს პირბადით სუნთქვა? _ მეც მიჭირს და არ მსიამოვნებს, მაგრამ ვატარებ, როცა საჭიროა. ვიღაცები წერენ, თუ გჯერა, რომ ერთი თვე მკლავზე ნამყოფი პირბადე გიცავს, ე.ი. უტვინო ხარო. ის ჭუჭყიანი პირბადე მას კი არა, მისგან მე მიცავს, როცა მის გვერდით ჩავივლი, ამიტომ როცა მომიახლოვდება, კეთილი ინებოს და პირბადე გაიკეთოს! 

რაც შეეხება მეორე ნაწილს, თუ ვირუსი ხელოვნურად შეიქმნა, განიხილონ ეს ვერსიები, ოღონდ წესები დაიცვან. ჩვენზეა დამოკიდებული, არჩევნები როგორ ჩატარდება, რეგიონებში მოსახლეობა მასობრივად არ იცავს წესებს და თბილისშიც ძალიან მოშვებულები ვართ, ამიტომ მოვუწოდებ პოლიტიკურ ძალებს, პირველ რიგში, ოპოზიციას, თუ ფიქრობს, რომ ხელისუფლება დაინტერესებულია, პანდემია თავის სასარგებლოდ გამოიყენოს, უზარმაზარი ადამიანური და საინფორმაციო რესურსი გააჩნიათ, მათ შორის, სოციალურ ქსელში და ჩაებან აქტიურად კამპანიაში, რათა მოსახლეობამ დაიცვას წესები და არ მოხდეს თუნდაც ერთი სოფლის ჩაკეტვა. 

ხან ჯანდაცვის სისტემაზე მიდის შეტევა, ხან _ „სამ მუშკეტერზე“ და სხვა ექიმებზე, ამიტომ ამ მოწოდებით დავასრულდებდი საუბარს: მაქვს იმედი, რომ არჩევნები ნორმალურად ჩატარდება. არ მაქვს მოლოდინი, რომ მოხდება ეპიდვითარების აფეთქება,მოსახლეობას არჩევნებზე აქტიურობისკენ მოვუწოდებ, რათა ეს თემაც სალაპარაკო არ გახდეს. 4 წელიწადში ერთი დღეა და რამდენი ლოდინიც უნდა დაგვჭირდეს, უსაფრთხოდ შევიდეთ და ხმა მივცეთ, ეს უნდა გავაკეთოთ. მანამდე შევინარჩუნოთ სოციალური დისტანცია, ეს მნიშვნელოვანია.

თათია გოჩაძე

 

]]>
versiaprinti@yahoo.com (super admin) პოლიტიკა Wed, 09 Sep 2020 12:02:29 +0400
მიშას საარჩევნო ტრიუკი http://www.versia.ge/2013-07-31-11-22-32/item/6907-მიშას-საარჩევნო-ტრიუკი.html http://www.versia.ge/2013-07-31-11-22-32/item/6907-მიშას-საარჩევნო-ტრიუკი.html

მართლა ბრუნდება თუ არა ექსპრეზიდენტი საქართველოში

კართან კი არ მოდგა, არამედ, შემოდგომამ კარი უკვე შემოაღო, რაც იმას ნიშნავს, რომ პოლიტიკური წიწილების დათვლის სეზონი დაიწყო. რომელი „კრუხი“ აღმოჩნდება ყველაზე „მრავალშვილიანი“, ამას 31 ოქტომბერს გავიგებთ, მანამდე კი, ისეთი პირი უჩანს, რომ პოლიტიკური ცირკი არ მოგვაკლდება, თუმცა აქვე, ისიც უნდა ვთქვათ, რომ წლევანდელმა საარჩევნო კამპანიამ, ყველა წინამორბედისგან განსხვავებით, შესაძლოა, უჩვეულოდ მშვიდ ვითარებაში ჩაიაროს და სანახაობის მომსწრენიც ვერ გავხდეთ.

ასეა თუ ისე, პირველი სექტემბრიდან საარჩევნო კამპანია ოფიციალურად გაიხსნა, რასაც პრეზიდენტ ზურაბიშვილის მიერ არჩევნების თარიღის ოფიციალური დასახელება უძღვოდა. 

„მინდა, მივმართო საზოგადოებას და მოგიწოდოთ, რომ ეს პერიოდი, ეს ორი თვე, რაც წინ გვიძღვის არჩევნებამდე, ჩავატაროთ რაც შეიძლება მშვიდობიანად... ამ არჩევნებს განსაკუთრებული მნიშვნელობა აქვს! ჩვენ ამით კიდევ ერთხელ დავადასტურებთ ჩვენი ქვეყნის დემოკრატიულობას... ვიცი და მჯერა, რომ ჩვენ შეგვიძლია მომავალი არჩევნები ასე დემოკრატიულად, მშვიდობიანად და გამჭვირვალედ ჩავატაროთ“, _ განაცხადა სალომე ზურაბიშვილმა. 

 

ყველამ ვიცით, რომ ქალბატონი ზურაბიშვილი ბუტაფორიული პრეზიდენტია ანუ ფასი მის სიტყვას არ აქვს. შესაბამისად, იმის ილუზია, რომ მთავარსარდლის მოწოდებას, წინასაარჩევნო კამპანია და ასევე, არჩევნებიც მშვიდად და დემოკრატიულად ჩავატაროთო, პოლიტიკური აქტიორები ერთი ყურიდან შეუშვებენ და მეორედან გაუშვებენ, მაგრამ ზურაბიშვილისგან განსხვავებით, მთელი ქართული პოლიტიკური ელიტისთვის ბაჯაღლოს ფასი აქვს ცივილიზებული დასავლეთის პოზიციას. უფრო გასაგებად რომ ვთქვათ, მხოლოდ მმართველი გუნდი კი არა, არამედ, ოპოზიციაც იმედს სწორედ ევროპა-აშშ-ზე ამყარებს ანუ იმ შემთხვევაში, თუ ჩვენი სტრატეგიული პარტნიორები იტყვიან, არჩევნები დემოკრატიულად ჩატარდაო, ამით „ოცნება“ სიხარულისგან ცას ეწევა, ოპოზიციას კი კოვზი ნაცარში ჩაუვარდება, მაგრამ თუ უცხოელები იტყვიან, რომ საქართველოში 2020-ის არჩევნები თვალშისაცემი ხარვეზებით ჩატარდა, მაშინ შესაძლოა, ოპოზიციის უმრავლესობამ 2003 წლის სცენარის განმეორება სცადოს ანუ ხმების დაცვის საბაბით, ქუჩის აქციები დაიწყოს და „ოცნება“, მინიმუმ, აიძულოს, რომ უმრავლესობა არ გაიფორმოს და კოალიციურ მთავრობაზე დასთანხმდეს, თუმცა ყველაფერი ეს მხოლოდ ვერსიაა და მეტი არაფერი, რადგან ზუსტად არავინ იცის, 31 ოქტომბერს რა მოხდება. 

საერთოდ, პროგნოზები უმადურობად ითვლება, ამიტომ ამისგან თავი ჩვენც შვეიკავოთ და იმაზე ვისაუბროთ და ვიმსჯელოთ, რაც პოლარული ღამესავით ნათელია. 

ნათელი კი ისაა, რომ კრიმინალური ახალი ამბებით გაჯერებულ საინფორმაციო ველში, უკრაინის მოქალაქე მიხეილ სააკაშვილმა პოლიტიკა დააბრუნა ანუ რამდენიმე დღის წინ, ექსპრეზიდენტმა „ფეისბუქის“ საკუთარ გვერდზე ვიდეომიმართვა გაავრცელა, სადაც მოსახლეობას პრეზიდენტობისას დაშვებული შეცდომების გამო ბოდიში მოუხადა და ისიც გვამცნო, რომ... ბრუნდება. 

„უკრაინა ჩემი მეორე სახლია. თავის დროზე, აქ ჩამოვედი ჩემი მთავარი სახლიდან, ჩემი ტკბილი საქართველოდან. უკრაინა სტუდენტობის ასაკიდან ყოველთვის ძალიან მიყვარდა, ყველაზე რთულ პერიოდში, სწორედ უკრაინამ მიმიღო ისეთი, როგორიც ვარ ყოველგვარი პირობებისა და მოთხოვნების გარეშე და მე ამას ძალიან ვაფასებ. ძალიან მადლობელი ვარ ასევე ბედის, რომ მომცა შესაძლებლობა, ბოლო შვიდი წელი განმეცადა ეს და საკმარისი დროა დაფიქრებისთვის და ბევრი საკითხის გადასაფასებლად. 

ახლა, წლების გადმოსახედიდან ვიცი, თუ უკეთესად როგორ უნდა ვემსახურო ჩვენს ქვეყანას, როგორ ავიცილოთ თავიდან შეცდომები... და შეცდომები, რა თქმა უნდა, იყო და იყო ძალიან მძიმე შეცდომებიც, მაგრამ ღმერთია მოწამე, ყველაფერი საუკეთესო მინდოდა ჩემი ხალხისთვის. 

მინდოდა, რომ ჩემს ხალხს ეცხოვრა უკეთესად, ბევრად უფრო მდიდრულად და მაინც ამ წლების გადმოსახედიდან, ამ შეცდომების გამო, რომელიც დავუშვი იმის გამო, რაც ბოლომდე ვერ გავაკეთე, მინდა, ყველას საჯაროდ მოგიხადოთ ბოდიში. 

ამავე დროს, მე ვარ უსაზღვროდ მადლიერი ქართველი ხალხის, რომელმაც მაქცია ქართული სახელმწიფოს მშენებლობის წარმატებული ისტორიული პროცესის მონაწილედ. ამ შვიდი წლის განმავლობაში, არ ყოფილა არც ერთი დღე, რომ მე არ დავინტერესებულიყავი საქართველოს ამბებით და ვიცი ზუსტად, რომ ჩემს მუშაობას პრეზიდენტის თანამდებობაზე ფუჭად არ ჩაუვლია და ბევრი რამე, რაც ჩვენ შევქმენით, დღესაც შენარჩუნებულია და მუშაობს, მაგრამ ამავე დროს, როდესაც საქართველოს ამბებს ვისმენ, ზუსტად ვხვდები და ვიცი, რომ ჩვენ შეგვიძლია ვიცხოვროთ ბევრად უფრო მაგრად, ბევრად უკეთესად და თითოეულ ქართველს შეუძლია იყოს მდიდარი და ეს ჩვენ ერთად გამოგვივა! 

მე ვბრუნდები!“ _ აცხადებს მიხეილ სააკაშვილი ზემოხენებულ ვიდეომიმართვაში. 

საერთოდ, ეს პირველი შემთხვევა არაა, როცა მიხეილ სააკაშვილი საქართველოში დაბრუნების პირობას დებს. აი, მაგალითად, ასე იყო 2016 წლის საპარლამენტო არჩევნების წინაც, როცა მიშას მხარდამჭერებს იმედი ჰქონდათ, რომ სააკაშვილი სამშობლოში ზღვით დაბრუნდებოდა. ეს კი არადა, მართლმორწმუნე „ნაცები“ პირად საუბრებში დღემდე ამტკიცებენ, რომ ექსპრეზიდენტი მაშინ სარფთან იყო, მაგრამ გიგა ბოკერიამ და სხვებმა ყველაფერი გააკეთეს, რომ საქართველოს საზღვარი არ გადმოეკვეთა. სხვათა შორის, ამ კონტექსტში ახსენებენ ელენე ხოშტარიასაც, რომელიც მიშას, თურმე, „სკაიპით“ ეჩხუბა. 

დანამდვილებით ვერ გეტყვით, ოთხი წლის წინ მოვლენები ასე დრამატულად მართლა ვითარდებოდა თუ არა, მაგრამ ადამიანები, რომლებიც ახლაც სააკაშვილის ფანები არიან, ირწმუნებიან, რომ ბოკერიამ და მისმა რაზმმა ნაცმოძრაობიდან წასვლის გადაწყვეტილება, სწორედ ზემოხსენებული „ონლაინრაზბორკის“ შემდეგ მიიღო. 

მოკლედ, ასეა თუ ისე, მიშა ბრუნდება. ყოველ შემთხვევაში, ამბობს, რომ ბრუნდება, თუმცა დანამდვილებით არავინ იცის, ეს დაბრუნება რეალურია თუ, უბრალოდ, საუბარი სატელევიზო დაბრუნებაზეა ანუ ერთი ვერსიით, სააკაშვილი ამ განცხადებით, საკუთარი მომხრეებისა და გულშემატკივრების მობილიზებას ცდილობს. მეორე ვერსიით კი, მიშას დაბრუბნება „მგელი მოდის“ „ოპერიდანაა“, ერთგვარი „მაშველი რგოლის“ ფუნქცია აქვს და ე.წ. შუაშისტურ ელექტორატზეა გათვლილი. კერძოდ, ამ შემთხვევაში საუბარი, დაახლოებით, ასეთ სცენარზეა: 

 

დიდი ხანია, ქართული პოლიტიკა ორ _ „ოცნებურ“ და „ნაცურ“ პოლუსადაა გაყოფილი, ესე იგი, ორივე პარტიას თავისი მეტ-ნაკლებად მყარი ელექტორატი ჰყავს, თუმცა ამას გარდა, ქვეყანაში უამრავია ისეთი ადამიანი, რომელსაც არც „ქოცები“ უნდა და არც „ნაცები“, მაგრამ მიშას, მაინც „ოცნება“ ურჩევნია. ჰოდა, იმის შიშით, ემანდ, სააკაშვილი მართლა არ დაბრუნდეს და რეპრესიები არ დაიწყოსო, ხმა შესაძლოა, ისევ „ოცნებას“ მისცეს. 

სხვათა შორის, სწორედ ეს მიზანსცენა გათამაშდა 2018 წლის საპრეზიდენტო არჩევნების მეორე ტურზე _ მათაც კი, რომლებიც სალომე ზურაბიშვილს დასანახად ვერ იტანდნენ, იმის დაშვებით, რომ პრეზიდენტი შესაძლოა, გრიგოლ ვაშაძე გამხდარიყო, ხმა „მადამ პიურეს“ მისცეს („მადამ პიურე“ ჩემი შერქმეული თიკუნი არ გეგონოთ. ქალბატონ პრეზიდენტს ამ მეტსახელით მას შემდეგ მოიხსენიებენ, რაც საპრეზიდენტო კამპანიის დროს, მისმა მხარდამჭერმა მმართველმა პარტიამ ხალხს კარტოფილი და ხახვი დაურიგა!). 

მიხეილ სააკაშვილის დაბრუნების კონტექსტში კიდევ ერთი ნიუანსია საგულისხმო _ კულუარული ინფორმაციით, რამდენიმე დღეში, კერძოდ, 7 სექტემბერს, ნაციონალური მოძრაობა ექსპრეზიდენტს საქართველოს პრემიერობის კანდიდატად დაასახელებს. დავუშვათ, ეს ინფორმაცია გამართლდა და ისიც დავუშვათ, რომ „ნაცმოძრაობა“, ესე იგი, კოალიცია „ძალა ერთობაშიამ“ არჩევნებზე იმდენი ხმა მიიღო, რომ მთავრობის დაკომპლექტება, პარტნიორებთან ერთად შეძლო, მაგრამ საინტერესოა, სააკაშვილი ჩვენი ქვეყნის პრემიერი როგორ გახდება? _ ის ხომ უკრაინის მოქალაქეა, თან საქართველოს ძალოვანი უწყებების მიერ ძებნილია.

მოდით, ვიფანტაზიოროთ: სალომე ზურაბიშვილმა, რომელიც ვერ იხსენებს, სააკაშვილი ვინ არის, თავის წინამორბედს საქართველოს მოქალაქეობა მისცა, მაგრამ რა მოვუხერხოთ სისხლის სამართლის კოდექსს? კი ბატონო, მიშა უდანაშაულოა და „ოცნება“ მის წინააღმდეგ პოლიტიკურ დევნას ანხორციელებს, მაგრამ ყველაფერ ამას ხომ სასამართლოს მიერ დასაბუთებული განაჩენი სჭირდება, რაც დროში გაიწელება. ჰოდა, სანამ ყველა ეს პროცედურა ამოიწურება, რა ვქნათ, პრემიერის გარეშე ვიყოთ თუ „ნაცმოძრაობა“ კანონს ზურგს შეაქცევს და ადამიანს, რომელიც ქართული კანონმდებლობით ძებნილია, მინისტრთა კაბინეტის ლიდერად მაინც დაამტკიცებს? 

ყოველივე ამის გათვალისწინებით, უფრო მყარდება მოსაზრება, რომ სააკაშვილის განცხადება, მე ვბრუნდებიო, ჩვეულებრივი საარჩევნო ტრიუკია და მეტი არაფერი. 

ამასთან, ეს ის შემთხვევაა, როცა იგივე „ოცნების“ ლიდერშიფის წარმომადგენლები რეალობას რეალურად აფასებენ და ამბობენ, რომ სააკაშვილი ზემოხსენებული ვირტუალური დაბრუნებით, მხოლოდ საკუთარ გულშემატკივრებზე მუშაობს ანუ სხვა დროს, დავით მათიკაშვილის მოსაზრებისთვის შესაძლოა, ანგარიში არ გაგვეწია, მაგრამ ამ შემთხვევაში, „ოცნების“ ერთ-ერთი სპიკერი სიმართლეს ამბობს. 

„სააკაშვილის მდარე დრამატურგიამ და „ნიანგის ცრემლებმა“ ყველა კითხვას გასცა სათანადო პასუხი. ამ სიყალბეს უნდა დაესვას წერტილი. მინდა მივმართო სააკაშვილის პარტიის მოქმედ და ყოფილ წევრებს, ალბათ, უკვე ყველა კითხვას გაეცა პასუხი, ნახეთ თქვენი საკუთარი ბელადის პოზიცია და ბოდიშები საკუთარი ხალხის მიმართ. ისე, მინდა შეგახსენოთ, არსებობს სისხლის სამართლის კოდექსი, წითელი დიდი წიგნი, სადაც ჩამონათვალია იმ დანაშაულების, რომლებიც ისჯება სისხლის სამართლის წესით ძალიან მკაცრად. იქვე არის გამიჯნული, რა არის დანაშაული და რა გადაცდომა, შეცდომა. ნუ ავურევთ ამას ერთმანეთში და ნუ შევეცდებით საზოგადოებას ნაცარი თვალში შევაყაროთ. 

შეცდომა არ არის ადამიანის მოკვლა, ოჯახების განადგურება. შეცდომა არ არის მედიასაშუალებების დარბევა და მათი წართმევა მესაკუთრეებისთვის. შეცდომა არ არის საკუთარი მიწა-წყლის, სამშობლოს 20%-ის ჩაბარება ოკუპანტებისათვის. ეს არის დანაშაული და ამაზე, ყველა მისმა ჩამდენმა, ძალიან მკაცრად უნდა აგოს პასუხი. დიახ, უნდა დაბრუნდეს საქართველოში, აუცილებლად უნდა დაბრუნდეს! მან კანონის სრული სიმკაცრით უნდა აგოს პასუხი ქართველი ხალხის წინაშე, იმ თითოეული ოჯახის წინაშე, რომლის წინაშეც პირადად მას და მისი პარტიის ძალიან ბევრ წევრს მიუძღვის დანაშაული. ვგულისხმობ ყველა იმ ოჯახს, რომელიც ცხინვალის რეგიონდან გამოიდევნა; ვგულისხმობ ყველა წართმეულ ბიზნესს, რომელიც საზოგადოებამ და მსოფლიომ კარგად იცის. ამ ხალხის რიგში შედის გირგვლიანის, რობაქიძის ოჯახები. ეს ადამიანები დღემდე ითხოვენ პასუხებს არა შეცდომებისთვის, არამედ, დანაშაულებისთვის, რომელიც მან ჩაიდინა... 

ყოფილი დამნაშავე პრეზიდენტი პირდაპირ აღიარებს, რომ მან დანაშაული ჩაიდინა... 

ეს „ნიანგის ცრემლები“ და ტყუილები მას საქართველოში აღარ გაუვა. ის მაღალი დონის მატყუარაა, მაგრამ ქართველ ხალხს ვეღარ მოატყუებს. ის იტყუებოდა ხელისუფლებაში ყოფნის დროს, იტყუებოდა 2012 წლიდან დღემდე, ხან წყლით მოდიოდა, ხან მიწით, ხან ხმელეთით, მაგრამ ამ ტყუილებს თვითონვე დაუსვა წერტილი. ხომ არ მიბაძავდით კოლეგებო მას და იმ დანაშაულებისთვის, რომელიც ჩადენილია თქვენი ხელისუფლებაში ყოფნის დროს, გამოხვალთ და ბოდიშს მოუხდით საზოგადოებას?! ეს პასუხისმგებლობისგან არცერთ შემთხვევაში არ გაგათავისუფლებთ, მაგრამ არსებობს მორალი და ამ მორალსაც უნდა ვცეთ პატივი“, _ აცხადებს ბატონი მათიკაშვილი. 

სააკაშვილის დაბრუნებას „ბლეფად“ მიიჩნევს ქრისტიან-დემოკრატიული მოძრაობის ლიდერი გოჩა ჯოჯუაც, რომელმაც ვანო პავლიაშვილის გადაცემა „პოლიტიკურ ბარში“ განაცხადა: 

„მიხეილ სააკაშვილის დაბრუნება ისეთივე ნონსენსია, როგორიც ბიძინა ივანიშვილის დარჩენა. ივანიშვილს როგორც კი გაუჭირდება, სააკაშვილი მაშველი რგოლივით ამბობს, რომ ბრუნდება. საზოგადოების უდიდესი ნაწილი ნამდვილად ჩამოყალიბებულია, რომ „ოცნება“ უნდა წავიდეს, მაგრამ გარკვეულ ნაწილს აქვს იმის შიში, რომ ნაციონალური მოძრაობა არ მოვიდეს. ერთიც და მეორეც უკვე განვლილი ეტაპია, ქართველმა ერმა წინ უნდა დიწყოს ყურება“. 

რა არის წინ? _ ამის თქმა ხელაღებით ძნელია, თუმცა სამართლიანობისთვის უნდა ვთქვათ, რომ სააკაშილის ვიდეომიმართვა, რომლის თაობაზეც ამდენს ვსაუბრობთ, თანამედროვე ქართულ პოლიტიკურ პიარში, ერთგვარად ახალი სიტყვაა ანუ მიშამ, რომელსაც ექსცენტრიულობა ახასიათებს, აგრესიაზე უარი თქვა და საზოგადოების წინაშე სრულიად მშვიდი სახით წარსდგა, თანაც ბოდიშიც მოიხადა. ბოდიში კი, მოგეხსენებათ, ერთგვარი „წამალია“, რომელიც გამწარებულ ადამიანებზე მეტ-ნაკლებად დადებითად მოქმედებს. 

ზუსტად ეს ტრიუკი გამოიყენა სააკაშვილმა 2007 წლის სისხლიანი 7 ნოემბრის შემდეგაც _ ვადამდელი საპრეზიდენტო არჩევნების კამპანია დაიწყო თუ არა, ბილბორდებსა თუ ვიდეოკლიპებში გამოჩნდა მიშა, რომელიც მოხუც ქალბატონს ეფერებოდა და თან თვალზე კურცხალი „უგორავდა“. 

მოკლედ, რა, რა და, სააკაშვილმა პიარი ზედმიწევნით კარგად იცის! 

რაც შეეხება ნაციონალური მოძრაობის მიერ ექსპრეზიდენტის პრემიერობის შესაძლო კანდიდატად დასახელებას, გულახდილები თუ ვიქნებით, სიახლე არც ესაა და აი, რატომ: რვა წლის წინ ანუ მაშინ, როცა პოლიტიკურ ავანსცენაზე „ოცნება“ გამოჩნდა, კულუარებში აქტიურად საუბრობდნენ, რომ სააკაშვილი კონსტიტუციის შეცვლას გეგმავდა. 

რა ცვლილება უნდა შესულიყო მაშინ კონსტიტუციაში? _ მოგეხსენებათ, ერთ პიროვნებას უფლება არ აქვს, რომ პრეზიდენტი მესამე ვადითაც გახდეს. ჰოდა, როგორც მაშინ ამბობდნენ, მიშას ჰქონდა იდეა, რომ პრეზიდენტობის მეორე ვადის ამოწურვის შემდეგ, ავტომატურად ქვეყნის პრემიერი გამხდარიყო. სწორედ ამიტომ იგეგმებოდა კონსტიტუციაში ცვლილებების შეტანა, რომელი ცვლილებებითაც, პრემიერს განუზომელი უფლება-მოვალეობები ექნებოდა და, პრაქტიკულად, ქვეყნის ერთპიროვნული მმართველი იქნებოდა, მაგრამ სააკაშვილს ისე მოუვიდა, გლახაკმა ქილა ერბო რომ იპოვა და ოცნებობდა. 

მოკლედ, მაშინ მიშა ოცნებობდა, „ოცნება“ კი იცინოდა და ყველაფერი იმით დამთავრდა, რომ 2012 წლის პირველ ოქტომბერს, ნაციონალურმა მოძრაობამ დამარცხება აღიარა, თუმცა ეს იმას როდი ნიშნავს, რომ ყოფილმა მმართველმა გუნდმა, ხელისუფლებაში დაბრუნებაზე ფიქრი, ამ რვა წლის განმავლობაში წუთით მაინც შეწყვიტა. შესაბამისად, ახლა იმედოვნებს, რომ მართვის ყველა ბერკეტს ხელმეორედ თუ ვერ დაეპატრონება, მინიმუმ, იმდენს მაინც მოახერხებს, რომ კოალიციური მთავრობა უმეტესად მისი წარმომადგენლებით დაკომპლექტდება, პრემიერი კი სააკაშვილი გახდება და... სოფელიც აშენდება, მაგრამ ეს ზუსტად ის შემთხვევაა, როცა ისე არ წვიმს, როგორც ქუხს ანუ მმართველი გუნდის რეიტინგი, შესაძლოა, დაცემულია, მაგრამ ხალხი ფსონს იმ ოპოზიციონერებზე კი არ დებს, რომლებიც 30 წელია, ქართულ პოლიტიკას საკუთარი ნადავლივით ირგებენ. მოსახლეობას უნდა, რომ პოლიტიკაში ახალი სახეები მოვიდნენ, ახალი იდეებითა და ახალი შემართებით. ეს ახალი ძალა კი შორს, ბუზის ტოლადაც არ ჩანს. 

წეღან, ალბათ, ყურადღება მიაქციეთ, რომ არჩევნებთან მიმართებაში დასავლეთის პოზიცია ვახსენეთ, კერძოდ, ოპოზიცია იმედოვნებს, რომ 31 ოქტომბრის მიმართ, ცივილიზებული მსოფლიოს ინტერესი ძალიან დიდი იქნება. შესაძლოა, მართლაც ასე იყოს, მაგრამ ირკვევა, რომ კორონაპანდემიის გამო, უცხოელი დამკვირვებლები საქართველოში, შესაძლოა, ვერ ჩამოვიდნენ. 

„ჩვენ ვქმნით მაქსიმალურად კომფორტულ პირობებს იმისათვის, რომ მაქსიმალურად დიდი რაოდენობით დამკვირვებლები ჩამოვიდნენ საქართველოში. ამ შემთხვევაში, დადგენილია სპეციალური პროტოკოლი, გათვალისწინებულია მხოლოდ Pჩღ ტესტირება დამკვირვებლებისთვის, ასევე, ხელისუფლების მხრიდან შეთავაზებული იქნება ლოგისტიკური განსხვავებული პირობებიც. მაგალითად, შეიძლება დაორგანიზდეს სპეციალური ფრენებიც კი იმისათვის, რომ დამკვირვებლებს გაუადვილდეთ საქართველოში ჩამოსვლა. დღევანდელი მდგომარეობით, ვფიქრობთ, რომ საკმაოდ დიდი რაოდენობით ჩამოვლენ დამკვირვებლები საქართველოში, მათ შორის, ეუთო-დან, სხვა საპარლამენტო ასამბლეებიდან, ევროსაბჭოს საპარლამენტო ასამბლეის დამკვირვებელთა ვიზიტიც იგეგმება. არის მხოლოდ რამდენიმე შემთხვევა, სადაც განიხილება არჩამოსვლის საკითხი. ეს არის IRI, NDI, ევროპარლამენტი და ჯერ კიდევ ადგენენ, ზოგადად წესებს არჩევნების დაკვირვებასთან დაკავშირებით სხვადასხვა ქვეყანაში. აქ, მხოლოდ საქართველოზე არ არის საუბარი“, – განაცხადა კობახიძემ. 

მართალია, პარლამენტის ყოფილი თავმჯდომარის ამ განცხადებას ოპოზიციის მხრიდან დიდი აჟიოტაჟი არ მოჰყოლია, მაგრამ იმ შემთხვევაში, თუ უცხოელი დამკვირვებლების სიმცირე იქნება, 31 ოქტომბერს, მანიპულაციისთვის ნოყიერი ნიადაგი ხელისუფელბასაც შეექმნება და ოპოზიციასაც, თუმცა 31-მდე, ორი თვეა დარჩენილი და ამ ხნის განმავლობაში, შესაძლოა, ვითარება რადიკალურად შეიცვალოს _ კორონა არ გაქრება, მაგრამ ვინ იცის, ვირუსმა იქნებ უკან დაიხიოს და დამკვირვებლებიც უპრობლემიოდ გვეწვივნენ, მით უმეტეს, რომ საქართველო მსოფლიოს კორონარუკაზე „მწვანე ქვეყნის“ სტატუსს სამართლიანად ინარჩუნებს. 

ისე, ყურადღება თუ მიაქციეთ, პანდემიის მიუხედავად, ცესკო-ს 31 ოქტომბრის პროტოკოლი არ გამოუქვეყნებია. სწორედ ამ პროტოკოლის შემუშავება-გამოქვეყნებისკენ მოუწოდებს თამარ ჟვანიას სამოქალაქო პლატფორმა 20/20. 

„საარჩევნო უბნებზე რიგების თავიდან ასაცილებლად, აგრეთვე, კომისიის წევრების, დამკვირვებლებისა და ამომრჩევლების ჯანმრთელობის უსაფრთხოების მოთხოვნების დაცვის უზრუნველსაყოფად, აუცილებელია გაიწეროს წესები და პროცედურები. 

ჩვენ მზად ვართ, აქტიურად ჩავერთოთ აღნიშნული პროტოკოლის შემუშავებაში და ვითანამშრომლოთ ცესკოსთან“, _ აცხადებენ ზემოხსენებულ პლატფორმაში. 

* * * 

მოკლედ, იმით დავამთავროთ, რითაც დავიწყეთ _ კართან კი არ მოდგა, არამედ, შემოდგომამ კარი შემოაღო. ჰოდა, პოლიტიკური წიწილების დათვლის პროცესიც დაიწყო, რომელიც ზუსტად ორ თვეში, ესე იგი, 31 ოქტომბერს დამთავრდება და შესაბამისად, გამოჩნდება, ამ ხნის განმავლობაში, ვინ ტყუილად ბაქი-ბუქობდა და ვინ რელურად ლაპარაკობდა! 

ასე რომ, არჩევანის გასაკეთებლად მოემზადეთ, ხალხო და, ისიც არ დაგავიწყდეთ, რომ საარჩევნო უბანზე მისულები უკან დროულად ვერ წამოხვალთ, რადგან 68-სუბიექტიანი სიის წაკითხვა მოგიწევთ! არა, შეიძლება, გადაწყვეტილი გაქვთ, ხმას ვის აძლევთ, მაგრამ ამ გრძელ სიას ინტერესის გამო მაინც ჩაიკითხავთ და აღმოაჩენთ, რომ ქვეყნის სათავეში მოსასვლელად კვლავ იბრძვის, მაგალითად, გელა (მიხეილ) სალუაშვილი, ოღონდ არ შეგეშალოთ _ ეს ის მიხეილი არაა, დაბრუნებას რომ აპირებს! ეს სრულიად სხვა მიხეილია, სრულიად სხვა იდეებითა და გეგმებით! 

აბა, ჰე და აბა, ჰო _ ღირსეული არჩევანის გაკეთება თითოეულ ჩვენგანზეა!

ნინო დოლიძე

 

]]>
versiaprinti@yahoo.com (super admin) პოლიტიკა Wed, 02 Sep 2020 12:19:17 +0400