პოლიტიკა - ვერსია - ვერსია http://www.versia.ge Sat, 18 Jan 2020 02:25:26 +0400 Joomla! - Open Source Content Management en-gb რა ინფორმაცია მიაწოდეს „გამარჯვებული საქართველოს ლიდერებმა კოტე კემულარიამ და ანა რეხვიაშვილმა ავტორიტეტულ უფლებადამცველებს http://www.versia.ge/2013-07-31-11-22-32/item/6516-რა-ინფორმაცია-მიაწოდეს-„გამარჯვებული-საქართველოს-ლიდერებმა-კოტე-კემულარიამ-და-ანა-რეხვიაშვილმა-ავტორიტეტულ-უფლებადამცველებს.html http://www.versia.ge/2013-07-31-11-22-32/item/6516-რა-ინფორმაცია-მიაწოდეს-„გამარჯვებული-საქართველოს-ლიდერებმა-კოტე-კემულარიამ-და-ანა-რეხვიაშვილმა-ავტორიტეტულ-უფლებადამცველებს.html

,,გამარჯვებული საქართველოს’’ ლიდერები კოტე კემულარია და ანა რეხვიაშვილი ავტორიტეტულ და გავლენიან უფლებადამცველებსა და ინსტიტუტებს შეხვდნენ. სამუშაო შეხვედრები შედგა: საერთაშორისო გამჭვირვალობა - საქართველოს აღმასრულებელ დირექტორთან ეკა გიგაურთან, საქართველოს სახალხო დამცველის მოადგილესთან და საქართველოს ყოფილ სახალხო დამცველთან, დემოკრატიის კვლევის ინსტიტუტის ხელმძღვანელთან უჩა ნანუაშვილთან.

„ირაკლი ოქრუაშვილი პოლტიკური პატიმარია“, - განაცხადა ანა რეხვიაშვილმა და გავლენიან უფლებადამცველებს გადასცა ყველა ის მასალა და ინფორმაცია, რომელიც ირაკლი ოქრუაშვილის საქმეში არსებულ უამრავ ხარვეზს, დარღვევას, ივანიშვილის რეჟიმის მიერ პოლიტიკური ოპონენტისადმი ღია ანგარიშსწორებასა და გამოკვეთილად პოლიტიკურ დევნას შეიცავს.

,, ჩვენ ვთხოვეთ ცნობილ და გავლენიან უფლებადამცველებს, აქტიურად მიადევნონ თვალი ირაკლი ოქრუაშვილის საქმეს ისევე, როგორც პოლიტპატიმრების საქმეებს. მათ დასკვნებსა და პრინციპულ პოზიციებს უდიდესი მნიშვნელობა აქვს და ექნება პოლიტპატიმრების გასათავისუფლებლად. ,, გამარჯვებული საქართველო’’ ისევე, როგორც ირაკლი ოქრუაშვილის ადვოკატები, მჭიდროდ ითანამშრომლებენ უფლებადამცველ გავლენიან ინსტიტუტებთან , როგორც საქართველოში, ასევე საერთაშორისო არენაზე და საერთაშორისო გამოცემებთან, რათა დემოკრატიულმა სამყარომ ყოველდღიურად და კიდევ უფრო მეტი შეიტყოს ივანიშვილის ოლიგარქიული რეჟიმის რეპრესიული პოლიტიკის და ოპოზიციური პოლიტიკური ლიდერების მიმართ ოლიგარქის ანგარიშსწორების შესახებ. პოლიტპატიმრები, რაც შეიძლება მალე უნდა გათავისუფლდნენ ციხეებიდან და პოლიტიკური ნიშნით დევნიდან,“ - განაცხადა შეხვედრების დასრულების შემდეგ ,, გამარჯვებული საქართველოს’’ ერთ-ერთმა ლიდერმა ანა რეხვიაშვილმა.

]]>
versiaprinti@yahoo.com (super admin) პოლიტიკა Thu, 16 Jan 2020 18:20:30 +0400
საით არის მიმართული „რუსული ანტენა“ _ რატომ არ უკრავს ტაშს კრემლი?! http://www.versia.ge/2013-07-31-11-22-32/item/6514-საით-არის-მიმართული-„რუსული-ანტენა“-_-რატომ-არ-უკრავს-ტაშს-კრემლი.html http://www.versia.ge/2013-07-31-11-22-32/item/6514-საით-არის-მიმართული-„რუსული-ანტენა“-_-რატომ-არ-უკრავს-ტაშს-კრემლი.html

ქიმიური იარაღის აკრძალვის ორგანიზაციის (OPCW) ახალ სტრუქტურასთან თანამშრომლობაზე რუსეთის ხელისუფლებამ უარი თქვა. ახალი სტრუქტურის უფლებამოსილებაში, მთელი მსოფლიოს მასშტაბით, ინციდენტების გამოძიება და მათ მოწყობაში დამნაშავეების იდენტიფიცირება შედის.

აღსანიშნავია, რომ OPCW-ს არსებობის ისტორიაში პირველად _ წელს, აკრძალული ქიმიური ნივთიერებების სიას ახალი ნივთიერება დაემატა. ორგანიზაცია 1997 წელს შეიქმნა და სწორედ მაშინ შედგა აკრძალული მომწამვლელი ნივთიერებების სია, რომელიც აქამდე არასოდეს შეცვლილა. ქიმიური იარაღის აკრძალვის ორგანიზაციის სათაო ოფისში, ჰააგაში, რამდენიმე დღის წინ გამართულ პლენარულ სხდომაზე გადაწყდა, რომ ორგანიზაციამ აკრძალული ნივთიერებების სიაში უნდა შეიყვანოს „ნოვიჩოკი“; ეს არის ნივთიერება, რომელიც საბჭოთა კავშირში შექმნეს და სერგეი სკრიპალისა და მისი ქალიშვილის მოწამვლისთვის გამოიყენეს. ამ გადაწყვეტილების მიღებას ორგანიზაციის წევრები აპლოდისმენტებით შეხვდნენ... თითქმის ყველამ დაუკრა ტაში. ვინ არ დაუკრა? რა თქმა უნდა, რუსეთის დელეგაციამ... 

ორგანიზაციის ყოველწლიური პლენარული სხდომა ჰააგაში, 25 ნოემბერს გაიხსნა. ორგანიზაციის წევრმა ქვეყნებმა დაამტკიცეს ორგანიზაციის ბიუჯეტი 2020 წლისთვის, რომელიც 71 მილიონი ევროს მოცულობისაა. რუსეთმა, ჩინეთმა და სირიამ ამ ბიუჯეტის დამტკიცებას მხარი არ დაუჭირეს. მოსკოვი ბიუჯეტის მიღების დაბლოკვას ცდილობდა, რადგან ახალ ბიუჯეტში ჩაიდო თანხები ერთდროულად კონვენციური და არაკონვენციური საქმიანობისთვის. არაკონვენციური საქმიანობა გულისხმობს საბრალდებო მექანიზმის ამუშავებას, რომელიც ქიმიური შეტევების განმახორციელებლების იდენტიფიცირებას ისახავს მიზნად. 

მართალია, რუსეთი თავისი სახელმწიფოს მნიშვნელობიდან, ამბიციებიდან, მიზნებიდან თუ ინტერესებიდან გამომდინარე, მრავალი საერთაშორისო ორგანიზაციის წონიანი წევრია, თუმცა ეს არ უშლის მას ხელს იმაში, რომ პარალელურად, ამ ორგანიზაციების საწინააღმდეგოდ იმოქმედოს... ყველა ხერხით! როგორც ბოლოდროინდელმა მოვლენებმაც ცხადჰყო, კრემლი გამოკვეთილ პარტნიორ ქვეყნებშიც კი ხშირად ბინძურად აფათურებს ხელებს. მსგავს მოქმედებებს ძირითადად ГРУ-ს თანამშრომლების მეშვეობით ახორციელებს. თუმცა, ასევე სულ უფრო და უფრო ხშირად, ამ ქმედებების კვალზე ევროპელი სამართალდამცველები და დამოუკიდებელი მედია გადიან. როგორც არ უნდა ტრაბახობდეს პრეზიდენტი პუტინი თავისი სპეცსამსახურების სიძლიერით, მათი ქმედებების პრევენცია უკვე სულ უფრო და უფრო ხშირად ხდება. მაგალითისთვის, იგივე ქიმიური იარაღის აკრძალვის ორგანიზაციის (OPCW) სერვერებზე თავდასხმის მცდელობის აღკვეთა შეიძლება მოვიყვანოთ. 

2018 წლის აპრილში, ჰააგაში, რუსული სპეცსამსახურის თანამშრომლებმა, ქიმიური იარაღის აკრძალვის ორგანიზაციის სერვერების გატეხვა სცადეს. მათი გეგმა ნიდერლანდების ხელისუფლებამ ჩაშალა. დიპლომატიური პასპორტების მქონე 4 რუსი ჯაშუში გაძევებულ იქნა ქვეყნიდან. ამ ქვეყნის სამხედრო დაზვერვამ სავარაუდო რუსი ჯაშუშების ფოტოები და ვინაობაც კი გაასაჯაროვა. ესენი იყვნენ ალექსეი მორენეცი, ევგენი სერებრიაკოვი, ოლეგ სოტნიკოვი და ალექსეი მინინი. არსებული ინფორმაციით, რუსი ჰაკერები, სკრიპალების მოწამვლის საქმეში, რუსეთის როლის შესახებ OPCW-ს მიერ აღმოჩენილი სამხილების ხელში ჩაგდებას ცდილობდნენ. ჰოლანდიის სამართალდამცველების აზრით, ოთხივე მათგანი ე.წ. ГРУ -ს თანამშრომელი იყო. ასევე, გაირკვა, რომ მათი ინტერესის საგანი იყო შვეიცარიაში არსებული ქიმიური ლაბორატორია და ის გამოძიებაც, რომელსაც ჰოლანდია დონბასში, სეპარატისტების მიერ მალაიზიური თვითმფრინავის ჩამოგდების საქმეზე ატარებს. ყველა ის თემა, რომელიც მათი ინტერესის საგანი იყო, უკიდურესად მნიშვნელოვანია რუსეთისთვის _ ეს არის საკითხები, სადაც რუსეთის, როგორც სახელმწიფოს ბრალეულობა იკვეთება. 

ნიდერლანდების კონტრდაზვერვის სამსახურის ცნობით, რუსი ჯაშუშები სპეცსაქმიანობისთვის საკუთარ ავტომანქანებს, ხოლო მობილური სიხშირისთვის კომპიუტერულ სიგნალს იყენებდნენ. დაკავებულებს საბარგულში ტრანსფორმატორი და რამდენიმე ელემენტი აღმოაჩნდათ, ასევე მანქანის სალონში ნაპოვნი იყო ძლიერი მონაცემების კომპიუტერი, ანტენა და სმარტფონები. ჰაკერები მათთვის საინტერესო ადამიანების კომპიუტერებს პაროლებს ხსნიდნენ და საიდუმლო მასალებს იპარავდნენ. ანტენა ქიმიური იარაღის აკრძალვის ორგანიზაციისკენ ჰქონდათ მიმართული. დაკავებამდე რუსეთის მოქალაქეები სამუშაო ტექნიკის, მათ შორის, მობილური ტელეფონების განადგურებას ცდილობდნენ, რის განხორციელებაც ვერ შეძლეს. აღსანიშნავია, რომ ერთ-ერთ დაკავებული სარგებლობდა ნოუთბუქით, რომლითაც მალაიზიაში, არასანქცირებული გზებით წვდომას ცდილობდა. მომხდარს რუსეთის საგარეო საქმეთა სამინისტრო გამოეხმაურა. მაშინ სერგეი ლავროვმა განაცხადა, რომ ნიდერლანდებში დაკავებულ რუსეთის მოქალაქეებს უნდა მოეხდინათ საელჩოს საინფორმაციო სისტემების ტესტირება და მათი ჩასვლა ჰააგაში რუტინული იყო. თუმცა, მას არ განუხილავს ის ფაქტი, რომ „რუსული ანტენა“ მიმართული იყო OPCW-ს შტაბბინისკენ და არა რუსეთის საელჩოსკენ, სხვა სამხილების არსებობაც საჯაროდ არ გაურჩევია. 

ფაქტია, რომ ეს არ არის პირველი შემთხვევა, როდესაც რუსეთი იყენებს ყველა ხერხს, რათა საკუთარ მიზანს მიაღწიოს; რუსეთი აგრძელებს კიბერშეტევებს, ტროლების ქარხნების ქსელების გაბმას მთელი მსოფლიოს მასშტაბით იმ პირებისა თუ ორგანიზაციების წინააღმდეგ, ვინც მათ მიზნებს ეწინააღმდეგება. ეს ნათლად გამოჩნდა ამ შემთხვევაშიც. მიუხედავად იმისა, რომ მარია ზახაროვამ მომხდარი მეზღაპრე ანდერსონის ზღაპრებს შეადარა, მისი ირონიული რეპლიკები ვერავის მოატყუებს. 

თანაც, უკვე ფაქტია, რომ რუსეთის ხელისუფლების არასანქცირებული, არასამართლიანი, მიუღებელი მოქმედებების შედეგებს თავადვე რუსეთის მოქალაქეები უფრო ხშირად იმკიან. ამის მაგალითია, მსოფლიო ანტიდოპინგური სააგენტოს ბოლოდროინდელი გადაწყვეტილება იმის თაობაზე, რომ რუსეთს 4 წლით მსოფლიოს ჩემპიონატებსა და ოლიმპიურ თამაშებში მონაწილეობის უფლება ჩამოერთმევა. მიზეზი კი ის არის, რომ რუსმა სპორტსმენებმა, კრემლის ჩინოვნიკების დახმარებით, სპეცსამსახურების ჩართულობითაც კი, დოპინგით მოახერხეს მსოფლიო სპორტის დაბინძურება. უკვე აღარ დარჩა სფერო თუ საკითხი, სადაც კრემლი საფრთხეს არ ქმნის, სიბინძურეს არ ავრცელებს და მავნებლობას არ ეწევა!

სოფიო უგრეხელიძე

]]>
versiaprinti@yahoo.com (super admin) პოლიტიკა Wed, 25 Dec 2019 12:46:53 +0400
დაგვეცემა თუ არა 2020-ში პოლიტიკური მეტეორი http://www.versia.ge/2013-07-31-11-22-32/item/6513-დაგვეცემა-თუ-არა-2020-ში-პოლიტიკური-მეტეორი.html http://www.versia.ge/2013-07-31-11-22-32/item/6513-დაგვეცემა-თუ-არა-2020-ში-პოლიტიკური-მეტეორი.html

2019 წლის პოლიტსკანდალების ანატომია

დროს თავისი კანონები აქვს ანუ გვინდა, თუ არა, როგორც ერთ სიმღერაშია, დრო არაფერზე ფიქრობს და მიჰქრის. 2019 წელიც ისტორიის კუთვნილება ისე ხდება, რომ არაფერზე დაფიქრებულა. სამაგიეროდ, ბევრი საფიქრალი ჩვენ, ადამიანებს დაგვიტოვა! 

დიახ, ქალბატონებო და ბატონებო, ახლა, როცა ახალ წლამდე ერთი კვირაა დარჩენილი, შეგვიძლია, თამამად ვთქვათ, რომ 2019 წელი, საქართველოს უახლოეს ისტორიაზე, თავის მძიმე კვალს აუცილებლად დატოვებს. 

ყველაფერს თავი რომ დავანებოთ, წელს საქართველო რამდენიმე საერთაშორისო სკანდალში გაეხვა. ამ მხრივ კი ყველაზე „მსუყე“, ანაკლიის პორტის გარშემო განვითარებული მოვლენები და „ფეისბუქის“ მიერ, ე.წ. ტროლებ-ბოტების მასშტაბური გამოვლენაა. 

ვინაიდან და რადგანაც ანაკლიის პორტის მოვლენებზე „ვერსიის“ ამავე ნომერში, ჟურნალისტ მაია მიშელაძის წლის ეკონომიკურ მიმოხილვაში ვრცლად წაიკითხავთ, ამ თემაზე აღარ შევჩერდები და პირდაპირ „ტროლების სკანდალზე“ გადავალ.

ისე, მთელი ცივილიზებული მსოფლიო, ლამის მარსზე „გადადის საცხოვრებლად“. ჩვენ კი იმის განხილვაში ვართ, ვიღაც „ბოტმა“, თუ „ტროლმა“ სოციალურ ქსელში რა სისაძაგლე დაწერა. 

„განხილვა“ „ლაითად“ ნათქვამია, რადგან კვირაზე მეტია, სრულიად ქართული მედიისთვის მთავარი ახალი ამბავი, სწორედ ეს საკითხია და იგივე ტელევიზიები, საინფორმაციო გამოშვებებს ისეთი ტრაგიკული ხმით იწყებენ, გეგონება, მესამე მსოფლიო ომი დაიწყო! 

ერთი სიტყვით, ასეთია ჩვენი ბედკრული რეალობა და ვინმემ რეალობის დამახინჯებაში რომ არ დამდოს ბრალი, ამიტომაც, 2019 წლის შეჯამებას მეც „ბოტების სკანდალით“ დავიწყებ. 

 

ზოგადად, ე.წ. ფეიკ-ნიუსის გარეშე, 21-ე საუკუნე წარმოუდგენელია, რაც იმას ნიშნავს, რომ ყალბი ინფორმაციის ინდუსტრია მხოლოდ საქართველოში კი არა, არამედ, მთელ მსოფლიოში ყვავის, თუმცა ჩვენთან, საქმე გაცილებით რთულადაა ანუ როგორც „ფეისბუქმა“ გაარკვია, გარკვეული ჯგუფები, გვერდები და ანგარიშები, პირდაპირ მმართველ გუნდთან იყო დაკავშირებული და სოცქსელში მხოლოდ ანტიოპოზიციური განწყობის ფორმირებას კი არ ახდენდა, არამედ, ანტიდასავლურ კამპანიასაც ეწეოდა. 

„სოციალურმა ქსელმა FACEBOOK-მა, 418 ქართული ანგარიში გააუქმა'', _ ამის შესახებ, ქართულმა ონლაინ და ტელე-მედიამ ინფორმაცია 20 დეკემბერს გაავრცელა. 

ამავე ინფორმაციაში ნათქვამი იყო, რომ ამ გადაწყვეტილების მიზეზი, არაავთენტური ქმედება გახდა. 

„როგორც სოციალური ქსელი განმარტავს, 39 პროფილი, 344 გვერდი, 13 ჯგუფი და 22 INSTAGRAM-ანგარიში პოზიციონირებდნენ, როგორც ახალი ამბების სააგენტოები და იმიტირებდნენ პოლიტიკურ პარტიებს, საჯარო პირებსა და მედიებს. ამისთვის ისინი შემდეგნაირ სახელწოდებებს იყენებდნენ: DailyInfo, NewsHub.ge, TodayNews.ge  და OnTime.ge. 

გვერდების ადმინასტრატორები, ძირითადად, ადგილობრივ ახალ ამბებსა და პოლიტიკურ საკითხებზე პოსტავდნენ, მაგალითად, არჩევნებზე, სამთავრობო პოლიტიკაზე, მაღალჩინოსნებზე, ოპოზიციისა და ადგილობრივი აქტივისტური ჯგუფების კრიტიკაზე. 

„მიუხედავად იმისა, რომ ამ ანგარიშების უკან მდგომი ადამიანები ცდილობდნენ, დაეფარათ თავიანთი იდენტობა და კოორდინირებული მუშაობა, ჩვენი გამოძიებით, ეს აქტივობები საქართველოში მოქმედ სარეკლამო კომპანია ,,პანდასა'' და ქართული ოცნების ხელისუფლებას უკავშირდება'', _ წერია განცხადებაში. 

გაუქმებული ანგარიშები მოიცავდა ისეთ გვერდებს, რომლებიც ფოკუსირებული იყო სენსაციურ ახალ ამბებზე და მიმების გავრცელებაზე. გაუქმებული გვერდების გამომწერების რაოდენობა, ზოგ შემთხვევაში, 11 000-მდეც აღწევდა. 

DFRLAB-ის ცნობით, გაუქმებული ჯგუფები აქტიურად მუშაობდნენ ადგილობრივი ოპოზიციური პარტიების დისკრედიტაციაზე. ამასთან, ავრცელებდნენ ყალბ ინფორმაციებს 2008 წლის აგვისტოს რუსეთ-საქართველოს ომთან დაკავშირებითაც'', _ იუწყებოდა ქართული მედია 20 დეკემბერს. 

ისე, წესითა და რიგით, უკეთესი იქნებოდა, 20 დეკემბერს, მედიას და, ზოგადად, საზოგადოებას მსჯელობა „ტროლებზე“ კი არა, გაცილებით საჭირბოროტო საკითხზე დაეწყო. 

აი, მაგალითად, გამართულიყო დებატები იმის თაობაზე, თუ რატომ და ვისი ხელშეწყობით დაიწყო 28 წლის წინ, 1991 წლის 22 დეკემბერს, თბილისში სამოქალაქო ომი, ომი, რომლის შედეგებსაც ახლაც ვიმკით, მაგრამ „ფეისბუქის“ მიერ განხორციელებულმა „სპეცოპერაციამ“, მხოლოდ 28 წლის წინანდელი კი არა, არამედ, სულ ახალი მოვლენებიც გადაფარა. 

ყოველ შემთხვევაში, ოპოზიცია მთლიანად „ტროლების თემაზე“ გადაერთო და იგივე პროპორციული არჩევნები, რომლის გამოც, მთელი ეს ვაკჰანალია დაიწყო, დაავიწყდა, თუმცა სანამ პროპორციულის ჩაგდების პერიპეტიებს გავიხსენებთ, სჯობს, „ტროლების სკანდალი“ ამოვწუროთ. 

ერთი სიტყვით, 2019 წლის მიწურულს, ქართულმა პოლიტიკამ „ტროლებსა და ბოტებზე“ დაიწყო ტრიალი და ყველა, ვისაც არ ეზარება, ამ თემაზე საუბრობს. ამ ამბავს საკრალურობას კი ის სძენს, რომ „ოცნება“ ფეიკ-გვერდებთან კავშირს კატეგორიულად უარყოფს და ყველაფერს „ნაცებს“ აბრალებს. 

ჩვენთვის რომ ვთქვათ, ამ მხრივ სუფთანი არც ყოფილი ხელისუფლების მხარდამჭერები არიან ანუ ინტერნეტ-ბულინგსა და ტროლინგს, მხოლოდ „ოცნება“ და მასთან აფილირებული ადამიანები კი არა, ნაციონალებიც მიმართავენ, თუმცა ისე მოხდა, რომ „ფეისბუქი“ მხოლოდ ხელისუფლების ინტერნეტ-ბულინგზე აკეთებს აქცენტს. არადა, თუ სამართალია, ორივე მხარის „ტროლების“ „მზე“ უნდა „ჩაესვენებინა“, მაგრამ მოხდა ის, რაც მოხდა და ახლაც, როგორც ბოლო 7 წლის განმავლობაში, „ოცნება“ კვლავ თავის დაცვის რეჟიმშია. 

ადამიანური ლოგიკით კი, თავდაცვაში ყოფნა, ყოველთვის წამგებიანია, ესე იგი, ბევრად უკეთესი თავდასხმაა. ჰოდა, ნაციონალებიც დროსა და სიტუაციას არ უშვებენ, რომ „ოცნება“ მიწაში ჩადონ. 

არადა, გულახდილად რომ ვთქვათ, მმმართველ გუნდს, შეიძლება, კარგის გაკეთება უნდა და ბევრ კარგსაც აკეთებს, მაგრამ რად გინდათ? _ ყველაფერს უნიათობის იარლიყი ეწებება. 

სხვათა შორის, „ფეისბუქის“ სკანდალზე, გავლენიანმა ქართულმა არასამთავრობო ორგანიზაციამ _ „გამჭვირვალობა საქართველომ“, გამოძიების დაწყება მოითხოვა. 

„20 დეკემბერს, FACEBOOK-მა გაავრცელა განცხადება, რომელშიც ნათქვამია, რომ კომპანიამ სოციალურ ქსელში არსებული ასობით ყალბი და კოორდინირებულ არაავთენტურ ქცევაში შემჩნეული გვერდი, ჯგუფი და მომხმარებელი წაშალა, რომლებიც არასამთავრობო სექტორის, სახალხო დამცველის, ოპოზიციისა, თუ სხვადასხვა სამოქალაქო აქტივისტის მადისკრედიტირებელ მასალას აქვეყნებდნენ. ამ ჯგუფების უკან მდგომი პირების ქმედებებში, შესაძლოა, რამდენიმე დანაშაულის ნიშანი იკვეთებოდეს, შესაბამისად, გამოძიება დაუყოვნებლივ უნდა დაიწყოს. ორგანიზაცია ხაზგასმით აღნიშნავს, რომ გამოძიების პროცესში, მკაცრად უნდა იყოს დაცული ზღვარი გამოხატვის თავისუფლებასა და კონკრეტულ დანაშაულს შორის. პროკურატურამ სისხლის სამართლებრივი დევნა იმ შემთხვევაში უნდა დაიწყოს, თუ ნათლად დადგინდება, რომ ქმედება დანაშაულის ნიშნების შემცველია და არ ექცევა გამოხატვის თავისუფლებით დაცულ სფეროში. 

FACEBOOK-ის გამოძიების შედეგად, ჯამში, 39 ანგარიში, 344 გვერდი და 13 ჯგუფი გაუქმდა. ამავე გამოძიებით დადგინდა, რომ წაშლილი გვერდები პარტია ,,ქართულ ოცნებასთან'' და სარეკლამო კომპანია ,,პანდასთან'' იყვნენ დაკავშირებულები. ამ გვერდებმა, დაახლოებით, 316 000 აშშ დოლარი FACEBOOK-სა და INSTAGRAM-ზე რეკლამაში ანუ პოსტების დასპონსორებაში დახარჯეს. ნიშანდობლივია ის ფაქტიც, რომ ყალბი ჯგუფების ქმედებები, უმეტესად მიმართული იყო საზოგადოებრივად აქტიურ პირებზე ზემოქმედებისა და მათი საქმიანობისათვის ხელშეშლისაკენ. 

გავლენებისგან თავისუფალი საგამოძიებო ორგანოების პირობებში, გავრცელებულ ინფორმაციაზე დაყრდნობით, გამოძიება დაუყოვნებლივ უნდა დაწყებულიყო. ობიექტური გამოძიების შემთხვევაში, შესაძლოა, გამოიკვეთოს სისხლის სამართლის კოდექსით გათვალისწინებული რამდენიმე დანაშაულის ნიშანი'', – ვკითხულობთ „გამჭვირვალობის“ მიერ გავრცელებულ განცხადებაში, თუმცა ისეთი პირი უჩანს, რომ ამ თემაზე გამოძიება არ დაიწყება. 

ისე, „ტროლების სკანდალის“ გამოძიებას ვინ ჩივის, როცა ბოლომდე, იგივე 20-21 ივნისის გამოძიებაც არ მოსულა. არადა, 20-21 ივნისი, შესაძლოა, ერთგვარ წყალგამყოფად ჩავთვალოთ ანუ წლების განმავლობაში, „ოცნება“ იმით აპელირებდა, რომ წინა ხელისუფლება საკუთარ ხალხს არბევდა. 

20-21 ივნისს კი, თავადაც იგივე საბედისწერო შეცდომა დაუშვა, თუმცა ამ შეცდომას მმართველი გუნდი არ აღიარებს და ამბობს, რომ თავიდან აიცილა სახელმწიფო გადატრიალება. 

კარგი, დავუშვათ, რომ სახელმწიფო გადატრიალების ნიშნები მართლაც, იყო სახეზე, მაგრამ საკითხავია: ამ გადატრიალებას მარტო ნიკა მელია და ირაკლი ოქრუაშვილი აპირებდნენ? 

ისე, თუ ოქრუაშვილი გადატრიალების ბრალდებით გისოსებში გამოკეტეს, იგივე ბედი მელიამაც რატომ არ გაიზიარა, ან თუ მელიას სამაჯური დაადეს, ხომ შეიძლება, „ოქროსთვისაც“ დაედოთ? 

მოკლედ, 20-21 ივნისის საქმეში ბევრი პასუხგაუცემელი კითხვაა, თუმცა ამ კითხვებზე პასუხებს, ზერელედ თუ შევხედავთ, ოპოზიციაც არ ეძებს ანუ ისეთი შთაბეჭდილება იქმნება, რომ ოპოზიციას 20-21 ივნისის მოვლენები სალაპარაკოდ სჭირდება, თორემ სინამდვილეში, სიმართლის დადგენა სულაც არ აინტერესებს. 

მაინც, რა მოხდა 20 ივნისის ღამეს და რატომ გახდა საჭირო ქუჩაში სპეცრაზმის გამოყვანა? 

მოდით, ამ მოვლენების ქრონოლოგია კიდევ ერთხელ გავიხსენოთ: 

17 ივნისს, ევროპული საქართველოს წევრმა, გიორგი კანდელაკმა გაავრცელა ინფორმაცია, რომ საქართველოში, 19 ივნისს, იგეგმებოდა მართლმადიდებლობის საპარლამენტო ასამბლეის ჩატარება, რომელსაც რუსეთის დუმის რამდენიმე დეპუტატი დაესწრებოდა. კანდელაკი ამბობდა, რომ დუმის დეპუტატების საქართველოს ტერიტორიაზე შემოსვლა არასასურველი იყო და ზიანს მიაყენებდა, როგორც ჩვენი საქართველოს სუვერენიტეტს, ასევე, საერთაშორისო ავტორიტეტს. 

ასევე, ცნობილი გახდა, რომ ზემოხსენებულ ასამბლეას დაესწრებოდა სერგეი გავრილოვი, რომელიც რუსეთის კომუნისტური პარტიის წევრი და რუსეთის დუმის მოქმედი დეპუტატია. პარალელურად, გავრცელდა ინფორმაცია, რომ გავრილოვი, აფხაზეთის ომის დროს, ქართველების წინააღმდეგ იბრძოდა. გარდა ამისა, ისიც გახდა ცნობილი, რომ გავრილოვი აფხაზეთისა და ე.წ. სამხრეთ ოსეთის დამოუკიდებლობას სცნობს. ეს კი საქართველოს სუვერენიტეტის ფარგლებში, საერთაშორისოდ აღიარებულ საზღვრებს ეწინააღმდეგება.

მოკლედ, რუსეთის დუმის დეპუტატმა, სერგეი გავრილოვმა, რომელიც აფხაზეთსა და ოსეთს დამოუკიდებელ სახელმწიფოებად განიხილავს, საქართველოში ვიზიტის დროს, საქართველოს პარლამენტის თავჯდომარის სავარძელი დაიკავა და მართლმადიდებლურ ასამბლეას გაუძღვა. ამან ოპოზიციონერებისა და ქართული საზოგადოების ნაწილის აღშფოთება გამოიწვია, რასაც სამოქალაქო მოძრაობების მხრიდან, აქციების დაანონსება მოჰყვა, ევროპული საქართველოსა და ნაციონალური მოძრაობის წევრების აქტიურობით კი, პარლამენტში ასამბლეა შეწყდა. 

შესვენების შემდეგ, თინა ბოკუჩავამ, ელენე ხოშტარიამ და სხვა პოლიტიკოსებმა გავრილოვს საშუალება არ მისცეს, რომ ხელმეორედ დაეკავებინა ირაკლი კობახიძის სკამი, კაკო ბობოხიძემ კი რუს დეპუტატს წყალი შეასხა. 

რუსი დეპუტატის მიერ, საქართველოს პარლამენტის თავმჯდომარის ადგილის დაკავებას, სამოქალაქო მოძრაობების პროტესტი #სირცხვილია მოჰყვა. აქტივისტები საქართველოს პარლამენტის შენობასთან შეიკრიბნენ და რუსული დელეგაციის ვიზიტი გააპროტესტეს. მათ ხელში ეჭირათ ბანერები _ „სირცხვილი მთავრობას“, „წადი და გაიყვანე რუსული ჯარი“. 

ასამბლეის ჩაშლის შემდეგ, სერგეი გავრილოვი და სხვა რუსი დეპუტატები, საქართველოს პარლამენტიდან, სასტუმრო „რედისონში“ გადაიყვანეს. სამოქალაქო აქტივისტების ნაწილმაც სასტუმროსთან გადაინაცვლა, სადაც პროტესტი გაგრძელდა. ისინი ითხოვდნენ, რომ ასამბლეა შეჩერებულიყო და გავრილოვსა და რუსულ დელეგაციას საქართველო დაეტოვებინათ. 

აქციის მონაწილეების აქტიურობამ შედეგი გამოიღო და გავრილოვმა ჯერ „რედისონის“ შენობა, შემდეგ კი საქართველო დატოვა, თუმცა პროტესტი ამით არ დასრულებულა. ოპოზიციამ კობახიძის თანამდებობიდან გადადგომა მოითხოვა, სამოქალაქო აქტივისტებმა კი რუსთაველზე, პარლამენტის წინ, ფართომასშტაბიანი აქცია დააანონსეს. 

20 ივნისს, 19:00 საათზე, პარლამენტთან აქცია დაიწყო. მოქალაქეები რუსული დელეგაციის ვიზიტსა და ოკუპაციას აპროტესტებდნენ, პარალელურად კი, მთავარი მოთხოვნები წამოაყენეს, რომელთაგან ერთ-ერთი, ირაკლი კობახიძის გადადგომა იყო. 

აქციის დაწყებიდან რამდენიმე წუთში, რუსთაველზე ათასობით ადამიანი შეიკრიბა. სპეციალურად მოწყობილ სცენასთან გამოჩნდნენ პოლიტიკოსებიც, რომლებმაც საზოგადოებას მიმართეს. აქცია რამდენიმე საათის განმავლობაში მშვიდობიანად მიმდინარეობდა, თუმცა საღამოს ათი საათისთვის, სამართალდამცავებს აქტივისტების ნაწილი დაუპირისპირდა, რასაც აქტივისტების პარლამენტში შეღწევის მცდელობა მოჰყვა. მათ წინააღმდეგობა სამართალდამცავებმა გაუწიეს და ვითარების განმუხტვას შეეცადნენ... აქციის მონაწილეებმა პარლამენტში შესვლა კიდევ რამდენჯერმე სცადეს, რის გამოც სამართალდამცავებსა და მომიტინგეებს შორის, შეტაკება განმეორდა. 

ღამის 12 საათისთვის, ძალოვანმა სტრუქტურებმა ცრემლსადენი გაზისა და რეზინის ტყვიების გამოყენებით, აქციის დაშლა გაუფრთხილებლად დაიწყეს. რუსთაველის გამზირზე, საავტომობილო გზაზე მდგარი აქციის მონაწილეები, თავდაცვის მიზნით, ტერიტორიას გაეცალნენ, თუმცა მალევე უკან დაბრუნდნენ. 

ამის შემდეგ, სპეცრაზმმა რეზინის ტყვიების გამოყენებაც დაიწყო, რის გამოც აქციის არაერთი მოქალაქე და მედიის წარმომადგენელი მძიმედ დაშავდა. ორმა აქტივისტმა, სპეცრაზმის მხრიდან ნასროლი რეზინის ტყვიების შედეგად, თვალი დაკარგა, 240-მდე მოქალაქემ კი სხეულის დაზიანებები მიიღო. 

სპეცრაზმი ცრემლსადენ გაზს უშვებდა, დემონსტრანტები კი საქართველოს ჰიმნს მღეროდნენ. 

ოპერაციის დაწყებიდან საათნახევრის შემდეგ, შსს-მ ოფიციალური განცხადება გაავრცელა, რომლის თანახმადაც, პარლამენტის შენობაში შეჭრის, მოქალაქეთა და პოლიციელთა ჯანმრთელობის დაზიანებისა და ფიზიკური დაპირისპირების თავიდან ასაცილებლად, გამოიყენეს ,,კანონით გათვალისწინებული იძულების პროპორციული სპეციალური საშუალებები''. 

აქციის დაშლა, თითქმის 8 საათის განმავლობაში გრძელდებოდა, გამთენიისას კი სიტუაცია შედარებით განეიტრალდა. აქციის დაშლა დაკავებებით დასრულდა. 

აქციის მონაწილეთა მოთხოვნა, პრემიერთან და შინაგან საქმეთა მინისტრთან ერთად, პარლამენტის თავმჯდომარის გადადგომა იყო. მათგან მხოლოდ პარლამენტის თავმჯდომარე გადადგა. ისიც, აქციის დაშლიდან რამდენიმე საათის შემდეგ, თუმცა ამას წინ უსწრებდა პრესსამსახურის განცხადება, რომ კობახიძე არც თანამდებობას დატოვებდა და არც ვიზიტს შეწყვეტდა, თუმცა ბოლოს, კობახიძე იძულებული გახდა, გადამდგარიყო. 

პარალელურად, ხელისუფლება ფართომასშტაბიან დათმობაზე წავიდა და განაცხადა, რომ თანახმა იყო, კონსტიტუციაში ცვლილებები შეეტანა და 2020 წელს, არჩევნები სრულად პროპორციული სისტემით ჩაეტარებინა, თუმცა შემოდგომის მიწურულს გაირკვა, რომ ეს დაპირება, ჩვეულებრივი „ფეიკი“ იყო ანუ უმრავლესობის წევრი მაჟორიტარები აჯანყდნენ და პროპორციულ სისტემაზე გადასვლის კანონპროექტი ჩავარდა. 

ჰოდა, ოპოზიციასაც კიდევ ერთი ახალი სუნთქვა გაეხსნა. 

უფრო მეტიც, ერთმანეთის გვერდით ისეთი „ანტიქოცებიც“ დასხდნენ, რომლებიც არცთუ შორეულ წარსულში, ერთმანეთს მკვდარსა და ცოცხალს აგინებდნენ. „ოცნებას“, როგორც ჩანს, სწორედ ეს არ ჰქონდა გათვლილი და იმედოვნებდა, რომ პროპორციულის ჩაგდებას, მხოლოდ ნაციონალები და ევროპული საქართველოს წარმომადგენლები გააპროტესტებდნენ, მაგრამ პოლიტიკურ არენაზე ნინო ბურჯანძე, შალვა ნათელაშვილი და სხვა პოლიტიკოსებიც გააქტიურდნენ. 

როგორ დამთავრდება ე.წ. პროპორციულის კრიზისი? _ ამას უკვე მომავალ წელს გავიგებთ, თუმცა ამთავითვე ნათელია, რომ ამ კანონპროექტის ჩაგდების გამო, მმართველმა გუნდმა დასავლეთის მხარდაჭერა დაკარგა. 

ასევე, დაკარგა ის თანაგუნდელებიც, რომლებიც, იგივე ევროპასა თუ აშშ-ში, „ოცნების“ ინტერესებს იცავდნენ ანუ ყველა პარამეტრით, ამ ეტაპზე, მოგებული ოპოზიციაა, რომელიც „ოცნებასთან“ ნერვების ომს აწარმოებს. 

ხელისუფლებას კი ნერვები ხშირად ღალატობს და ეს თუნდაც იქიდანაც გამოჩნდა, რომ სულ ახლახანს, პარლამენტის ყოფილმა თავმჯდომარემ, ირაკლი კობახიძემ ძველი იდეა გააცოცხლა და გამოვიდა ინიციატივით, რომ მედიაცილისწამებაზე, სპეცკანონი შეიქმნას. 

ამას გარდა, კომუნიკაციების მარეგულირებელი კომისია ერთგვარ ცენზურას აწესებს _ იწყებს გადაცემათა ციკლს, რომელიც მედიას კრიტიკის ქარცეცხლში გაატარებს და ამ გადაცემის სახეები ხელისუფლებასთან აფილირებული ისეთი სუბიექტები იქნებიან, როგორებიც, მაგალითად, ია ანთაძე, ან შორენა შავერდაშვილი არიან. 

ამასობაში კი, აშშ-ს სახელმწიფო დეპარტამენტი საქართველოს მთავრობას აფრთხილებს და განცხადებას ავრცელებს, რომელშიც აღნიშნულია, რომ საქართველოს მთავრობამ უნდა განამტკიცოს დემოკრატიის პრინციპები, ინდივიდუალური თავისუფლება, კანონის უზენაესობა, პოლიტიკურად მიუკერძოებელი სასამართლო და პროკურატურის სისტემა. 

ამასთან, განცხადებაში ნათქვამია, რომ შეერთებული შტატები გააგრძელებს მუშაობას თავის სტატეგიულ პარტნიორთან _ საქართველოსთან, რათა ხელი შეუწყოს კანონის უზენაესობასა და ანგარიშვალდებულ ინსტიტუტებს. 

„ამერიკის შეერთებული შტატები მხარს უჭერს უსაფრთხო, წარმატებულ და დემოკრატიულ საქართველოს. ჩვენ მივესალმებით სასამართლო რეფორმის მეოთხე ტალღის პროგრესს და მხარს ვუჭერთ მმართველი პარტიისა და ოპოზიციური პარტიების წარმომადგენლებს შორის მიმდინარე დიალოგს საარჩევნო რეფორმის შესახებ. ჩვენ მოვუწოდებთ საქართველოს მთავრობას, განამტკიცოს დემოკრატიის პრინციპებისადმი, ინდივიდუალური თავისუფლებისა და კანონის უზენაესობისადმი ერთგულება პოლიტიკურად მიუკერძოებელი სასამართლო და პროკურატურის სისტემის უზრუნველყოფით. ამერიკის შეერთებული შტატები გააგრძელებს თავის სტრატეგიულ პარტნიორთან, საქართველოსთან მუშაობას, კანონის უზენაესობისა და ანგარიშვალდებული ინსტიტუტების ხელშესაწყობად“, _ ნათქვამია ზემოხსენებულ განცხადებაში. 

ყველაფერ ზემოთქმულიდან, ერთი დასკვნის გაკეთება შეიძლება: 2020 წლის იანვარში, საქართველოში პოლიტიკური დუღილის ტემპერატურა დასაშვებ ზღვარს გადასცდება, რაც შესაძლოა, იმის წინაპირობა გახდეს, რომ მმართველმა გუნდმა არათუ ოპოზიციის ახლანდელი მოთხოვნები დააკმაყოფილოს, არამედ, სრულიად ახალი პოლიტიკური თამაში დაიწყოს და ვადამდელი საპარლამენტო არჩევნები დაინიშნოს. 

აი, თუ ასე მოხდა, მაშინ ნამდვილი „მეორედ მოსვლის“ მომსწრენი გავხდებით! 

და სანამ პოლიტიკური მეტეორი დაგვეცემა, მოდით, პოლიტიკურ ეშმაკებს მივაფურთხოთ და ერთმანეთს მშვიდობიანი ახალი წლის დადგომა მივულოცოთ!

ნინო დოლიძე

]]>
versiaprinti@yahoo.com (super admin) პოლიტიკა Wed, 25 Dec 2019 12:46:50 +0400
დიმიტრი შაშკინი: „ლუკა სირაძე საბჭოთა მილიციის მეთოდებით ჩაპრესეს!“ http://www.versia.ge/2013-07-31-11-22-32/item/6512-დიმიტრი-შაშკინი-„ლუკა-სირაძე-საბჭოთა-მილიციის-მეთოდებით-ჩაპრესეს-“.html http://www.versia.ge/2013-07-31-11-22-32/item/6512-დიმიტრი-შაშკინი-„ლუკა-სირაძე-საბჭოთა-მილიციის-მეთოდებით-ჩაპრესეს-“.html

არის თუ არა 15 წლის მოზარდის ტრაგედიაში დამნაშავე სკოლა _ განათლების ყოფილი მინისტრის განმარტებები

2019 წლის მიწურულს, საქართველო კიდევ ერთმა ტრაგედიამ შეძრა _ 15 წლის მოზარდი, ლუკა სირაძე, თვითმკვლელობის მიზნით, მე-9 სართულიდან გადმოხტა და რამდენიმე დღეში გარდაიცვალა. საქმე ეხება „მწვანე სკოლაში“ მომხდარ ფაქტს, როცა ჯერ კიდევ დაუდგენელმა პირმა სკოლის კედლებზე დაწერა: _ „ამ ცხოვრების დედაც“. სკოლის დირექციამ კი პოლიცია გამოიძახა. როგორც შემდეგ გაირკვა, სამართალდამცავებმა, გამოტეხვის მიზნით, სავარაუდოდ, ფსიქოლოგიურად იძალადეს ლუკა სირაძეზე და ზეწოლა განახორციელეს მის რამდენიმე თანატოლზეც, რის გამოც არასრუწლოვანმა გოგონამ თავის მოკვლაც კი სცადა. მომხდარის გამო, დაკავებულია დეტექტივ-გამომძიებელი, მარიანა ჩოლოიანი, რომელსაც პროკურატურამ 19 დეკემბერს, ბრალი ოფიციალურად წარუდგინა. ჩოლოიანს ბრალად ედება არასრულწლოვანზე ზეწოლა, თუმცა გამომძიებელი ბრალს არ აღიარებს და თავს დამნაშავედ არ მიიჩნევს. პარალელურად, საზოგადოების ნაწილში მუსირებს აზრი, რომ უნდა დადგეს სკოლის, განათლებისა და მეცნიერების სამინისტროს პასუხისმგებლობის საკითხი ანუ ზოგი თვლის, რომ სკოლის დირექტორს პოლიცია კი არ უნდა გამოეძახა, არამედ პრობლემა „კაცურად“ უნდა მოეგვარებინა, რაც მინიმუმ, ძალიან საშიშ ტენდენციაზე მიუთითებს _ საზოგადოებას პოლიციისადმი უნდობლობის განცდა გაუჩნდეს და ქვეყანა „ბნელ 90-იანებს“ დაუბრუნდეს, როცა ადამიანები საქმეებს თავად, სამართალდამცავი ორგანოების გარეშე, აგვარებდნენ. 

რას ემსახურება და სამართლიანია, თუ არა მოზარდის თვითმკვლელობის საქმეში, ისრების სკოლაზე გადატანის მცდელობა? _ „ვერსია“ განათლებისა და მეცნიერების ყოფილ მინისტრ დიმიტრი შაშკინს ესაუბრა, რომლის ინიციატივითაც საქართველოში, 2010 წელს, მანდატურის სამსახური დაინერგა...

_ ბატონო დიმა, როგორ ფიქრობთ, ლუკა სირაძის თვითმკვლელობის საქმეში, სკოლის პასუხისმგებლობის საკითხი უნდა დადგეს? 

_ ეს უმძიმესი ტრაგედიაა და, პირველ რიგში, მინდა, სამძიმარი ვუთხრა ლუკას ოჯახს, მთელი საქართველო ახლა ლუკას ოჯახის გვერდითაა. ეს ძალიან დიდი ტრაგედიაა და სამწუხაროა, რომ ვცხოვრობთ ქვეყანაში, სადაც მმართველ პარტიას არ გააჩნია მორალური საზღვრები და იმისთვის, რომ გადაარჩინოს საკუთარი სავარძლები, მზადაა, ყველანაირ სიბინძურეზე წავიდეს, თუმცა ეს გასაკვირი არაა, რადგან ეს ზუსტად ის ძალაა, რომელიც ხელისუფლებაში ჩვილი ბავშვის მოკვლის ფონზე მოვიდა. 

რაც შეეხება კითხვას, სკოლის პასუხისმგებლობის საკითხის დასმა ლოგიკური იმ შემთხვევაში იქნებოდა, თუ სკოლას ეცოდინებოდა იმ ადამიანის ვინაობა, რომელმაც დატოვა ეს წარწერები. ქრონოლოგიას თუ გადავხედავთ და ამ ქრონოლოგიაში ეჭვი არავის ეპარება _ დადასტურებულია ყველა წყაროთი, არის ის, რომ როცა ადმინისტრაცია, ბავშვები და პედაგოგები მივიდნენ სკოლაში, დახვდათ უამრავი წარწერა და დაზიანებული ინვენტარი. სკოლის დირექტორმა გააკეთა ის, რაც ავალია კანონით, რადგან ის არის პასუხისმგებელი ბავშვების უსაფრთხოებაზე _ დარეკა 112-ში, გამოიძახა პოლიცია. ამის შემდეგ იწყება პროცესი იმ პიროვნების დადგენის, რომელმაც ეს გააკეთა. ასევე, ყველა წყაროთი დადასტურებულია, რომ იმ სათვალთვალო კამერებში, რომლებიც სკოლაშია, იმ ადამიანის სახე, რომელიც ამ წარწერებს ტოვებს და აზიანებს ინვენტარს, არ ჩანს. აქედან გამომდინარე, პოლიცია იწყებს ჩვეულებრივი, საბჭოური მილიციის „საუკეთესო ტრადიციების“ მიხედვით, შესაძლო დამნაშავის დადგენას ანუ სკოლას ართმევს ყველა იმ ადამიანის სიას, რომელმაც დატოვა სკოლა უახლოეს წარსულში, ან რომელიც შეიძლება, განაწყენებული ყოფილიყო პედაგოგებსა და ადმინისტრაციაზე. პოლიციაში მიჰყავთ 5 ბავშვი და იწყებენ ამ ბავშვების „ჩაპრესვას“. 5 ბავშვის პოლიციაში წაყვანა ადასტურებს, რომ არ აქვთ უტყუარი ინფორმაცია, თუ ვინ შეიძლებოდა ყოფილიყო ეჭვმიტანილი. ატარებენ პირისპირ შეხვედრას ამ ბავშვებში, რაც ამაზრზენია. არ მოჰყავთ ადვოკატები მიუხედავად იმისა, რომ კანონით, იქ ადვოკატი უნდა ყოფილიყო. ხშირ შემთხვევაში, არც მშობლებს უკავშირდებიან. როგორც ჩანს, ყველაზე სუსტი წერტილი ნახეს ლუკა და დაიწყეს, კიდევ ერთხელ ვიხდი ბოდიშს ამ ჟარგონისთვის, „შეტენვა“ ამ დანაშაულისა იმიტომ, რომ ჩათვალეს, ჰქონდათ ბერკეტები _ ვთქვათ, მისი ძმა და დედა. როგორც ჩანს, ჩათვალეს, რომ რადგან მამა გარდაეცვალა, მარტივად მოახდენდნენ ზეწოლას. მოკლედ, ჩვენ ვსაუბრობთ ამაზრზენ არაადამიანებზე. 

ამ დროს კი „ოცნება“ ცდილობს, პასუხისმგებლობა მოუხსნას პოლიციას და გააზავოს ეს საკითხი. მანდატურებიც მიაბეს, რომლებიც კერძო სკოლებიდან მარგველაშვილმა 2013 წელს გამოიყვანა და ეს ყველამ ძალიან კარგად იცის. ამის მიუხედავად, ცდილობენ, გააზავონ ახალი მოთამაშეებით, ახალი სუბიექტებით ეს საკითხი, რაც ამაზრზენია. საქმე გვაქვს მარტივ რამესთან _ აიყვანეს ეს ბავშვი, მოტყუებით მიიყვანეს პოლიციაში, როგორც მოწმე, გამოიძახეს, რომ არ ჰყოლოდა ადვოკატი. დაიწყეს იქ „ჩაპრესვა“, რის შედეგადაც ბავშვმა თავი მოიკლა. რა შუაშია აქ, სკოლა?! ამ ბავშვის თვითმკვლელობასთან სკოლა, ჯანდაცვის, ან განათლების სამინისტრო რა შუაშია? 

ჩოლოიანი არის ერთი ჩვეულებრივი გამომძიებელი, რომელიც იქ იყო და ამაში მონაწილეობდა კიდევ 3 ადამიანი. იცით, რატომ უნდათ ყველაფრის გაზავება და სხვაგან ისრების გადატანა? _ ამას აკეთებენ იმის გამო, რომ მერე, როცა დამთავრდება ყველაფერი, ადამიანებში დარჩება განცდა, რატომ გააკეთეს ეს ამ პოლიციელებმა, რა, სადისტები იყვნენ ყველანი, ამ განყოფილებაში? ეს ყველაზე მარტივი ბრალდებაა, რომ ყველა სადისტი იყო. არ ვთვლი, რომ ისინი სადისტები იყვნენ, ვთვლი, რომ ასრულებდნენ დავალებას, რომლითაც უნდა გამოესწორებინათ სტატისტიკა და რაც შეიძლება, მალე ეჩვენებინათ თავიანთი ზემდგომებისთვის, რომლების მოთხოვნაა „გახსნილი“ და „შეტენილი“ საქმეები. 

_ ესე იგი, სისტემურ პრობლემაზე საუბრობთ. თქვენ ნაციონალური მოძრაობის ხელისუფლებას წარმოადგენდით და ზოგი ფიქრობს, რომ ეს სისტემა, სწორედ მაშინდელია. რა არის საჭირო ამ სისტემური პრობლემის მოსაგვარებლად, მხოლოდ პოლიტიკური ნება? 

_ რაღაცის იმაზე გადაბრალება, რაც 9, თუ 12 წლის წინ იყო, „ქართული ოცნების“ სავიზიტო ბარათია. ბარემ, 70 წლის წინ რომ რაღაც იყო, ისიც გაიხსენონ. იცით, რა? _ ხელისუფლება იმისთვისაა, რომ აიღოს პასუხისმგებლობა. 8 წელია, ხელისუფლებაში არიან! მაგალითს ვერ მომიყვანთ, რომ ვოლსკისთვის დაებრალებინათ რაღაც პრობლემა იმის გამო, რომ ის კომუნისტური პარტიის მდივანი იყო. 9 აპრილს, საბჭოთა ჯარი როცა ურტყამდა და კლავდა ჩვენს მოქალაქეებს, მაშინ იყო ვოლსკი კომუნისტური პარტიის მდივანი, თუმცა არც ერთხელ, მისთვის ეს არ დაუბრალებია არავის იმიტომ, რომ პასუხისმგებლობას იღებს ხელისუფლება, ეს არის მარტივი. 

ზუსტად თქვით _ პოლიტიკური ნება იმაში გამოიხატება, რომ პოლიციას არ უნდა მისცენ დანაშაულებრივი დავალება. როგორც კი პოლიცია იწყებს „პოლიტიკურ თამაშებში“ მონაწილეობას და პოლიტიკური დავალებების შესრულებას, სწორედ ეს შედეგი დგება! 

_ ბატონო დიმიტრი, სკოლებში მანდატურის შეყვანა თქენი იდეა იყო. დღეს რა მდგომარეობაა ამ მიმართულებით, თქვენი ინფორმაციით, ეს ინსტიტუტი მუშაობს? 

_ პირველი, რაც უნდა იცოდეთ ისაა, რომ მანდატურები 2013 წელს გამოიყვანეს ყველა კერძო სკოლიდან, გიორგი მარგველაშვილის ბრძანებით. 

ამასთან, მანდატურები გადააქვემდებარეს სკოლის დირექტორებს, რამაც მოკლა მანდატურის არსი, რადგან ჩვენ ვაკეთებდით მანდატურის სამსახურს ამერიკულ მოდელზე, რის მიხედვითაც, ისინი არ ექვემდაბარებოდნენ სკოლის დირექტორს. 

სკოლა დიდი ოჯახია, რამე რომ ხდება, ხშირად, სკოლის დირექტორი ცდილობს, მიაჩუმოს ეს ამბავი და არ რეაგირებს რაღაცაზე. მანდატურს უნდა ჰქონოდა შესაძლებლობა, დამოუკიდებლად ჩაეყენებინა საქმის კურსში სამინისტრო, რომ სკოლაში არის პრობლემა. მანდატურები განათლების სამინისტროზე იყვნენ დაქვემდებარებულნი, ამ ხელისუფლებამ კი სკოლებზე გადააქვემდებარა. სხვათა შორის, აშშ-ში, მანდატურები პოლიციას ექვემდებარებიან და არა განთლების სამინისტროს! 

მესამე, რაც გააფუჭეს, ისაა, რომ მანდატურებს სკოლის დირექტორებმა აუკრძალეს პოლიციის გამოძახება. ცნობილი ფაქტია, როცა 161-ე სკოლაში, 2 ბავშვი დაჭრეს, მანდატურები გაყარეს სამსახურიდან იმის გამო, რომ ამ ფაქტზე, 2013 წელს, გამოიძახეს პოლიცია, თუმცა 51-ე სკოლაში, მკვლელობის შემდეგ დაიწყო ამ რეფორმის უკან დაბრუნება, მაგრამ ამის უკან დატრიალება ამ მთავრობის ხელში შეუძლებელია იმიტომ, რომ მანდატურის მუშაობის პრინციპი ძალიან მარტივია _ არ არსებობს გამონაკლისი! 

ყველა ბავშვს, ყველა სკოლაში, მანდატურები უნდა ექცეოდნენ თანაბრად. არ არსებობს გამონაკლისები, რომ ვიღაცის შვილისთვის რაღაც დასაშვებია და ვიღაცისთვის _ არა. ის, რომ ვიღაც მაღალჩინოსნის შვილია, ამ ბავშვისთვის, ეს ინდულგენციას არ წარმოადგენს. 

სკოლებში მანდატურები პირველად რომ შევიყვანეთ, შეხვედრაზე, კარგად მახსოვს, ვიყავით მე, შინაგან საქმეთა და კიდევ რამდენიმე მინისტრი და მაშინ ყველა მანდატურს ვუთხარი, როგორც მოექცევით ჩვენს შვილებს, ისე უნდა მოექცეთ ყველას და როგორც მოექცევით ყველას, ისე უნდა მოექცეთ ჩვენს შვილებს-მეთქი. ეს, სამწუხაროდ, დარღვეულია. 

_ ანუ, დღეს თანასწორობის პრინციპი არ მოქმედებს? 

_ სუბელიანის ანუ 51-ე სკოლის მაგალითი სახეზეა _ რადგან კალანდია იყო მაღალჩინოსნის ნათესავი, აბსოლუტურად სხვანაირად იმუშავა სისტემამ. 

_ მოკლედ, იმის თქმა გინდათ, რომ მანდატურის სამსახურმა დღეს ფუნქცია დაკარგა? 

_ დიახ, ჩვეულებივი დარაჯები არიან ახლა. თუ გახსოვთ, თამარ სანიკიძის მინისტრობის დროს იყო საუბარი, მანდატურები კი არა, ფსიქოლოგები გვჭირდებაო. მაშინაც ვამბობდი, რომ სისულელეს ამბობდნენ. საუბარი იყო იმაზე, რომ ჰიპნოზის ოთახები უნდა გაეკეთებინათ და ბავშვებთან ურთიერთობა ჰიპნოზით დაემყარებინათ. პილოტიც დაიწყეს, ჰიპნოზის ოთახები გააკეთეს რამდენიმე სკოლაში და ასეთ სისულელეებზე ლაპარაკობდნენ, თუმცა მერე ეს თემა მოკვდა. მანდატურის სამსახური დაანგრიეს, აქციეს დარაჯებად და არც ფსიქოლოგები შეიყვანეს სკოლებში. გჯერათ, რომ 2000-ბავშვიან სკოლაში, ერთი ფსიქოლოგი რამე შედეგს დადებს? 

_ რა თქმა უნდა, არა. წარმოუდგენელია, ერთი ფსიქოლოგი ათასზე მეტ ბავშვს გაწვდეს. 

_ აბსოლუტურად გეთანხმებით. 

_ თუმცა, ბატონო დიმიტრი, მაშინ ბევრი გაკრიტიკებდათ, რომ მანდატურების შეყვანით სკოლებში, პოლიციური სისტემა, ზედმეტი სიმკაცრე შეიტანეთ. ამ გადასახედიდან, როგორ აფასებთ იმ ნაბიჯს? 

_ არ ვთვლი, რომ ეს იყო პოლიციური სისტემა. ვამაყობ, რომ 4 წლის განმავლობაში, რაც მინისტრი ვიყავი, მკვლელობა კი არა, დაჭრა არ მომხდარა საჯარო სკოლებში. ამით ვამაყობ და მთელი ცხოვრება ჩემთვის იქნება უზარმაზარი და უმნიშვნელოვანესი შედეგი იმის გათვალისწინებით, რომ ძალადობა ჩვენს სკოლებში არ იყო ბოლო წლების პრობლემა, ეს საბჭოური დროიდან მოდის. მეც თბილისში დავამთავრე სკოლა და კარგად მახსოვს ყველაფერი. ეს რეფორმა ევროკავშირის კვლევებით იყო მხარდაჭერილი ანუ მშობლების 79% მხარს უჭერდა. სტატისტიკის დეპარტამენტის მიერ დადასტურებული ცნობით კი, 2011 წელს, 20 000-მა ადამიანმა გადაიყვანა ბავშვი კერძოდან საჯარო სკოლაში იმიტომ, რომ იცოდა, იქ უფრო უსაფრთხოდ იქნებოდა. 

მე და ჩემმა გუნდმა დავდეთ ჩვენი ჯანმრთელობა, ენერგია, შრომა მაგიდაზე და 24-საათიან რეჟიმში ვმუშაობდით. ყველაზე მარტივი იყო ჩემთვის თვალების დახუჭვა და ის, რომ მეთქვა, ეს სკოლის ბრალია და სკოლამ მოაგვაროს, მე რა შუაში ვარ-მეთქი. ჩვენ ავიღეთ პასუხისმგებლობა და ვამაყობ, რომ არც ერთი ბავშვი არ დაუჭრიათ ჩემი მინისტრობის დროს!

თათია გოჩაძე

]]>
versiaprinti@yahoo.com (super admin) პოლიტიკა Wed, 25 Dec 2019 12:46:46 +0400
სისხლიანი ოკუპანტური თამაშები _ რა ფარულ პროვოკაციას გვიმზადებს კრემლი http://www.versia.ge/2013-07-31-11-22-32/item/6499-სისხლიანი-ოკუპანტური-თამაშები-_-რა-ფარულ-პროვოკაციას-გვიმზადებს-კრემლი.html http://www.versia.ge/2013-07-31-11-22-32/item/6499-სისხლიანი-ოკუპანტური-თამაშები-_-რა-ფარულ-პროვოკაციას-გვიმზადებს-კრემლი.html

ვინ არის და რატომ იცავს მმართველი გუნდი ერეკლე კუხიანიძეს კბილებით

მართალია, ქვემეხები დუმან, მაგრამ ეს იმას როდი ნიშნავს, რომ მშვიდობაა. დიახ, ეს არის მშვიდობა, რომელიც ომზე საშიშია. ეს ომი საქართველოს არ დაუწყია. ეს ომი ძალიან დიდი ხნის, კერძოდ, ორი საუკუნის წინ, ჩვენმა ჩრდილოელმა მეზობელმა გამოგვიცხადა და ამ ხნის განმავლობაში იძულებულნი ვართ, კრემლის აგრესიისგან თავი დავიცვათ! ეს თავდაცვა ხან გამოგვდის, ხან _ არა. რა იქნება ხვალ? _ ეს არავინ იცის. უფრო სწორად, კონფლიქტოლოგები და ის ადამიანებიც, რომლებიც რუსული „დერჟავის“ ბუნებას ზედმიწევნით კარგად იცნობენ, ამბობენ, რომ მოსკოვი თავის იმმპერიალისტურ მიზნებზე უარს არასოდეს იტყვის და თუ ძლიერი მფარველი არ გვეყოლება, მუდმივად შეეცდება, რომ საქართველო საკუთარ კლანჭებში მოიქციოს. ვინ შეიძლება ძლიერი მფარველობა გაგვიწიოს? _ ამ კითხვაზე პასუხი უმარტივესია ანუ ნატო და, საერთოდ, ევროატლანტიკური სტრუქტურები, ამ ეტაპზე, ჩვენი ერთადერთი ნავთსაყუდელი და თავშესაფარია.

ახლა, მავანნი იტყვიან, არ გვიღებს ნატო თავის რიგებში და როდემდე უნდა ვეხვეწოთ? ამ სკეპტიკოსების რიტორიკაში, შესაძლოა, ლოგიკა არის, მაგრამ ისიც ფაქტია, რომ ვინც ეძებს, ყოველთვის პოულობს. ჰოდა, ადრე თუ გვიან, ჩვენთვის ნატო-ს კარი აუცილებლად გაიღება და ჩრდოლოეთური დათვიც იძულებული გახდება, თავი დაგვანებოს, მაგრამ რა იქნება ამ „კარის გაღებამდე“? _ ამაზე მარჩიელობა საჭირო არ არის, რადგან ყველაფერი პოლარული ღამესავით ნათელია _ კრემლი უკანონო ბორდერიზაციას გააგრძელებს და საკუთარი გავლენის აგენტების მეშვეობით, შეეცდება, რაც შეიძლება მეტად მოახდინოს იმ აზრის კულტივირება, რომ რუსეთი ჩვენი უფროსი ძმა, მეგობარია და ამიტომ, წინააღმდეგობა კი არ უნდა გავუწიოთ, არამედ, „ბაბაია“ უნდა დავუძახოთ. 

ისე, სიტყვამ მოიტანა და, ყველამ ვიცით, რომ ჩვენი ქვეყანა კრემლის გავლენის აგენტებითაა სავსე. ყველაზე დიდი უბედურება კი ის გახლავთ, რომ ჩრდილოეთურ ინტერესებს ზოგი „მოხალისის რეჟიმში“ ატარებს და ამის ნათელი მაგალითია თბილისის საკრებულოს აქამდე უცნობი წევრი, „მეოცნებე“ ერეკლე კუხიანიძე, რომელმაც ცხინვალის საოკუპაციო რეჟიმის მიერ დატყვევებულ ქართველ ექიმს, ვაჟა გაფრინდაშვილს, მის ოჯახსა და, აქედან გამომდინარე, ყველა ქართველ პატრიოტს შეურაცხყოფა მიაყენა. კერძოდ, მან სოციალურ ქსელში, სიტყვა-სიტყვით ასე დაწერა: 

„ძალიან სერიოზული მყრალი პროვოკაციის ოხშივარი ასდის ამ ამბავს! პირდაპირ გეუბნებით _ როდესაც იცი, იქ ოკუპანტია და დაგიჭერს და მაინც სპეციალურად მიდიხარ... ისიც იცი, რომ შენი ქვეყანა მოკლებულია იმას, რომ ქმედითი წინააღმდეგობა გაუწიოს ოკუპანტს და ამის შემდეგ შენი ოჯახი სახელმწიფოს უპირისპირდება _ ან მთელი ოჯახი იდიოტები ხართ, ან პროვოკატორები, თქვენი დედაც...“ 

ნიშანდობლივია, რომ „მეოცნებე“ კუხიანიძემ, ვაჟა ექიმსა და მის ოჯახს დედა სწორედ მაშინ აგინა, როცა მმართველი გუნდი, თავისუფლების მოედანზე, საქართველოს ევროსაბჭოს თავმჯდომარე ქვეყნად გახდომას ზეიმობდა. 

ისე, ჩვენთვის რომ ვთქვათ, ვერავინ გაიგო, რა იზეიმმა 14 დეკემბერს „ოცნებამ“ ანუ ევროსაბჭოს წევრი ქვეყნები ამ გაერთიანების თავმჯდომარეები რამე დამსახურებით კი არა, არამედ, ანბანის მიხედვით ხდებიან და ამ პოსტს 6 თვე იკავებენ. ჰოდა, საქართველოს ევროსაბჭოს თავმჯდომარეობამ, სწორედ ამბანის მიხედვით მოუწია და, აი, მართლაც, საკითხავია, ამის გამო ტაშ-ფანდურის მოწყობა რატომ გახდა აუცილებელი? ამ ლოგიკით, თავისუფლად შეიძლება, რომ ქართველი პოლიტიკოსების, მაგალითად, პარლამენტის წევრების ევროსაბჭოსა, თუ ევროკავშირში ყველა ვიზიტს საერთო-სახალხო ზეიმით გამოვეხმაუროთ და ამით ხაზი გავუსვათ, რომ ჩვენი არჩევანი ევროპაა, თუმცა იმას, რომ საქართველოს დასავლეთს იქით გზა არ აქვს, ზეიმების მოწყობა კი არა, საქმე სჭირდება. საქმე კი აბსოლუტურად სხვანაირია და ამას, მინიმუმ, კუხიანიძის ზემოხსენებული განცხადებაც მოწმობს. 

სხვათა შორის, კუხიანიძის „გამოხტომას“ საზოგადოების ყველა ფენიდან ადეკვატური რეაქცია მოჰყვა, თუმცა „მეოცნებე“ პოლიტიკოსმა, რომლის არსებობაც აქამდე ოჯახის წევრებისა და მეზობელ-მეგობრების გარდა, არავინ იცოდა, აღებული გზიდან არ გადაუხვია და იგივე სოციალურ ქსელში, ვაჟა გაფრინდაშვილზე არანაკლებ შეურაცხმყოფელი ინფორმაციის ტირაჟირება მოახდინა. 

„თბილისის საკრებულოს წევრი „ქართული ოცნებიდან“, ერეკლე კუხიანიძე, ოკუპანტების მიერ დაკავებულ ქართველ ექიმ ვაჟა გაფრინდაშვილთან დაკავშირებით, ამჯერად, ცხინვალის ე.წ. უშიშროების სამსახურის (KGB) ვერსიას ავრცელებს. 

ვერსია თავდაპირველად სოციალური ქსელის მომხმარებელმა, სანდრო ჯამასპიშვილმა გაავრცელა, რომელიც კუხიანიძემ გადააზიარა და წერილის ავტორს მხარი დაუჭირა. 

საუბარია ცხინვალის KGB-ს მიერ, საჯაროდ გავრცელებულ ინფორმაციასა და აუდიოჩანაწერებზე. ცხინვალი ამტკიცებს, რომ ექიმ ვაჟა გაფრინდაშვილს, დე-ფაქტო საზღვრის გადაკვეთა და „კანონდარღვევა“ წინასწარ ჰქონდა დაგეგმილი. 

ცხინვალის KGB-ს განცხადებით, „საზღვრის დარღვევამდე“, ექიმი ესტონეთში იმყოფებოდა ვიზიტით, ხოლო საქართველოში დაბრუნების შემდეგ, საბანკო ანგარიშზე 21 ათასი დოლარი ჩაერიცხა, რის შემდეგაც, „თანამზახველების“ მეშვეობით, ცხინვალის რეგიონში მოხვდა. ცხინვალის ე.წ. უშიშროება, მათ შორის, სირიის მოქალაქესაც ასახელებს. 

ჯამასპიშვილმა მოგვიანებით წერილი კიდევ გამოაქვეყნა, სადაც ვაჟა გაფრინდაშვილი აგენტად მოიხსენია. 

„დაე, დიდხანს აყურყუტონ ეგ კაცი ორმოში'', _ დაწერა ხელისუფლების მხარდამჭერმა'', _ იუწყებოდა 16 დეკემბერს, ქართული ონლაინ-მედია. 

ვინ არის ერეკლე კუხიანიძე? _ მედიაში გავრცელებული ცნობით, ის 59 წლისაა და თბილისის საკრებულოში, „ქართული ოცნების“ კვოტით, გარემოს დაცვის კომისიას თავმჯდომარეობს, თუმცა მხოლოდ პოლიტიკოსობას არ სჯერდება და პერიოდულად, თურმე, მსახიობობს (რამდენიმე ფილმშია გადაღებული) და თავს სიმღერითაც იქცევს ხოლმე ანუ თავის დროზე, ანსამბლების _ „ოროველას“, „ჰელიკონ-იოპერასა“ და „იმედის“ სოლისტი იყო. 

2012 წელს, კუხიანიძე საზოგადოებრივი მოძრაობა „ქართული ოცნების“ კულტურის ჯგუფის მუსიკალურ განყოფილებას ხელმძღვანელობდა, 2015-2017 წლებში კი, თეთრიწყაროს მუნიციპალიტეტში, გამგებლის მოადგილედ მუშაობდა. 

სხვათა შორის, კუხიანიძე ცნობილი ქართველი მსახიობის, ნუცა კუახიანიძის მამაა. შეგახსენებთ, ნუცა თავის დროზე, ჰოლივუდში მოღვაწეობდა. მოგვიანებით, ის საქართველოში დაბრუნდა და ცოლად ვახტანგ და მაია რჩეულილშვილების ვაჟს, გუკა რჩეულიშვილს გაჰყვა, თუმცა ნუცა კუხიანიძე მამას ემიჯნება და ამბობს, რომ მის პოზიციას არ იზიარებს. 

ერეკლე კუხიანიძე პროფესიით ისტორიკოსია და, როგორც ირკვევა, ამილახვრების შთამომავალია. 

„ბავშვობიდან მესმოდა, რომ ჩემი დიდედის ანუ დედაჩემის დედის წინაპრები, ამილახვრები იყვნენ. ამაზე ხშირად არ საუბრობდნენ – ოცდაჩვიდმეტი წლის შიში ჰქონდათ გამოყოლილი და მიუხედავად იმისა, რომ საშიში აღარაფერი იყო, დიდედაჩემი ამის აფიშირებას მაინც გაურბოდა. მოკლედ, მისი დედა ამილახვარი იყო. გვიყვებოდა ხოლმე სახლზე, სადაც გაიზარდა; რომ იქ ძალიან დიდი ოთახები იყო, სასახლეს ჰგავდა ყველაფერი. თვითონ იყო ჩოლოყაშვილი, იმ ცნობილი მევენახის, სოლომონ ჩოლოყაშვილის შვილი, რომელმაც მევენახეობის ინსტიტუტი დააარსა საქართველოში, ცნობილი მეცნიერი იყო. დიდედას პაპა გახლდათ ცნობილი გენერალი, ივანე ამილახვარი, რომელიც 1905 წელს გარდაიცვალა. უმცირესი ჩინიდან დაიწყო და ბოლოს მთელი ბატალიონი ჩაიბარა, სერიოზული მებრძოლი იყო. ჩეჩნეთში დიდი აჯანყება ყოფილა და რუსეთი მის სისხლში ჩახშობას აპირებდა. ივანემ მოახერხა, ჩავიდა და მხოლოდ მოლაპარაკებით, სიტყვით დააწყნარა სიტუაცია. ჩეჩენმა ერმა ძალიან დიდი მადლიერება გამოხატა მის მიმართ, როდესაც გარდაიცვალა. სწორედ ეს ივანე ამილახვარი იყო დიდედას პაპის ძმა. დიდედას პაპა ადრე გარდაიცვალა და ამიტომ დიდედას დედა, პრაქტიკულად, ივანეს სახლში გაიზარდა'', _ ესაა ამონარიდი კუახინიძის ინტერვიუდან, რომელიც ქართულ მედიაში რამდენიმე წლის წინ გამოქვეყნდა. 

რაც შეეხება ერეკლე კუხიანიძის ქონებრივ დეკლარაციას, 2019 წლის 23 ნოემბერს შევსებული დეკლარაციის თანახმად, კუხიანიძის მფლობელობაშია 101 კვ.მ. ფართობის ბინა თბილისში, ტოვსტონოგოვის ქუჩაზე. საანგარიშო პერიოდში, ერეკლე კუხიანიძეს რესპუბლიკა ბანკის მიმდინარე ანგარიშზე ჰქონდა 50 აშშ დოლარი, ლიბერთი ბანკის მიმდინარეზე _ 1 800 ლარი და საქართველოს ბანკის მიმდინარეზე _ 100 ლარი. დეკლარაციის შევსების მომენტში, კუხიანიძეს ნაღდი ფულის სახით ჰქონდა ბინის გაყიდვიდან შემოსული თანხა, ჯამში, 34 000 აშშ დოლარი. 

ამავე დეკლარაციის მიხედვით, კუხიანიძემ 2017 წლის 1 იანვრიდან 2017 წლის 30 აპრილის ჩათვლით, თეთრიწყაროს მუნიციპალიტეტის გამგებლის მოადგილის თანამდებობაზე, შემოსავლის სახით, აიღო 4 160 ლარი. იმავე წლის 1 მაისიდან 13 ნოემბრის ჩათვლით, თეთრიწყაროს მუნიციპალიტეტის გამგებლის მოვალეობის შემსრულებლის თანამდებობაზე _ 13 800 ლარი. 

თბილისის საკრებულოში, 2018 წლის განმავლობაში, კუხიანიძემ გარემოს დაცვის კომისიის თავმჯდომარის თანამდებობაზე ყოფნისას, ანაზღაურების სახით, 37 900 ლარი აიღო. ამავე პერიოდში, მან ბინა 57 000 აშშ დოლარად გაყიდა. 

მოკლედ, კუხიანიძე, როგორც კახეთში იტყვიან, კარგ ბაგაზეა დაბმული და არც უკანონო ბორდერიზაცია ადარდებს და არც ის, რომ ქართველი ექიმი, ვაჟა გაფრინდაშვილი, რომელიც სამოქალაქო გმირობის მაგალითია, თვეზე მეტია, ოკუპირებული რეჟიმის ტყვეობაშია. 

კუხიანიძეს არც ის გაუპროტესტებია, რომ რუსმა ოკუპანტებმა, თავის დროზე, ტატუნაშვილი მოგვიკლეს და ამ ბატონს ხმა არც ოთხოზორიას მკვლელობის დროს ამოუღია. ესე იგი, გამოდის, რომ კუხიანიძე წმინდა წყლის რუსეთუმეა? გვინდა, თუ არა, ფაქტები სწორედ ამაზე მიანიშნებენ, არადა, ქვეყანაში, სადაც ოკუპაციის კანონი მოქმედებს, კუხიანიძეების მსგავსი ადამიანები საჯარო სამსახურებში კი არ უნდა იყვნენ დასაქმებულნი, არამედ, საკუთარი ანტიქართული პოზიციის გამო, პასუხს უნდა აგებდნენ, მაგრამ ასე რომ არ ხდება, ალბათ, სწორედ ესეცაა ერთ-ერთი მიზეზი, რომ ბოლო წლებში, ოკუპანტმა რუსეთმა ე.წ. მცოცავი ოკუაპცია დაიწყო. 

ისე, ჩვენთვის რომ ვთქვათ, რა არის ამ უკანონო ბორდერიზაციის მიზეზი? _ ადამიანი, რომელიც გეოპოლიტიკურ თამაშებში ზედმიწევნით კარგად ერკვევა, „ვერსიას“ ეუბნება, რომ კრემლის მთავარი სამიზნე სამაჩაბლო კი არა, არამედ, აფხაზეთი და, ზოგადად, ენგურის მიმდებარე ტერიტორიაა. 

„რუსეთისთვის ე.წ. ცხინვალის რეგიონი სტრატეგიულად მნიშნელოვანი არასოდეს იყო, თუმცა თუ ბოლო წლების მოვლენებს გავიხსენებთ, შეგვიძლია ვთქვათ, რომ პროვოკაციებს ყოველთვის აქედან იწყებდა ანუ გასული საუკუნის 90-იან წლებშიც, ჯერ შიდა ქართლში დაიწყო არეულობა, რასაც აფხაზეთის ომი მოჰყვა. 

შეიძლება, ვცდები, მაგრამ ახლაც ასე მოხდება ანუ ის უკანონო ბორდერიზაცია, რასაც ოკუპანტები, ოკუპირებული ცხინვალის მიმდებარედ ანხორციელებენ, ერთგვარი რეპეტიციაა. მთავარი სპექტაკლი კი აფხაზეთში გათამაშდება'', _ გვეუბნება კონფიდენციალური წყარო, რომელიც გარკვეული მიზეზების გამო, ვინაობის გამხელისგან თავს იკავებს.

მისივე ვერსიით, არსებობს იმის ალბათობა, რომ მომავალ წელს, ოკუპანტებმა იგივე ბორდერიზაცია ენგურის ხიდის გასწვრივ დაიწყონ, რის შედეგადაც, წალენჯიხის ათეულზე მეტი ქართული სოფელი ე.წ. საზღვრის მიღმა აღმოჩნდება და, დიდი ალბათობით, მოვლენები გალის სცენარით განვითარდება. 

რას ნიშნავს „გალის სცენარი“? _ როგორც ცნობილია, გალის რაიონის ოკუპაცია რუსეთმა არა აფახაზეთის ომის დროს, არამედ, მოგვიანებით მოახდინა. „გალის სცენარში“ უკეთ გარკვევის მიზნით, გთავაზობთ ამონარიდს სტატიიდან, რომელიც ერთ-ერთ ქართულ ბეჭდვურ მედიაში, რამდენიმე წლის წინ გამოქვეყნდა: 

 

„1995 წელს, არძინბას ხელისუფლებამ, რომელიც ფიქრობდა, რომ გალის რაიონში „ცოცხალი ბუფერის“ არსებობა, საჭიროების შემთხვევაში, ხელსაც აძლევდა, გალის ე.წ. ქვედა ზონის ქართველ მოსახლეობას უფლება მისცა, სახლებში დაბრუნებულიყო. 1998 წლის გაზაფხულისთვის, გალის რაიონში ქართველი მოსახლეობის რაოდენობა 60 000 კაცს შეადგენდა, 32 ქართულ სკოლაში 4 500 ბავშვი სწავლობდა. გააქტიურებული პარტიზანული მოძრაობის გამო, გალის ე.წ. ქვედა ზონას აფხაზები, ფაქტობრივად, ვეღარ აკონტროლებდნენ, ამიტომ ქვედა ზონის სოფლებში, ქართველი პოლიტიკოსების სტუმრობა ჩვეულებრივ მოვლენად იქცა. დროდადრო, საქართველოს დროშების გალის ქართული სოფლების თავზე აფრიალება, აღარც აფხაზებს უკვირდათ, თუმცა აფხაზური მილიცია რატომღაც ურჩების დასჯაზე არ ფიქრობდა და დროშებს მშვიდად ხსნიდა. საქმე იქამდე მივიდა, რომ ქართულმა მხარემ, 9 მაისს, ფაშიზმზე გამარჯვების ღონისძიების გამართვა სოფელ ფიჩორში გადაწყვიტა. სპეციალურად მომზადდა აფხაზეთის უზენაესი საბჭოს თავმჯდომარე თამაზ ნადარეიშვილის მიმართვა გალის ქართველი მოსახლეობისადმი, სადაც არძინბას რეჟიმი ფაშიზმთან იყო შედარებული და ერთგვარი მოწოდებაც იყო ბრძოლისკენ. ღონისძიებაზე სტუმრებისა და მოსახლეობის უსაფრთხოების გარანტი ფიჩორსა და ოტობაიაში განლაგებული პარტიზანული რაზმები უნდა ყოფილიყვნენ. 

1998 წლის 9 მაისს, ფიჩორში გამართულ მარულას, აფხაზეთის მთავრობის წევრები და დეპუტატებიც ესწრებოდნენ, საღამოს კი მთელი საქართველო, ერი თუ ბერი, სიხარულს ვერ მალავდა, მალე გალი ისევ ჩვენი იქნებაო და… აზრადაც არავის მოსდიოდა, რომ ფიჩორში აღმართული ქართული დროშა, საქართველოს უახლოეს ისტორიაში, ყველაზე სისხლიანი პროვოკაციის დასაწყისი გახდებოდა. 

თენგო, ყოფილი პარტიზანი: „_ 10 მაისს, ოტობაიაში შეგვატყობინეს, რომ ვიღაცებს ჩვენი ნახვა უნდოდათ. დათქმულ დროს მივედით ერთი ნაცნობის სახლში. სტუმრები გვიან მოვიდნენ, აფხაზები ყველგან არიან, დაბნელებას ველოდებოდითო, მოიბოდიშეს და თავი უშიშროების თანამშრომლებად გაგვაცნეს. ხელისუფლება გალის რაიონში შესვლას გეგმავს, ყველაფერი კარგად გათვლილი და დაგეგმილია, ჩვენ მხოლოდ დავიწყოთო. თავიდან ვერ გავიგე, რას გულისხმობდნენ დაწყებაში, მერე რომ თქვეს, პარტიზანებმა უნდა დაიწყოთ და ჩვენ წამოგეშველებითო, სიცილი ძლივს შევიკავეთ. რისი დამწყები ვიყავით 15 კაცი?! თქვენ რომ დაიწყებთ, გალის რაიონში არსებული ყველა პარტიზანული დაჯგუფება აგყვებათ, შემდეგ მოსახლეობა და უკვე ხელისუფლებას ხელ-ფეხი ექნება გახსნილი ჯარის შემოსაყვანადო, დაგვამშვიდეს. ყურებს არ ვუჯერებდით, ხუმრობა ხომ არ იყო, გალს ავიღებდით. ვიღაცამ იკითხა, მერე, რუსებიო? მათთან ყველაფერი შეთანხმებულიაო, გენერალ კორობკოს (რუსი სამშვიდობო ძალების სარდალი) ფულს ვუხდითო, თუმცა არ უთქვამთ, რამდენს, ეს იმ დროს არც არავის აინტერესებდა''. 

1998 წლის 18 მაისისთვის, პარტიზანული დაჯგუფებები თავისუფლად მოქმედებდნენ გალის ე.წ. არხის მარცხენა სანაპიროზე, სოფლებში _ პრიმორსკში, ფიჩორში, ზემო ბარღებში, სიდაში, ხუმუშკურში, პარტიზანული მოძრაობა აკონტროლებდა გალის რამდენიმე გადმოსასვლელსაც. გალის რაიონში იყო ყველა პარტიზანული დაჯგუფება: „ტყის ძმები“, „თეთრი ლეგიონი“, „სამურაი“ და ა.შ. ქართული მხარე გალში შესასვლელად საბაბს ელოდა, ასეთი კი 19 მაისს, სოფელი სიდა აღმოჩნდა: შუადღისას, ცნობილი გახდა, რომ სიდაში პარტიზანებსა და აფხაზებს შორის შეიარაღებული დაპირისპირება მოხდა, მიზეზი ორი ქართველი პარტიზანის მკვლელობა იყო. აფხაზებმა თავი სკოლას შეაფარეს, პარტიზანებს ისინი ალყაში ჰყავდათ. მიუხედავად იმისა, რომ სიდაში სიტუაციას პარტიზანები აკონტროლებდნენ, მდგომარეობა, ნებისმიერ წუთს, შეიძლებოდა გართულებულიყო. ალყაში მოქცეულები დახმარებას ელოდნენ. სანამ ქართული მხარე ზუგდიდში განთავსებულ 5 შტაბში საგანგებოდ თათბირობდა, საღამოს სიტუაცია დაიძაბა, სიდაში აფხაზი მეომრებით სავსე ორი ავტობუსი შევიდა და ახლა პარტიზანები მოექცნენ ალყაში. დაძაბულობა რუსმა სამშვიდობოებმა განმუხტეს და დაპირისპირებულ მხარეებს, სოფელი იმჯერად უსისხლოდ დაატოვებინეს. სოხუმს სიდას ინციდენტი ცუდად ენიშნა. 

„არ არის გამორიცხული, პარტიზანებმა, თუ როგორც ეძახიან, დივერსიული აქტები მოაწყონ აფხაზეთის ტერიტორიაზე. მდინარე კოდორის ხიდი თუ ააფეთქეს, ჩვენ ვერ შევძლებთ ჯარების გადასროლას გალის ტერიტორიაზე. ყოველ შემთხვევაში, შეიძლება რამდენიმე დღე დაგვაგვიანდეს, მერე კი იძულებული გავხდებით, თავდაცვის ზღუდე უკვე კელასურთან გავავლოთ'', _ არძინბა ყურადღებით მისმენდა. ,,ამას ვერ დავუშვებთ!'', _ წამოიყვირა უცებ, _ სასწრაფოდ სადამსჯელო ოპერაცია უნდა დავიწყოთ''. ,,ეს რას მოგვცემს?'' _ ვკითხე მე. 

„ძალიან ბევრს, პარტიზანები დაკარგავენ ერთგულ მოკავშირეს''. „რომელ მოკავშირეს, რუსებს?“ 

ამაზე არძინბას გაეცინა: „არა, ადგილობრივ მოსახლეობას'', _ იხსენებდა ვალერი წკუია, რომელსაც 1998 წელს, აფხაზეთის ე.წ. შს მინისტრის მოადგილის პოსტი ეკავა. 

1998 წლის 20 მაისს, სოფელ ზემო ბარღებთან გამაგრებული მცირერიცხოვანი პარტიზანული დაჯგუფება, კბილებამდე შეიარაღებული 400-კაციანი აფხაზური დაჯგუფების (ყაბარდოელები, რუსები და ბაგრამიანის ბატალიონი) პირისპირ აღმოჩნდა. როცა პარტიზანებმა მოსახლეობას სოფლის დატოვება შესთავაზეს, მამაკაცებმა უარი თქვეს, შედეგად, სოფელ ზემო ბარღებთან, აფხაზებმა დიდი მსხვერპლის ფასად, პირველი დამარცხება იწვნიეს.… იმავე საღამოს, სოფელ თაგილონში, ქართულმა მხარემ დემონსტრაციულად თათბირი ჩაატარა, სადაც გენერალმა ყურაშვილმა, პრეზიდენტ შევარდნაძეს ტელეფონით ცნობილი სიტყვები უთხრა: ,,გაეცით ბრძანება და ორ საათში გალს ავიღებ''. იქმნებოდა განცდა, რომ გალი უკვე ჩვენი იყო, თუმცა ზეიმი ნაადრევი გამოდგა. ორი საათის შემდეგ, ზუგდიდს დევნილების პირველი ნაკადი მიაწყდა. 

მურმან ჭედია, გალის გამგებელი 1998 წელს: „_ როდესაც გუბერნატორთან თათბირი დამთავრდა და გარეთ გამოვედი, ზუგდიდის მოედანზე უამრავ ხალხს მოეყარა თავი და ეს ავად მენიშნა. 

,,სად არიან თქვენი მინისტრები, აფხაზებს რომ შეგვატოვეთ ხელში!“ _ ყვიროდა ხალხი. 

გადაწყდა, გაგვეღო ყველა საბავშვო ბაღისა, თუ სკოლის კარი და დევნილები დაგვებინავებინა. მძიმე სიტუაცია იყო. მეორე დღეს, როცა წალენჯიხიდან ჩამოვედი, ზუგდიდის მოედანზე ხალხი სიხარულს ვერ მალავდა, ზუგდიდში ქართული ტანკები შემოვიდნენ, მალე სახლებში დავბრუნდებითო. ხალხი უარს ამბობდა სკოლებში დაბინავებაზე და ზუგდიდში, ჯართან ერთად ჩამოსულ დათო თევზაძეს, როგორც მხსნელს, ისე უყურებდა.“ 

ქართული არმია გალში ვერ შევიდა, რადგან ეს, ფაქტობრივად, ომის გამოცხადების ტოლფასი იქნებოდა. თავდაცვის მინისტრი, პრეზიდენტის დავალებით, გენერალ კორობკოსთან მოლაპარაკებას ცდილობდა, რათა ომი შეწყვეტილიყო. დახმარების გარეშე დარჩენილი პარტიზანული ჯგუფები კი, რაღაც მანქანებით, მაინც ახერხებდნენ პოზიციების შენარჩუნებას. 

თენგო: „_ 24 მაისს, ხუმუშკურში ვიყავით. ფაქტობრივად, გალში ომი იყო, ჩვენ კი ჯარისკაცები არ ვიყავით, ომის არაფერი ვიცოდით, არც კავშირი გვქონდა, არც დახმარება, მხოლოდ რამდენიმე ყუთი ტყვია მოგვიტანეს. როდესაც აფხაზების მორიგი შეტევა დაიწყო, ვიცოდით, ვერ გავუძლებდით, მაგრამ ვცდილობდით, ვმდგარიყავით, რათა მოსახლეობას მისცემოდა საშუალება, სოფელი დაეტოვებინა. ბოლოს, ტყვია-წამალიც გვითავდებოდა, ბიჭი გავგზავნეთ, გამოგზავნილი ყუთები რომ მოეტანა, რომ დააგვიანდა, გული შემიწუხდა, ხომ არ მოკლეს-მეთქი და მივვარდი, ის კი იჯდა და ტიროდა. ყუთებში რომ ჩავიხედე, ტყვია-წამლის მაგივრად, ლურსმნებით იყო სავსე... უკან დავიხიეთ''. 

24 მაისს, შუადღისას, პარტიზანები ნაბაკევის, თაგილონისა და ოტობაიის ტერიტორიაზე განლაგდნენ. აფხაზების ცეცხლს გამოქცეულ მოსახლეობას, წინ ახალი განსაცდელი ელოდა _ ხურჩის ხიდი ხის იყო და შესაძლოა, ამხელა დატვირთვისთვის ვერ გაეძლო, ჩანგრეულიყო. მოსახლეობა ენგურზე გადმოსვლას ვერ მოახერხებდა. საღამოს აფხაზებმა პრიმორსკში, ზღვიდან, „გრადებით“ ცეცხლი გახსნეს, პარალელურად, დაიწყო ენგურზე გადმოსასვლელი ყველა ხიდის დაბომბვა. ხურჩის ხიდზე უკვე მსხვერპლი იყო. გენერალი კორობკო მოლაპარაკებას აჭიანურებდა. ამასობაში გადაწყდა, რადგან ქართული შეიარაღებული ნაწილები ვერ შევიდოდნენ გალის რაიონში, სახმელეთო ჯარის ცალკეული ნაწილები (ტექნიკის გარეშე) გადაესროლათ პოზიციებზე პარტიზანების დასახმარებლად და მოსახლეობის უსაფრთხოდ გამოსაყვანად. ლოკალურ ბრძოლებში ჩართული იყვნენ შინაგანი ჯარის ნაწილებიც. სამწუხაროდ, ქართულმა მხარემ მაინც ვერ შეძლო დაკარგული პოზიციების დაკავება და თავდაცვის ზღუდე ე.წ. გალის ზემო ზონაში, სოფ. საბერიოში, დიხაზურგასა და ლეკუხონაში გაავლო. 25 მაისს, დევნილთა რაოდენობამ 40 000 კაცი შეადგინა. იმავე დღეს გადაწყდა, რომ 26 მაისს, 06.00 საათზე, ორივე მხარე დატოვებდა პოზიციებს და შუაში რუსი სამშვიდობოები ჩადგებოდნენ. ამასობაში, გამთენიისას, დიხაზურგა-საბერიოს ე.წ. გადასასვლელზე, ტყიბულის ბატალიონი უკანასკნელ ამოსუნთქვამდე ცდილობდა პოზიციის შენარჩუნებას. ექიმები დაღუპულებისა და დაჭრილების გამოყვანას ვერ აუდიოდნენ. 26 მაისს, დღისით, ომი შეწყდა, თუმცა აფხაზები გაჩერებას არ აპირებდნენ. დილის 10 საათიდან, აფხაზურმა მილიციამ და ქალთა ბატალიონმა ქვედა ზონის სოფლების გადაწვა დაიწყეს, პირუტყვს, რომლის წაყვანასაც ვერ ახერხებდნენ, ცოცხლად წვავდნენ. საღამოს 8 საათზე ცნობილი გახდა, რომ აფხაზები პოლკოვნიკ ვალდმერ ბუთბას მეთაურობით, ენგურჰესის ადმინისტრაციულ შენობას მიადგნენ. პარტიზანებმა ჰესის თანამშრომლები და 50-მდე ჯარისკაცი უსაფრთხო ბილიკებით სამშვიდობოს გაიყვანეს. აფხაზებს ეზოში დახვდათ ენგურჰესის დირექტორი, გიორგი მიქავა, რომელმაც უარი თქვა, გაჰყოლოდა თანამშრომლებს. არავინ იცის, როგორ დამთავრდებოდა ბუთბასა და მიქავას შეხვედრა, მოულოდნელად, გალის აფხაზური მხარის გამგებელი, რუსლან ქიშმარია და სამშვიდობოები რომ არ გამოჩენილიყვნენ სიტყვებით: „დამთავრდა ომობანა!“ 

1998 წლის 26 მაისს, საქართველოს დამოუკიდებლობის დღეს, საღამოს, აფხაზებმა გალის შესასვლელთან ტრაფარეტს მიაწერეს: 

„2:0, საქართველო მეორედ დამარცხდა“. 

მოკლედ, ღმერთმა არ ქნას, „გალის სცენარი“ კიდევ განმეორდეს, თორემ ეს ჩვენი ქვეყნისთვის დიდი დარტყმა იქნება. არადა, საქმეს ისეთი პირი უჩანს, რომ ოკუპანტი ქვეყანა მსგავსი რაღაცისთვის ემზადება. აბა, სხვას რას უნდა ემსახურებოდეს საქართველოს მოქალაქეების მოტაცებები, თუ მკვლელობები? ჰოდა, ამ ვითარებაში, როცა მშვიდობა მყიფეზე მყიფეა, ერეკლე კუხიანიძეები, როგორც იტყვიან, ცეცხლზე ნავთს ასხამენ და კრემლის ,,გაპრავებას'' ცდილობენ. პარლალელურად, მთელი ხელისუფლება „კუხიანიძეების“ დაცვას კბილებით ცდილობს. 

რატომ? _ აი, ეს არის კითხვა, რომელზეც პასუხი არ არსებობს!

ნინო დოლიძე

]]>
versiaprinti@yahoo.com (super admin) პოლიტიკა Wed, 18 Dec 2019 12:47:41 +0400
„იმის თქმა, რომ ფეხები მიკანკალებს და გამოძიების მეშინია, სასაცილოა!“ http://www.versia.ge/2013-07-31-11-22-32/item/6497-„იმის-თქმა,-რომ-ფეხები-მიკანკალებს-და-გამოძიების-მეშინია,-სასაცილოა-“.html http://www.versia.ge/2013-07-31-11-22-32/item/6497-„იმის-თქმა,-რომ-ფეხები-მიკანკალებს-და-გამოძიების-მეშინია,-სასაცილოა-“.html

პარლამენტში მოწყობილი „ფეკალიების ტერაქტში“ ეჭვმიტანილი, ლელა ქებურია ბრალდებას უარყოფს!

 

2019 წლის 12 დეკემბერი ისტორიაში, როგორც იტყვიან, დიდი ასოებით ჩაიწერა _ ამ დღეს, პარლამენტმა სასამართლოს უმაღლესი ინსტანციის უვადო მოსამართლეები დაამტკიცა. სამოქალაქო სექტორი, ოპოზიცია და საზოგადოების ნაწილი ამ გადაწყვეტილებას აპროტესტებს და აცხადებს, რომ უვადოდ გამწესებული მოსამართლეები ე.წ. კლანის წარმომადგენლები არიან და ყველა ხელისუფლების დავალებებს ასრულებენ. ისე, მოსამართლეთა დამტკიცება იმ დღეს უცნაურმა შემთხვევამ გადაფარა _ პლენარულ დარბაზში, ფეკალიების სუნის გამო, ევაკუაცია გამოცხადდა. მოგვიანებით გაირკვა, რომ ვიღაცამ დარბაზში, სავარაუდოდ, პრეპარატი „აცდ“ მოასხა, რის გამოც ძალიან მძიმე სუნი დადგა და ზოგ დეპუტატს, მაგალითად, ენძელა მაჭავარიანსა და სვეტლანა კუდბას ალერგიული შეტევა დაემართა. მოკლედ, მოსამართლეების დამტკიცება ვიღას ახსოვდა, პანიკამ მმართველი ძალის თითქმის ყველა დეპუტატი მოიცვა. „ოცნებამ“ ეს პერფორმანსი უმწვავესად შეაფასა. არჩილ თალაკვაძემ კი თქვა, რომ პარლამენტზე ქიმიური შეტევა განხორციელდა, თუმცა მოძრაობა „სირცხვილიამ“ განმარტა, პრეპარატი ჯანმრთელობისთვის საშიში არაა და მას მხოლოდ მძაფრი სუნი აქვსო. ასე იყო თუ ისე, „ფეკალიების ტერაქტში“, „ოცნებამ“ეჭვმიტანილად ევროპული საქართველოს დეპუტატები _ ლელა ქებურია და ირმა ნადირაშვილი გამოაცხადა და... საქმეზე გამოძიება ჯანმრთლების განზრახ მძიმე დაზიანების მცდელობის მუხლითაც დაიწყო. „ვერსია“ პერფორმანსში ერთ-ერთ ეჭვმიტანილს, დეპუტატ ლელა ქებურიას ესაუბრა.

_ ქალბატონო ლელა, პარლამენტში ის სითხე მართლა თქვენ მოასხით? 

_ „ქართული ოცნების“ მტკიცებულებების მიხედვით, სრულიად შესაძლებელი იყო, დაჩი ბერაიასაც მოესხა. ასე რომ, ამ ბრალდებას სერიოზულად კი არა, ცინიკურად ვუპასუხებ, რადგან არ მინდა, სერიოზული პასუხი გავცე. რაც შეეხება იმას, თუ ვინ შეასრულა ტექნიკურად ეს აქტი, რომელიც საზოგადოების უმრავლესობის გზავნილი იყო და ის სუნი, რომელიც იმ წუთას პარლამენტში დადგა, სიმბოლურად დიდი ხანია, ქვეყანაში დგას. ეს სუნი შეიძლება, ვიგრძნოთ პროკურატურაში, სასამართლოში, ეკონომიკის სამინისტროში და თითქმის ყველგან, სადაც „ოცნების“ უფლებამოსილება ვრცელდება. ასე რომ, ამ ალეგორიულ გამოხატვასა და პერფორმანსს, პოლიტიკურად აბსოლუტურად ვიზიარებ და, მეტსაც გეტყვით, პოლიტიკურად ვარ ყველაფერ ამის თანამონაწილე. რაც შეეხება სამართლებრივ ფაქტს, ამაზე მხოლოდ შესაბამისი მტკიცებულების წარმოდგენის შემდეგ ვისაუბროთ. 

_ როგორც ვიცით, გამოძიება დაიწყო ჯანმრთელობის განზრახ მძიმე დაზიანების მიყენების მცდელობის მუხლით... 

_ დიახ, სრული პანიკა და ისტერიკა იყო. ვინც ეს ტექნიკურად შეასრულა, მისთვის პრობლემას არ წარმოადგენდა, ეს საჯაროდ გაეკეთებინა, მაგრამ ამ პერფორმანსის შინაარსი სწორედ ის იყო, რომ ყველაფერ ამაშიც გამოჩენილიყო ცინიზმი და სარკაზმი. ვნახეთ სრული პანიკა, ხან ქიმიური შეტევა უწოდეს, ხან _ ბირთვული, ტერორისტულ აქტსაც შეადარეს ანუ ძალიან სამარცხვინო პანიკა ატყდა, მხოლოდ გაანალიზების შემდეგ მიხვდნენ ამ კომიკურობას და შემდეგ ცოტა უფრო დალაგებული განცხადებები გააკეთეს. ბევრჯერ გვინახავს, რომ გამოძიება იწყება და უსასრულოდ გრძელდება. რომელი მუხლითაც დაიწყო გამოძიება, ესეც ერთ-ერთი კომიკური ჟანრიდანაა, რადგან ეს პერფორმანსი აბსოლუტურად უწყინარი, დისკომფორტის შემქმნელი იყო, მაგრამ საზოგადოების გზავნილი სწორედ ისაა, რომ დისკომფორტი შეექმნას „ქართულ ოცნებას“ და ეს წითელი ხაზები თვითონ გადაკვეთა, როცა უკან წაიღო პროპორციული არჩევნები. დღეს ქვეყანაში შექმნილ პოლიტიკურ კლიმატზე პასუხისმგებელი „ქართული ოცნებაა“ და თვითონ გამოიწვია ის რადიკალიზმი, რომელიც საპროტესტო ელექტორატსა და ხელისუფლებას შორის მიმდინარეობს. ყველაფრის მიუხედავად, ხელისუფლებას არ აწუხებს, რომ მერამდენე თვეა, ახალგაზრდები ითხოვენ სამართლიანი არჩევანის უფლებას, რომელიც კონსტიტუციურად აქვს გარანტირებული ყველა მოქალაქეს. ეს უფლება წაართვა ივანიშვილმა თაღლითურად, დაცინვით და ამით გადაიკვეთა წითელი ხაზები. როგორც პოლიტიკოსს, მეჩვენება, რომ არასაფრთხის შემცველი კანონის ფარგლებში, პროტესტის გამოხატვის ნებისმიერი ფორმა ლოგიკური და მისაღებია. სამი თვის წინ, ვინმეს ჩემთვის რომ ეთქვა, ასეთი რამ პარლამენტში მოხდაო, შეიძლება, მეც აღვშფოთებულიყავი, მაგრამ დღეს პროტესტის გამოხატვის ნებისმიერი, თუნდაც ასეთი რადიკალური ფორმა ლოგიკურია. მათ არ აწუხებთ, რომ პოლიციის კორდონებით გადაადგილდებიან და მთელი პოლიცია გაწყდა წელში, რეგიონებიდან დაჰყავთ, რომ ჩაანაცვლონ. არც ის ადარდებთ, რომ „ზონდერი“ თანამდებობის პირები, წიხლებს ურტყამენ სახეში ახალგაზრდებს. იმ შემთხვევაში არ დაწყებულა გამოძიება ჯანმრთელობის განზრახ დაზიანებაზე, მგონი, დაკითხულიც არაა ის პირი, რომელიც იდენტიფიცირებადია და უწყინარ პერფორმანსზე ამბობენ, ჯანმრთელობის განზრახ დაზიანების მუხლით უნდა აღიძრას საქმეო. ძალიან მინდა, საზოგადოებამ იცოდეს, რომ არ მომწონს, როცა ქილიკობენ ადამიანებზე, რომლებიც, ერთი შეხედვით, ცუდად გახდნენ ამ შემთხვევის შედეგად. ნამდვილად არ მინდა, ვიღაც დავადანაშაულო სიმულაციაში. თუ ვინმეს მიმართ შეიძლება სიმპათია მქონდეს „ოცნებაში“, ეს ენძელა მაჭავარიანია. ვერ დავაბრალებ, რომ ბოროტია და რაღაცის გაფუჭება შეუძლია. მორჩილი, უმრავლესობის ტიპური წარმომადგენელია დადებითი ადამიანური თვისებებით. მესმის, ამ პანიკის დროს, შეიძლება, ვინმეს შიშის გამო ჰქონდა შეტევა, ენძელა ამბობს, სუნზე მაქვს ალერგიაო, თუმცა პრეპარატის ანოტაციას გავეცანი და წერია, რომ შესაძლებელია, ალერგიული შემთხვევები გამოწვეული იყოს პირდაპირი კავშირის შედეგად. არადა, არც ერთ დეპუტატთან პირდაპირი შეხება არ ყოფილა. 

_ მოკლედ, არც აღიარებთ, რომ ეს თქვენ ჩაიდინეთ და არც გამოძიების გეშინიათ, არა? 

_ „შიში ვერ იხსნის სიკვდილსა“ (იცინის)... „ქართული ოცნებისგან“ გამოძიების დაწყება არ მიკვირს, გიორგი ვაშაძე ზებრა-გადასასვლელზე გადასვლის გამო დააკავეს. გიგი უგულავას საქმეც ცინიზმითაა სავსე _ როცა თავს გესხმიან და აღმოჩნდება, რომ შენ ხარ მოძალადე და ამის გამო, შეიძლება, პასპორტი ჩამოგართვან... ასეთი სასაცილო და აბსურდული ამბები ხდება ჩვენს ქვეყანაში. იმის თქმა, ფეხები მიკანკალებს და ძალიან მეშინია ამ გამოძიების-მეთქი, უბრალოდ, სასაცილოა, რადგან ამას სჭირდება შესაბამისი მტკიცებულებები. 

_ ამ პერფორმანსის მიზეზი უვადო მოსამართლეთა დამტკიცება გახდა, თუ ეს პროპორციული არჩევნების ჩაგდების ერთგვარი გამოძახილი იყო? 

_ „ოცნების“ დაპირება ხელისუფლებაში მოსვლის დროს ის იყო, რომ ქვეყანას უნდა ჰქონოდა პროპორციული არჩევანი და ისიც, რომ სასამართლოში არსებული მძიმე ვითარება გამოსწორებულიყო. წინა ხელისუფლების ძალიან დიდი ჩავარდნა ის იყო, რომ ადამიანის უფლებებისა და სასამართლოს დამოუკიდებლობის თვალსაზრისით, სასამართლოში ძალიან მძიმე მდგომარეობა სუფევდა. ახლა კი, უვადოდ აირჩიეს მოსამართლეები, რომლებიც არაკომპეტენტურები არიან. მათი 99%, კეთილსინდისიერებისა და დამოუკიდებლობის თვალსაზრისით, მინიმალურ სტანდარტსაც ვერ აკმაყოფილებს და მივიღეთ მოსამართლეები, რომლებიც კრებსითი „მურუსიძე და ჩინჩალაძე“ არიან. მივიღეთ უდიპლომო და უცოდინარი მოსამართლეები, რომლებიც ბიძინა ივანიშვილის დავალებების შემსრულებლები არიან. ივანიშვილი ხვალ და ზეგ ხელისუფლებაში არ იქნება, მაგრამ ისინი ნებისმიერი ხელისუფლების დავალებებს შეასრულებენ და ესაა ყველაზე მთავარი პრობლემა. 

_ ქალბატონო ლელა, მიუხედავად იმისა, რომ ნაციონალურ მოძრაობაში 2014 წელს შეხვედით, ფაქტია: ეს სასამართლო სისტემა, სწორედ წინა ხელისუფლების დროს შეიქმნა და ამიტომ ზოგი ამბობს, ამორალური და უსამართლოა, როცა ნაცმოძრაობა და მისი განაყარი პარტია კლანის არსებობას აპროტესტებსო. 

_ ეს მანკიერი სისტემა მაშინ კი არა, გაცილებით ადრე შეიქმნა და ეს საბჭოთა მემკვიდრეობის პირმშოა. რაც შეეხება იმას, ცვლილებებზე საუბრის უფლება ვის აქვს და ვის არა, ეს „ქართული ოცნების“ მიერ დაწესებული სტანდარტია. სინამდვილეში, სწორედ წინა ხელისუფლებამ იწვნია საკუთარ თავზე ყველაზე მეტად, თუ რას ნიშნავს მართული სასამართლო სისტემა. ჩვენს პოლიტიკურ გუნდს აქვს კონკრეტული ხედვა, როგორ უნდა გაჯანსაღდეს სასამართლო სისტემა. 

_მაინც არ მიპასუხეთ, რატომ უნდა გენდონ ადამიანები სიტყვაზე, როცა ხელისუფლებაში ყოფნისას, ამ პრობლემის მოსაგვარებლად, მინიმუმ, არაფერი გააკეთეთ? 

_ ამა თუ იმ პოლიტიკურ ძალას ენდობა, თუ არა, ეს უნდა გადაწყვიტოს საზოგადოებამ და ეს ჩვენს მარიფათზეცაა დამოკიდებული, რამდენად დავარწმუნებთ, ვართ სანდო, თუ არა. სწორედ ისაა ჩვენი აღშფოთების საგანი, რომ ივანიშვილმა საზოგადოების დარწმუნებისა და სამართლიანი თამაშის წესების უფლება წაგვართვა. სწორედ ამან გამოიწვია ის რადიკალზიაცია, რაც ქვეყანაშია. „ოცნების“ დეპუტატები ნიშნის მოგებით ამბობენ, რატომ გეშინიათ, „ქართულმა ოცნებამ“ 2012 წელს, სწორედ ამ სისტემით მოიგო არჩევნებიო, სიმართლე გითხრათ, არ მეგულება საარჩევნო სისტემა, რომელიც „ქართულ ოცნებას“ არჩევნებში გამარჯვების შესაძლებლობას მისცემს, მაგრამ საქართველოს გამოცდილებამ აჩვენა, რომ ეს მოდელი საშუალებას აძლევს გამარჯვებულს, ჰქონდეს შეუზღუდავი ძალაუფლება. თქვენ წინა ხელისუფლების შეცდომებზე საუბრობთ და გვახსოვს, როგორც დაამთავრა წინა ხელისუფლებამ ანუ საუბარი კონკრეტულად ბიძინა ივანიშვილის დამარცხებაზე კი არა, იმაზეა, რომ მისი დამარცხების შემდეგაც უნდა გავაგრძელოთ ცხოვრება. ამიტომ, ისევ მორიგი „მონსტრით“ ჩანაცვლდება ეს ხელისუფლება, რომელიც ისევ შემოიკრებს ძალაუფლებას და ხალხის სურვილების იგნორირებას მოახდენს. 

_ ხალხი ოპოზიციასაც საყვედურობს, რადგან პარტიებმა ვერ შეძლეს პროტესტის მასშტაბურობაში გადაზრდა. ამასთან, ოპოზიციის არაერთი სახე აღიზიანებთ ადამიანებს ანუ ოპოზიციას ხალხის სათანადო მხარდაჭერა აქვს? 

_ კიდევ ერთი სასაცილო ამბავი დაამკვიდრა „ოცნებამ“, რომ აქციებზე თავებს ითვლის და ამის მიხედვით აფასებს... 

_ ისე, ირაკლი კობახიძე ხშირად იყენებს ტერმინს _ „200 ნაცი“... 

_ დიახ, ასეა. „ქართულ ოცნებას“ აქვს არჩევნების მოგების ერთადერთი ხერხი, რომ როგორმე, საზოგადოება ორ ნაწილად _ „ნაცებად“ და „ქოცებად“ გაყოს. რატომღაც ჰგონია, რომ თვითონ უპირატეს მდგომარეობაშია და ყოველთვის მოიგებს არჩევნებს, მაგრამ ეს მეთოდიც აღარ იმუშავებს, რადგან „ქართული ოცნება“ არის სრულიად მარტო და მეორე მხარესაა მთელი პოლიტიკური სპექტრი. კრიტიკულ მომენტებში საზოგადოებას, ოპოზიციას, სამოქალაქო სექტორს გვაქვს უჩვეულო უნარი გაერთიანებისა, რათა ერთობლივი ძალებით გადარჩეს ქვეყანა, ამიტომ თავების დათვლა სასაცილოა. 

რაც შეეხება იმას, რომ წინა ხელისუფლების „გაცვეთილი“ სახეები აღიზიანებს ხალხს, ესეც „ოცნების“ პიარის ნაწილია და ყველაფერი ეს, საზოგადოებრივი აზრის შესაქმნელად კეთდება, რომ საზოგადოებაში კონკრეტული პოლიტიკური ლიდერების მიმართ, თითქოს სიძულვილია, მაგრამ არც ეს უშველის „ოცნებას“. ამას წინათ, „საერთაშორისო გამჭვირვალობამ“ კვლევა ჩაატარა, სადაც ჩანს, რომ მილიონებითაა გაზრდილი პიარ-სამსახურების დაფინანსება და ეს ფული იხარჯება Fაცებოოკ-„ტროლებისა“ და „ბოტების“ აქტიურობაში ანუ ცხოვრობენ შემოსაზღვრულ წრეში, შეგრძნებები დაჩლუნგებული აქვთ, არ აინტერესებთ, რას ფიქრობს საზოგადოება. მოცემულობა კი ასეთია _ ქვეყანაში არც ერთი პოლიტიკური პარტია არ ენდობა, სამოქალაქო სექტორი უფრო და უფრო კრიტიკული ხდება, არ ენდობა პოლიტიკური სიმპატიებისგან დაცლილი საზოგადოებაც. „ქართული ოცნების“ რღვევა მიდის ყოველ დღე _ „ოცნებას“ დეპუტატები ტოვებენ. რაც შეეხება ქვეყნის გარეთ არსებულ დამოკიდებულებას, ხედავთ, რომ კრიტიკა ყოველდღე მძაფრდება. სასამართლოსთან დაკავშირებით, აშშ-ს დეპარტამენტმა შემაშფოთებელი განცხადება გააკეთა. 

_ ანუ, შესაძლოა, რომ უმრავლესობა დაიშალოს და რიგგარეშე არჩევნები ჩატარდეს? 

_ როგორც ჩანს, ეს მოლოდინი თავადაც აქვთ და თავის დაზღვევის მცდელობა იყო „ოცნების“ ბოლო ბრიფინგი. არაფერს გამოვრიცხავ, როცა კრიზისი შეექმნება, რა სიგიჟეზე წავა ივანიშვილი. 7 წელია, ვცდილობ, ჩავწვდე „ოცნების“ ლოგიკას და ვერასდროს „გავარტყი“. ყოველთვის ისეთ სიგიჟეს მოიფიქრებს ხოლმე, რაც ჩემს ფანტაზიას აღემატება.

თათია გოჩაძე

]]>
versiaprinti@yahoo.com (super admin) პოლიტიკა Wed, 18 Dec 2019 12:47:35 +0400
ექიმი ვაჟა ერთიანი ქართული სახელმწიფოს ღირსება და სინდისია http://www.versia.ge/2013-07-31-11-22-32/item/6492-გამარჯვებული-საქართველოს-ერთ-ერთი-ლიდერი-ანა-რეხვიაშვილი-ოფიციალური-ვიზიტით-კიევში-გაემგზავრა.html http://www.versia.ge/2013-07-31-11-22-32/item/6492-გამარჯვებული-საქართველოს-ერთ-ერთი-ლიდერი-ანა-რეხვიაშვილი-ოფიციალური-ვიზიტით-კიევში-გაემგზავრა.html

გამარჯვებული საქართველოს ერთ-ერთი ლიდერი,  გაეროში უკრაინის, საქართველოს და პოლონეთის ერთობლივი დელეგაციის წევრი, ანა რეხვიაშვილი კიევიდან განცხადებას ავრცელებს რომელსაც სრულად გთავაზობთ:

 სრულიად დამთრგუნველი იყო  ჩემთვის და ყველა  ჩვენთაგანისათვის, როდესაც სიცრუის ფაბრიკის და  ბოტების შემდეგ,   ექიმ ვაჟა გაფრინდაშვილის წინააღმდეგ ოცბების ხელისუფლების ოფიციალური წარმომადგენლები ჩაერთნენ.  ეს ხომ ხელისუფლების გამიზნული და შორსმიმავალი  ბრძოლაა სამშობლოსათვის თავდადების და თავგანწირვის წინააღმდეგ

ექიმი ვაჟა ერთიანი ქართული სახელმწიფოს ღირსება და სინდისია , ასე ჩავწერთ ჩვენ  უკრაინის, საქართველოს და პოლონეთის ერთობლივი დელეგაციის წევრები ჩვენს ერთობლივ განცხადებაში. რომელიც  მიმართულია გაეროს გენერალური მდივნის, გაეროს წევრი სახელმწიფოების მეთაურების და მსოფლიო საზოგადოებისადმი.  

- ჩვენ, უკრაინისა და საქართველოს ქალები-სამოქალაქო  და პოლიტიკრი ლიდერები, რომლებიც ამ წუთებშიც კი,   გაძლიერებული გეოპოლიტიკური აგრესიის ზონებში ვცხოვრობთ და ვსაქმიანობთ;

- როდესაც ჩვენი ხალხები ცხოვრობენ პოსტ ომის ტრავმულ და სტრესულ რეალობაში;

- როდესაც  ჩემი თანამემამულე, უკვე მთელს მსოფლიოში გახმაურებული ექიმი და ჰუმანისტი  ვაჟა გაფრიდანშვილი  რამდენიმე  დღის წინ , კვლავ პატიმრობაში დატოვეს ცხინვალის ( სამხრეთ ოსეთი) ციხეში,  მხოლოდ იმიტომ, რომ  მან შეასრულა ექიმის მოვალეობა,  დახმარება გაუწია პაციენტს დროებით ოკუპირებულ ტერიტორიაზე და საზღვრის უკანონო კვეთის ბრალდებით დააპატიმრეს    და ამ დღეებშიც,   ღირსეულმა ექიმმა და საქართველოს მოქალაქემ იგივე გაუმეორა  საოკუპაციო რეჟიმის სასამართლოს, როდესაც   განაცხადა, რომ  მან, თავის  სამშობლოში - საქართველოში შეასრულა ექიმის   მოვალეობა და საოკუპაციო რეჟიმის მიერ დაწესებულ არც ერთ სხვა საზღვარს არ აღიარებს;

- როდესაც უკრაინელი ხალხი ვერ ეგუება და არასოდეს შეეგუება უკრაინის დაშლას ოკუპირებულ და ბუფერულ ზონებად და რამდენიმე დღის წინ, უკრაინის მოსახლეობის უდიდესი უმრავლესობის მანდატით აღჭურვილმა პრეზიდენტმა ზელენსკიმ სრულიად მკაფიოდ  უთხრა ნორმანდიული ფორმატის   მოლაპარაკების ყველა მხარეს, რომ ის არსოდეს წავა დათმობაზე უკრაინის საზიანოდ  და ყველგან და ყოველთვის მოლაპარაკება რუსეთთან წარიმართება  მხოლოდ ერთიანი უკრაინის ფარგლებში.

 ჩვენ ამ  და სხვა  ძლიერი გზვნილებით  მივმართავთ  გაეროს გენერალურ მდივანს და მსოფლიო საზოგადოებას და გაეროს მაღალი ტრიბუნიდან  64-ე სესიაზე, რომელიც უახლოეს მომავალში გაიმართბა გაეროს შტაბ-ბინაში.

 ჩვენ ვართ  ძლიერი ქალების თაობა

ჩვენ ვართ  ძლიერი ქალების თაობა და  არავითარი უფლება არა გვაქვს  შევეგუოთ და გულგრილად  ვუყუროთ იმ რეალობას, რომელშიც ვცხოვრობთ.

- დღეს , ჩვენ კიევიდან ვეუბნებით საერთაშორისო საზოგადოებას, რომ არ არის ადვილი დრო ყველასთვის.

- დღეს, როდესაც ყოველდღე უფრო და უფრო მეტი ადამიანი ეძებს კრიზისების მოგვარების გზებს, როდესაც ყოველდღე უფრო და უფრო მეტი ადამიანი შფოთვით ფიქრობს  შვილებზე და მომავალზე,  ჩვენ, განსაკუთრებით ქალებს გვესმის კარგად  ჩვენი მისია. ჩვენი  პასუხისმგებლობა და საჭიროება, რათა  აქტიური მონაწილეობა  მივიღოთ ჩვენი ქვეყნების და საერთაშორისო  გადაწყვეტილებებში,უმნიშვნელოვანესი  სასიკეთო  ცვლილებებისათვის.

ამიტომაც , მივიღეთ ეს გადაწყვეტილებები,  ამიტომაც შევქმენით ერთანი დელეგაცია გაეროში და ვეუბნებით მსოფლიოს, რომ  ჩვენ ძლიერი ქალების თაობამ, უკრაინის,  საქართველოს და  პოლონეთის და რეგიონის სხვა ქვეყნების ქალებმა, სამოქალაქო და პოლიტიკურმა ლიდერებმა, შევქმენით  მშვიდობის და განვითარების,  ნდობის და პარტნიორობის, ღირსების, დამოუკიდებლობის და თავისუფლების  სარტყელი.

ბარბარობას გილოცავთ ყველას!

                                                                  

 

]]>
versiaprinti@yahoo.com (super admin) პოლიტიკა Tue, 17 Dec 2019 11:30:48 +0400
გამარჯვებული საქართველოს ერთ-ერთი ლიდერი ანა რეხვიაშვილი ოფიციალური ვიზიტით კიევში გაემგზავრა http://www.versia.ge/2013-07-31-11-22-32/item/6491-გამარჯვებული-საქართველოს-ერთ-ერთი-ლიდერი-ანა-რეხვიაშვილი-ოფიციალური-ვიზიტით-კიევში-გაემგზავრა.html http://www.versia.ge/2013-07-31-11-22-32/item/6491-გამარჯვებული-საქართველოს-ერთ-ერთი-ლიდერი-ანა-რეხვიაშვილი-ოფიციალური-ვიზიტით-კიევში-გაემგზავრა.html

 საერთაშორისო  გეოპოლიტიკური პლატფორმის, უკრაინის, საქართველოს და პოლონეთის სამოქალაქო და პოლიტიკურ ლიდერ ქალთა გეოპოლიტიკური ალიანსის მიწვევით გამარჯვებული საქართველოს ერთ-ერთი ლიდერი ანა რეხვიაშვილი  ოფიციალური ვიზიტით კიევში გაემგზავრა.

16 დეკემბერს, 15:00 კიევში, უკრაინის ახალი ამბების სააგენტოში  გაიმართება  ალიანსის ერთობლივი პრესკონფერენცია, რომელსაც Ukrinform პირდაპირი ეთერით გადასცემს.

ანა რეხვიაშვილი, კიევში გამართულ  პრესკონფერენციაზე, უკრაინული და საერთაშორისო მედიის წინაშე წარსდგება, როგორც  საერთაშორისო ევროპული ორგანიზაციის _EUGS- International Development and Leadership Network პრეზიდენტი, რომელიც გეოპოლიტიკური ალიანსის გადაწყვეტილებით გახდა   გაეროში უკრაინის, საქართველოს და პოლონეთის ლიდერ ქალთა  ერთობლივი დელაგაციის წევრი.

კიდევ ერთი მნიშვნელოვანი ამბავი, რაც დღეს კიევში გამართულ პრესკონფერენციაზე გაჟღერდება არის ის, რომ გაეროში უკრაინის, საქართველოს და პოლონეთის ლიდერ ქალთა  ერთობლივი დელაგაცია, უკრაინული და საერთაშორისო მედიის წინაშე  კიდევ ერთხელ გამოხატავს სოლიდარობას  ექიმ ვაჟა გაფრინდაშვილის მიმართ და საოკუპაციო რეჟიმის მიერ უკანონოდ დატყვევებული ექიმისა და ჰუმანისტის ვაჟა გავრინდაშვილის გათავისუფლებისათვის სპეციალურ  მიმართვას გაუგზავნის გაეროს გენერალურ მდივანს.

კიევში გამართულ პრესკონფერენციაზე გამარჯვებული საქართველოს ერთ-ერთი ლიდერი ისაუბრებს,   საქართველოში მიმდინარე პოლიტიკურ პროცესებზე.

]]>
versiaprinti@yahoo.com (super admin) პოლიტიკა Mon, 16 Dec 2019 10:53:03 +0400
დიმიტრი ხუნდაძე: „როგორც მაჟორიტარს, მთელ საქართველოში, ღობე-ღობე სიარული არ მევალება!“ http://www.versia.ge/2013-07-31-11-22-32/item/6489-დიმიტრი-ხუნდაძე-„როგორც-მაჟორიტარს,-მთელ-საქართველოში,-ღობე-ღობე-სიარული-არ-მევალება-“.html http://www.versia.ge/2013-07-31-11-22-32/item/6489-დიმიტრი-ხუნდაძე-„როგორც-მაჟორიტარს,-მთელ-საქართველოში,-ღობე-ღობე-სიარული-არ-მევალება-“.html

რატომ აუმხედრდა უმრავლესობას და გრძნობს თუ არა თავს დამნაშავედ ივანიშვილის წინაშე, გაპოლიტიკოსებული ექიმი

მცხეთის მაჟორიტარი დეპუტატი დიმიტრი ხუნდაძე, სხვა „ამბოხებულ“ მაჟორიტარებთან ერთად, ბიძინა ივანიშვილსა და „ქართული ოცნების“ უმრავლესობას დაუპირისპირდა ანუ პროპორციულ სისტემაზე გადასვლის შესახებ კანონპროექტი ჩააგდო. ესეც არ იკმარა და საარჩევნო სისტემის სრულად მაჟორიტარულ წესზე გადასვლა მოინდომა, თუმცა ამ საკითხზე, ივანიშვილსა და უმრავლესობასთან თანხმობას ვერ მიაღწია და ამიტომ გადაწყვიტა, ხალხში გავიდეს, 200 000 ხელმოწერა შეაგროვოს და საკუთარი კანონპროექტი მაჟორიტარული წესის შესახებ, პარლამენტში განსახილველად გაიტანოს. დიმიტრი ხუნდაძისა და სხვა მაჟორიტარების მიერ, პროპორციულ სისტემაზე უარის თქმის გამო, მმართველ ძალაში რყევები დაიწყო, პოლიტიკურმა პროცესებმა ქუჩაში გადაინაცვლა და ქვეყანაში კრიზისი შეიქმნა. როგორ ხსნის საკუთარ გადაწყვეტილებას ხუნდაძე? _ „ვერსია“ ამბოხებული დეპუტატის ინტერვიუს გთავაზობთ. სხვათა შორის, დიმიტრი ხუნდაძე ის დეპუტატია, რომელმაც 2024 წლისთვის, სრულად პროპორციულ სისტემაზე გადასვლას მხარი დაუჭირა და ალბათ, ფიქრობდა, რომ მასთან საუბარს დავიწყებდი კითხვით, თუ ადრე მოგწონდათ, ახლა რატომ ეწინააღმდეგებით პროპორციულ სისტემას-მეთქი. ჰოდა, სანამ კითხვას დავსვამდი, 2016 წლიდან, მის მიერ, მედიაში გაკეთებული განცხადებები და კომენტარები შემაგება ანუ იმის დასამტკიცებლად, რომ პროპორციულ სისტემაზე გადასვლას ყოველთვის ეწინააღმდეგებოდა, მტკიცებულებები წარმომიდგინა:

_ საარჩევნო სისტემასთან დაკავშირებით, გუნდში ყოველთვის ვამბობდი, ქვეყანა პროპორციულ სისტემაზე უნდა გადავიდეს, მაგრამ ამისთვის საჭიროა შესაბამისი სამზადისი და ნაადრევად გადასვლა ხიფათს შეიცავს-მეთქი. 2016 წლის დეკემბერში ვაცხადებდი, მაჟორიტარული სისტემის გაუქმებას, სავარაუდოდ, მხარს დავუჭერ, მაგრამ სანამ მაჟორიტარული სისტემა გაუქმდება, თვითმმართველობა უნდა გაძლიერდეს-მეთქი. პრესა 2017 წელსაც წერდა, რომ მაჟორიტარული სისტემის გაუქმებას არასწორად მივიჩნევდი. კიდევ არაერთი მსგავსი მაგალითის მოყვანა შემიძლია... 

როცა გუნდმა 2024 წლისთვის, საარჩევნო სისტემის პროპორციულ წესზე გადასვლა გადაწყვიტა, რადგანაც ამდენი წინააღმდეგობრივი განცხადება მქონდა გაკეთებული, ჩემთან კონსულტაციები გაიმართა. ჩემი პირობა იყო, ამ სისტემაზე მაშინ უნდა გადავიდეთ, როცა თვითმმართველობები იქნება ძლიერი, რადგან ამ ვითარებაში მაჟორიტარის რგოლი აუცილებელია მთავრობასა და საკანონმდებლო ორგანოსთან ურთიერთობისთვის-მეთქი. მიპასუხეს, 2024 წლამდე ამას მოვახერხებთ, იქამდე 4-5 წელია, მოვაძლიერებთ თვითმმართველობებსო და დამითანხმეს. ამ კომპრომისზე წავედი და ჩემი ღილაკი იყო მწვანე. მოკლედ, დავუჭირე მხარი, რომ 2024 წელს გადავსულიყავით პროპორციულ სისტემაზე. შემდეგ, დადგა დღის წესრიგში, რომ ეს ვადა 2020 წლისთვის უნდა გადმოწეულიყო. ალბათ, გახსოვთ, 20-21 ივნისის ღამე... 

_ დიახ, ბიძინა ივანიშვილის დაპირებაც მახსოვს პროპორციულ სისტემასა და ბუნებრივ ბარიერთან დაკავშირებით. 

_ კი, ყველაფერი ეს ერთად იყო. შემდეგ, ისევ გაიმართა ჩემთან კონსულტაციები, მიგვეღო ეს გადაწყვეტილება, სადაც დავსვი კითხვა _ სად იყო მათი დაპირება თვითმმართველობის მოძლიერებასთან დაკავშირებით, რისთვისაც დრო აღარ რჩებოდა? 

_ ბატონო დიმიტრი, თვითმმართველობის მოძლიერებაში რას გულისხმობთ? 

_ გარდა იმისა, რომ მოსახლეობის კონტაქტი წყდება, ზოგს ჰგონია, მაჟორიტარები საქმეს არ აკეთებენ და ამაზე, მოდით, ცალკე ვისაუბროთ. საკუთარ მაგალითზე მოგიყვებით, შესაძლოა, ვინმე მართლა არ ასრულებს დაკისრებულ როლს და ზოგან არასწორად ხდება მაჟორიტარის შერჩევა, მაგრამ განათლება, პოლიცია კორუფციული რომ იყო, კი არ გავაუქმეთ, გავაუმჯობესეთ, რადგან გაუქმება საუკეთესო გამოსავალი არაა. თვითმმართველობა, მერი და მთელი ეს ვერტიკალი მაჟორიტარის გარეშე, ამ ვითარებაში, ვერ მოახერხებს ადგილზე მოქალაქეების მომსახურებას და მერისთვის ბევრი ტვირთი იქნება დაუძლეველი. პროპორციული სისტემით, ბიუროებიც კი არ იქნება რეგიონებში ანუ ვის უნდა მიაკითხოს ამომრჩეველმა, არ ეცოდინება და პრაქტიკულად, 150 დეპუტატს ექნება ვალდებულება, ნებისმიერ ამომრჩეველს გაუწიოს დახმარება. 

_ და ამაში ცუდი რა არის? 

_ როგორ გგონიათ, მცხეთის ამომრჩეველს როგორ უნდა მოემსახუროს ბათუმში მცხოვრები დეპუტატი, თუნდაც ის თბილისში, პარლამენტში იყოს? პრაქტიკულად, მოქალაქეებს საკუთარი წარმომადგენელი არ ჰყავთ... 

მოკლედ, მაშინ მითხრეს, ქუჩა დაძაბულია, მოქალაქეების ნაწილი ქუჩაშია და ამას არასამთავრობო სექტორის დიდი ნაწილიც ხელს უწყობსო. ეს დაძაბულობა მოქმედებდა ლარის კურსზე, ინვესტიციებზე, ბიზნესზე, მოქალაქეების სიმშვიდეზე და ა.შ. გამოვთქვი ეჭვი, რომ ამ გადაწყვეტილებით, სიმშვიდეს ვერ მივიღებდით, მაგრამ გუნდის ერთიანობისთვის დავეთანხმე, თუმცა ამ გადაწყვეტილების შემდეგ, სიმშვიდე არ დადგა. აქციები გაგრძელდა, პოლიტიკური პარტიებიდან, უდიდესი დესტრუქციული ნაწილი, ნაციონალური მოძრაობა და მისი განაყარი პარტიები იყვნენ ქუჩაში. ეს ხდებოდა ივნისის შემდეგ, ყოველ 20 რიცხვში აანონსებდნენ აქციას. სახელმწიფო ინსტიტუტებზე დარტყმები გაგრძელდა. დაიწყეს დეპუტატების, მათი ოჯახის წევრების შეურაცხყოფა და შემდეგ, ყველაზე ფუნდამენტურ ინტიტუტზე _ საპატრიარქოზე, პრაქტიკულად, სპეცოპერაცია განახორციელეს. 

_ საპატრიარქოზე სპეცოპერაცია ოპოზიციამ განახორციელა? 

_ ამაში ეჭვი გეპარებათ? ვინ არის პეტრე ცაავა? _ ეს არის ახალაიების კარის მოძღვარი. ალბათ, გახსოვთ მიხეილ სააკაშვილის მყისიერი განცხადება, რომ ის არის გამორჩეული ღირსების ადამიანი. ამას მოჰყვა უგულავას, ბოკერიას განცხადებები, როცა პატრიარქს მიაყენეს შეურაცხყოფა და მასზე გაილაშქრეს. 

_ ისე, იმასაც ამბობენ, პეტრე ცაავა ბიძინა ივანიშვილთან შეთანხმებით მოქმედებდაო. 

_ არ ვიცი, ვინ რას ამბობდა, მე ვსაუბრობ იმაზე, რაც ღიად ჩანდა და საზოგადოება ხედავდა. 

_ მოკლედ, ფიქრობთ, რომ საპატრიარქოს სკანდალიც ამ სცენარის ერთ-ერთი ნაწილი იყო? 

_ რა თქმა უნდა. 

_ ოპოზიციამ საპატრიარქოს იმიტომ „დაარტყა“, რომ ხელისუფლების დასუსტება უნდოდა? 

_ ამით უნდოდათ საზოგადოების დასუსტება, ყველაზე ფუნდამენტური, მყარი ინსტიტუტისა და რწმენის შერყევა. მაშინ დავსვი საკითხი, კი ბატონო, გადავხაზეთ ის, რომ თვითმმართველობა მოძლიერებულიყო. მეორე კომპრომისი სად არის? ე.ი. მათ პროპორციული სისტემა კი არა, რევოლუციური სცენარის განვითარება უნდათ-მეთქი. 

_ რომ დაგეჭირათ მხარი პროპორციული სისტემისთვის, უფრო მეტად შენარჩუნდებოდა სიმშვიდე, თუ ახლა, როცა ამის წინააღმდეგ წახვედით? 

_ იმიტომ ახმაურდნენ, რომ მათი რევოლუციური სცენარი ჩაშლის წინაშე დგას. ბოლო ძალებს იკრებენ და შემოაქვთ აურზაური. 

_ ბატონო დიმიტრი, ვერ ვხვდები, როგორ მოაწყობდა ოპოზიცია რევოლუციას მშვიდ ვითარებაში, თუ პროპორციულს მიიღებდით და აქციები არ იქნებოდა? 

_ აგიხსნით, პროპორციული სისტემა რატომ არის არასტაბილურობის გარანტი. ჩვენთან, ოპოზიციური სპექტრის უდიდესი ნაწილი დესტრუქციულია. ველზე არის პრონაცური და პრორუსული პარტიები. გავიხსენოთ ირაკლი კობახიძის თეორიული ვარიანტი, რომ დავუშვათ, 45% აიღო მმართველმა გუნდმა, მაშინ იძულებული ხდება, კოალიციური მთავრობა ჩამოაყალიბოს და ვისთან უწევს ეს _ პრორუსულ ძალასთან? მაშინ, სადაა „ქართული ოცნების“ მთავარი შეთანხმება საზოგადოებასთან, რომ გვაქვს ევროატლანტიკური მიმართულება. 

_ თქვენც ფიქრობთ, რომ 45%-ზე მეტს ვერ მიიღებთ? 

_ არ მისმენთ! ირაკლი კობახიძემ დაუშვა ეს თეორიული ვარიანტი, პოლიტიკოსი ვარ და ქვეყნის ხვალინდელ დღეზე ვფიქრობ, ვალდებული ვარ, თეორიული ვარიანტი ისე განვიხილო, როგორც პრაქტიკული. 

_ რატომ იქნება ტრაგედია, რომ „ოცნებამ“ 45% აიღოს? იქნებით უმცირესობაში, რა აუცილებელია, უმრავლესობაში იყოთ? 

_ პროპორციულ სისტემაზე მაშინ უნდა გადავიდეთ, როცა პარტიული სტრუქტურები განვითარებულია და მინიმუმ, არაა დესტრუქციული. პრორუსულ პარტიებთან კოალიციას ვერ შევქმნით, მაშინ გამოდის, რომ პრონაცურთან „ვლაგდებით“? ეს ხომ წარმოუდგენელია?! იდეოლოგიურად შეუთავსებელი კოალიციები ვერ ძლებს. მოლდოვაში ასეთი კოალიცია ჩამოიშალა... 

_ რაღა შორს მიდიხართ, „ოცნება“ ასეთი კოალიციით არ მოვიდა ხელისუფლებაში და მერე არ დაიშალა? 

_ დიახ, მაგრამ რომ დაიშალა, ამას არ მოჰყოლია სახელმწიფო ინსტიტუტების ნგრევა და ხელისუფლება არ გამხდარა რყევადი. 

_ ახლა არის ხელისუფლება რყევადი და „ოცნებას“ დაშლა ემუქრება? 

_ მაგალითების მოყვანას არ მაცდით! იტალიაში დაუბრუნდნენ მაჟორიტარულ სისტემას. ისრაელში კი არაერთი ვადამდელი არჩევნები ჩატარდა. გერმანიაში, სადაც პარტიული სტრუქტურები ჩამოყალიბებულია, 3 თვე იყო კრიზისი და გაითვალისწინეთ, ჩვენი ქვეყანა ასეთ გამოცდებს გაუძლებს? 

_ შერეული სისტემით, აბსოლუტურად ყველა მაჟორიტარი დეპუტატი „ოცნების“ კანდიდატი რომ გახდა, ეს დემოკრატიულია? სამართლიანად მიგაჩნიათ, რომ არსებული სისტემით, თქვენი პოლიტიკური ძალა, რომელმაც ხმების 50%-ზე მეტი ვერ მოიპოვა, საკონსტიტუციო უმრავლესობით მოვიდა ხელისუფლებაში? მართალია, ახლა თქვენი გამოისობით დაკარგა, მაგრამ „ოცნება“ ხომ წლების განმავლობაში ფლობდა საკონსტიტუციო უმრავლესობას? 

_ მოდით, შევთანხმდეთ, რომ მაჟორიტარულიც, შერეულიცა და პროპორციულიც _ სამივე დემოკრატიულია. კონკრეტულ ქვეყანაში ის სისტემა უნდა აირჩეს, რომელიც მის პოლიტიკურ ვითარებას ერგება. მაჟორიტარული სისტემა არაა გარანტი, რომ აუცილებლად ხელისუფლებაში მყოფი ძალა მოიგებს არჩევნებს. 2012 წელს, სისტემა არადემოკრატიული იყო, მაგრამ ოპოზიციაში მყოფმა „ქართულმა ოცნებამ“ მოიგო. მაჟორიტარული სისტემა იმის გარანტია, რომ ქვეყანა სტაბილურად იცხოვრებს. 

_ რა პრობლემაა, რომ რომელიმე პოლიტიკურ ძალას უმრავლესობა არ ჰქონდეს? 

_ ვთქვათ, 75 ადამიანი კოალიციურად თანხმდება მთავრობის ჩამოყალიბებაში, 76-ე არის ერთკაციანი პარტიიდან შესული და ითხოვს გავლენიანი მინისტრის პორტფელს ანუ ერთკაციანი პარტია აშანტაჟებს მთელ კოალიციას. მეორეც, პოლიტიკურ სპექტრს გადახედეთ, 12 პარტიას 1%-იანი რეიტინგი აქვს და ამასთან, ვხედავთ პარტიულ ნეპოტიზმს _ შვილები წამოვიდნენ პარტიებში, ნინო ბურჯანაძის შვილი საკუთარ პარტიაში წინა ხაზზეა, ბერძენიშვილის შვილი, ნათელაშვილის შვილი... რა, ეს ოჯახური პარტიებია? საკუთარ სარგებელზე ფიქრობენ... შვილსა და ცოლსაც თუ სურს პოლიტიკაში ყოფნა, დაიმსახუროს პირდაპირი მხარდაჭერა. 

_ სხვათა შორის, თქვენც გდებდნენ ბრალს ნეპოტიზმში 2016 წელს, როცა მცხეთის საკრებულოში დაგიპირისპირდნენ. 

_ დიახ, საკრებულოს ერთ-ერთი წევრი ბიძად მეკუთვნოდა, მაგრამ ის ღიად, არჩევით შევიდა. მისი „სივი“ რომ ნახოთ.. 

_ შეიძლება, ნათელაშვილის შვილსაც ძალიან კარგი „სივი“ აქვს... 

_ გავიგე, მაგრამ მე არ დამინიშნია, აირჩიეს. 

_ კეთილი... ბატონო დიმიტრი, ახალი წელი მოდის, პროდუქტებზე ფასები საგრძნობლად გაზრდილია, მძიმე სოციალური მდგომარეობაა, პირადად თქვენ და სხვა მაჟორიტარები ხალხის კეთილდღეობისთვის რას აკეთებთ? 

_ ამას იმიტომ მეკითხებით, რომ ძირითადი თემა გადაფაროთ. ვსაუბრობ ქვეყნის სტაბილურობაზე, ნებისმიერ მიმართულებას, იქნება ეს სოციალური, ჯანდაცვა, საგარეო პოლიტიკა, განათლება _ ყველას, პირველ რიგში, სჭირდება სტაბილურობა. 

_ გკითხეთ, აქამდე რა გააკეთეთ მაჟორიტარებმა ხალხისთვის, როცა ეს საარჩევნო წესი ქვეყნის სტაბილურობას საფრთხეს არ უქმნიდა? 

_ ჰაერზე საუბარი არ მიყვარს. მცხეთაში ჩამოდით!!! ოღონდ, სამი დღე დაგჭირდებათ, რომ გაჩვენოთ, მსხვილ პროექტებზე ვისაუბრებ და გაჩვენებთ, რაც გაკეთდა! ასე, რაც უნდა მოგიყვეთ, ბოლოს იტყვით, რომ ასე არაა. ჯერ ერთი თემა ამოვწუროთ, ნუ ავურევთ ერთმანეთში. ჩაგიყვანთ, სექტორი აირჩიეთ და გამოგყვებით, ოღონდ ყველაფერი ასახეთ, გაგიკვირდებათ, იმდენი რამაა გაკეთებული. 

_ კარგი, ვთქვათ, სიტყვაზე გენდეთ. სხვა მაჟორიტარებზეც იმავეს იტყვით? 

_ არიან აქტიური, საშუალოდ აქტიური მაჟორიტარები და ისეთებიც, რომელთა მუშაობას დადებითად არ შეაფასებ. მაჟორიტარებს არ აქვთ ჯადოსნური ჯოხი, რომ ყველა სურვილი აასრულონ. იმის განცდა არ მაქვს, რომ ჩემს რეგიონში ყველაფერი მოგვარებულია, პრობლემა ბევრია, მაგრამ ნამუშევარსაც დანახვა სჭირდება. ზოგს ცხვირწინ რომ დაუდო შედეგი, არ უნდა დანახვა. 

_ ჯანდაცვის კომიტეტს წარმოადგენთ. საყოველთაო დაზღვევაში ცვლილებები შევიდა, რის გამოც კლინიკები დახურვის პირასაა და ხალხის ჯანმრთელობას საფრთხე ემუქრება. საკანონმდებლო ორგანოში, ამ საკითხის დასარეგულირებლად, რას აკეთებთ? 

_ პრობლემები არსებობს. კლინიკების უკმაყოფილება უსაფუძვლო არაა. ერთიანი განფასების სიტემა აუცილებელია, მაგრამ დარგობრივი სპეციალისტების გარეშე შეუძლებელია, რადგან მედიცინა არაა დარგი, რომელსაც მხოლოდ ფინანსური კუთხით შეიძლება შეხედო. პრობლემაში მინისტრი, პრემიერ-მინისტრი ჩაერთვნენ. ამას საკანონმდებლო ცვლილება არ სჭირდება, თუმცა კომიტეტი ამ საკითხს კონტროლს უწევს. 

_ არადა, შორიდან ისე ჩანს, თითქოს პარლამენტი ასეთ თემებზე სამუშაოდ ვერ იცლის... საინტერესოა, მოვლენათა როგორ განვითარებას ხედავთ? 

_ როცა „დავამუხრუჭეთ“ ის კანონპროექტი, რომელიც 2020 წლისთვის პროპორციულ სისტემაზე გადასვლას გულისხმობდა, განვაცხადე, რომ ეს ნაბიჯი აუცილებელი იყო ქვეყნის სტაბილური ცხოვრებისთვის, ამ გადაწყვეტილებას მოჰყვებოდა რყევები გუნდში და ასეც მოხდა, მაგრამ მაშინ იმასაც ვაცხადებდი, რომ თუ შეცდომას დავუშვებთ და ნაჩქარევ გადაწყვეტილებას მივიღებთ, ქვეყანას უფრო დიდ კრიზისში შევიყვანთ და ნეგატიური შედეგიც გაასმაგდება.

2024 წლისთვის რომ გადავდივართ პროპორციულ სისტემაზე, ეს შეცდომაა. არსებობს მაღალი რისკის ჩანაწერები კონსტიტუციაში, რომელიც ახალისებს დესტრუქციულ ოპოზიციას, იყოს ქუჩაში და მუდმივად, რევოლუციური სცენარისთვის ემზადებოდეს. ამ რისკებზე მქონდა საუბარი უმრავლესობაში. ახლა ღიად არ ვიტყვი, რომელ ჩანაწერებს ვგულისხმობ, რადგან ჯერ უმრავლესობიდან პასუხს ველოდები. 

_ რატომ არ ითვალისწინებთ მათ აზრს, ვინც პროპორციულ სისტემაზე გადასვლას ითხოვს? 

_ ქუჩაში დგას ნაციონალური მოძრაობა, რომელიც დესტრუქციული ძალაა. მის დამოკიდებულებასა და სიტყვათა წყობას ხედავთ _ „სულს ამოგხდით“, „დაგიმახსოვრებთ“. 

_ „დაგამთავრებთო“, _ ნაცებს ირაკლი კობახიძეც ხომ ეუბნება? 

_ კი, როგორც დესტრუქციულ ძალას დაგამთავრებთო, ნამდვილად ეუბნება. მათი ლიდერი, ვაშაძე, პოლიციელს თავში ურტყამს, ჩაფხუტს თავზე ამხობს და მას სურს, იყოს ლიდერი. მათ ვერ გაიგეს, რატომ უთხრა ხალხმა უარი 2012 წელს და ისევ იმ განწყობაზე არიან. 

_ ბიძინა ივანიშვილი და „ოცნების“ უმრავლესობაც პროპორციული სისტემის მომხრეა და ისინიც დესტრუქციულ ძალად მიგაჩნიათ? 

_ არა, ისინი ამ შეცდომას ვერ ხედავენ და მხოლოდ ერთი პასუხი აქვთ, სამწუხაროდ, რომ „დაპირდნენ“. თუ ხიფათს ვხედავთ, რადგან დავპირდით, არ უნდა გავრისკოთ. მირჩევნია, რეპუტაციული ტვირთი ვატარო, ვიდრე რეალური ხიფათის წინაშე დავაყენო ქვეყანა და თუ ეს დაპირება ვერ შევასრულე, არჩევნებზე გაითვალისწინებს ამას ამომრჩეველი. 

_ ბატონო დიმიტრი, ივანიშვილი თქვენს პოზიციაში რატომ ვერ დაარწმუნეთ? 

_ ბატონი ბიძინა... როცა კანონპროექტი დავამუხრუჭე, დავსვი კითხვები რისკებსა და ხიფათებზე, მაგრამ ოპოზიციისგან მესმოდა _ დაგვპირდით და უმრავლესობიდან _ დავპირდით. იმ რისკებზე პასუხი არ იყო, რაზეც ვსაუბობ. ამიტომ გავალ მოსახლეობაში. დავიცავი გუნდური წესები, პროცედურებიც და ხალხში რომ გავალ, ამაში დანაშაული არაფერია. 

_ ვფიქრობ, მაჟორიტარი დეპუტატი ყოველთვის ხალხში უნდა იყოს, ახლა კი არ უნდა გადიოდეთ... 

_ არა, ჩემს სამაჟორიტარო ოლქში კი არ გავდივარ. როგორც მაჟორიტარს, მთელ საქართველოში, ღობე-ღობე სიარული არ მევალება, ჩემო კარგო. ეს სხვა გასვლაა, თორემ ბიუროებში ყველა დეპუტატი გადის და მეც ვხვდები მოსახლეობას. შეგიძლიათ, ჩემს რეგიონში, ჩემი ცნობადობაც გაზომოთ. ეს სხვა გასვლაა, ვაპირებ 200 000 ხელმოწერის შეგროვებას, რომ ეს კანონპრიექტი გავიტანო განსახილველად და მოსახლეობის განწყობა _ ჰყავდეს საკუთარი წამრომადგენელი პარლამენტში, გავხადო უფრო ჟღერადი. 

_ რატომ გგონიათ, რომ ხალხს, როცა ამდენი სოციალური პრობლემა აქვს, მაჟორიტარული და პროპორციული სისტემა აინტერესებს? 

_ და თქვენ რატომ გგონიათ, რომ ხალხი პროპორციულ სისტემაზე გადასვლას ითხოვს? გარკვეულ ნაწილში მოგყვებით, რომ ლარის კურსი უფრო აინტერესებთ და ის, რომ ჯანდაცვისა, თუ განათლების სექტორი იყოს უფრო გამართული, მაგრამ საზოგადოებას უნდა ავუხსნათ, რომ ქვეყნის სტაბილური განვითარება აუცილებელია და ეს სისტემა გარკვეულ რისკებს შეიცავს. ყველაფერი ეს, ერთმანეთზეა დამოკიდებული. 

_ 2012 წელს, ივანიშვილმა შემოგიკრიბათ და მოხვედით ხელისუფლებაში, ახლა მას რომ დაუპირისპირდით, სამართლიანია? 

_ რომელი წესი დავარღვიე? კანონმდებელი ვარ და საკანონმდებლო მუშაობის ვალდებულება მაქვს. ყველა პროცედურა დავიცავი, მათ შორის, გუნდურიც. 

_ იმასაც ამბობენ, ხუნდაძე ივანიშვილის დავალებით მოქმედებსო. 

_ შიგნით, გუნდშიც აქვთ ეს ეჭვი და ამისთვის გაგაცანით ეს მტკიცებულებები, ჩემი განცხადებები 2016, 2017, 2018 წლებში. როცა მიმაჩნია, რომ გადაწყვეტილება არაა მისაღები, მწვანე ღილაკს არ ვაჭერ ხელს. ნარკოტიკების დეკრიმინალიზაციის შესახებ კანონპროექტი ჩავაგდე და დღემდე დამუხრუჭებულია. ასე რომ, ჩემთვის ზემაღალი პასუხისმგებლობაა ქვეყანა და სახელმწიფო და ამას ვთხოვ ჩემი გუნდის წევრებსაც.

თათია გოჩაძე

]]>
versiaprinti@yahoo.com (super admin) პოლიტიკა Wed, 11 Dec 2019 12:40:56 +0400
ბეჟუაშვილის „ქოცური“ რეინკარნაცია _ „ჯი პი აი ჰოლდინგის“ საავადმყოფოები სააკაშვილის კლანის ბიზნესმენმა იყიდა http://www.versia.ge/2013-07-31-11-22-32/item/6487-ბეჟუაშვილის-„ქოცური“-რეინკარნაცია-_-„ჯი-პი-აი-ჰოლდინგის“-საავადმყოფოები-სააკაშვილის-კლანის-ბიზნესმენმა-იყიდა.html http://www.versia.ge/2013-07-31-11-22-32/item/6487-ბეჟუაშვილის-„ქოცური“-რეინკარნაცია-_-„ჯი-პი-აი-ჰოლდინგის“-საავადმყოფოები-სააკაშვილის-კლანის-ბიზნესმენმა-იყიდა.html

რა ფარული მოლაპარაკება მიმდინარეობს მთავრობასა და მსხვილ კლინიკებს შორის

ამიერიდან, სადაზღვევო კომპანია ,,ჯი პი აი ჰოლდინგი'', მხოლოდ სადაზღვევო ბიზნესსაქმიანობას განაგრძობს, რადგან კომპანიის ჰოსპიტალური აქტივები ყოფილმა დეპუტატმა, მიხეილ სააკაშვილის კლანის ბიზნესმენად მიჩნეულმა, დავით ბეჟუაშვილმა შეიძინა. კერძოდ, ,,ჯი პი აი ჰოლდინგის'' შვილობილი კომპანიის _ ,,ჯეო ჰოსპიტალსის'' კლინიკების ქსელი, ბეჟუაშვილის კუთვნილი შპს ,,ქართულ ჰოსპიტალთა ჯგუფის'' ხელში გადავიდა. „ჯი პი აი ჰოლდინგსა“ და „ქართულ ჰოსპიტალთა ჯგუფს“ შორის გარიგება, 2019 წლის 22 ნოემბერს შედგა.

ტრანზაქციის დეტალების გასარკვევად, ,,ვერსია'' სადაზღვევო კომპანია ,,ჯი პი აი ჰოლდინგის'' საზოგადოებასთან ურთიერთობის დეპარტამენტის უფროსს, თინა სტამბოლიშვილს დაუკავშირდა. მისი თქმით, კომპანიამ ამგვარი ნაბიჯი ,,ვენის სადაზღვევო ჯგუფთან'' (,,ჯი პი აი ჰოლდინგი'' ამ ჯგუფის წევრია) შეთანხმების შედეგად გადადგა და ეს იმიტომ, რომ ავსტრიელი და სხვა ევროპელი აქციონერები, წლების განმავლობაში მოუწოდებდნენ ქართულ მენეჯმენტს, რომ ბიზნესი მხოლოდ სადაზღვევო საქმიანობისა და მასთან დაკავშირებული მიმართულებებით გაეგრძელებინა. 

„ამ გადაწყვეტილების მთავარი მიზეზი ისაა, რომ ჩვენს ძირითად ბიზნესზე _ სადაზღვევო საქმიანობაზე ვკონცენტრირდეთ და მხოლოდ ის მიმართულებები განვავითაროთ, რაც უშუალოდ, ამ ბიზნესს უკავშირდება. მოხარულები ვართ, რომ ეს გარიგება შედგა, რადგან ახალი მფლობელის შერჩევის პროცესი დიდხანს გაგრძელდა. ჩვენთვის მნიშვნელოვანი იყო, რომ ახალი ინვესტორი ძლიერი პარტნიორი ყოფილიყო. საქართველოში სადაზღვევო სექტორის განვითარების მნიშვნელოვან ფაქტორად, ,,ვენის სადაზღვევო ჯგუფს'', ამ ბიზნესის სხვა სფეროებისგან გამოყოფა და მთავარ საქმიანობაზე ორიენტირება მიაჩნია. ქართული სადაზღვევო ბაზრის ზრდის დიდ პოტენციალს კი ინვესტორები, მოახლოებული საკანონმდებლო ცვლილებებისა და რეფორმის გაგრძელებაში ხედავენ'', _ აღნიშნულია პრეს-რელიზში, რომელიც კომპანიამ გაავრცელა. 

„ჯეო ჰოსპიტალსი“ 2011 წელს დაფუძნდა, რომელიც საქართველოს ხუთ რეგიონში, 17 კლინიკას აერთიანებს. ეს კლინიკები 2010-2011 წლებში აშენდა და განთავსებულია, როგორც ქვემო ქართლში, ასევე, იმერეთში, მცხეთა-მთიანეთში, სამცხე-ჯავახეთსა და კახეთში. კომპანიაში აცხადებენ, რომ წლების მანძილზე, მათი მთავარი ღირებულება მაღალი ხარისხის სამედიცინო მომსახურების ხელმისაწვდომობა იყო რეგიონების მოსახლეობისთვის. 

,,ვერსის'' კითხვაზე, უკავშირდება თუ არა ,,ჯი პი აი ჰოლდინგის'' გადაწყვეტილება ჰოსპიტალური აქტივების გასხვისების შესახებ, საქართველოს პრემიერ-მინისტრის #520 დადგენილებას, რასაც 25 კლინიკის წარმომადგენლები აპროტესტებენ, თინა სტამბოლიშვილმა გვიპასუხა: 

,,ჰოსპიტალური აქტივების გაყიდვასთან დაკავშირებული მოლაპარკებები, დიდი ხანია, მიმდინარეობს. ამიტომ, ასე პირდაპირ, პრემიერ-მინისტრის დადგენილებას არ უკავშირდება, რადგან ,,ჯეო ჰოსპიტალსის'' გაყიდვის გადაწყვეტილება დიდი ხნით ადრე მივიღეთ, თუმცა კიდევ ერთხელ დავრწმუნდით, რომ გარემო არაპროგნოზირებადია''. 

მისივე თქმით, ,,ვენის სადაზღვევო ჯგუფის'' მთავარი ინტერესია, რომ ,,ჯი პი აი ჰოლდინგის'' ბიზნესსაქმიანობა საქართველოში, მხოლოდ მთავარი მიმართულების _ დაზღვევისა და სადაზღვევო პროდუქტების განვითარებით შემოიფარგლოს. 

„ჯი პი აი ჰოლდინგი“ წამყვანი სადაზღვევო კომპანიაა, რომელიც 2018 წლის მონაცემებით, ბაზრის ყველაზე დიდი წილს _ 19%-ს ფლობს და ლიდერია, როგორც კორპორაციული, ასევე საცალო მიმართულებით. ,,ჯი პი აი ჰოლდინგის'' 6 ფილიალსა და 40 რეგიონალურ წარმომადგენლობაში, 830 ადამიანია დასაქმებული და მთელი ქვეყნის მასშტაბით, 250 000 დაზღვეულ მოქალაქეს ემსახურება. თავის მხრივ, „ვენის სადაზღვევო ჯგუფი“, ერთ-ერთი უმსხვილესი ინვესტორია საქართველოს სადაზღვევო ბაზარზე, რომელიც ცენტრალურ და აღმოსავლეთ ევროპაში, ლიდერი კომპანიაა. ჯგუფი ევროპის 25 ქვეყნის 50 კომპანიაში საქმიანობს. 2018 წლის მონაცემებით, ავსტრიულმა ჯგუფმა 9.7 მილიარდი ევროს პრემია მოიზიდა, ხოლო წმინდა მოგება _ 485 მილიონი ევრო იყო. 

კიდევ ერთი, მნიშვნელოვანი დეტალი, რაც ,,ჯეო ჰოსპიტალსს'' უკავშირდება, სტატისტიკის ეროვნული სამსახურის _ ,,საქსტატის'' მონაცემებია. კერძოდ, 2016 წელს, შპს „ჯეო ჰოსპიტალსი“, ყველაზე მსხვილი დამსაქმებელი კომპანიების ოცეულში დასახელდა. 

აქვე, ისიც უნდა გავიხსენოთ, რომ ამ ქსელის რამდენიმე ჰოსპიტალი კლინიკების იმ სიაში მოხვდა, რომლებიც საყოველთაო ჯანდაცვის პროგრამის პირობების დარღვევის გამო, სამინისტრომ 2016, 2017, 2018 წლებში დააჯარიმა. სხვათა შორის, ჯამში 91-მა კლინიკამ და მათ შორის, ,,ჯეო ჰოსპიტალსის'' რამდენიმე კლინიკამაც, სახელმწიფო ბიუჯეტში 13 მილიონი ლარი უნდა დააბრუნოს! 

რაც შეეხება ,,ქართულ ჰოსპიტალთა ჯგუფს'', საჯარო რეესტრის ეროვნული სააგენტოს მონაცემებზე დაყრდნობით ირკვევა, რომ ეს შპს 2019 წლის 1 მარტს, დავით ბეჟუაშვილმა დააფუძნა და 100%-იან წილსაც, თავადვე ფლობს. ოფიციალურ მონაცემებზე დაყრდნობით, მილიარდერი ბეჟუაშვილის კომპანია ,,საქართველოს ინდუსტრიული ჯგუფი'' დაინტერესებულია, როგორც ენერგეტიკით, ასევე ბუნებრივი რესურსების მოპოვება-დამუშავებით, საშენ მასალათა წარმოებით, ლოგისტიკური მომსახურებით, დეველოპმენტით, მედიაბიზნესით, საავტომობილო და ნავთობის ბიზნესითაც კი, ვინაიდან ამ ჯგუფში შედის, როგორც „საქართველოს საერთაშორისო ენერგეტიკული კორპორაცია“, ასევე „საქნახშირი“, „მტკვარი ენერჯი“ და „ნეოგაზი“. 

გარდა ამისა, ,,ვერსიის'' ინფორმაციით, ბეჟუაშვილის ინტერესი იკვეთება იმ კომპანიაშიც, რომელიც თბილისის მოსახლეობას გაზით ამარაგებს. კერძოდ, ყოფილი ,,ყაზტრანსგაზთბილისის'' ახალი მფლობელი ,,თბილისი ენერჯი'', ირიბად, დავით ბეჟუაშვილის სახელს უკავშირდება. მოკლედ, აგვისტოში, ,,ყაზტრანსგაზთბილისის'' 100%-იანი წილი ოფშორში, კერძოდ, მარშალის კუნძულებზე რეგისტრირებულმა შპს ,,ვოლთბეიმ'' შეიძინა, ხოლო ,,თბილისი ენერჯის'' გენერალური დირექტორად მამუკა კობახიძე დაინიშნა, რომელიც მანამდე, თბილისის სატრანსპორტო კომპანიას ხელმძღვანელობდა. 

საჯარო რეესტრის ოფიციალურ დოკუმენტებზე დაყრდნობით, ,,ვერსიამ'' გაარკვია, რომ შპს ,,ვოლთბეი'' ბიზნესმენებს _ ხვიჩა მაქაცარიასა და დავითYბეჟუაშვილს ეკუთვნის. 2018 წლის 9 აგვისტოს, საჯარო რეესტრში ოფიციალურად დარეგისტრირდა შპს ,,ვოლტბეი'', რომლის დირექტორი საბერძნეთის მოქალაქე, მიხეილ მავრომატისია. ის ამავე კომპანიაში 50%-იან წილს ფლობს, ხოლო მეორე 50% _ ხვიჩა მაქაცარიას ეკუთვნის. საჯარო რეესტრის 2018 წლის 25 დეკემბრის მონაცემებით კი, შპს ,,ვოლტბეის'' უკვე ორი გენერალური დირექტორი ჰყავს _ დავით ბეჟუაშვილი და ხვიჩა მაქაცარია. კომპანიის 50%-იანი წილი კი ისევ მიხეილ მავრომატისს, ხოლო მეორე 50% _ ხვიჩა მაქაცარიას ეკუთვნის. 

2008 და 2012 წლებში, ,,ერთიანი ნაციონალური მოძრაობის'' სიით, დავით ბეჟუაშვილი საქართველოს პარლამენტის წევრი, თეთრიწყაროს მაჟორიტარი დეპუტატი იყო. მანამდე, 1999 წელს _ მეხუთე მოწვევისა და 2004 წელს _ მეექვსე მოწვევის პარლამენტში, ბეჟუაშვილი ,,საქართველოს მოქალაქეთა კავშირის'' საარჩევნო სიით მოხვდა. 

* * * 

,,ვერსიაში'' უკვე ვწერდით, რომ 25 კლინიკის წარმომადგენლებმა, საქართველოს პრემიერ-მინისტრის #520 დადგენილების შეჩერება მოითხოვეს, რომლითაც ჯანმრთელობის დაცვის საყოველთაო დაზღვევის ფარგლებში, სხვადასხვა ოპერაციების ტარიფები განისაზღვრა. საპარლამენტო ფრაქცია ,,დამოუკიდებელი დეპუტატების'' თავმჯდომარის მოადგილემ, ლევან კობერიძემ დეტალურად ახსნა ის მოსალოდნელი უარყოფითი შედეგი, რაც ჯანდაცვის რეფორმის ფარგლებში მიღებულ ამ დადგენილებას მოჰყვება. 

ეს სტატია ,,ვერსიაში'' უკვე გამოქვეყნდა და ცხადია, მის განხილვას აღარ შევუდგები, თუმცა მას შემდეგ, რაც ბეჟუაშვილმა ,,ჯი პი აი ჰოლდინგის'' ჰოსპიტალური აქტივები შეიძინა, ლევან კობერიძის ინტერვიუდან ერთი პასაჟი გამახსენდა: დეპუტატმა ,,ვერსიას'' განუცხადა, რომ პრემიერ-მინისტრის #520 დადგენილება, სავარაუდოდ, ხელს შეუწყობს მსხვილი და ქსელური კლინიკების განვითარებას. 22 ნოემბერს კი ვიგებთ, რომ ,,ჯეო ჰოსპიტალსის'' აქციები, შპს ,,ქართულ ჰოსპიტალთა ჯგუფმა'' შეიძინა. რა თქმა უნდა, 520-ე დადგენილებასა და ,,ჯი პი აი ჰოლდინგის'' გადაწყვეტილებას შორის პირდაპირი კორელაცია არ არსებობს, რადგან კლინიკების ქსელის გაყიდვა საკმაოდ ხანგრძლივი პროცესია, რაც ,,ვერსიასთან'' საუბრისას, სადაზღვევო კომპანიის საზოგადოებასთან ურთიერთობის დეპარტამენტის უფროსმა ხაზგასმით აღნიშნა კიდეც. 

მოკლედ, შევთანხმდეთ, რომ 520-ე დადგენილებასა და სამედიცინო სფეროში ამ უმსხვილეს ტრანზაქციას შორის პირდაპირი კავშირი არ არსებობს, მაგრამ თუ ლევან კობერიძის ვარაუდს განვავრცობთ, გამოდის, სწორედ 520-ე დადგენილების გათვალისწინებით, შპს ,,ქართულ ჰოსპიტალთა ჯგუფი'' ბაზრის სხვა მოთამაშეებს (საშუალო და მცირე კლინიკებს) აშკარად შთანთქავს. ,,ვერსია'' კიდევ ერთხელ დაუკავშირდა ლევან კობერიძეს და ამ ერთადერთი კითხვით მიმართა: 

,,არავითარი საფუძველი არ მაქვს, რომ ასე პირდაპირ, ეს ფაქტი, პრემიერ-მინისტრის 520-ე დადგენილებას დავუკავშირო. თუმცა არ გამოვრიცხავ, რომ თუ ის 25 კლინიკა, რომელიც ამ დადგენილებას აპროტესტებს, ჯანდაცვის საყოველთაო დაზღვევის პროგრამას გამოეთიშება, სავარაუდოდ, არსებობს არაფორმალური მოლაპარაკება სხვა კლინიკებთან. ,,სხვა კლინიკებში'' კი მსხვილ კლინიკებს ვგულისხმობ, იქნება ეს ქსელური, თუ არაქსელური, რათა მთავრობის მიერ დადგენილ ამ ფასებში, გარკვეული პირობებით, საყოველთაო ჯანდაცვის პროგრამას მოემსახურონ. მაშინ, როდესაც ხარისხიანი კლინიკების უმრავლესობა ასე აპროტესტებს პრემიერ-მინისტრის დადგენილებას, ხოლო მთავრობა და ჯანდაცვის მინისტრი ჯიუტად იცავენ საკუთარ პოზიციას, საფუძვლიანი ეჭვი მიჩნდება, რომ შესაძლოა, დიდ კლინიკებთან არაფორმალური მოლაპარაკებები მიმდინარეობდა კიდეც''.

მაია მიშელაძე

]]>
versiaprinti@yahoo.com (super admin) პოლიტიკა Wed, 11 Dec 2019 12:40:50 +0400